aap jis dil se gurezāñ the usī dil se mile

dekhiye DhūñDh nikālā hai kahāñ se maiñ ne

aap jis dil se gurezan the usi dil se mile

dekhiye DhunDh nikala hai kahan se main ne

paidā vo baat kar ki tujhe ro.eñ dūsre

ronā ḳhud apne haal pe ye zaar zaar kyā

paida wo baat kar ki tujhe roen dusre

rona KHud apne haal pe ye zar zar kya

ye mashvara baham uTThe haiñ chāra-jū karte

ki ab marīz ko achchhā thā qibla-rū karte

ye mashwara baham uTThe hain chaara-ju karte

ki ab mariz ko achchha tha qibla-ru karte

sabaq aa ke gor-e-ġharībāñ se le lo

ḳhamoshī mudarris hai is anjuman meñ

sabaq aa ke gor-e-ghariban se le lo

KHamoshi mudarris hai is anjuman mein

mujh ko ka.aba meñ bhī hamesha shaiḳh

yād-e-ayyām-e-but-parastī thī

mujh ko kaba mein bhi hamesha shaiKH

yaad-e-ayyam-e-but-parasti thi

haa.e kyā chiiz thī javānī bhī

ab to din raat yaad aatī hai

hae kya chiz thi jawani bhi

ab to din raat yaad aati hai

be-ḳhudī kūcha-e-jānāñ meñ liye jaatī hai

dekhiye kaun mujhe merī ḳhabar detā hai

be-KHudi kucha-e-jaanan mein liye jati hai

dekhiye kaun mujhe meri KHabar deta hai

hamesha se mizāj-e-husn meñ diqqat-pasandī hai

mirī dushvāriyāñ āsān honā saḳht mushkil hai

hamesha se mizaj-e-husn mein diqqat-pasandi hai

meri dushwariyan aasan hona saKHt mushkil hai

sham.eñ afsurda jahāñ phuul haiñ pazhmurda jahāñ

dil ko us gor-e-ġharībāñ meñ pukārā hotā

shamen afsurda jahan phul hain pazhmurda jahan

dil ko us gor-e-ghariban mein pukara hota

dil kī ālūdgī-e-zaḳhm baḌhī jaatī hai

saañs letā huuñ to ab ḳhuun kī bū aatī hai

dil ki aaludgi-e-zaKHm baDhi jati hai

sans leta hun to ab KHun ki bu aati hai

mire dahan meñ agar aap kī zabāñ hotī

to phir kuchh aur hī unvān-e-dāstāñ hotā

mere dahan mein agar aap ki zaban hoti

to phir kuchh aur hi unwan-e-dastan hota

lutf-e-bahār kuchh nahīñ go hai vahī bahār

dil hī ujaḌ gayā ki zamāna ujaḌ gayā

lutf-e-bahaar kuchh nahin go hai wahi bahaar

dil hi ujaD gaya ki zamana ujaD gaya

kabhī jannat kabhī dozaḳh kabhī ka.aba kabhī dair

ajab andāz se ta.amīr huā ḳhāna-e-dil

kabhi jannat kabhi dozaKH kabhi kaba kabhi dair

ajab andaz se tamir hua KHana-e-dil

manzil-e-hastī meñ ik yūsuf kī thī mujh ko talāsh

ab jo dekhā kārvāñ kā kārvāñ miltā nahīñ

manzil-e-hasti mein ek yusuf ki thi mujh ko talash

ab jo dekha karwan ka karwan milta nahin

qafas meñ jī nahīñ lagtā hai aah phir bhī mirā

ye jāntā huuñ ki tinkā bhī āshiyāñ meñ nahīñ

qafas mein ji nahin lagta hai aah phir bhi mera

ye jaanta hun ki tinka bhi aashiyan mein nahin

usī ko hashr kahte haiñ jahāñ duniyā ho fariyādī

yahī ai mīr-e-dīvān-e-jazā kyā terī mahfil hai

usi ko hashr kahte hain jahan duniya ho fariyaadi

yahi ai mir-e-diwan-e-jaza kya teri mahfil hai

