Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "صلح"

Nazm MATCHES FOR "صلح"

Nazm

tu hindu banega na musalman banega

tuu amn kaa aur sulh kaa armaan banegaa
insaan kii aulaad hai insaan banegaa

Sahir Ludhianvi
Nazm

aurat march: taswir ka dusra ruKH

chalo sulh kar le.n
chalo apne bachcho.n kii aa.inda naslo.n kii KHaatir
mohabbat kii aa.inda faslo.n kii KHaatir
jhaga.Dnaa kare.n KHatm aur sulh kare.n
chale.n aaj shaana-ba-shaana na.ii zindagii ke na.e march me.n ham
ki jis me.n chalegii baraabar baraabar
tumhaarii bhii marzii
hamaarii bhii marzii

Rehman Faris
Nazm

bachchon ki tauba

ham ne bakrii ke bachcho.n ko kamro.n me.n nachaanaa chho.D diyaa
naaraaz na ho ammii ham ne har shauq puraanaa chho.D diyaa
daddy ke suiT pahan kar ham sofo.n par dance nahii.n karte
saare ghar kii buniyaado.n ko ab ham ne hilaanaa chho.D diyaa
daadaa abbaa kaa ab chashma bakre ko nahii.n pahnaate ham
naanaa abbaa kii laThiyaa ab ham ne chhupaanaa chho.D diyaa
bandar ko sehraa baa.ndh ke ham duulhaa na banaa.e.nge ammii
ab ghuu.nghaT kaa.Dh bandariyaa ko Dolii me.n biThaanaa chho.D diyaa
nadiyaa ke gahre paanii me.n khaa.e na ka.ii din se Gote
ghar hii me.n pa.De ab sa.Dte hai.n nadiyaa pe nahaanaa chho.D diyaa
ab sabr ke miiThe phal aahe.n bhar bhar kar khaate hai.n
maalan ko banaa baiThe KHaala maalii ko rulaanaa chho.D diyaa
ghar me.n baiThe saadhuu ban kar ab ilm kii maalaa japte hai.n
KHargosho.n ke piichhe jangal me.n kutto.n ko bhagaana chho.D diyaa
pinjro.n me.n band jo rahtii thii.n vo phir se u.Daa de.n sab chi.Diyaa.n
murGo.n me.n sulh karaate hai.n murGo.n ko la.Daanaa chho.D diyaa
ab ham ne kabhii khaanaa khaa kar kap.Do.n se haath nahii.n po.nchhe
dekho ka.ii din se dhobii ne ronaa chillaanaa chho.D diyaa
har ek baGaavat chho.Dii hai har ek sharaarat ruKHsat hai
ab ghar me.n farishte aate hai.n shaitaan ne aanaa chho.D diyaa
ham se phir bhii naaraaz ho kyo.n kyaa tum sautelii ammii ho
apne in pyaare bachcho.n ko ab mu.nh bhii lagaanaa chho.D diyaa
jin aa.nkho.n me.n roz sharaarat thii in aa.nkho.n me.n aa.nsuu ab dekho
in aap kii pyaarii aa.nkho.n ko ab ham ne rulaanaa chho.D diyaa
hai ghar kii fazaa sahmii sahmii Gamgiin hai.n bachcho.n ke chehre
kab ha.ns ke kahuu.ngii ai bachcho kyo.n ham ko sataanaa chho.D diyaa

Raja Mehdi Ali Khan
Nazm

janaze mein to aaoge na mere

kabhii mai.n zindagii kii naaz-bardaarii na kar paayaa
hamesha biich me.n haa.il rahaa ik KHvaab
paagal KHvaab
sote jaagte jo dekhtaa huu.n mai.n
ki sar hii sar janaaze me.n hai.n mere
aur mai.n baano.n kii na.ii ik chaarpaa.ii par sukuu.n ke saath leTaa ha.ns rahaa huu.n
ik aisii bhii.D par
jo mujh ko kaa.ndhaa dene ke liye aapas me.n jhag.Daa kar rahii hai
mujhe ye zindagii pairo.n-tale jitnaa kuchaltii hai
mirii is KHvaab se vaabastagii ba.Dhtii hii jaatii hai
mire jaise kisii gumnaam se ik shaKHs kii aa.nkho.n ne
aisaa KHvaab kyuu.n dekhaa
kahaa.n dekhaa
ye KHud mere liye bhii ik pahelii hai
magar ha.nsiye nahii.n is KHvaab par mere
miraa ye KHvaab hii to vo ka.Dii hai
jo mujh ko zindagii se jo.Dtii hai
na jaane kab se vo fahrist mai.n tayyaar karne lagaa huu.n
likhe hai.n naam jis me.n aise logo.n ke
janaaze me.n jinhe.n honaa hii honaa chaahiye mere
so un logo.n se rishte bhii
bahut hamvaar honaa chaahiye mere
mai.n ye bhii jaantaa huu.n
mujhe jis shaan se marne kii KHvaahish hai
vo mehnat maa.ngtii hai
kisii had tak bhii jhuk kar dushmano.n se
sulh kar lene kii himmat maa.ngtii hai
mohabbat maa.ngtii hai
du.aa.e.n maa.ngtaa huu.n zindagii kii is liye mai.n
ki mujh ko vo tho.Daa vaqt mil jaa.e
na.e rishte banaane kaa
ta.alluq gahre karne kaa
vagarna kyuu.n bhalaa aa.egaa ko.ii
maut ke din ghar pe mere
sanak kah lo ki paagal-pan
idhar aa kar mirii ye dhun yahaa.n tak ba.Dh ga.ii hai
ki ab mai.n dosto.n se
KHushii kii mahfilo.n me.n bhii ye aksar puuchh letaa huu.n
janaaze me.n to aa.oge na mere?
yahaa.n chaaho to ha.ns sakte ho mujh par
magar laashe pe to aa.nsuu bahaa.oge na mere?
vo ha.ns dete hai.n merii baat par
aur mai.n kahii.n andar se jaise TuuT jaataa huu.n
magar jab bhii kabhii aisaa hu.aa hai
janaaze ne mujhe kaa.ndhaa diyaa hai
mujhe jab bhii lagaa aisaa ki mai.n ab thak rahaa huu.n
gir rahaa huu.n
mire is KHvaab ne
mire apne janaaze ne mujhe kaa.ndhaa diyaa hai

