'shujā' vo ḳhairiyat pūchheñ to hairat meñ na paḌ jaanā

pareshāñ karne vaale ḳhair-ḳhvāhoñ meñ bhī hote haiñ

'shuja' wo KHairiyat puchhen to hairat mein na paD jaana

pareshan karne wale KHair-KHwahon mein bhi hote hain

yā to jo nā-fahm haiñ vo bolte haiñ in dinoñ

yā jinheñ ḳhāmosh rahne kī sazā ma.alūm hai

ya to jo na-fahm hain wo bolte hain in dinon

ya jinhen KHamosh rahne ki saza malum hai

zindagī bhar zinda rahne kī yahī tarkīb hai

us taraf jaanā nahīñ bilkul jidhar kī sochnā

zindagi bhar zinda rahne ki yahi tarkib hai

us taraf jaana nahin bilkul jidhar ki sochna

ghar meñ bechainī ho to agle safar kī sochnā

phir safar nākām ho jaa.e to ghar kī sochnā

ghar mein bechaini ho to agle safar ki sochna

phir safar nakaam ho jae to ghar ki sochna

mire hālāt ko bas yuuñ samajh lo

parinde par shajar rakkhā huā hai

mere haalat ko bas yun samajh lo

parinde par shajar rakkha hua hai

jaisā manzar mile gavārā kar

tabsire chhoḌ de nazārā kar

jaisa manzar mile gawara kar

tabsire chhoD de nazara kar

auroñ se pūchhiye to haqīqat pata chale

tanhā.ī meñ to zaat kā irfān ho chukā

auron se puchhiye to haqiqat pata chale

tanhai mein to zat ka irfan ho chuka

hazār rañg meñ mumkin hai dard kā iz.hār

tire firāq meñ marnā hī kyā zarūrī hai

hazar rang mein mumkin hai dard ka izhaar

tere firaq mein marna hi kya zaruri hai

tañgī-e-hai.at se Takrātā huā josh-e-mavād

shā.erī kā lutf aa jaatā hai chhoTī bahr meñ

tangi-e-haiat se Takraata hua josh-e-mawad

shaeri ka lutf aa jata hai chhoTi bahr mein

be-ārzū bhī ḳhush haiñ zamāne meñ baaz log

yaañ aarzū ke saath bhī jiinā harām hai

be-arzu bhi KHush hain zamane mein baz log

yan aarzu ke sath bhi jina haram hai

ham sūfiyoñ kā donoñ taraf se ziyāñ huā

irfān-e-zāt bhī na huā raat bhī ga.ī

hum sufiyon ka donon taraf se ziyan hua

irfan-e-zat bhi na hua raat bhi gai

jo zinda ho use to maar dete haiñ jahāñ vaale

jo marnā chāhtā ho us ko zinda chhoḌ dete haiñ

jo zinda ho use to mar dete hain jahan wale

jo marna chahta ho us ko zinda chhoD dete hain

dard jā.egā to kuchh kuchh jā.egā par dekhnā

chain jab jā.egā to saarā kā saarā jā.egā

dard jaega to kuchh kuchh jaega par dekhna

chain jab jaega to sara ka sara jaega

aap idhar aa.e udhar diin aur īmān ga.e

iid kā chāñd nazar aayā to ramzān ga.e

aap idhar aae udhar din aur iman gae

id ka chand nazar aaya to ramzan gae

chāragarī kī baat kisī aur se karo

ab ho ga.e haiñ yaaro purāne marīz ham

chaaragari ki baat kisi aur se karo

ab ho gae hain yaro purane mariz hum

do chaar nahīñ saiñkaḌoñ sher us pe kahe haiñ

is par bhī vo samjhe na to qadmoñ pe jhukeñ kyā

do chaar nahin sainkaDon sher us pe kahe hain

is par bhi wo samjhe na to qadmon pe jhuken kya

ye duniyā-dārī aur irfān kā daavā 'shujā-ḳhāvar'

miyāñ irfān ho jaa.e to duniyā chhoḌ dete haiñ

ye duniya-dari aur irfan ka dawa 'shuja-KHawar'

