Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "taaqat"

Nazm MATCHES FOR "taaqat"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

ek pahaD aur gilahri

ko.ii pahaa.D ye kahtaa thaa ik gilahrii se
tujhe ho sharm to paanii me.n jaa ke Duub mare
zaraa sii chiiz hai is par Guruur! kyaa kahnaa!
ye aql aur ye samajh ye shu.uur! kyaa kahnaa!
KHudaa kii shaan hai naa-chiiz! chiiz ban baiThe.n!
jo be-shu.uur ho.n yuu.n baa-tamiiz ban baiThe.n!
tirii bisaat hai kyaa merii shaan ke aage
zamii.n hai past mirii aan-baan ke aage
jo baat mujh me.n hai tujh ko vo hai nasiib kahaa.n
bhalaa pahaa.D kahaa.n jaanvar Gariib kahaa.n!
kahaa ye sun ke gilahrii ne mu.nh sambhaal zaraa
ye kachchii baate.n hai.n dil se inhe.n nikaal zaraa!
jo mai.n ba.Dii nahii.n terii tarah to kyaa parvaa!
nahii.n hai tuu bhii to aaKHir mirii tarah chhoTaa
har ek chiiz se paidaa KHudaa kii qudarat hai
ko.ii ba.Daa ko.ii chhoTaa ye us kii hikmat hai
ba.Daa jahaan me.n tujh ko banaa diyaa us ne
mujhe daraKHt pe cha.Dhnaa sikhaa diyaa us ne
qadam uThaane kii taaqat nahii.n zaraa tujh me.n
nirii ba.Daa.ii hai! KHuubii hai aur kyaa tujh me.n
jo tuu ba.Daa hai to mujh saa hunar dikhaa mujh ko
ye chhaaliyaa hii zaraa to.D kar dikhaa mujh ko
nahii.n hai chiiz nikammii ko.ii zamaane me.n
ko.ii buraa nahii.n qudarat ke kaar-KHaane me.n