Shariq Kaifi
Nazm

wahi jawan hai qabile ki aankh ka tara

وہي جواں ہے قبيلے کي آنکھ کا تارا
شباب جس کا ہے بے داغ ، ضرب ہے کاري
اگر ہو جنگ تو شيران غاب سے بڑھ کر
اگر ہو صلح تو رعنا غزال تاتاري
عجب نہيں ہے اگر اس کا سوز ہے ہمہ سوز
کہ نيستاں کے ليے بس ہے ايک چنگاري
خدا نے اس کو ديا ہے شکوہ سلطاني
کہ اس کے فقر ميں ہے حيدري و کراري
نگاہ کم سے نہ ديکھ اس کي بے کلاہي کو
يہ بے کلاہ ہے سرمايہ کلہ داري

Allama Iqbal
Nazm

hindi hindustani

kyaa milansaar hai mizaaj is kaa
sulh-juu.ii hai kaam-kaaj is kaa

Chandar Bhan Kaifi Dehelvi
Nazm

tarana-e-qaumi

jabki jaarii ho zabaano.n par ye kalma sub.h o shaam
naGma-haa-e-saaz se ba.Dh kar hai jo mojaz nizaam
ya.anii sulh-o-aashtii kaa de.n ham aapas me.n payaam
mushkile.n aasaan ho.n big.De hu.e ban jaa.e.n kaam
ruunumaa jis kii badaulat jalva-e-ummiid ho
duur zulmat ho dilo.n se aur ghar ghar iid ho

Safeer Kakorvi
Nazm

zarurat-e-ittihad

yaa KHudaa hind par karam farmaa
is kii takliif kal-adam farmaa
hai.n pareshaa.n bahut havaas is ke
nahii.n hamdard ko.ii paas is ke
faqr-o-faaqa se paa.emaal hai ab
qarz me.n is kaa baal baal hai ab
na hii san.at na ab tijaarat hai
saarii aasuudgii vo Gaarat hai
ilm-o-fan se hai is kaa ghar KHaalii
aql o idraak se hai sar KHaalii
achchhe atvaar miT ga.e is ke
nek kirdaar miT ga.e is ke
KHulq hai ab na mehr-o-ulfat hai
aatishii hai na ab uKHuvvat hai
ra.ng bilkul hai mulk kaa badlaa
saaraa paanii hai chaah kaa gadlaa
har taraf jahl hai la.Daa.ii hai
dushman aapas me.n bhaa.ii bhaa.ii hai
na mohabbat hai ab na hamdardii
na dilerii na ab javaa.n-mardii
na ravaa-daarii o sharaafat hai
na ab amn-o-amaan o raahat hai
har taraf hai fasaad ha.ngaama
ko.ii rustam hai aur ko.ii gaamaa
ab kahaa.n sulh-o-KHair kii baate.n
jab hai.n kaano.n me.n Gair kii baate.n
john-bill kii hai.n saazishe.n jaarii
mulk par hai.n navaazishe.n jaarii
ek se hai kabhii shanaasaa.ii
duusre ke liye kabhii saa.ii
kabhii in ko la.Daa diyaa sab se
kabhii un ko bhi.Daa diyaa sab se
kabhii in ko police o thaana hai
aur kabhii un ko jail-KHaana hai
yahii manzar yahaa.n hai shaam-o-sahar
bas yahii ho rahaa hai aaTh pahar
jaantaa hai har ik ye sab baate.n
phir bhii KHaalii nahii.n havaalaate.n
vahii ja.ng-o-jadal vahii jhag.De
vahii buGz-o-enaad ke rag.De
yaa KHudaa de hame.n vo aql-e-saliim
ki samajh ham sake.n har ik scheme
pa.D sake phir na ko.ii zad ham par
khul sake.n saare nek-o-bad ham par
KHatm kar de.n ye tafraqa-saazii
aag me.n jho.nk de.n tabar-yaazii
sab kare.n mil ke mulk kii KHidmat
duur ho is kii usrat-o-nakbat
hikmat o fan vatan me.n phailaa.e.n
shaahraahe.n masal kii khul jaa.e.n
ilm o science mulk me.n bhar de.n
is zamii.n ko ham aasmaa.n kar de.n
ham pe khul jaa.e.n sab vo aql ke raaz
ho is kaa europe ke turra-e-e.azaaz
san.ato.n kii ho garm-baazaarii
gaa.nv gaa.nv me.n ho.n mile.n jaarii
rail, motor, jahaaz, tayyaare
KHud ye tayaar ham kare.n saare
kabhii sahraa ho mustaqar apnaa
ho kabhii Taapuu.o.n me.n ghar apnaa
manchester pe KHaak Daale.nge
ghar se jaapaan ko nikaale.n ham
na rahe.n ham kisii ke bhii muhtaaj
mulk apnaa ho aur apnaa raaj
ham me.n gar ittihaad ho jaa.e
mulk aabaad shaad ho jaa.e

