Sher on Ghar

mire ḳhudā mujhe itnā to mo'tabar kar de

maiñ jis makān meñ rahtā huuñ us ko ghar kar de

mere KHuda mujhe itna to mo'tabar kar de

main jis makan mein rahta hun us ko ghar kar de

tum parindoñ se ziyāda to nahīñ ho āzād

shaam hone ko hai ab ghar kī taraf lauT chalo

tum parindon se ziyaada to nahin ho aazad

sham hone ko hai ab ghar ki taraf lauT chalo

sab kuchh to hai kyā DhūñDtī rahtī haiñ nigāheñ

kyā baat hai maiñ vaqt pe ghar kyuuñ nahīñ jaatā

sab kuchh to hai kya DhunDti rahti hain nigahen

kya baat hai main waqt pe ghar kyun nahin jata

patā ab tak nahīñ badlā hamārā

vahī ghar hai vahī qissa hamārā

pata ab tak nahin badla hamara

wahi ghar hai wahi qissa hamara

ab kaun muntazir hai hamāre liye vahāñ

shaam aa ga.ī hai lauT ke ghar jaa.eñ ham to kyā

ab kaun muntazir hai hamare liye wahan

sham aa gai hai lauT ke ghar jaen hum to kya

ghar kī ta.amīr tasavvur hī meñ ho saktī hai

apne naqshe ke mutābiq ye zamīñ kuchh kam hai

ghar ki tamir tasawwur hi mein ho sakti hai

apne naqshe ke mutabiq ye zamin kuchh kam hai

dostoñ se mulāqāt kī shaam hai

ye sazā kaaT kar apne ghar jā.ūñgā

doston se mulaqat ki sham hai

ye saza kaT kar apne ghar jaunga

ab ghar bhī nahīñ ghar kī tamannā bhī nahīñ hai

muddat huī sochā thā ki ghar jā.eñge ik din

ab ghar bhi nahin ghar ki tamanna bhi nahin hai

muddat hui socha tha ki ghar jaenge ek din

gurez-pā hai nayā rāsta kidhar jaa.eñ

chalo ki lauT ke ham apne apne ghar jaa.eñ

gurez-pa hai naya rasta kidhar jaen

chalo ki lauT ke hum apne apne ghar jaen

koī vīrānī sī vīrānī hai

dasht ko dekh ke ghar yaad aayā

koi virani si virani hai

dasht ko dekh ke ghar yaad aaya

ye dasht vo hai jahāñ rāsta nahīñ miltā

abhī se lauT chalo ghar abhī ujālā hai

ye dasht wo hai jahan rasta nahin milta

abhi se lauT chalo ghar abhi ujala hai

mujhe bhī lamha-e-hijrat ne kar diyā taqsīm

nigāh ghar kī taraf hai qadam safar kī taraf

mujhe bhi lamha-e-hijrat ne kar diya taqsim

nigah ghar ki taraf hai qadam safar ki taraf

kabhī to shaam Dhale apne ghar ga.e hote

kisī kī aañkh meñ rah kar sañvar ga.e hote

kabhi to sham Dhale apne ghar gae hote

kisi ki aankh mein rah kar sanwar gae hote

koī bhī ghar meñ samajhtā na thā mire dukh sukh

ek ajnabī kī tarah maiñ ḳhud apne ghar meñ thā

koi bhi ghar mein samajhta na tha mere dukh sukh

ek ajnabi ki tarah main KHud apne ghar mein tha

dar-ba-dar Thokareñ khā.īñ to ye mālūm huā

ghar kise kahte haiñ kyā chiiz hai be-ghar honā

dar-ba-dar Thokaren khain to ye malum hua

ghar kise kahte hain kya chiz hai be-ghar hona

apnā ghar aane se pahle

itnī galiyāñ kyuuñ aatī haiñ

apna ghar aane se pahle

itni galiyan kyun aati hain

ghar kī vahshat se laraztā huuñ magar jaane kyuuñ

shaam hotī hai to ghar jaane ko jī chāhtā hai

ghar ki wahshat se larazta hun magar jaane kyun

sham hoti hai to ghar jaane ko ji chahta hai

