مہکتے پھول ستارے دمکتا چاند دھنک

ترے جمال سے کتنوں نے استفادہ کیا

یہ بھی اعجاز مجھے عشق نے بخشا تھا کبھی

اس کی آواز سے میں دیپ جلا سکتا تھا

تو جو یہ جان ہتھیلی پہ لیے پھرتا ہے

تیرا کردار کہانی سے نکل سکتا ہے

ہوا کے ہاتھ پہ چھالے ہیں آج تک موجود

مرے چراغ کی لو میں کمال ایسا تھا

میں تھا صدیوں کے سفر میں احمدؔ

اور صدیوں کا سفر تھا مجھ میں

عین ممکن ہے کہ بینائی مجھے دھوکہ دے

یہ جو شبنم ہے شرارہ بھی تو ہو سکتا ہے

یہ بھی تری شکست نہیں ہے تو اور کیا

جیسا تو چاہتا تھا میں ویسا نہیں بنا

تمہاری جیت میں پنہاں ہے میری جیت کہیں

تمہارے سامنے ہر بار ہارتا ہوا میں

سکوت توڑنے کا اہتمام کرنا چاہیئے

کبھی کبھار خود سے بھی کلام کرنا چاہیئے

کسی درویش کے حجرے سے ابھی آیا ہوں

سو ترے حکم کی تعمیل نہیں کرنی مجھے

کوئی حیرت ہے نہ اس بات کا رونا ہے ہمیں

خاک سے اٹھے ہیں سو خاک ہی ہونا ہے ہمیں

وہ زہر ہے فضاؤں میں کہ آدمی کی بات کیا

ہوا کا سانس لینا بھی محال کر دیا گیا

میرے کشکول میں ڈال اور ذرا عجز کہ میں

اتنی خیرات سے آگے نہیں جانے والا

وہ سر اٹھائے یہاں سے پلٹ گیا احمدؔ

میں سر جھکائے کھڑا ہوں سوال ایسا تھا

وہ دے رہا تھا طلب سے سوا سبھی کو خیالؔ

سو میں نے دامن دل اور کچھ کشادہ کیا

دشت میں وادئ شاداب کو چھو کر آیا

میں کھلی آنکھ حسیں خواب کو چھو کر آیا

کوئی تو دشت سمندر میں ڈھل گیا آخر

کسی کے ہجر میں رو رو کے بھر گیا تھا میں

دل کسی بزم میں جاتے ہی مچلتا ہے خیالؔ

سو طبیعت کہیں بے زار نہیں بھی ہوتی

بس چند لمحے پیشتر وہ پاؤں دھو کے پلٹا ہے

اور نور کا سیلاب سا اس آب جو میں آ گیا

دشت و جنوں کا سلسلہ میرے لہو میں آ گیا

یہ کس جگہ پہ میں تمہاری جستجو میں آ گیا