na jaane sher meñ kis dard kā havāla thā

ki jo bhī lafz thā vo dil dukhāne vaalā thā

na jaane sher mein kis dard ka hawala tha

ki jo bhi lafz tha wo dil dukhane wala tha

ghaas meñ jazb hue hoñge zamīñ ke aañsū

paañv rakhtā huuñ to halkī sī namī lagtī hai

ghas mein jazb hue honge zamin ke aansu

panw rakhta hun to halki si nami lagti hai

sach to kah duuñ magar is daur ke insānoñ ko

baat jo dil se nikaltī hai burī lagtī hai

sach to kah dun magar is daur ke insanon ko

baat jo dil se nikalti hai buri lagti hai

dar-ba-dar Thokareñ khā.īñ to ye mālūm huā

ghar kise kahte haiñ kyā chiiz hai be-ghar honā

dar-ba-dar Thokaren khain to ye malum hua

ghar kise kahte hain kya chiz hai be-ghar hona

nikal ga.e haiñ jo bādal barasne vaale the

ye shahr aab ko tarsegā chashm-e-tar ke baġhair

nikal gae hain jo baadal barasne wale the

ye shahr aab ko tarsega chashm-e-tar ke baghair

itnī kāvish bhī na kar merī asīrī ke liye

tū kahīñ merā giraftār na samjhā jaa.e

itni kawish bhi na kar meri asiri ke liye

tu kahin mera giraftar na samjha jae

us ek chehre meñ ābād the ka.ī chehre

us ek shaḳhs meñ kis kis ko dekhtā thā maiñ

us ek chehre mein aabaad the kai chehre

us ek shaKHs mein kis kis ko dekhta tha main

kisī ko kyā batā.ūñ kaun huuñ maiñ

ki apnī dāstāñ bhūlā huā huuñ

kisi ko kya bataun kaun hun main

ki apni dastan bhula hua hun

maiñ vo ma.anī-e-ġham-e-ishq huuñ jise harf harf likhā gayā

kabhī āñsuoñ kī bayāz meñ kabhī dil se le ke kitāb tak

main wo mani-e-gham-e-ishq hun jise harf harf likha gaya

kabhi aansuon ki bayaz mein kabhi dil se le ke kitab tak

kaun tū hai kaun maiñ kaisī vafā

hāsil-e-hastī haiñ kuchh rusvā.iyāñ

kaun tu hai kaun main kaisi wafa

hasil-e-hasti hain kuchh ruswaiyan

dukh de yā rusvā.ī de

ġham ko mire gahrā.ī de

dukh de ya ruswai de

gham ko mere gahrai de

chalī hai mauj meñ kāġhaz kī kashtī

use dariyā kā andāza nahīñ hai

chali hai mauj mein kaghaz ki kashti

use dariya ka andaza nahin hai

ḳhamoshī ke haiñ āñgan aur sannāTe kī dīvāreñ

ye kaise log haiñ jin ko gharoñ se Dar nahīñ lagtā

KHamoshi ke hain aangan aur sannaTe ki diwaren

ye kaise log hain jin ko gharon se Dar nahin lagta

devtā banñe kī hasrat meñ muallaq ho ga.e

ab zarā nīche utariye aadmī ban jā.iye

dewta banne ki hasrat mein muallaq ho gae

ab zara niche utariye aadmi ban jaiye

merā shor-e-ġharqābī ḳhatm ho gayā āḳhir

aur rah gayā baaqī sirf shor dariyā kā

mera shor-e-gharqabi KHatm ho gaya aaKHir

aur rah gaya baqi sirf shor dariya ka

mohalle vaale mere kār-e-be-masraf pe hañste haiñ

maiñ bachchoñ ke liye galiyoñ meñ ġhubbāre banātā huuñ

mohalle wale mere kar-e-be-masraf pe hanste hain

main bachchon ke liye galiyon mein ghubbare banata hun

manzil kā patā hai na kisī rāhguzar kā