Allama Iqbal
Nazm

yaad-e-aligarh

vo chaa.e kii pyaalii pe yaaro.n ke jalse
vo sardii kii raate.n vo zulfo.n ke qisse
kabhii tazkire husn-e-sho.ala-ruKHaa.n ke
mohabbat hu.ii thii kisii ko kisii se
har ik dil vahaa.n thaa nazar kaa nishaana
bahut yaad aataa hai guzraa zamaana
bahut apnaa andaaz thaa laa-ubaalii
kabhii the jalaalii kabhii the jamaalii
kabhii baat me.n baat yuu.nhii nikaalii
sar-e-raah ko.ii qayaamat uThaa lii
kisii ko la.Daanaa kisii ko bachaanaa
bahut yaad aataa hai guzraa zamaana
kabhii sachchii baato.n ko jhuuTaa bataayaa
kabhii jhuuTii baato.n ko sach kar dikhaayaa
kabhii raaz-e-dil kah ke us ko chhupaayaa
kabhii dosto.n me.n yuu.nhii kuchh u.Daayaa
bataa kar chhupaanaa chhupaa kar bataanaa
bahut yaad aataa hai guzraa zamaana
kabhii bazm-e-ahbaab me.n sho.ala-afshaa.n
kabhii union me.n the shamshiir-e-burraa.n
kabhii bazm-e-vaa.iz me.n the paa-ba-jaulaa.n
badalte the har roz taqdiir-e-dauraa.n
jahaa.n jaisii Daflii vahaa.n vaisaa gaanaa
bahut yaad aataa hai guzraa zamaana
zamaana thaa vo ek haivaaniyat kaa
vo daur-e-malaamat thaa shaitaaniyat kaa
hame.n dard thaa ek insaaniyat kaa
uThaa.e alam ham the haqqaaniyat kaa
ba.Dhe jaa rahe the magar baaGiyaana
bahut yaad aataa hai guzraa zamaana
muqaabil me.n aa.e jasaarat thii kis ko
ko.ii rok de ba.Dh ke himmat thii kis ko
pukaare ko.ii ham ko taaqat thii kis ko
ki har bul-havas ko the ham taaziyaana
bahut yaad aataa hai guzraa zamaana
KHayaalaat-e-pur-shauq kaa silsila thaa
badal de.n zamaane ko vo hausla thaa
har ik dil me.n paidaa nayaa valvala thaa
har ik gaam ahbaab kaa qaafila thaa
idhar da.avaa karnaa udhar kar dikhaanaa
bahut yaad aataa hai guzraa zamaana
vo shah-raah-e-marrice ke pur-pech chakkar
vo shamshaad building pe ik shor-e-mahshar
vo mub.ham sii baate.n vo poshiida nashtar
vo be-fikr duniyaa vo lafzo.n ke daftar
ki jin kaa siraa thaa na ko.ii Thikaana
bahut yaad aataa hai guzraa zamaana
kisii ko hu.ii thii kisii se mohabbat
ko.ii kar rahaa thaa kisii kii shikaayat
Garaz roz Dhaatii thii taaza qayaamat
kisii kii shabaahat kisii kii malaamat
kisii kii tasallii kisii kaa sataanaa
bahut yaad aataa hai guzraa zamaana
ko.ii Gam-zada thaa ko.ii ha.ns rahaa thaa
ko.ii husn-e-naahiid par mar miTaa thaa
ko.ii chashm-e-nargis kaa biimaar saa thaa
ko.ii bas yuu.nhii taaktaa jhaa.nktaa thaa
kabhii choT khaanaa kabhii muskuraanaa
bahut yaad aataa hai guzraa zamaana
vo har january me.n numaa.ish ke charche
vo pur-shauq aa.nkhe.n vo hairaan jalve
vo chakkar pe chakkar the baara-darii ke
vo hasrat ki sau baar mil kar bhii milte
hazaaro.n bahaano.n kaa vo ik bahaanaa
bahut yaad aataa hai guzraa zamaana
vo ruKH aaftaabii pe abruu hilaalii
vo timsaal-e-siimii.n vo husn-misaalii
shaguufo.n me.n khelii gulaabo.n me.n paalii
vo KHud ik adaa thii adaa bhii niraalii
nigaahe.n bachaa kar nigaahe.n milaa kar
bahut yaad aataa hai guzraa zamaana
vo har-chand mujh ko nahii.n jaantii thii
magar merii nazro.n ko pahchaantii thii
agarche mire dil me.n vo bas ga.ii thii
magar baat bas dil kii dil me.n rahii thii
magar aaj ahbaab se kyaa chhupaanaa
bahut yaad aataa hai guzraa zamaana
vo ik shaam barsaat kii din Dhalaa thaa
abhii raat aa.ii na thii jhuTpuTaa thaa
vo baad-e-bahaarii se ik gul khilaa thaa
dha.Dakte hu.e dil se ik dil milaa thaa
nazar sun rahii thii nazar kaa fasaana
bahut yaad aataa hai guzraa zamaana
javaanii adaa.o.n me.n bal khaa rahii thii
kahaanii nigaaho.n me.n lahraa rahii thii
mohabbat mohabbat ko samjhaa rahii thii
vo chashm-e-tamannaa jhukii jaa rahii thii
qayaamat se pahle qayaamat vo Dhaanaa
bahut yaad aataa hai guzraa zamaana
hame.n biitii baate.n jo yaad aa rahii thii.n
vo maKHmuur nazre.n jo sharmaa rahii thii.n
bahut aql-e-saada ko bahkaa rahii thii.n
ba.Dii be-niyaazii se farmaa rahii thii.n
unhe.n yaad rakhnaa hame.n bhuul jaanaa
bahut yaad aataa hai guzraa zamaana
ab vo uma.nge.n na dil me.n muraade.n
ab rah ga.ii.n chand maazii kii yaade.n
ye jii chaahtaa hai unhe.n bhii bhalaa de.n
Gam-e-zindagii ko kahaa.n tak du.aa de.n
haqiiqat bhii ab ban ga.ii hai fasaana
bahut yaad aataa hai guzraa zamaana
aligarh hai ba.Dh kar hame.n kul jahaa.n se
hame.n ishq hai apnii urdu zabaa.n se
hame.n pyaar hai apne naam-o-nishaa.n se
yahaa.n aa ga.e ham na jaane kahaa.n se
qasam de ke ham ko kasii kaa bulaanaa
bahut yaad aataa hai guzraa zamaana
mohabbat se yaksar hai anjaan duniyaa
ye viiraan bastii pareshaan duniyaa
kamaal-e-KHirad se ye hairaan duniyaa
KHud apne kiye par pashemaan duniyaa
kahaa.n le ke aayaa hame.n aab-o-daana
bahut yaad aataa hai guzraa zamaana

