gaahe gaahe kī mulāqāt hī achchhī hai 'amīr'

qadr kho detā hai har roz kā aanā jaanā

gahe gahe ki mulaqat hi achchhi hai 'amir'

qadr kho deta hai har roz ka aana jaana

vasl kā din aur itnā muḳhtasar

din gine jaate the is din ke liye

wasl ka din aur itna muKHtasar

din gine jate the is din ke liye

ḳhanjar chale kisī pe taḌapte haiñ ham 'amīr'

saare jahāñ kā dard hamāre jigar meñ hai

KHanjar chale kisi pe taDapte hain hum 'amir'

sare jahan ka dard hamare jigar mein hai

aafat to hai vo naaz bhī andāz bhī lekin

martā huuñ maiñ jis par vo adā aur hī kuchh hai

aafat to hai wo naz bhi andaz bhi lekin

marta hun main jis par wo ada aur hi kuchh hai

tiir khāne kī havas hai to jigar paidā kar

sarfaroshī kī tamannā hai to sar paidā kar

tir khane ki hawas hai to jigar paida kar

sarfaroshi ki tamanna hai to sar paida kar

kaun sī jā hai jahāñ jalva-e-māshūq nahīñ

shauq-e-dīdār agar hai to nazar paidā kar

kaun si ja hai jahan jalwa-e-mashuq nahin

shauq-e-didar agar hai to nazar paida kar

hañs ke farmāte haiñ vo dekh ke hālat merī

kyuuñ tum āsān samajhte the mohabbat merī

hans ke farmate hain wo dekh ke haalat meri

kyun tum aasan samajhte the mohabbat meri

āñkheñ dikhlāte ho joban to dikhāo sāhab

vo alag bāñdh ke rakkhā hai jo maal achchhā hai

aankhen dikhlate ho joban to dikhao sahab

wo alag bandh ke rakkha hai jo mal achchha hai

abhī aa.e abhī jaate ho jaldī kyā hai dam le lo

na chheḌūñgā maiñ jaisī chāhe tum mujh se qasam le lo

abhi aae abhi jate ho jaldi kya hai dam le lo

na chheDunga main jaisi chahe tum mujh se qasam le lo

firāq-e-yār ne bechain mujh ko raat bhar rakkhā

kabhī takiya idhar rakkhā kabhī takiya udhar rakkhā

firaq-e-yar ne bechain mujh ko raat bhar rakkha

kabhi takiya idhar rakkha kabhi takiya udhar rakkha

javāñ hone lage jab vo to ham se kar liyā parda

hayā yak-laḳht aa.ī aur shabāb āhista āhista

jawan hone lage jab wo to hum se kar liya parda

haya yak-laKHt aai aur shabab aahista aahista

maanī haiñ maiñ ne saikaḌoñ bāteñ tamām umr

aaj aap ek baat mirī maan jā.iye

mani hain main ne saikaDon baaten tamam umr

aaj aap ek baat meri man jaiye

tiir par tiir lagāo tumheñ Dar kis kā hai

siina kis kā hai mirī jaan jigar kis kā hai

tir par tir lagao tumhein Dar kis ka hai

sina kis ka hai meri jaan jigar kis ka hai

shab-e-furqat kā jaagā huuñ farishto ab to sone do

kabhī fursat meñ kar lenā hisāb āhista āhista

shab-e-furqat ka jaga hun farishto ab to sone do

kabhi fursat mein kar lena hisab aahista aahista

baaqī na dil meñ koī bhī yā rab havas rahe

chaudah baras ke sin meñ vo lākhoñ baras rahe

baqi na dil mein koi bhi ya rab hawas rahe

chaudah baras ke sin mein wo lakhon baras rahe

vasl ho jaa.e yahīñ hashr meñ kyā rakkhā hai

aaj kī baat ko kyuuñ kal pe uThā rakkhā hai

wasl ho jae yahin hashr mein kya rakkha hai

aaj ki baat ko kyun kal pe uTha rakkha hai

tujh se māñgūñ maiñ tujhī ko ki sabhī kuchh mil jaa.e

sau savāloñ se yahī ek savāl achchhā hai

tujh se mangun main tujhi ko ki sabhi kuchh mil jae

sau sawalon se yahi ek sawal achchha hai

putliyāñ tak bhī to phir jaatī haiñ dekho dam-e-naz.a

vaqt paḌtā hai to sab aañkh churā jaate haiñ

putliyan tak bhi to phir jati hain dekho dam-e-naza

waqt paDta hai to sab aankh chura jate hain

bāġhbāñ kaliyāñ hoñ halke rañg kī

bhejnī haiñ ek kam-sin ke liye

baghban kaliyan hon halke rang ki

bhejni hain ek kam-sin ke liye

shab-e-visāl bahut kam hai āsmāñ se kaho

ki joḌ de koī TukḌā shab-e-judā.ī kā

shab-e-visal bahut kam hai aasman se kaho

ki joD de koi TukDa shab-e-judai ka