bas ek thakan hai ki jo hāsil hai safar kā

manzil ka pata hai na kisi rahguzar ka

bas ek thakan hai ki jo hasil hai safar ka

koī nahīñ jo patā de diloñ kī hālat kā

ki saare shahr ke aḳhbār haiñ ḳhabar ke baġhair

koi nahin jo pata de dilon ki haalat ka

ki sare shahr ke aKHbar hain KHabar ke baghair

mujh se kahtā hai ki saa.e kī tarah saath haiñ ham

yuuñ na milne kā nikālā hai bahāna kaisā

mujh se kahta hai ki sae ki tarah sath hain hum

yun na milne ka nikala hai bahana kaisa

vo junūñ ko baḌhā.e jā.eñge

un kī shohrat hai merī rusvā.ī

wo junun ko baDhae jaenge

un ki shohrat hai meri ruswai

kaise qisse the ki chhiḌ jaa.eñ to uḌ jaatī thī niiñd

kyā ḳhabar thī vo bhī harf-e-muḳhtasar ho jā.eñge

kaise qisse the ki chhiD jaen to uD jati thi nind

kya KHabar thi wo bhi harf-e-muKHtasar ho jaenge

saath us ke rah sake na baġhair us ke rah sake

ye rabt hai charāġh kā kaisā havā ke saath

sath us ke rah sake na baghair us ke rah sake

ye rabt hai charagh ka kaisa hawa ke sath

saḳht biivī ko shikāyat hai javān-e-nau se

rail chaltī nahīñ gir jaatā hai pahle signal

saKHt biwi ko shikayat hai jawan-e-nau se

rail chalti nahin gir jata hai pahle signal

maiñ tujh ko kitnā chāhtā huuñ

ye kahnā ġhair-zarūrī hai

main tujh ko kitna chahta hun

ye kahna ghair-zaruri hai

yaad ne aa kar yakāyak parda khīñchā duur tak

maiñ bharī mahfil meñ baiThā thā ki tanhā ho gayā

yaad ne aa kar yakayak parda khincha dur tak

main bhari mahfil mein baiTha tha ki tanha ho gaya

nahīñ rahā maiñ tire rāste kā patthar bhī

vo din bhī the tire ehsās meñ ḳhudā thā maiñ

nahin raha main tere raste ka patthar bhi

wo din bhi the tere ehsas mein KHuda tha main

jitnā aañkh se kam dekhūñ

utnī duur dikhā.ī de

jitna aankh se kam dekhun

utni dur dikhai de

vo be-ḳhudī thī mohabbat kī be-ruḳhī to na thī

pe us ko tark-e-ta.alluq ko ik bahāna huā

wo be-KHudi thi mohabbat ki be-ruKHi to na thi

pe us ko tark-e-talluq ko ek bahana hua

maiñ ġham ko basā rahā huuñ dil meñ

be-ghar ko makān de rahā huuñ

main gham ko basa raha hun dil mein

be-ghar ko makan de raha hun

ye chāhā thā ki patthar ban ke jī luuñ

so andar se pighaltā jā rahā huuñ

ye chaha tha ki patthar ban ke ji lun

so andar se pighalta ja raha hun

ḳhud apnī diid se andhī haiñ āñkheñ

ḳhud apnī guuñj se bahrā huā huuñ

KHud apni did se andhi hain aankhen

KHud apni gunj se bahra hua hun

bār-hā yuuñ bhī huā terī mohabbat kī qasam

jaan kar ham ne tujhe ḳhud se ḳhafā rakkhā hai

bar-ha yun bhi hua teri mohabbat ki qasam

jaan kar hum ne tujhe KHud se KHafa rakkha hai

hāl-e-dil kaun sunā.e use fursat kis ko

sab ko is aañkh ne bātoñ meñ lagā rakkhā hai

haal-e-dil kaun sunae use fursat kis ko

sab ko is aankh ne baaton mein laga rakkha hai

ik patiñge ne ye apne raqs-e-āḳhir meñ kahā