Aabidullah Ghazi
Nazm

apni malka-e-suKHan se

naGme pale hai.n daulat-e-guftaar se tirii
paayaa hai nutq chashm-e-suKHan-baar se tirii
taaqat hai dil me.n nargis-e-biimaar se tirii
kyaa kyaa milaa hai 'josh' ko sarkaar se tirii
baa.nke KHayaal hai.n KHam-e-gardan liye hu.e
har sher kii kalaa.ii hai ka.ngan liye hu.e

Josh Malihabadi
Nazm

mazduron ka git

ham jism me.n taaqat rakhte hai.n
siino.n me.n haraarat rakhte hai.n
ham azm-e-baGaavat rakhte hai.n
mazduur hai.n ham mazduur hai.n ham

Asrarul Haq Majaz
Nazm

nama-e-jaanan

muddato.n baa'd milaa naama-e-jaanaa.n lekin
na ko.ii dil kii hikaayat na ko.ii pyaar kii baat
na kisii harf me.n mahruumi-e-jaa.n kaa qissa
na kisii lafz me.n bhuule hu.e iqraar kii baat
na kisii satr pe bhiige hu.e kaajal kii lakiir
na kahii.n zikr judaa.ii kaa na diidaar kii baat
bas vahii ek hii mazmuu.n ki mire shahr ke log
kaise sahme hu.e rahte hai.n gharo.n me.n apne
itnii be-naam KHamoshii hai ki diivaane bhii
ko.ii saudaa nahii.n rakhte hai.n saro.n me.n apne
ab qafas hii ko nasheman kaa badal jaan liyaa
ab kahaa.n taaqat-e-parvaaz paro.n me.n apne
vo jo do chaar subuu-kash the ki jin ke dam se
gardish-e-jaam bhii thii raunaq-e-mai-KHaana bhii thii
vo jo do chaar navaa-gar the ki jin ke hote
hurmat-e-naGma bhii thii jur.at-e-rindaana bhii thii
ko.ii maqtal ko.ii zindaa.n ko.ii pardes gayaa
chand hii the ki ravish jin kii judaagaana bhii thii
ab to bas burda-farosh hai jidhar bhii jaa.o
ab to har kuucha-o-kuu misr kaa baazaar lage
sar-e-darbaar sitaada hai.n bayaaze.n le kar
vo jo kuchh dost kabhii saahab-e-kirdaar lage
Gairat-e-ishq ki kal maal-e-tijaarat me.n na thii
aaj dekho ki hai.n ambaar ke ambaar lage
aisaa aaseb-zada shahr ki dekhaa na sunaa
aisii dahshat hai ki patthar hu.e sab ke baazuu
dar-o-diivaar-e-KHaraabaat vahii hai.n lekin
na kahii.n qulqul-e-miinaa hai na gul-baa.ng-e-subuu
be-dilii sheva-e-arbaab-e-mohabbat Thahraa
ab ko.ii aa.e ki jaa.e ''tananaahuu-yaahuu''

Ahmad Faraz
Nazm

aaKHiri lamha

vo vaqt kabhii to aa.egaa jab dil ke chaman lahraa.e.nge
mar jaa.uu.n to kyaa marne se mire ye KHvaab nahii.n mar jaa.e.nge
ye KHvaab hii merii daulat hai.n ye KHvaab tumhe.n de jaa.uu.ngaa
is dahr me.n jiine marne ke aadaab tumhe.n de jaa.uu.ngaa
mumkin hai ki ye duniyaa kii ravish pal bhar ko tumhaaraa saath na de
kaa.nTo.n hii kaa tohfa nazr kare phuulo.n kii ko.ii sauGaat na de
mumkin hai tumhaare raste me.n har zulm-o-sitam diivaar bane
siine me.n dahakte sho.ale ho.n har saa.ns ko.ii aazaar bane
aise me.n na khul kar rah jaanaa ashko.n se na aa.nchal bhar lenaa
Gam aap ba.Dii ik taaqat hai ye taaqat bas me.n kar lenaa
ho azm to lau de uThtaa hai har zaKHm sulagte siine kaa
jo apnaa haq KHud chhiin sake miltaa hai use haq jiine kaa
lekin ye hamesha yaad rahe ik fard kii taaqat kuchh bhii nahii.n
jo bhii ho akele insaa.n se duniyaa kii baGaavat kuchh bhii nahii.n
tanhaa jo kisii ko paa.e.nge taaqat ke shikanje jak.De.nge
sau haath uThe.nge jab mil kar duniyaa kaa garebaa.n pak.De.nge
insaan vahii hai taabinda us raaz se jis kaa siinaa hai
auro.n ke liye to jiinaa hii KHud apne liye bhii jiinaa hai

