زندگی ہو تو کئی کام نکل آتے ہیں

یاد آؤں گا کبھی میں بھی ضرورت میں اسے

میں اکثر کھو سا جاتا ہوں گلی کوچوں کے جنگل میں

مگر پھر بھی ترے گھر کی نشانی یاد رکھتا ہوں

سب اپنے اپنے دیوں کے اسیر پائے گئے

میں چاند بن کے کئی آنگنوں میں اترا ہوں

مدت کے بعد آج میں آفس نہیں گیا

خود اپنے ساتھ بیٹھ کے دن بھر شراب پی

اک تعلق تھا جسے آگ لگا دی اس نے

اب مجھے دیکھ رہا ہے وہ دھواں ہوتے ہوئے

میں اک تھکا ہوا انسان اور کیا کرتا

طرح طرح کے تصور خدا سے باندھ لیے

سفید پوشیٔ دل کا بھرم بھی رکھنا ہے

تری خوشی کے لیے تیرا غم بھی رکھنا ہے

اب کون جا کے صاحب منبر سے یہ کہے

کیوں خون پی رہا ہے ستم گر شراب پی

میں ہی اپنی قید میں تھا اور میں ہی ایک دن

کر کے اپنے آپ کو آزاد لے جانے لگا

مرے وجود کو پرچھائیوں نے توڑ دیا

میں اک حصار تھا تنہائیوں نے توڑ دیا

مرے لیے نہ رک سکے تو کیا ہوا

جہاں کہیں ٹھہر گئے ہو خوش رہو

پرانے یار بھی آپس میں اب نہیں ملتے

نہ جانے کون کہاں دل لگا کے بیٹھ گیا

گزرتی ہے جو دل پر وہ کہانی یاد رکھتا ہوں

میں ہر گل رنگ چہرے کو زبانی یاد رکھتا ہوں

مثال شمع جلا ہوں دھواں سا بکھرا ہوں

میں انتظار کی ہر کیفیت سے گزرا ہوں

زیادہ دیر اسے دیکھنا بھی ہے فاضلؔ

اور اپنے آپ کو تھوڑا سا کم بھی رکھنا ہے

تم کبھی ایک نظر میری طرف بھی دیکھو

اک توقع ہی تو ہے کوئی گزارش تو نہیں

اس کاک ٹیل کا تو نشہ ہی کچھ اور ہے

غم کو خوشی کے ساتھ ملا کر شراب پی

میں اپنے آپ سے آگے نکلنے والا تھا

سو خود کو اپنی نظر سے گرا کے بیٹھ گیا

ہمارے کمرے میں اس کی یادیں نہیں ہیں فاضلؔ

کہیں کتابیں کہیں رسالے پڑے ہوئے ہیں