jin ko nīñdoñ kī na ho chādar nasīb

un se ḳhvāboñ kā hasīñ bistar na maañg

jin ko nindon ki na ho chadar nasib

un se KHwabon ka hasin bistar na mang

jail se vāpas aa kar us ne pān.cho vaqt namāz paḌhī

muñh bhī band hue sab ke aur badnāmī bhī ḳhatm huī

jail se wapas aa kar us ne pancho waqt namaz paDhi

munh bhi band hue sab ke aur badnami bhi KHatm hui

jab bhī TuuTā mire ḳhvāboñ kā hasīñ tāj-mahal

maiñ ne ghabrā ke kahī 'mīr' ke lahje meñ ġhazal

jab bhi TuTa mere KHwabon ka hasin taj-mahal

main ne ghabra ke kahi 'mir' ke lahje mein ghazal

hādse raah ke zevar haiñ musāfir ke liye

ek Thokar jo lagī hai to irāda na badal

hadse rah ke zewar hain musafir ke liye

ek Thokar jo lagi hai to irada na badal

is bulandī pe bahut tanhā huuñ

kaash maiñ sab ke barābar hotā

is bulandi pe bahut tanha hun

kash main sab ke barabar hota

kaise mānūñ ki zamāne kī ḳhabar rakhtī hai

gardish-e-vaqt to bas mujh pe nazar rakhtī hai

kaise manun ki zamane ki KHabar rakhti hai

gardish-e-waqt to bas mujh pe nazar rakhti hai

ḳhatm ho jā.egā jis din bhī tumhārā intizār

ghar ke darvāze pe dastak chīḳhtī rah jā.egī

KHatm ho jaega jis din bhi tumhaara intizar

ghar ke darwaze pe dastak chiKHti rah jaegi

umr-bhar ko mujhe be-sadā kar gayā

terā ik baar muñh pher kar bolnā

umr-bhar ko mujhe be-sada kar gaya

tera ek bar munh pher kar bolna

tārīkiyoñ ne ḳhud ko milāyā hai dhuup meñ

saaya jo shaam kā nazar aaya hai dhuup meñ

tarikiyon ne KHud ko milaya hai dhup mein

saya jo sham ka nazar aaya hai dhup mein

kāñpte hoñT bhīgtī palkeñ

baat adhūrī hī chhoḌ detā huuñ

kanpte honT bhigti palken

baat adhuri hi chhoD deta hun

kaash aisā koī manzar hotā

mere kāñdhe pe tirā sar hotā

kash aisa koi manzar hota

mere kandhe pe tera sar hota

aadmī huuñ vasf-e-paiġhambar na maañg

mujh se mere dost merā sar na maañg

aadmi hun wasf-e-paighambar na mang

mujh se mere dost mera sar na mang

tamām din ke dukhoñ kā hisāb karnā hai

maiñ chāhtā huuñ koī mere ās-pās na ho

tamam din ke dukhon ka hisab karna hai

main chahta hun koi mere aas-pas na ho

dil bhī lahūluhān hai āñkheñ bhī haiñ udaas

shāyad anā ne shah-rag-e-jazbāt kaaT dī

dil bhi lahuluhan hai aankhen bhi hain udas

shayad ana ne shah-rag-e-jazbaat kaT di

us zāviye se dekhiye ā.īna-e-hayāt

jis zāviye se maiñ ne lagāyā hai dhuup meñ

us zawiye se dekhiye aaina-e-hayat

jis zawiye se main ne lagaya hai dhup mein

purāne ahd ke qisse sunātā rahtā hai

bachā huā hai jo būḌhā shajar hamārī taraf

purane ahd ke qisse sunata rahta hai

bacha hua hai jo buDha shajar hamari taraf

dhuup mujh ko jo liye phirtī hai saa.e saa.e

hai to āvāra magar zehn meñ ghar rakhtī hai

dhup mujh ko jo liye phirti hai sae sae

hai to aawara magar zehn mein ghar rakhti hai

kyā ḳhabar thī aa.egā ik roz aisā vaqt bhī

merī goyā.ī tirā muñh dekhtī rah jā.egī

kya KHabar thi aaega ek roz aisa waqt bhi

meri goyai tera munh dekhti rah jaegi

mire hunar kā use bhī na thā kuchh andāza

malāl ye hai use dūsrī shikast huī

mere hunar ka use bhi na tha kuchh andaza

malal ye hai use dusri shikast hui