Jan Nisar Akhtar
Nazm

shor-e-barbat-o-nai

ye haath salaamat hai.n jab tak is KHuu.n me.n haraarat hai jab tak
is dil me.n sadaaqat hai jab tak is nutq me.n taaqat hai jab tak
in tauq-o-salaasil ko ham tum sikhlaae.nge shorish-e-barbat-o-nai
vo shorish jis ke aage zubuu.n ha.ngaama-e-tabl-e-qaisar-o-kai
aazaad hai.n apne fikr o amal bharpuur KHaziina himmat kaa
ik umar hai apnii har saa.at imroz hai apnaa har fardaa
ye shaam-o-sahar ye shams-o-qamar ye aKHtar-o-kaukab apne hai.n
ye lauh-o-qalam ye tabl-o-alam ye maal-o-hasham sab apne hai.n

Faiz Ahmad Faiz
Nazm

KHuda-e-bartar teri zamin par zamin ki KHatir ye jang kyun hai

Gariib maa.o.n shariif bahno.n ko aman-o-izzat kii zindagii de
jinhe.n ataa kii hai tuu ne taaqat unhe.n hidaayat kii raushnii de

Sahir Ludhianvi
Nazm

mata-e-alfaz

aur is arsa-e-aKHlaaq-o-muravvat me.n kabhii
ek pal ke liye vo saa.at-e-naazuk aa jaa.e
naaKHun-e-lafz kisii yaad ke zaKHmo.n ko chhu.e
ik jhijaktaa hu.aa jumla ko.ii dukh de jaa.e
kaun jaanegaa ki ham dono.n pe kyaa biitii hai
is KHamoshii ke a.ndhero.n se nikal aa.e.n chalo
kisii sulge hu.e lahje se charaaGaa.n kar le.n
chun le.n phuulo.n kii tarah ham bhii mataa-e-alfaaz
apne uj.De hu.e daaman ko gulistaa.n kar le.n
chun le.n phuulo.n kii tarah ham bhii mataa-e-alfaaz
daulat-e-dard ba.Dii chiiz hai iqraar karo
ne.amat-e-Gam ba.Dii ne.amat hai ye iz.haar karo
lafz paimaan bhii iqraar bhii iz.haar bhii hai.n
taaqat-e-sabr agar ho to ye Gam-KHvaar bhii hai.n
haath KHaalii huu.n to ye jins-e-giraa.n-baar bhii hai.n
paas ko.ii bhii na ho phir to ye dildaar bhii hai.n
haath KHaalii ho.n to ye jins-e-giraa.n-baar bhii hai.n
ye jo tum mujh se gurezaa.n ho mirii baat suno

