us ke maañ baap nahīñ haiñ shāyad

varna us meñ kahīñ bachcha hotā

us ke man bap nahin hain shayad

warna us mein kahin bachcha hota

vo niiñd milī hai ki jo puurī nahīñ hotī

vo ḳhvāb milā hai ki jo ma.azūr huā hai

wo nind mili hai ki jo puri nahin hoti

wo KHwab mila hai ki jo mazur hua hai

baḳhsh mujh ko na adhūrī koī ne.amat maulā

yā to dariyā hī de puurā yā to sahrā saarā

baKHsh mujh ko na adhuri koi neamat maula

ya to dariya hi de pura ya to sahra sara

is dafa to zindagī jaldī meñ thī

kah do aglī baar fursat meñ mile

is dafa to zindagi jaldi mein thi

kah do agli bar fursat mein mile

ranj yuuñ rāh-e-masāfat meñ mile

kuchh kamā.e kuchh virāsat meñ mile

ranj yun rah-e-masafat mein mile

kuchh kamae kuchh wirasat mein mile

mohabbat faqat lafz thā ek ḳhālī

ye kis ne kahā thā ma.ānī milā do

mohabbat faqat lafz tha ek KHali

ye kis ne kaha tha maani mila do

na jazbāt se ye safar tai huā

na dil se kabhī ye zabāñ tak ga.e

na jazbaat se ye safar tai hua

na dil se kabhi ye zaban tak gae

pyaar āñkhoñ se chhalaktā hī hai

dil ke paimāne meñ saarā na rahe

pyar aankhon se chhalakta hi hai

dil ke paimane mein sara na rahe

nishān raahī ke rāhoñ pe ho na ho lekin

nishān rāhoñ ke aksar mileñge raahī pe

nishan rahi ke rahon pe ho na ho lekin

nishan rahon ke aksar milenge rahi pe

rah ga.e kitne kirdār bhītar mire

mere bhītar mirā qāfila rah gayā

rah gae kitne kirdar bhitar mere

mere bhitar mera qafila rah gaya

ki hāsil yahī mausamoñ kā rahā

bahāroñ ke patte ḳhizāñ tak ga.e

ki hasil yahi mausamon ka raha

bahaaron ke patte KHizan tak gae

fāsloñ meñ rahā qurbatoñ kā gumāñ

qurbatoñ meñ kahīñ fāsla rah gayā

faslon mein raha qurbaton ka guman

qurbaton mein kahin fasla rah gaya

rahūñgā jashn-zada maiñ bahāne kyā kam haiñ

tū raqs dekhnā merā mirī tabāhī pe

rahunga jashn-zada main bahane kya kam hain

tu raqs dekhna mera meri tabahi pe

kyā zarūrī hai ye iqrār kī muhtāj rahe

ham mohabbat ko yuuñ lāchār kareñ bhī ki nahīñ

kya zaruri hai ye iqrar ki muhtaj rahe

hum mohabbat ko yun lachaar karen bhi ki nahin

añdheroñ ujāloñ kī hai ye laḌā.ī

bujhāoge tum ham jalāyā kareñge

andheron ujalon ki hai ye laDai

bujhaoge tum hum jalaya karenge

tum ne paude ko thā saa.e meñ rakhā

dhuup meñ rakhte to zinda hotā

tum ne paude ko tha sae mein rakha

dhup mein rakhte to zinda hota

dhuup baḌhne ke jo āsār hue

kitne saa.e ke taraf-dār hue

dhup baDhne ke jo aasar hue

kitne sae ke taraf-dar hue

kuchh vaqt zarā aur nahar duudh kī legī

farhād ko tesha nahīñ manzūr huā hai

kuchh waqt zara aur nahar dudh ki legi

farhad ko tesha nahin manzur hua hai

hai vajūd us kā jo kāġhaz pe kare sābit ye

ba.az auqāt hai kāġhaz baḌā auqāt se ab

hai wajud us ka jo kaghaz pe kare sabit ye

baz auqat hai kaghaz baDa auqat se ab

yahī dā.imī mashġhala hai hamārā

na.ī chiiz le lo purānī milā do

yahi daimi mashghala hai hamara

nai chiz le lo purani mila do