december kī sardī hai us ke hī jaisī

zarā sā jo chhū le badan kāñptā hai

december ki sardi hai us ke hi jaisi

zara sa jo chhu le badan kanpta hai

rāt-bhar ḳhvāb meñ jalnā bhī ik bīmārī hai

ishq kī aag se bachne meñ samajhdārī hai

raat-bhar KHwab mein jalna bhi ek bimari hai

ishq ki aag se bachne mein samajhdari hai

raat bechain sī sardī meñ ThiThurtī hai bahut

din bhī har roz sulagtā hai tirī yādoñ se

raat bechain si sardi mein ThiThurti hai bahut

din bhi har roz sulagta hai teri yaadon se

purānī dekh kar tasvīr terī

nayā har din guzartā jā rahā hai

purani dekh kar taswir teri

naya har din guzarta ja raha hai

terī sūrat terī chāhat yādeñ sab

chhoTe se is dil meñ kyā kyā rakkhūñgā

teri surat teri chahat yaaden sab

chhoTe se is dil mein kya kya rakkhunga

sach kahne kā āḳhir ye anjām huā

saarī bastī meñ maiñ hī badnām huā

sach kahne ka aaKHir ye anjam hua

sari basti mein main hi badnam hua

yuuñ mulāqāt kā ye daur banā.e rakhiye

maut kab saath nibhā jaa.e bharosa kyā hai

yun mulaqat ka ye daur banae rakhiye

maut kab sath nibha jae bharosa kya hai

ka.ī din se sharārat hī nahīñ kī

mire andar kā bachcha lāpata hai

kai din se shararat hi nahin ki

mere andar ka bachcha lapata hai

maiñ kahānī meñ nayā moḌ bhī lā saktā thā

maiñ ne kirdār ko aañsū meñ bhigoyā hī nahīñ

main kahani mein naya moD bhi la sakta tha

main ne kirdar ko aansu mein bhigoya hi nahin

ġhalat-fahmiyāñ 'mīt' rakkho na dil meñ

vahī sach nahīñ jitnā tum ne sunā hai

ghalat-fahmiyan 'mit' rakkho na dil mein

wahi sach nahin jitna tum ne suna hai

maiñ jitnī aur piitā jā rahā huuñ

nasha utnā utartā jā rahā hai

main jitni aur pita ja raha hun

nasha utna utarta ja raha hai

ik taraf pyaar hai rishta hai vafādārī hai

aur in sab meñ hī us ġham kī taraf-dārī hai

ek taraf pyar hai rishta hai wafadari hai

aur in sab mein hi us gham ki taraf-dari hai

rāteñ saarī karvaT meñ hī biit rahīñ

yādeñ bhī kitnī bechainī detī haiñ

raaten sari karwaT mein hi bit rahin

yaaden bhi kitni bechaini deti hain

hijr ke ba.ad ye socho ki kahāñ jāoge

ham to mar jā.eñge vaise bhī hamārā kyā hai

hijr ke baad ye socho ki kahan jaoge

hum to mar jaenge waise bhi hamara kya hai

lagāyā hai dil bhī to patthar se maiñ ne

mirī zindagī kī yahī ik ḳhatā hai

lagaya hai dil bhi to patthar se main ne

meri zindagi ki yahi ek KHata hai

soch rahā huuñ maiñ is kā saudā kar duuñ

us kī yādoñ kā jo dil meñ malba hai

soch raha hun main is ka sauda kar dun

us ki yaadon ka jo dil mein malba hai

shor-sharāba rahtā thā jis āñgan meñ

aaj vahāñ se bas ḳhāmoshī niklī hai

shor-sharaba rahta tha jis aangan mein

aaj wahan se bas KHamoshi nikli hai

hijr ke ġham ne mujhe maar diyā thā to kyā

mar ke jiinā bhī to sīkhā hai tirī yādoñ se

hijr ke gham ne mujhe mar diya tha to kya

mar ke jina bhi to sikha hai teri yaadon se

dil TuuTā to 'mīt' samajh meñ ye aayā

ishq vafā sab ek pahelī niklī hai

dil TuTa to 'mit' samajh mein ye aaya

ishq wafa sab ek paheli nikli hai

ḳhvāb meñ us se roz milā kartā thā 'mīt'

lekin sach meñ nahīñ milā so zinda huuñ

KHwab mein us se roz mila karta tha 'mit'

lekin sach mein nahin mila so zinda hun

hamārā hijr bhī ab mas.ala ban

zamāne meñ uchhaltā jā rahā hai

hamara hijr bhi ab masala ban

zamane mein uchhalta ja raha hai

dikhā thā ḳhvāb meñ rotā huā dil

kahūñ kyā ab talak dahshat meñ huuñ maiñ

dikha tha KHwab mein rota hua dil

kahun kya ab talak dahshat mein hun main

zindagī kā ye mirī kaun hai qātil jaane

maiñ huuñ mushkil meñ sazā duuñ to sazā duuñ kis ko

zindagi ka ye meri kaun hai qatil jaane

main hun mushkil mein saza dun to saza dun kis ko

kal mere saa.e meñ us kī shakl dikhī

manzar aise pas-manzar meñ aatā hai

kal mere sae mein us ki shakl dikhi

manzar aise pas-manzar mein aata hai