duniyā kā ḳhuun daur-e-mohabbat meñ hai safed

āvāz aa rahī hai lab-e-jū-e-shīr se

duniya ka KHun daur-e-mohabbat mein hai safed

aawaz aa rahi hai lab-e-ju-e-shir se

be-piye vaa.iz ko merī raa.e meñ

masjid-e-jāma meñ jaanā hī na thā

be-piye waiz ko meri rae mein

masjid-e-jama mein jaana hi na tha

musībat thī hamāre hī liye kyuuñ

ye maanā ham jiye lekin jiye kyuuñ

musibat thi hamare hi liye kyun

ye mana hum jiye lekin jiye kyun

maiñ to hastī ko samajhtā huuñ sarāsar ik gunāh

pāk-dāmānī kā da.avā ho to kis buniyād par

main to hasti ko samajhta hun sarasar ek gunah

pak-damani ka dawa ho to kis buniyaad par

dil ke ajzā meñ nahīñ miltā koī juzv-e-nishāt

is sahīfe se kisī ne ik varaq kam kar diyā

dil ke ajza mein nahin milta koi juzw-e-nishat

is sahife se kisi ne ek waraq kam kar diya

tum ne chheḌā to kuchh khule ham bhī

baat par baat yaad aatī hai

tum ne chheDa to kuchh khule hum bhi

baat par baat yaad aati hai

ḳhāma-e-qudrat ne dil kā naam ye kah kar likhā

har jagah is lafz ke ma.anī badalte jā.eñge

KHama-e-qudrat ne dil ka nam ye kah kar likha

har jagah is lafz ke mani badalte jaenge

itnā bhī bār-e-ḳhātir-e-gulshan na ho koī

TuuTī vo shāḳh jis pe mirā āshiyāna thā

itna bhi bar-e-KHatir-e-gulshan na ho koi

TuTi wo shaKH jis pe mera aashiyana tha

batāo aise marīzoñ kā hai ilaaj koī

ki jin se haal bhī apnā bayāñ nahīñ hotā

batao aise marizon ka hai ilaj koi

ki jin se haal bhi apna bayan nahin hota

ḳhud chale aao yā bulā bhejo

raat akele basar nahīñ hotī

KHud chale aao ya bula bhejo

raat akele basar nahin hoti

ā.īna chhoḌ ke dekhā kiye sūrat merī

dil-e-muztar ne mire un ko sañvarne na diyā

aaina chhoD ke dekha kiye surat meri

dil-e-muztar ne mere un ko sanwarne na diya

ai soz-e-ishq-e-pinhāñ ab qissa muḳhtasar hai

iksīr ho chalā huuñ ik aañch kī kasar hai

ai soz-e-ishq-e-pinhan ab qissa muKHtasar hai

iksir ho chala hun ek aanch ki kasar hai

duā.eñ māñgī haiñ saaqī ne khol kar zulfeñ

basān-e-dast-e-karam abr-e-dajla-bār baras

duaen mangi hain saqi ne khol kar zulfen

basan-e-dast-e-karam abr-e-dajla-bar baras

ye terī aarzū meñ baḌhī vus.at-e-nazar

duniyā hai sab mirī nigah-e-intizār meñ

ye teri aarzu mein baDhi wusat-e-nazar

duniya hai sab meri nigah-e-intizar mein

sham.a bujh kar rah ga.ī parvāna jal kar rah gayā

yādgār-e-husn-o-ishq ik daaġh dil par rah gayā

shama bujh kar rah gai parwana jal kar rah gaya

yaadgar-e-husn-o-ishq ek dagh dil par rah gaya

dil nahīñ jab to ḳhaak hai duniyā

asal jo chiiz thī vahī na rahī

dil nahin jab to KHak hai duniya

asal jo chiz thi wahi na rahi

vā.izoñ buniyād-e-ka.aba meñ butoñ kī hastiyāñ

ham musalmāñ ho chuke aur tum musalmāñ kar chuke

waizon buniyaad-e-kaba mein buton ki hastiyan

hum musalman ho chuke aur tum musalman kar chuke