makāñ hai qabr jise log ḳhud banāte haiñ

maiñ apne ghar meñ huuñ yā maiñ kisī mazār meñ huuñ

makan hai qabr jise log KHud banate hain

main apne ghar mein hun ya main kisi mazar mein hun

Dhalegī shaam jahāñ kuchh nazar na aa.egā

phir is ke ba.ad bahut yaad ghar kī aa.egī

Dhalegi sham jahan kuchh nazar na aaega

phir is ke baad bahut yaad ghar ki aaegi

pahle har chiiz thī apnī magar ab lagtā hai

apne hī ghar meñ kisī dūsre ghar ke ham haiñ

pahle har chiz thi apni magar ab lagta hai

apne hi ghar mein kisi dusre ghar ke hum hain

kis se pūchhūñ ki kahāñ gum huuñ ka.ī barsoñ se

har jagah DhūñDhtā phirtā hai mujhe ghar merā

kis se puchhun ki kahan gum hun kai barson se

har jagah DhunDhta phirta hai mujhe ghar mera

sunā hai shahr kā naqsha badal gayā 'mahfūz'

to chal ke ham bhī zarā apne ghar ko dekhte haiñ

suna hai shahr ka naqsha badal gaya 'mahfuz'

to chal ke hum bhi zara apne ghar ko dekhte hain

bhiiḌ ke ḳhauf se phir ghar kī taraf lauT aayā

ghar se jab shahr meñ tanhā.ī ke Dar se niklā

bhiD ke KHauf se phir ghar ki taraf lauT aaya

ghar se jab shahr mein tanhai ke Dar se nikla

tamām ḳhāna-ba-doshoñ meñ mushtarak hai ye baat

sab apne apne gharoñ ko palaT ke dekhte haiñ

tamam KHana-ba-doshon mein mushtarak hai ye baat

sab apne apne gharon ko palaT ke dekhte hain

'kaif' pardes meñ mat yaad karo apnā makāñ

ab ke bārish ne use toḌ girāyā hogā

'kaif' pardes mein mat yaad karo apna makan

ab ke barish ne use toD giraya hoga

us kī āñkhoñ meñ utar jaane ko jī chāhtā hai

shaam hotī hai to ghar jaane ko jī chāhtā hai

us ki aankhon mein utar jaane ko ji chahta hai

sham hoti hai to ghar jaane ko ji chahta hai

ham ne ghar kī salāmtī ke liye

ḳhud ko ghar se nikāl rakkhā hai

hum ne ghar ki salamti ke liye

KHud ko ghar se nikal rakkha hai

ab tak na ḳhabar thī mujhe ujḌe hue ghar kī

vo aa.e to ghar be-sar-o-sāmāñ nazar aayā

ab tak na KHabar thi mujhe ujDe hue ghar ki

wo aae to ghar be-sar-o-saman nazar aaya

kab aaoge ye ghar ne mujh se chalte vaqt pūchhā thā

yahī āvāz ab tak gūñjtī hai mere kānoñ meñ

kab aaoge ye ghar ne mujh se chalte waqt puchha tha

yahi aawaz ab tak gunjti hai mere kanon mein

un dinoñ ghar se ajab rishta thā

saare darvāze gale lagte the

un dinon ghar se ajab rishta tha

sare darwaze gale lagte the

andar andar khokhle ho jaate haiñ ghar

jab dīvāroñ meñ paanī bhar jaatā hai

andar andar khokhle ho jate hain ghar

jab diwaron mein pani bhar jata hai

ghar meñ kyā aayā ki mujh ko

dīvāroñ ne gher liyā hai

ghar mein kya aaya ki mujh ko

diwaron ne gher liya hai

ik ghar banā ke kitne jhameloñ meñ phañs ga.e

kitnā sukūn be-sar-o-sāmāniyoñ meñ thā

ek ghar bana ke kitne jhamelon mein phans gae

kitna sukun be-sar-o-samaniyon mein tha

shaam ko terā hañs kar milnā

din bhar kī ujrat hotī hai

sham ko tera hans kar milna

din bhar ki ujrat hoti hai

milā na ghar se nikal kar bhī chain ai 'zāhid'

