hayāt le ke chalo kā.enāt le ke chalo

chalo to saare zamāne ko saath le ke chalo

hayat le ke chalo kaenat le ke chalo

chalo to sare zamane ko sath le ke chalo

aap kī yaad aatī rahī raat bhar

chashm-e-nam muskurātī rahī raat bhar

aap ki yaad aati rahi raat bhar

chashm-e-nam muskuraati rahi raat bhar

ham ne hañs hañs ke tirī bazm meñ ai paikar-e-nāz

kitnī aahoñ ko chhupāyā hai tujhe kyā ma.alūm

hum ne hans hans ke teri bazm mein ai paikar-e-naz

kitni aahon ko chhupaya hai tujhe kya malum

ishq ke sho.ale ko bhaḌkāo ki kuchh raat kaTe

dil ke añgāre ko dahkāo ki kuchh raat kaTe

ishq ke shoale ko bhaDkao ki kuchh raat kaTe

dil ke angare ko dahkao ki kuchh raat kaTe

bazm se duur vo gaatā rahā tanhā tanhā

so gayā saaz pe sar rakh ke sahar se pahle

bazm se dur wo gata raha tanha tanha

so gaya saz pe sar rakh ke sahar se pahle

raat bhar dard kī sham.a jaltī rahī

ġham kī lau thartharātī rahī raat bhar

raat bhar dard ki shama jalti rahi

gham ki lau thartharaati rahi raat bhar

vasl hai un kī adā hijr hai un kā andāz

kaun sā rañg bharūñ ishq ke afsānoñ meñ

wasl hai un ki ada hijr hai un ka andaz

kaun sa rang bharun ishq ke afsanon mein

phir chhiḌī raat baat phūloñ kī

raat hai yā barāt phūloñ kī

phir chhiDi raat baat phulon ki

raat hai ya baraat phulon ki

hujūm-e-bāda-o-gul meñ hujūm-e-yārāñ meñ

kisī nigāh ne jhuk kar mire salām liye

hujum-e-baada-o-gul mein hujum-e-yaran mein

kisi nigah ne jhuk kar mere salam liye

ek thā shaḳhs zamāna thā ki dīvāna banā

ek afsāna thā afsāne se afsāna banā

ek tha shaKHs zamana tha ki diwana bana

ek afsana tha afsane se afsana bana

vo hindī naujavāñ ya.anī alam-bardār-e-āzādī

vatan kī pāsbāñ vo teġh-e-jauhar-dār-e-āzādī

wo hindi naujawan yani alam-bardar-e-azadi

watan ki pasban wo tegh-e-jauhar-dar-e-azadi

diip jalte haiñ diloñ meñ ki chitā jaltī hai

ab kī dīvālī meñ dekheñge ki kyā hotā hai

dip jalte hain dilon mein ki chita jalti hai

ab ki diwali mein dekhenge ki kya hota hai

ek jhoñkā tire pahlū kā mahaktī huī yaad

ek lamha tirī dildārī kā kyā kyā na banā

ek jhonka tere pahlu ka mahakti hui yaad

ek lamha teri dildari ka kya kya na bana

aaj ho jaane do har ek ko bad-mast-o-ḳharāb

aaj ek ek ko pilvāo ki kuchh raat kaTe

aaj ho jaane do har ek ko bad-mast-o-KHarab

aaj ek ek ko pilwao ki kuchh raat kaTe

na kisī aah kī āvāz na zanjīr kā shor

aaj kyā ho gayā zindāñ meñ ki zindāñ chup hai

na kisi aah ki aawaz na zanjir ka shor

aaj kya ho gaya zindan mein ki zindan chup hai

hijr meñ milne shab-e-māh ke ġham aa.e haiñ

chārasāzoñ ko bhī bulvāo ki kuchh raat kaTe

hijr mein milne shab-e-mah ke gham aae hain

chaarasazon ko bhi bulwao ki kuchh raat kaTe

shamīm-e-pairahan-e-yār kyā nisār kareñ

tujhī ko dil se lagā leñ tujhī ko pyaar kareñ

shamim-e-pairahan-e-yar kya nisar karen

tujhi ko dil se laga len tujhi ko pyar karen

chashm o ruḳhsār ke azkār ko jaarī rakkho

pyaar ke naame ko doharāo ki kuchh raat kaTe

chashm o ruKHsar ke azkar ko jari rakkho

pyar ke name ko doharao ki kuchh raat kaTe

saañs ruktī hai chhalakte hue paimāne meñ

koī letā thā tirā nām-e-vafā āḳhir-e-shab

sans rukti hai chhalakte hue paimane mein

koi leta tha tera nam-e-wafa aaKHir-e-shab

tumhāre jism kā sūraj jahāñ jahāñ TuuTā

vahīñ vahīñ mirī zanjīr-e-jāñ bhī TuuTī hai

tumhaare jism ka suraj jahan jahan TuTa

wahin wahin meri zanjir-e-jaan bhi TuTi hai

is shahr meñ ik āhū-e-ḳhush-chashm se ham ko

kam kam hī sahī nisbat-e-paimāna rahī hai

is shahr mein ek aahu-e-KHush-chashm se hum ko

kam kam hi sahi nisbat-e-paimana rahi hai

koh-e-ġham aur girāñ aur girāñ aur girāñ

ġham-zado teshe ko chamkāo ki kuchh raat kaTe

koh-e-gham aur giran aur giran aur giran

gham-zado teshe ko chamkao ki kuchh raat kaTe

ye tamannā hai ki uḌtī huī manzil kā ġhubār

sub.h ke parde meñ yaad aa ga.ī shaam āhista

ye tamanna hai ki uDti hui manzil ka ghubar

subh ke parde mein yaad aa gai sham aahista

manzileñ ishq kī āsāñ huiiñ chalte chalte

aur chamkā tirā naqsh-e-kaf-e-pā āḳhir-e-shab

manzilen ishq ki aasan huin chalte chalte

aur chamka tera naqsh-e-kaf-e-pa aaKHir-e-shab

kaise haiñ ḳhānqāh meñ arbāb-e-ḳhānqāh

kis haal meñ hai pīr-e-muġhāñ dekhte chaleñ

kaise hain KHanqah mein arbab-e-KHanqah

kis haal mein hai pir-e-mughan dekhte chalen