kitne rishtoñ kā maiñ ne bharam rakh liyā

ik ta'alluq se dāman chhuḌāte hue

kitne rishton ka main ne bharam rakh liya

ek ta'alluq se daman chhuDate hue

ahvāl mere shor-e-salāsil ke sun rafīq

jaise ravāñ-davāñ koī dariyā qafas meñ hai

ahwal mere shor-e-salasil ke sun rafiq

jaise rawan-dawan koi dariya qafas mein hai

tum ne chunī hai raah jo hamvār hai bahut

zāhid tumhārī raah meñ patthar nahīñ koī

tum ne chuni hai rah jo hamwar hai bahut

zahid tumhaari rah mein patthar nahin koi

shāyad maiñ apne aap se ġhāfil na rah sakā

kuchh log merī zaat se mansūb ho ga.e

shayad main apne aap se ghafil na rah saka

kuchh log meri zat se mansub ho gae

ham aise baḳht ke maare ki shahr meñ aa kar

libās-e-gardish-e-daurāñ bhī taar taar kiyā

hum aise baKHt ke mare ki shahr mein aa kar

libas-e-gardish-e-dauran bhi tar tar kiya

qāfile meñ har ik fard muḳhtār hai

qāfila dekh lenā luTegā zarūr

qafile mein har ek fard muKHtar hai

qafila dekh lena luTega zarur

dil lagāne ko saarā jahāñ thā magar

sochtā kaun hai dil lagāte hue

dil lagane ko sara jahan tha magar

sochta kaun hai dil lagate hue

chupke chupke apne andar jaate haiñ

sahme sahme bāhar aanā paḌtā hai

chupke chupke apne andar jate hain

sahme sahme bahar aana paDta hai

gumān hone lagā hai ye kis ke hone par

kahīñ kahīñ jo nahīñ hai kahīñ kahīñ hai bahut

guman hone laga hai ye kis ke hone par

kahin kahin jo nahin hai kahin kahin hai bahut

ye kyā ki ek taal pe duniyā hai mahv-e-raqs

is gardish-e-kuhan ko na.e sub.h-o-shām de

ye kya ki ek tal pe duniya hai mahw-e-raqs

is gardish-e-kuhan ko nae subh-o-sham de

ye kaisī fasāhat ki samajh meñ nahīñ aatī

tahrīr-e-mohabbat zarā āsān likhā kar

ye kaisi fasahat ki samajh mein nahin aati

tahrir-e-mohabbat zara aasan likha kar

ham apne aap meñ rahte nahīñ haiñ dam bhar ko

hamāre vāste dīvār-o-dar kī zahmat kyā

hum apne aap mein rahte nahin hain dam bhar ko

hamare waste diwar-o-dar ki zahmat kya

maut bar-haq hai jab aa jaa.e hameñ kyā lekin

zindagī ham tirī raftār se Dar jaate haiñ

maut bar-haq hai jab aa jae hamein kya lekin

zindagi hum teri raftar se Dar jate hain

terī ḳhvāhish bhī na ho tujh se shikāyat bhī na ho

itnā ehsān mirī jaan nahīñ karnā thā

teri KHwahish bhi na ho tujh se shikayat bhi na ho

itna ehsan meri jaan nahin karna tha