khulī fazā meñ vahī zahr thā jo ghar meñ thā

mila na ghar se nikal kar bhi chain ai 'zahid'

khuli faza mein wahi zahr tha jo ghar mein tha

raat paḌe ghar jaanā hai

sub.h talak mar jaanā hai

raat paDe ghar jaana hai

subh talak mar jaana hai

dard-e-hijrat ke satā.e hue logoñ ko kahīñ

sāya-e-dar bhī nazar aa.e to ghar lagtā hai

dard-e-hijrat ke satae hue logon ko kahin

saya-e-dar bhi nazar aae to ghar lagta hai

vahāñ hamārā koī muntazir nahīñ phir bhī

hameñ na rok ki ghar jaanā chāhte haiñ ham

wahan hamara koi muntazir nahin phir bhi

hamein na rok ki ghar jaana chahte hain hum

ab yaad kabhī aa.e to ā.īne se pūchho

'mahbūb-ḳhizāñ' shaam ko ghar kyuuñ nahīñ jaate

ab yaad kabhi aae to aaine se puchho

'mahbub-KHizan' sham ko ghar kyun nahin jate

akelā us ko na chhoḌā jo ghar se niklā vo

har ik bahāne se maiñ us sanam ke saath rahā

akela us ko na chhoDa jo ghar se nikla wo

har ek bahane se main us sanam ke sath raha

maiñ apne ghar meñ huuñ ghar se ga.e huoñ kī tarah

mire hī sāmne hotā hai tazkira merā

main apne ghar mein hun ghar se gae huon ki tarah

mere hi samne hota hai tazkira mera

niiñd miTTī kī mahak sabze kī ThanDak

mujh ko apnā ghar bahut yaad aa rahā hai

nind miTTi ki mahak sabze ki ThanDak

mujh ko apna ghar bahut yaad aa raha hai

phir na.ī hijrat koī darpesh hai

ḳhvāb meñ ghar dekhnā achchhā nahīñ

phir nai hijrat koi darpesh hai

KHwab mein ghar dekhna achchha nahin

sharīfe ke daraḳhtoñ meñ chhupā ghar dekh letā huuñ

maiñ āñkheñ band kar ke ghar ke andar dekh letā huuñ

sharife ke daraKHton mein chhupa ghar dekh leta hun

main aankhen band kar ke ghar ke andar dekh leta hun

merī qismat hai ye āvāra-ḳhirāmī 'sājid'

dasht ko raah nikaltī hai na ghar aatā hai

meri qismat hai ye aawara-KHirami 'sajid'

dasht ko rah nikalti hai na ghar aata hai

na.ī nahīñ hai ye tanhā.ī mere hujre kī

maraz ho koī bhī hai chārāgar se Dar jaanā

nai nahin hai ye tanhai mere hujre ki

maraz ho koi bhi hai chaaragar se Dar jaana

marne ke ba.ad ḳhud hī bikhar jā.ūñgā kahīñ

ab qabr kyā banegī agar ghar nahīñ banā

marne ke baad KHud hi bikhar jaunga kahin

ab qabr kya banegi agar ghar nahin bana

zalzala aayā to dīvāroñ meñ dab jā.ūñgā

log bhī kahte haiñ ye ghar bhī Darātā hai mujhe

zalzala aaya to diwaron mein dab jaunga

log bhi kahte hain ye ghar bhi Daraata hai mujhe

ḳhud-baḳhud raah liye jaatī hai us kī jānib

ab kahāñ tak hai rasā.ī mujhe ma.alūm nahīñ

KHud-baKHud rah liye jati hai us ki jaanib

ab kahan tak hai rasai mujhe malum nahin

usī ne mujh pe uThā.e haiñ sañg jis ke liye

maiñ paash paash huā ghar nigār-ḳhāna huā

usi ne mujh pe uThae hain sang jis ke liye

main pash pash hua ghar nigar-KHana hua