Zehra Nigaah
Nazm

jawan beTi se bap ka KHitab

mirii beTii mirii jaanaa.n
tumhe.n sab yaad to hogaa
bahut pahle bahut pahle
javaanii kaa thaa jab aalam
mire baazuu me.n taaqat thii
mire siine me.n himmat thii
unhe.n ayyaam me.n ik din
mirii aaGosh-e-ulfat me.n
kisii ne laa ke rakkhaa thaa
tumhaaraa phuul saa chehra
badan be-intihaa naazuk
mire in saKHt haatho.n me.n
ajab narmii sii aa.ii thii
mirii is aa.nkh ne buu se liye the aur ro.ii thii
mujhe to yaad hai sab kuchh
tumhe.n bhii yaad to hogaa
na.e kap.De khilaune duudh kii botal KHariidii thii
bahut bechain hotaa thaa jo tum raato.n ko rotii thii.n
chalii thii.n apne pairo.n par jo tum pahle-pahal beTaa
mujhe aisaa lagaa thaa chal pa.Dii dil kii mire dha.Dkan
qadam do chaar le kar tum jo ik-dam la.Dkha.Daa.ii thii.n
mirii saa.nse.n mire siine ke andar thartharaa.ii thii.n
mirii godii me.n rafta rafta din guzraa kiye aur tum
na jaane sote sote mere siine par javaanii tak
mirii jaa.n aaj aa.ii ho
tumhe.n mujh se shikaayat hai
ki mai.n ne saKHtiyaa.n kii hai.n
mirii vo saKHtiyaa.n tum ko bahut ranjuur kartii thii.n
mujhe bhii ranj hotaa thaa
magar thii tarbiyat laazim
tumhe.n saa.nche me.n Dhalnaa thaa
tabii.at ko badalnaa thaa
tumhe.n sab yaad to hogaa
mirii beTii mire baazuu me.n vo quvvat nahii.n baaqii
tumhaarii har KHushii kii hai.n zamaanat dha.Dkane.n merii
magar ik mashvara sun lo
ki ab sab bhuul jaa.o tum
na.e rishte banaa.o tum
hamaaraa saath chhuuTegaa
na.e rishto.n ke merii jaa.n masaa.il kam nahii.n hoge
magar tab ham nahii.n ho.nge
akelii jaan hogii tum
faqat vo tarbiyat hogii
jo mai.n ne saKHtiyaa.n kar ke
tumhaare dil me.n Daalii hai
vo tum ko yaad to hogii
sabaq sab yaad to hogaa

Afeef Siraj
Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Nazm

ek aurat ki hansi

pathriile kohsaar ke gaate chashmo.n me.n
guu.nj rahii hai ek aurat kii narm ha.nsii
daulat taaqat aur shohrat sab kuchh bhii nahii.n
us ke badan me.n chhupii hai us kii aazaadii
duniyaa ke ma.abad ke na.e but kuchh kar le.n
sun nahii.n sakte us kii lazzat kii siskii
is baazaar me.n go har maal bikaa.uu hai
ko.ii KHariid ke laa.e zaraa taskiin us kii
ik sarshaarii jis se vo hii vaaqif hai
chaahe bhii to us ko bech nahii.n saktii
vaadii kii aavaara havaa.o aa jaa.o
aa.o aur us ke chehre par bose do
apne lambe lambe baal u.Daatii jaa.e
havaa kii beTii saath havaa ke gaatii jaa.e

Fahmida Riaz
Nazm

zamana KHuda hai

mere sehan me.n ek kam-sin banafshe kaa paudaa hai
tayyaara ko.ii kabhii us ke sar par se guzre
to vo muskuraataa hai aur lahlahaataa hai
goyaa vo tayyaara, us kii mohabbat me.n
ahd-e-vafaa ke kisii jabr-e-taaqat-rubaa hii se guzraa!
vo KHush-emtimaadii se kahtaa hai
lo dekho, kaise isii ek rassii ke dono.n kinaaro.n
se ham tum ba.ndhe hai.n!
ye rassii na ho to kahaa.n ham me.n tum me.n
ho paidaa ye raah-e-visaal?
magar hijr ke in vasiilo.n ko vo dekh saktaa nahii.n
jo saraasar azal se abad tak tane hai.n!
jahaa.n ye zamaana hanuuz-e-zamaana
faqat ik girah hai!

Noon Meem Rashid
Nazm

mahatma-gandhi ka qatl

taariiKH me.n qaumo.n kii ubhre kaise kaise mumtaaz bashar
kuchh mulk ke taKHt-nashii.n kuchh taKHt-falak ke taaj-basar

