چبھن یہ پیٹھ میں کیسی ہے مڑ کے دیکھ تو لے

کہیں کوئی تجھے پیچھے سے دیکھتا ہوگا

گلی کے موڑ سے گھر تک اندھیرا کیوں ہے نظامؔ

چراغ یاد کا اس نے بجھا دیا ہوگا

تو اکیلا ہے بند ہے کمرا

اب تو چہرا اتار کر رکھ دے

منظر کو کسی طرح بدلنے کی دعا دے

دے رات کی ٹھنڈک کو پگھلنے کی دعا دے

دوستی عشق اور وفاداری

سخت جاں میں بھی نرم گوشے ہیں

جن سے اندھیری راتوں میں جل جاتے تھے دیے

کتنے حسین لوگ تھے کیا جانے کیا ہوئے

یاد اور یاد کو بھلانے میں

عمر کی فصل کٹ گئی دیکھو

کہاں جاتی ہیں بارش کی دعائیں

شجر پر ایک بھی پتہ نہیں ہے

اپنی پہچان بھیڑ میں کھو کر

خود کو کمروں میں ڈھونڈتے ہیں لوگ

کوئی دعا کبھی تو ہماری قبول کر

ورنہ کہیں گے لوگ دعا سے اثر گیا

آرزو تھی ایک دن تجھ سے ملوں

مل گیا تو سوچتا ہوں کیا کروں

اپنے افسانے کی شہرت اسے منظور نہ تھی

اس نے کردار بدل کر مرا قصہ لکھا

ظلم تو بے زبان ہے لیکن

زخم کو تو زبان کب دے گا

نکلے کبھی نہ گھر سے مگر اس کے باوجود

اپنی تمام عمر سفر میں گزر گئی

برسوں سے گھومتا ہے اسی طرح رات دن

لیکن زمین ملتی نہیں آسمان کو

دروازہ کوئی گھر سے نکلنے کے لئے دے

بے خوف کوئی راستہ چلنے کے لیے دے

آنکھیں کہیں دماغ کہیں دست و پا کہیں

رستوں کی بھیڑ بھاڑ میں دنیا بکھر گئی

یادوں کی رت کے آتے ہی سب ہو گئے ہرے

ہم تو سمجھ رہے تھے سبھی زخم بھر گئے

بیچ کا بڑھتا ہوا ہر فاصلہ لے جائے گا

ایک طوفاں آئے گا سب کچھ بہا لے جائے گا

اونچی عمارتیں تو بڑی شاندار ہیں

لیکن یہاں تو رین بسیرے تھے کیا ہوئے

پتیاں ہو گئیں ہری دیکھو

خود سے باہر بھی تو کبھی دیکھو

کسی کے ساتھ اب سایہ نہیں ہے

کوئی بھی آدمی پورا نہیں ہے

سن لیا ہوگا ہواؤں میں بکھر جاتا ہے

اس لئے بچے نے کاغذ پہ گھروندا لکھا

خاموش تم تھے اور مرے ہونٹ بھی تھے بند

پھر اتنی دیر کون تھا جو بولتا رہا

ساحلوں کی شفیق آنکھوں میں

دھوپ کپڑے اتار کر چمکے

دھول اڑتی ہے دھوپ بیٹھی ہے

اوس نے آنسوؤں کا گھر چھوڑا

اداسی اکیلے میں ڈر جائے گی

گھڑی دو گھڑی کو خوشی بھیج دے

ایک آسیب ہے ہر اک گھر میں

ایک ہی چہرہ در بدر چمکے

بدلتی رت کا نوحہ سن رہا ہے

ندی سوئی ہے جنگل جاگتا ہے

ذرا سی بات تھی تیرا بچھڑنا

ذرا سی بات سے کیا کچھ ہوا ہے

وحشت تو سنگ و خشت کی ترتیب لے گئی

اب فکر یہ ہے دشت کی وسعت بھی لے نہ جائے

خاموش تم تھے اور مرے ہونٹھ بھی تھے بند

پھر اتنی دیر کون تھا جو بولتا رہا