adā aa.ī jafā aa.ī ġhurūr aayā hijāb aayā

hazāroñ āfateñ le kar hasīnoñ par shabāb aayā

ada aai jafa aai ghurur aaya hijab aaya

hazaron aafaten le kar hasinon par shabab aaya

ham intizār kareñ ham ko itnī taab nahīñ

pilā do tum hameñ paanī agar sharāb nahīñ

hum intizar karen hum ko itni tab nahin

pila do tum hamein pani agar sharab nahin

sunte rahe haiñ aap ke ausāf sab se ham

milne kā aap se kabhī mauqa.a nahīñ milā

sunte rahe hain aap ke ausaf sab se hum

milne ka aap se kabhi mauqa nahin mila

milnā jo na ho tum ko to kah do na mileñge

ye kyā kabhī parsoñ hai kabhī kal hai kabhī aaj

milna jo na ho tum ko to kah do na milenge

ye kya kabhi parson hai kabhi kal hai kabhi aaj

ḳhudā ke Dar se ham tum ko ḳhudā to kah nahīñ sakte

magar lutf-e-ḳhudā qahr-e-ḳhudā shān-e-ḳhudā tum ho

KHuda ke Dar se hum tum ko KHuda to kah nahin sakte

magar lutf-e-KHuda qahr-e-KHuda shan-e-KHuda tum ho

mahfil meñ terī aa ke yuuñ be-ābrū hue

pahle the aap aap se tum tum se tū hue

mahfil mein teri aa ke yun be-abru hue

pahle the aap aap se tum tum se tu hue

ishq meñ kuchh nazar nahīñ aayā

jis taraf dekhiye añdherā hai

ishq mein kuchh nazar nahin aaya

jis taraf dekhiye andhera hai

dostī ko burā samajhte haiñ

kyā samajh hai vo kyā samajhte haiñ

dosti ko bura samajhte hain

kya samajh hai wo kya samajhte hain

vo ḳhudā.ī kar rahe the jab ḳhudā hone se qabl

to ḳhudā jaane kareñge kyā ḳhudā hone ke ba.ad

wo KHudai kar rahe the jab KHuda hone se qabl

to KHuda jaane karenge kya KHuda hone ke baad

dil ke do hisse jo kar Daale the husn-o-ishq ne

ek sahrā ban gayā aur ek gulshan ho gayā

dil ke do hisse jo kar Dale the husn-o-ishq ne

ek sahra ban gaya aur ek gulshan ho gaya

kahīñ na un kī nazar se nazar kisī kī laḌe

vo is lihāz se āñkheñ jhukā.e baiThe haiñ

kahin na un ki nazar se nazar kisi ki laDe

wo is lihaz se aankhen jhukae baiThe hain

lailā hai na majnūñ hai na shīrīñ hai na farhād

ab rah ga.e haiñ āshiq o ma.ashūq meñ ham aap

laila hai na majnun hai na shirin hai na farhad

ab rah gae hain aashiq o mashuq mein hum aap

barsoñ rahe haiñ aap hamārī nigāh meñ

ye kyā kahā ki ham tumheñ pahchānte nahīñ

barson rahe hain aap hamari nigah mein

ye kya kaha ki hum tumhein pahchante nahin

mujh ko ye fikr ki dil muft gayā hāthoñ se

un ko ye naaz ki ham ne use chhīnā kaisā

mujh ko ye fikr ki dil muft gaya hathon se

un ko ye naz ki hum ne use chhina kaisa

kah rahī hai ye tirī tasvīr bhī

maiñ kisī se bolne vaalī nahīñ

kah rahi hai ye teri taswir bhi

main kisi se bolne wali nahin

jigar kī choT uupar se kahīñ ma.alūm hotī hai

jigar kī choT uupar se nahīñ ma.alūm hotī hai

jigar ki choT upar se kahin malum hoti hai

jigar ki choT upar se nahin malum hoti hai

tūfān-e-nūh laane se ai chashm fā.eda

do ashk bhī bahut haiñ agar kuchh asar kareñ