Anand Narayan Mulla
Nazm

raqqasa

uTThii hai maGrib se ghaTaa
piine kaa mausam aa gayaa
hai raqs me.n ik mah-laqaa
naazuk adaa naaz-aafrii.n
haa.n naachtii jaa gaa.e jaa
nazro.n se dil barmaa.e jaa
ta.Dpaa.e jaa ta.Dpaa.e jaa
o dushman-e-duniyaa-o-dii.n!
teraa thiraknaa KHuub hai
terii adaa.e.n dil-nashii.n
lekin Thahar tuu kaun hai
o niim-uryaa.n naaznii.n
kyaa mashriqii aurat hai tuu
hargiz nahii.n hargiz nahii.n
terii ha.nsii bebaak hai
terii nazar chaalaak hai
uff kis qadar dil-soz hai
taqriir baazaarii tirii
kitnii havas-aamoz hai
ye saada purkaarii tirii
sharm aur izzat vaaliyaa.n
hotii hai.n iffat vaaliyaa.n
vo husn kii shahzaadiyaa.n
parde kii hai.n aabaadiyaa.n
chashm-e-falak ne aaj tak
dekhii nahii.n un kii jhalak
sarmaaya-e-sharm-o-hayaa
zevar hai un ke husn kaa
shauhar ke dukh sahtii hai.n vo
mu.nh se nahii.n kahtii hai.n vo
kab saamne aatii hai.n vo
Gairat se kaT jaatii hai.n vo
e.azaaz-e-millat un se hai
naam-e-sharaafat un se hai
iimaan par qaa.em hai.n vo
paakiiza-o-saa.em hai.n vo
tujh me.n nahii.n sharm-o-hayaa
tujh me.n nahii.n mehr-o-vafaa
sach sach bataa tuu kaun hai
o be-hayaa tuu kaun hai
ehsaas-e-izzat kyuu.n nahii.n
sharm aur Gairat kyuu.n nahii.n
ye pur-fusuu.n Gamze tire
naa-mahramo.n ke saamne
haT saamne se duur ho
marduud ho maqhuur ho
taqdiir kii heTii hai tuu
shaitaan kii beTii hai tuu
jis qaum kii aurat hai tuu
us qaum par la.anat hai tuu
lekin Thahar jaanaa zaraa
terii nahii.n ko.ii KHataa
mardo.n me.n Gairat hii nahii.n
qaumii hamiiyat hii nahii.n
vo millat-e-baizaa ki thii
saare jahaa.n kii raushnii
jam.iyyat-e-islaamiyaa.n
shaahanshah-e-hindostaa.n
ab is me.n dam kuchh bhii nahii.n
ham kyaa hai.n ham kuchh bhii nahii.n
millii siyaasat uTh ga.ii
baazuu kii taaqat uTh ga.ii
shaan-e-hijaazii ab kahaa.n
vo turktaazii ab kahaa.n
ab Gaznavii himmat ga.ii
ab baabarii shaukat ga.ii
iimaan aalamgiir kaa
muslim ke dil se uTh gayaa
qaum ab jafaa-pesha hu.ii
izzat gadaa-pesha hu.ii
ab rang hii kuchh aur hai
be-Gairatii kaa daur hai
ye qaum ab miTne ko hai
ye nard ab piTne ko hai
afsos ye hindostaa.n!
ye gulshan-e-jannat-nishaa.n!
iimaan-daaro.n kaa vatan
taa.at-guzaaro.n kaa vatan
rah jaa.egaa viiraana phir
ban jaa.egaa but-KHaana phir
lekin mujhe kyaa KHabt hai
taqriir kyuu.n be-rabt hai
aisaa bahak jaataa huu.n mai.n
mu.nh aa.ii bak jaataa huu.n mai.n
itnaa sharaabii ho gayaa
aql-o-KHirad ko kho gayaa
mujh ko zamaane se Garaz
miTne miTaane se Garaz
hindostaa.n se kaam kyaa
andesha-e-anjaam kyaa
jiine do jiine do mujhe
piine do piine do mujhe
jab hashr kaa din aa.egaa
us vaqt dekhaa jaa.egaa
haa.n naachtii jaa gaa.e jaa
nazro.n se dil barmaa.e jaa
ta.Dpaa.e jaa ta.Dpaa.e jaa
o dushman-e-duniyaa-o-dii.n