raushnī ke saath rahiye raushnī ban jā.iye

ek patinge ne ye apne raqs-e-aKHir mein kaha

raushni ke sath rahiye raushni ban jaiye

saa.e ko saa.e meñ gum hote to dekhā hogā

ye bhī dekho ki tumheñ ham ne bhulāyā kaise

sae ko sae mein gum hote to dekha hoga

ye bhi dekho ki tumhein hum ne bhulaya kaise

bahut tavīl mirī dāstān-e-ġham thī magar

ġhazal se kaam liyā muḳhtasar banāne kā

bahut tawil meri dastan-e-gham thi magar

ghazal se kaam liya muKHtasar banane ka

hāl-e-dil nā-guftanī hai ham jo kahte bhī to kyā

phir bhī ġham ye hai ki us ne ham se pūchhā hī nahīñ

haal-e-dil na-guftani hai hum jo kahte bhi to kya

phir bhi gham ye hai ki us ne hum se puchha hi nahin

aa ke ab jañgal meñ ye uqda khulā

bheḌiye paḌhte nahīñ haiñ falsafa

aa ke ab jangal mein ye uqda khula

bheDiye paDhte nahin hain falsafa

qurb-e-badan se kam na hue dil ke fāsle

ik umr kaT ga.ī kisī nā-āshnā ke saath

qurb-e-badan se kam na hue dil ke fasle

ek umr kaT gai kisi na-ashna ke sath

safar meñ ishq ke ik aisā marhala aayā

vo DhūñDtā thā mujhe aur kho gayā thā maiñ

safar mein ishq ke ek aisa marhala aaya

wo DhunDta tha mujhe aur kho gaya tha main

ḳhush-numā lafzoñ kī rishvat de ke raazī kījiye

ruuh kī tauhīn par āmāda rahtā hai badan

KHush-numa lafzon ki rishwat de ke raazi kijiye

ruh ki tauhin par aamada rahta hai badan

libās-e-dard bhī ham ne utārā

ye kapḌe ab purāne ho chuke haiñ

libas-e-dard bhi hum ne utara

ye kapDe ab purane ho chuke hain

dil husn ko daan de rahā huuñ

gāhak ko dukān de rahā huuñ

dil husn ko dan de raha hun

gahak ko dukan de raha hun

ye nahīñ hai ki navāze na ga.e hoñ ham log

ham ko sarkār se tamġha milā rusvā.ī kā

ye nahin hai ki nawaze na gae hon hum log

hum ko sarkar se tamgha mila ruswai ka

maiñ us ko bhuul gayā thā vo yaad sā aayā

zamīñ hilī to maiñ samjhā ki zalzala aayā

main us ko bhul gaya tha wo yaad sa aaya

zamin hili to main samjha ki zalzala aaya

ye kaise log haiñ sadiyoñ kī vīrānī meñ rahte haiñ

inheñ kamroñ kī bosīda chhatoñ se Dar nahīñ lagtā

ye kaise log hain sadiyon ki virani mein rahte hain

inhen kamron ki bosida chhaton se Dar nahin lagta

ik aag sī jaltī rahī tā-umr lahū meñ

ham apne hī ehsās meñ pakte rahe tā-der

ek aag si jalti rahi ta-umr lahu mein

hum apne hi ehsas mein pakte rahe ta-der

haal mat pūchh mohabbat kā havā hai kuchh aur

lā ke kis ne ye sar-e-rāh diyā rakkhā hai

haal mat puchh mohabbat ka hawa hai kuchh aur

la ke kis ne ye sar-e-rah diya rakkha hai

jis aag se dil sulag rahe the

ab us se dimāġh jal rahe haiñ

jis aag se dil sulag rahe the

ab us se dimagh jal rahe hain

āñsuoñ se tū hai ḳhālī dard se aarī huuñ maiñ

terī āñkheñ kāñch kī haiñ merā dil patthar kā hai

aansuon se tu hai KHali dard se aari hun main

teri aankhen kanch ki hain mera dil patthar ka hai