miyan irfan ho jae to duniya chhoD dete hain

isī par ḳhush haiñ ki ik dūsre ke saath rahte haiñ

abhī tanhā.ī kā matlab nahīñ samjhe haiñ ghar vaale

isi par KHush hain ki ek dusre ke sath rahte hain

abhi tanhai ka matlab nahin samjhe hain ghar wale

tanhā.ī kā ik aur maza luuT rahā huuñ

mehmān mire ghar meñ bahut aa.e hue haiñ

tanhai ka ek aur maza luT raha hun

mehman mere ghar mein bahut aae hue hain

qalam meñ zor jitnā hai judā.ī kī badaulat hai

milan ke ba.ad likhne vaale likhnā chhoḌ dete haiñ

qalam mein zor jitna hai judai ki badaulat hai

milan ke baad likhne wale likhna chhoD dete hain

us ko na ḳhayāl aa.e to ham muñh se kaheñ kyā

vo bhī to mile ham se hamīñ us se mileñ kyā

us ko na KHayal aae to hum munh se kahen kya

wo bhi to mile hum se hamin us se milen kya

jin ko qudarat hai taḳhayyul par unheñ dikhtā nahīñ

jin kī āñhkeñ Thiik haiñ un ko taḳhayyul chāhiye

jin ko qudarat hai taKHayyul par unhen dikhta nahin

jin ki aanhken Thik hain un ko taKHayyul chahiye

rind khaḌe haiñ mimbar mimbar

aur vaa.iz ne pī rakkhī hai

rind khaDe hain mimbar mimbar

aur waiz ne pi rakkhi hai

vasl huā par dil meñ tamannā

jaisī thī vaisī rakkhī hai

wasl hua par dil mein tamanna

jaisi thi waisi rakkhi hai

'shujā.a' maut se pahle zarūr jī lenā

ye kaam bhuul na jaanā baḌā zarūrī hai

'shujaa' maut se pahle zarur ji lena

ye kaam bhul na jaana baDa zaruri hai

dil kī bāteñ dūsroñ se mat kaho luT jāoge

aaj kal iz.hār ke dhandhe meñ hai ghāTā bahut

dil ki baaten dusron se mat kaho luT jaoge

aaj kal izhaar ke dhandhe mein hai ghaTa bahut

kuchh nahīñ bolā to mar jā.egā andar se 'shujā.a'

aur agar bolā to phir bāhar se maarā jā.egā

kuchh nahin bola to mar jaega andar se 'shujaa'

aur agar bola to phir bahar se mara jaega

sardī bhī ḳhatm ho ga.ī barsāt bhī ga.ī

aur is ke saath garmi-e-jazbāt bhī ga.ī

sardi bhi KHatm ho gai barsat bhi gai

aur is ke sath garmi-e-jazbaat bhi gai

sabhī zindagī pe farefta koī maut par nahīñ shefta

sabhī sūd-ḳhor to ho ga.e haiñ koī paThān nahīñ rahā

sabhi zindagi pe farefta koi maut par nahin shefta

sabhi sud-KHor to ho gae hain koi paThan nahin raha

kyā munajjim se kareñ ham apne mustaqbil kī baat

haal ke baare meñ ham ko kaun sā ma.alūm hai

kya munajjim se karen hum apne mustaqbil ki baat

haal ke bare mein hum ko kaun sa malum hai

dil meñ nafrat ho to chehre pe bhī le aatā huuñ

bas isī baat se dushman mujhe pahchān ga.e

dil mein nafrat ho to chehre pe bhi le aata hun

bas isi baat se dushman mujhe pahchan gae

sab kā hī naam lete haiñ ik tujh ko chhoḌ kar

ḳhāsā shu.ūr hai hameñ vahshat ke bāvajūd

sab ka hi nam lete hain ek tujh ko chhoD kar

KHasa shuur hai hamein wahshat ke bawajud

us bevafā kā shahr hai aur vaqt-e-shām hai

aaise meñ aarzū baḌī himmat kā kaam hai

us bewafa ka shahr hai aur waqt-e-sham hai

aaise mein aarzu baDi himmat ka kaam hai

sātoñ aalam sar karne ke ba.ad ik din kī chhuTTī le kar

ghar meñ chiḌiyoñ ke gaane par bachchoñ kī hairānī dekho

saton aalam sar karne ke baad ek din ki chhuTTi le kar

ghar mein chiDiyon ke gane par bachchon ki hairani dekho

karam hai mujh pe kisī aur ke jalāne ko

vo shaḳhs mujh pe koī mehrbān thoḌī hai

karam hai mujh pe kisi aur ke jalane ko

wo shaKHs mujh pe koi mehrban thoDi hai

us ke bayān se hue har-dil-azīz ham

ġham ko samajh rahe the chhupāne kī chiiz ham

us ke bayan se hue har-dil-aziz hum

gham ko samajh rahe the chhupane ki chiz hum