merī har shab isī ummīd meñ kaT jaatī hai

vo abhī aaya abhī merā muqaddar jaagā

meri har shab isi ummid mein kaT jati hai

wo abhi aaya abhi mera muqaddar jaga

taḌap rahā hai jo betāb ho ke zaḳhmoñ se

ye rāste meñ mire dil ke hū-bahū kyā hai

taDap raha hai jo betab ho ke zaKHmon se

ye raste mein mere dil ke hu-bahu kya hai

shāḳh par hoñ ki un ke juuḌe meñ

umr hai ek raat phūloñ kī

shaKH par hon ki un ke juDe mein

umr hai ek raat phulon ki

jo nahīñ hai vaqt kā ham-safar use sub.h-o-shām kī kyā ḳhabar

ho kisī kā vaqt pe kyā asar bhalā vaqt kis kā ġhulām hai

jo nahin hai waqt ka ham-safar use subh-o-sham ki kya KHabar

ho kisi ka waqt pe kya asar bhala waqt kis ka ghulam hai

tujhe bhulā ke bhī sadiyāñ bhulā nahīñ saktīñ

magar ye shart hai ḳhud meñ kamāl paidā kar

tujhe bhula ke bhi sadiyan bhula nahin saktin

magar ye shart hai KHud mein kamal paida kar

azīzo zindagī kī talḳhiyoñ se maiñ to baaz aaya

rafīqo aur jiine kī duā se choT lagtī hai

azizo zindagi ki talKHiyon se main to baz aaya

rafiqo aur jine ki dua se choT lagti hai

jin ke āñgan meñ nahīñ koī bhī rone vaalā

un gharoñ se bhī guzartā hai khilaune vaalā

jin ke aangan mein nahin koi bhi rone wala

un gharon se bhi guzarta hai khilaune wala

ham apnī hājatoñ kī ġhulāmī meñ aa ga.e

zindāñ kī bandishoñ se nikalnā na aa sakā

hum apni hajaton ki ghulami mein aa gae

zindan ki bandishon se nikalna na aa saka