zabān dil kī haqīqat ko kyā bayāñ kartī

kisī kā haal kisī se kahā nahīñ jaatā

zaban dil ki haqiqat ko kya bayan karti

kisi ka haal kisi se kaha nahin jata

phuuT niklā zahr saare jism meñ

jab kabhī aañsū hamāre tham ga.e

phuT nikla zahr sare jism mein

jab kabhi aansu hamare tham gae

ham to dil hī par samajhte the butoñ kā iḳhtiyār

nasb-e-ka.aba meñ bhī ab tak ek patthar rah gayā

hum to dil hi par samajhte the buton ka iKHtiyar

nasb-e-kaba mein bhi ab tak ek patthar rah gaya

taqlīd ab maiñ hazrat-e-vā.iz kī kyuuñ karūñ

saaqī ne de diyā mujhe fatvā javāz kā

taqlid ab main hazrat-e-waiz ki kyun karun

saqi ne de diya mujhe fatwa jawaz ka

tamām anjuman-e-vāz ho ga.ī barham

liye hue koī yuuñ sāġhar-e-sharāb aayā

tamam anjuman-e-waz ho gai barham

liye hue koi yun saghar-e-sharab aaya

vahī hikāyat-e-dil thī vahī shikāyat-e-dil

thī ek baat jahāñ se bhī ibtidā karte

wahi hikayat-e-dil thi wahi shikayat-e-dil

thi ek baat jahan se bhi ibtida karte

tumheñ hañste hue dekhā hai jab se

mujhe rone kī aadat ho ga.ī hai

tumhein hanste hue dekha hai jab se

mujhe rone ki aadat ho gai hai

hai dil meñ josh-e-hasrat rukte nahīñ haiñ aañsū

ristī huī surāhī TuuTā huā subū huuñ

hai dil mein josh-e-hasrat rukte nahin hain aansu

risti hui surahi TuTa hua subu hun

hijr kī raat kāTne vaale

kyā karegā agar sahar na huī

hijr ki raat kaTne wale

kya karega agar sahar na hui

udāsī ab kisī kā rañg jamne hī nahīñ detī

kahāñ tak phuul barsā.e koī gor-e-ġharībāñ par

udasi ab kisi ka rang jamne hi nahin deti

kahan tak phul barsae koi gor-e-ghariban par

maanā ki bazm-e-husn ke ādāb haiñ bahut

jab dil pe iḳhtiyār na ho kyā kare koī

mana ki bazm-e-husn ke aadab hain bahut

jab dil pe iKHtiyar na ho kya kare koi

apne markaz kī taraf mā.il-e-parvāz thā husn

bhūltā hī nahīñ aalam tirī añgḌā.ī kā

apne markaz ki taraf mail-e-parwaz tha husn

bhulta hi nahin aalam teri angDai ka

banī haiñ shahr-āshob-e-tamannā

ḳhumār-ālūda āñkheñ rāt-bhar kī

bani hain shahr-ashob-e-tamanna

KHumar-aluda aankhen raat-bhar ki

haqārat se na dekho sākīnān-e-ḳhāk kī bastī

ki ik duniyā hai har zarra in ajzā-e-pareshāñ kā

haqarat se na dekho sakinan-e-KHak ki basti

ki ek duniya hai har zarra in ajza-e-pareshan ka

jhūTe va.adoñ par thī apnī zindagī

ab to vo bhī aasrā jaatā rahā

jhuTe wadon par thi apni zindagi

ab to wo bhi aasra jata raha

tah meñ dariyā-e-mohabbat ke thī kyā chiiz 'azīz'

jo koī Duub gayā us ko ubharne na diyā

tah mein dariya-e-mohabbat ke thi kya chiz 'aziz'

jo koi Dub gaya us ko ubharne na diya

hādsāt-e-dahr meñ vābasta-e-arbāb-e-dard

lī jahāñ karvaT kisī ne inqalāb aa hī gayā

hadsat-e-dahr mein wabasta-e-arbab-e-dard

li jahan karwaT kisi ne inqalab aa hi gaya