آخر کو ہنس پڑیں گے کسی ایک بات پر

رونا تمام عمر کا بے کار جائے گا

تو مجھے بنتے بگڑتے ہوئے اب غور سے دیکھ

وقت کل چاک پہ رہنے دے نہ رہنے دے مجھے

تمام عمر اکیلے میں تجھ سے باتیں کیں

تمام عمر ترے روبرو خموش رہے

یہ دور وہ ہے کہ بیٹھے رہو چراغ تلے

سبھی کو بزم میں دیکھو مگر دکھائی نہ دو

دو حرف تسلی کے جس نے بھی کہے اس کو

افسانہ سنا ڈالا تصویر دکھا ڈالی

بس دریچے سے لگے بیٹھے رہے اہل سفر

سبزہ جلتا رہا اور یاد وطن آتی رہی

جو شخص نہ رویا تھا تپتی ہوئی راہوں میں

دیوار کے سائے میں بیٹھا تو بہت رویا

موت کی ایک علامت ہے اگر دیکھا جائے

روح کا چار عناصر پہ سواری کرنا

اس اعتراف سے رس گھل رہا ہے کانوں میں

وہ اعتراف جو اس نے ابھی کیا بھی نہیں

آساں تو نہیں اپنی ہستی سے گزر جانا

اترا جو سمندر میں دریا تو بہت رویا

ہیں مری راہ کا پتھر مری آنکھوں کا حجاب

زخم باہر کے جو اندر نہیں جانے دیتے

ہم کہ اپنی راہ کا پتھر سمجھتے ہیں اسے

ہم سے جانے کس لیے دنیا نہ ٹھکرائی گئی

ہم تیری طبیعت کو خورشیدؔ نہیں سمجھے

پتھر نظر آتا تھا رویا تو بہت رویا

خورشیدؔ اب کہاں ہے کسی کو پتا نہیں

گزرا تو تھا کسی کا پتا پوچھتا ہوا

عکس نے میرے رلایا ہے مجھے

کوئی اپنا نظر آیا ہے مجھے

بہت سے روگ دعا مانگنے سے جاتے ہیں

یہ بات خوگر رسم دوا سے کون کہے

اب سے پہلے وہ مری ذات پہ طاری تو نہ تھا

دل میں رہتا تھا مگر خون میں جاری تو نہ تھا

تمہاری بزم سے تنہا نہیں اٹھا خورشیدؔ

ہجوم درد کا اک قافلہ رکاب میں تھا

مقام جن کا مورخ کے حافظے میں نہیں

شکست و فتح کے مابین مرحلے ہم لوگ

جو تمام عمر رہا سبب کی تلاش میں

وہ تری نگاہ میں بے سبب نہیں آ سکا

مرے اس اولیں اشک محبت پر نظر کر

یہ موتی سیپ میں پھر عمر بھر آتا نہیں ہے

پلٹ کر اشک سوئے چشم تر آتا نہیں ہے

یہ وہ بھٹکا مسافر ہے جو گھر آتا نہیں ہے

نسخۂ مرہم اکسیر بتانے والے

تو مرا زخم تو پہلے مجھے واپس کر دے

یا شکن آلود ہو جائے گی منظر کی جبیں

یا ہماری آنکھ کے شیشے میں بال آ جائے گا

مجھے بھی اپنا دل رفتہ یاد آتا ہے

کبھی کبھی کسی بازار سے گزرتے ہوئے

جسم کی چوکھٹ پہ خم دل کی جبیں کر دی گئی

آسماں کی چیز کیوں صرف زمیں کر دی گئی

بکھر گیا تو مجھے کوئی غم نہیں اس کا

کہ راز مجھ پہ کئی وا ہوئے بکھرتے ہوئے