تم زمانے کی راہ سے آئے

ورنہ سیدھا تھا راستہ دل کا

دوست ہر عیب چھپا لیتے ہیں

کوئی دشمن بھی ترا ہے کہ نہیں

کشتیاں ٹوٹ گئی ہیں ساری

اب لیے پھرتا ہے دریا ہم کو

باقیؔ جو چپ رہوگے تو اٹھیں گی انگلیاں

ہے بولنا بھی رسم جہاں بولتے رہو

ہر نئے حادثے پہ حیرانی

پہلے ہوتی تھی اب نہیں ہوتی

اس بدلتے ہوئے زمانے میں

تیرے قصے بھی کچھ پرانے لگے

رہنے دو کہ اب تم بھی مجھے پڑھ نہ سکو گے

برسات میں کاغذ کی طرح بھیگ گیا ہوں

زندگی کی بساط پر باقیؔ

موت کی ایک چال ہیں ہم لوگ

ایک پل میں وہاں سے ہم اٹھے

بیٹھنے میں جہاں زمانے لگے

دوستی خون جگر چاہتی ہے

کام مشکل ہے تو رستہ دیکھو

تم بھی الٹی الٹی باتیں پوچھتے ہو

ہم بھی کیسی کیسی قسمیں کھاتے ہیں

تیری ہر بات پہ چپ رہتے ہیں

ہم سا پتھر بھی کوئی کیا ہوگا

ہو گئے چپ ہمیں پاگل کہہ کر

جب کسی نے بھی نہ سمجھا ہم کو

راز سر بستہ ہے محفل تیری

جو سمجھ لے گا وہ تنہا ہوگا

وقت کے پاس ہیں کچھ تصویریں

کوئی ڈوبا ہے کہ ابھرا دیکھو

دل کو آنے لگا بسنے کا خیال

آگ جب گھر کو لگا دی ہم نے

دل میں جب بات نہیں رہ سکتی

کسی پتھر کو سنا دیتے ہیں

یوں بھی ہونے کا پتا دیتے ہیں

اپنی زنجیر ہلا دیتے ہیں

ہم کہ شعلہ بھی ہیں اور شبنم بھی

تو نے کس رنگ میں دیکھا ہم کو

تجھ کو دیکھا ترے وعدے دیکھے

اونچی دیوار کے لمبے سائے

ہائے وہ باتیں جو کہہ سکتے نہیں

اور تنہائی میں دہراتے ہیں ہم

کچھ نہ پا کر بھی مطمئن ہیں ہم

عشق میں ہاتھ کیا خزانے لگے

پہلے ہر بات پہ ہم سوچتے تھے

اب فقط ہاتھ اٹھا دیتے ہیں

یہی رستہ ہے اب یہی منزل

اب یہیں دل کسی بہانے لگے

کس سے پوچھیں کہ وہ انداز نظر

کب تبسم ہوا کب تیر ہوا

رنگ دل رنگ نظر یاد آیا

تیرے جلووں کا اثر یاد آیا

وقت کا پتھر بھاری ہوتا جاتا ہے

ہم مٹی کی صورت دیتے جاتے ہیں

تیرے غم سے تو سکون ملتا ہے

اپنے شعلوں نے جلایا ہم کو

ان کا یا اپنا تماشا دیکھو

جو دکھاتا ہے زمانہ دیکھو

ایک دیوار اٹھانے کے لیے

ایک دیوار گرا دیتے ہیں

ایک ہنستی ہوئی بدلی دیکھی

ایک جلتا ہوا گھر یاد آیا

آپ کو کارواں سے کیا مطلب

آپ تو میر کارواں ٹھہرے

دل کی دیوار گر گئی شاید

اپنی آواز کان میں آئی

خود فریبی سی خود فریبی ہے

پاس کے ڈھول بھی سہانے لگے

کان پڑتی نہیں آواز کوئی

دل میں وہ شور بپا ہے اپنا

بند کلیوں کی ادا کہتی ہے

بات کرنے کے ہیں سو پیرائے

ہر یاد ہر خیال ہے لفظوں کا سلسلہ

یہ محفل نوا ہے یہاں بولتے رہو

دنیا نے ہر بات میں کیا کیا رنگ بھرے

ہم سادہ اوراق الٹتے جاتے ہیں

اور جا جا کے عرض حال کرو

لو سلام و پیام سے بھی گئے

دوست ہر عیب چھپا لیتے ہیں

کوئی دشمن بھی ترا ہے کہ نہیں

آئے نہ پھر نظر کہیں جانے کدھر گئے

ان تک تو ساتھ گردش شام و سحر گئی