tufan-e-nuh lane se ai chashm faeda

do ashk bhi bahut hain agar kuchh asar karen

vo haath meñ talvār liye sar pe khaḌe haiñ

marne nahīñ detī mujhe marne kī ḳhushī aaj

wo hath mein talwar liye sar pe khaDe hain

marne nahin deti mujhe marne ki KHushi aaj

na milo khul ke to chorī kī mulāqāt rahe

ham bulā.eñge tumheñ raat ga.e raat rahe

na milo khul ke to chori ki mulaqat rahe

hum bulaenge tumhein raat gae raat rahe

jab zikr kiyā maiñ ne kabhī vasl kā un se

vo kahne lage paak mohabbat hai baḌī chiiz

jab zikr kiya main ne kabhi wasl ka un se

wo kahne lage pak mohabbat hai baDi chiz

jo vaqt jā.egā vo palaT kar na aa.egā

din raat chāhiye sahar-o-shām kā lihāz

jo waqt jaega wo palaT kar na aaega

din raat chahiye sahar-o-sham ka lihaz

jo ahl-e-zauq haiñ vo lutf uThā lete haiñ chal phir kar

gulistāñ kā gulistāñ meñ bayābāñ kā bayābāñ meñ

jo ahl-e-zauq hain wo lutf uTha lete hain chal phir kar

gulistan ka gulistan mein bayaban ka bayaban mein

dil nazr karo zulm saho naaz uThāo

ai ahl-e-tamannā ye haiñ arkān-e-tamannā

dil nazr karo zulm saho naz uThao

ai ahl-e-tamanna ye hain arkan-e-tamanna

un se sab haal daġhābāz kahe dete haiñ

mere hamrāz mirā raaz kahe dete haiñ

un se sab haal daghabaz kahe dete hain

mere hamraaz mera raaz kahe dete hain

ashkoñ ke Tapakne par tasdīq huī us kī

be-shak vo nahīñ uThte āñkhoñ se jo girte haiñ

ashkon ke Tapakne par tasdiq hui us ki

be-shak wo nahin uThte aankhon se jo girte hain

kambaḳht kabhī jī se guzarne nahīñ detī

jiine kī tamannā mujhe marne nahīñ detī

kambaKHt kabhi ji se guzarne nahin deti

jine ki tamanna mujhe marne nahin deti

achchhe bure ko vo abhī pahchānte nahīñ

kamsin haiñ bhole-bhāle haiñ kuchh jānte nahīñ

achchhe bure ko wo abhi pahchante nahin

kamsin hain bhole-bhaale hain kuchh jaante nahin

satyanās ho gayā dil kā

ishq ne ḳhuub kī ukhāḌ-pachhāḌ

satyanas ho gaya dil ka

ishq ne KHub ki ukhaD-pachhaD

hameñ isrār milne par tumheñ inkār milne se

na tum maano na ham māneñ na ye kam ho na vo kam ho

hamein israr milne par tumhein inkar milne se

na tum mano na hum manen na ye kam ho na wo kam ho

aaj ā.eñge kal ā.eñge kal ā.eñge aaj ā.eñge

muddat se yahī vo kahte haiñ muddat se yahī ham sunte haiñ

aaj aaenge kal aaenge kal aaenge aaj aaenge

muddat se yahi wo kahte hain muddat se yahi hum sunte hain

be-vaj.h mohabbat se nahīñ bol rahe haiñ

vo bātoñ hī bātoñ meñ mujhe khol rahe haiñ

be-wajh mohabbat se nahin bol rahe hain

wo baaton hi baaton mein mujhe khol rahe hain

aate aate raah par vo ā.eñge

jaate jaate bad-gumānī jā.egī

aate aate rah par wo aaenge

jate jate bad-gumani jaegi

nuuh baiThe haiñ chārpā.ī par

chārpā.ī pe nuuh baiThe haiñ

nuh baiThe hain chaarpai par

chaarpai pe nuh baiThe hain

dil ko tum shauq se le jaao magar yaad rahe

