sab kuchh to hai kyā DhūñDtī rahtī haiñ nigāheñ

kyā baat hai maiñ vaqt pe ghar kyuuñ nahīñ jaatā

sab kuchh to hai kya DhunDti rahti hain nigahen

kya baat hai main waqt pe ghar kyun nahin jata

ab ḳhushī hai na koī dard rulāne vaalā

ham ne apnā liyā har rañg zamāne vaalā

ab KHushi hai na koi dard rulane wala

hum ne apna liya har rang zamane wala

naqsha uThā ke koī nayā shahr DhūñDhiye

is shahr meñ to sab se mulāqāt ho ga.ī

naqsha uTha ke koi naya shahr DhunDhiye

is shahr mein to sab se mulaqat ho gai

apnī marzī se kahāñ apne safar ke ham haiñ

ruḳh havāoñ kā jidhar kā hai udhar ke ham haiñ

apni marzi se kahan apne safar ke hum hain

ruKH hawaon ka jidhar ka hai udhar ke hum hain

kuchh bhī bachā na kahne ko har baat ho ga.ī

aao kahīñ sharāb piyeñ raat ho ga.ī

kuchh bhi bacha na kahne ko har baat ho gai

aao kahin sharab piyen raat ho gai

har aadmī meñ hote haiñ das biis aadmī

jis ko bhī dekhnā ho ka.ī baar dekhnā

har aadmi mein hote hain das bis aadmi

jis ko bhi dekhna ho kai bar dekhna

ek mahfil meñ ka.ī mahfileñ hotī haiñ sharīk

jis ko bhī paas se dekhoge akelā hogā

ek mahfil mein kai mahfilen hoti hain sharik

jis ko bhi pas se dekhoge akela hoga

tum se chhuT kar bhī tumheñ bhūlnā āsān na thā

tum ko hī yaad kiyā tum ko bhulāne ke liye

tum se chhuT kar bhi tumhein bhulna aasan na tha

tum ko hi yaad kiya tum ko bhulane ke liye

dhuup meñ niklo ghaTāoñ meñ nahā kar dekho

zindagī kyā hai kitāboñ ko haTā kar dekho

dhup mein niklo ghaTaon mein naha kar dekho

zindagi kya hai kitabon ko haTa kar dekho

yahāñ kisī ko koī rāsta nahīñ detā

mujhe girā ke agar tum sambhal sako to chalo

yahan kisi ko koi rasta nahin deta

mujhe gira ke agar tum sambhal sako to chalo

bachchoñ ke chhoTe hāthoñ ko chāñd sitāre chhūne do

chaar kitābeñ paḌh kar ye bhī ham jaise ho jā.eñge

bachchon ke chhoTe hathon ko chand sitare chhune do

chaar kitaben paDh kar ye bhi hum jaise ho jaenge

ghar se masjid hai bahut duur chalo yuuñ kar leñ

kisī rote hue bachche ko hañsāyā jaa.e

ghar se masjid hai bahut dur chalo yun kar len

kisi rote hue bachche ko hansaya jae

kabhī kisī ko mukammal jahāñ nahīñ miltā

kahīñ zamīn kahīñ āsmāñ nahīñ miltā

kabhi kisi ko mukammal jahan nahin milta

kahin zamin kahin aasman nahin milta

kuchh log yūñhī shahr meñ ham se bhī ḳhafā haiñ

har ek se apnī bhī tabī.at nahīñ miltī

kuchh log yunhi shahr mein hum se bhi KHafa hain

har ek se apni bhi tabiat nahin milti

duniyā jise kahte haiñ jaadū kā khilaunā hai

mil jaa.e to miTTī hai kho jaa.e to sonā hai

duniya jise kahte hain jadu ka khilauna hai

mil jae to miTTi hai kho jae to sona hai

kuchh tabī.at hī milī thī aisī chain se jiine kī sūrat na huī

jis ko chāhā use apnā na sake jo milā us se mohabbat na huī

kuchh tabiat hi mili thi aisi chain se jine ki surat na hui

jis ko chaha use apna na sake jo mila us se mohabbat na hui

jitnī burī kahī jaatī hai utnī burī nahīñ hai duniyā

bachchoñ ke schōl meñ shāyad tum se milī nahīñ hai duniyā

jitni buri kahi jati hai utni buri nahin hai duniya

bachchon ke school mein shayad tum se mili nahin hai duniya

dushmanī laakh sahī ḳhatm na kiije rishta

dil mile yā na mile haath milāte rahiye

dushmani lakh sahi KHatm na kije rishta

dil mile ya na mile hath milate rahiye

koshish bhī kar umiid bhī rakh rāsta bhī chun

phir is ke ba.ad thoḌā muqaddar talāsh kar

koshish bhi kar umid bhi rakh rasta bhi chun

phir is ke baad thoDa muqaddar talash kar

us ke dushman haiñ bahut aadmī achchhā hogā

vo bhī merī hī tarah shahr meñ tanhā hogā

us ke dushman hain bahut aadmi achchha hoga

wo bhi meri hi tarah shahr mein tanha hoga