Hafeez Jalandhari
Nazm

zalzala

ek shab halkii sii jumbish mujhe mahsuus hu.ii
mai.n ye samjhaa mire shaano.n ko hilaataa hai ko.ii
aa.nkh uThaa.ii to ye dekhaa ki zamii.n hiltii hai
jis jagah shai ko.ii rakkhii hai vahii.n hiltii hai
sahn-o-diivaar kii jumbish hai to dar hilte hai.n
baahar aayaa to ye dekhaa ki shajar hilte hai.n
ko.ii shai jumbish-e-paiham se nahii.n hai mahruum
ek taaqat hai pas-e-parda magar naa-maaluum
chand lamhe bhii ye naira.ngii-e-aalam na rahii
zalzala KHatm hu.aa jumbish-e-paiham na rahii
hairat-e-diid se a.ngusht-ba-dandaa.n thaa mai.n
shaahid-e-jalva-e-qahhaarii-e-yazdaa.n thaa mai.n
daf.atan ek sadaa aah-o-fuGaa.n kii aa.ii
mere allaah ye gha.Dii kis pe musiibat laa.ii
gul kiyaa zalzala-e-qahr ne kis ghar kaa charaaG
kis pe Dhaayaa ye sitam kis ko diyaa hijr kaa daaG
jaa ke nazdiik ye nazzaara-e-hirmaa.n dekhaa
ek hasiina ko ba-sad haal-e-pareshaa.n dekhaa
baizavii shakl me.n the husn ke jalve pinhaa.n
aa.nkh me.n sehr bharaa thaa magar aa.nsuu the ravaa.n
mai.n ne ghabraa ke ye puuchhaa ki ye haalat kyuu.n hai
terii hastii hadaf-e-ra.nj-o-musiibat kyuu.n hai
bolii ai shaa.er-e-ra.ngiin-tabii.at mat puuchh
roz-o-shab dil pe guzartii hai qayaamat mat puuchh
log duniyaa ko tirii mujh ko zamii.n kahte hai.n
ahl-e-zar mujh ko mohabbat me.n hasii.n kahte hai.n
mai.n unhii.n husn-parasto.n kii huu.n ta.Dpaa.ii hu.ii
tujh se kahne ko ye raaz aa.ii huu.n ghabraa.ii hu.ii
zar-parasto.n se hai.n bad-dil mirii duniyaa ke Gariib
hai.n giraftaar-e-salaasil mirii duniyaa ke Gariib
mujh se ye taaza balaa.e.n nahii.n dekhii jaatii
zaalimo.n kii ye jafaa.e.n nahii.n dekhii jaatii.n
chaahtii huu.n mire ushshaaq me.n kuchh farq na ho
muft me.n kashtii-e-ehsaas-e-vafaa Garq na ho
ek vo jis ko mayassar ho.n imaaraat-o-naqiib
ek vo jis ko na ho phuu.ns kaa chhappar bhii nasiib
saahab-e-daulat-o-zii-rutba-o-zardaar ho ek
be-navaa Gam-zada-o-bekas-o-laachaar ho ek
ek muKHtaar ho, aura.ng-e-jahaa.nbaanii kaa
ik muraqqa.a ho Gam-o-ra.nj-o-pareshaanii kaa
saKHt nafrat hai mujhe apne parastaaro.n se
chhiin lete hai.n mujhe mere talab-gaaro.n se
chiira-dastii kaa miTaa detii hai.n sab jaah-o-jalaal
haif-sad-haif ki haa.il hai Gariibo.n kaa KHayaal
ye na hote to dikhaatii mai.n qayaamat kaa samaa.n
ye na hote to miTaatii mai.n Guruur-e-insaa.n
ek karvaT me.n badal detii nizaam-e-aalam
ik ishaare hii me.n ho jaatii hai ye mahfil barham
ik tabassum se jahaa.n barq-ba-daamaa.n hotaa
na ye aaraa.ishe.n hotii.n na ye saamaa.n hotaa
har adaa puuchhtii sarmaaya-parasto.n ke mizaaj
kuchh to farmaa.iye hazrat ki hai.n kis haal me.n aaj
lakh-pati sa.nkh-patii be-sar-o-saamaa.n hote
jaan bach jaa.e bas is baat ke KHvaahaa.n hote
barsar-e-KHaak nazar aate hai.n qasr-o-aivaa.n
ashk-e-KHuunii.n se mire aur bhii uThte tuufaa.n
merii aaGosh me.n sab ahl-e-sitam aa jaate
mere bartaav se bas naak me.n dam aa jaate
ba.az ke mu.nh Gam-e-aalaam se kaale kartii
ba.az ko maut kii devii ke havaale kartii
KHuun-e-zardaar hii mazduur kii mazduurii hai
mai.n jo KHaamosh huu.n ye baa.is-e-majbuurii hai
merii aaGosh me.n jaabir bhii hai.n majbuur bhii hai.n
mere daaman hii se vaabasta ye mazduur bhii hai.n
zabt kartii huu.n jo Gam aataa hai sah jaatii huu.n
josh aataa hai magar kaa.np ke rah jaatii huu.n

Shakeel Badayuni
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now