ye na merā na tumhārā na kisī kā hogā

dil ko tum shauq se le jao magar yaad rahe

ye na mera na tumhaara na kisi ka hoga

allāh-re un ke husn kī mojiz-numā.iyāñ

jis baam par vo aa.eñ vahī koh-e-tūr ho

allah-re un ke husn ki mojiz-numaiyan

jis baam par wo aaen wahi koh-e-tur ho

saaqī jo dil se chāhe to aa.e vo zamāna

har shaḳhs ho sharābī har ghar sharāb-ḳhāna

saqi jo dil se chahe to aae wo zamana

har shaKHs ho sharabi har ghar sharab-KHana

ḳhaak ho kar hī ham pahuñch jaate

us taraf kī magar havā bhī nahīñ

KHak ho kar hi hum pahunch jate

us taraf ki magar hawa bhi nahin

sharmā ke bigaḌ ke muskurā kar

vo chhup rahe ik jhalak dikhā kar

sharma ke bigaD ke muskura kar

wo chhup rahe ek jhalak dikha kar

koī yahāñ se chal diyā raunaq-e-bām-o-dar nahīñ

dekh rahā huuñ ghar ko maiñ ghar hai magar vo ghar nahīñ

koi yahan se chal diya raunaq-e-baam-o-dar nahin

dekh raha hun ghar ko main ghar hai magar wo ghar nahin

vo baat kyā jo aur kī tahrīk se huī

vo kaam kyā jo ġhair kī imdād se huā

wo baat kya jo aur ki tahrik se hui

wo kaam kya jo ghair ki imdad se hua

un kā va.ada un kā paimāñ un kā iqrār un kā qaul

jitnī bāteñ haiñ hasīnoñ kī vo be-buniyād haiñ

un ka wada un ka paiman un ka iqrar un ka qaul

jitni baaten hain hasinon ki wo be-buniyaad hain

dil unheñ deñge magar ham deñge in shartoñ ke saath

aazmā kar jāñch kar sun kar samajh kar dekh kar

dil unhen denge magar hum denge in sharton ke sath

aazma kar jaanch kar sun kar samajh kar dekh kar

ye mere paas jo chup-chāp aa.e baiThe haiñ

hazār fitna-e-mahshar uThā.e baiThe haiñ

ye mere pas jo chup-chap aae baiThe hain

hazar fitna-e-mahshar uThae baiThe hain

ai 'nūh' tauba ishq se kar lī thī aap ne

phir tāñk-jhāñk kyuuñ hai ye phir dekh-bhāl kyā

ai 'nuh' tauba ishq se kar li thi aap ne

phir tank-jhank kyun hai ye phir dekh-bhaal kya

ġhair kā ishq hai ki merā hai

saaf kah do abhī saverā hai

ghair ka ishq hai ki mera hai

saf kah do abhi sawera hai

pāmāl ho ke bhī na uThā kū-e-yār se

maiñ us galī meñ sāya-e-dīvār ho gayā

pamal ho ke bhi na uTha ku-e-yar se

main us gali mein saya-e-diwar ho gaya

ka.aba ho ki but-ḳhāna ho ai hazrat-e-vā.iz

jā.eñge jidhar aap na jā.eñge udhar ham

kaba ho ki but-KHana ho ai hazrat-e-waiz

jaenge jidhar aap na jaenge udhar hum

bharī mahfil meñ un ko chheḌne kī kyā zarūrat thī

janāb-e-nūh tum sā bhī na koī be-adab hogā

bhari mahfil mein un ko chheDne ki kya zarurat thi

janab-e-nuh tum sa bhi na koi be-adab hoga

mujh ko nazroñ ke laḌāne se hai kaam

aap ko āñkheñ dikhāne se ġharaz

mujh ko nazron ke laDane se hai kaam

aap ko aankhen dikhane se gharaz

dūñgā javāb maiñ bhī baḌī shadd-o-mad ke saath

likkhā hai us ne mujh ko baḌe karr-o-farr se ḳhat

dunga jawab main bhi baDi shadd-o-mad ke sath

likkha hai us ne mujh ko baDe karr-o-farr se KHat