Ahmaq Phaphoondvi
Nazm

cigarette aur pan ka mukalima

sulh in dono.n kii aaKHir me.n karaa.ii mai.n ne
paan me.n Daal ke tambaakuu bhii khaa.ii mai.n ne
lab se cigarette ke jo chi.ngaarii u.Daa.ii mai.n ne
sher aur fikr kii sham.a us se jalaa.ii mai.n ne
paan se mai.n ne kahaa shaan tirii baalaa hai
tuu hai nausha to ye cigarette tiraa shahbaalaa hai

Syed Mohammad Jafri
Nazm

hisab-e-shab

mire liye yahii Gam hai.n yahii masaa.il hai.n
mai.n raa.egaa.n huu.n ki huu.n kaamraa.n nahii.n ma.aluum
yahii hai jurm miraa hai yahii KHataa merii
rahuu.n havaa kii tarah dasht-o-dar me.n aavaara
kabhii huu.n ja.ng pe naadim kabhii hai sulh se KHauf
ye ja.ng-o-sulh kaa mafhuum aaj-kal kyaa hai

Sahar Ansari
Nazm

gandhi

vo kitaab-e-sulh kaa sar-varaq ki miTaa.ii kashmakash-e-firaq
vo qatiil-e-KHanjar-e-sabr-o-haq ki vatan pe KHud ko miTaa diyaa

Iqbal Sohail
Nazm

siyah lahu

al-Garaz ik na ik Gam-e-gul-o-KHaar
falsafe kaa KHumaar ishq kaa baar
dil ko ik sub.h-o-shaam kaa aazaar
hasrat-e-sulh-o-hasrat-e-paikaar
said-e-ibliis-o-kushta-e-yazdaa.n

Mustafa Zaidi
Nazm

dua

yaa KHudaa ham ko aadmiyat de
mulk aur qaum kii mohabbat de
kar ataa is qadar tamiiz hame.n
ki ho apnaa vatan aziiz hame.n
is kii KHidmat ko faKHr jaane.n ham
is kii har baat dil se maane.n ham
phuuT aur iftiraaq kho de.n ham
paap kii naav ko Dubo de.n ham
hasad-o-kiina o KHusuumat o shar
kar de.n in me.n se sab ko mulk-badar
ek ho jaa.e.n sab KHavaas o avaam
na rahe Gairiyat kaa mulk hai.n naam
sulh o amn-o-amaa.n ho chaar taraf
aafiyat hukmaraa.n ho chaar taraf
ittihaad-e-amal se ho.n sab kaam
ko.ii daanaa rahe na banda-ए-daam
mulk ho Gair ke asar se paak
KHirman-e-jaur-o-ma.asiyat ho KHaak
ho ye viiraana Gairat-e-gulzaar
phir se aa.e vatan me.n taaza bahaar
paTTaa utre gale se la.anat kaa
KHatm ho daur faqr o zillat kaa

Ahmaq Phaphoondvi
Nazm

jahan dariya utarta hai

1
sarishk-e-KHuu.n ruKH-e-mazmuun pe chaltaa hai to ik rasta
nikaltaa hai
nadii dariyaa pe tham jaa.e
lahuu nuqte pe jam jaa.e to unvaan-e-safar Thahre
usii raste pe sarkash raushnii taaro.n me.n Dhaltii hai
usii nuqte kii suulii par payambar baat karte hai.n
mujhe chalnaa nahii.n aataa
shab-e-saakin kii KHaana-zaad tasviiro gavaahii do
fasiil-e-sub.h-e-mumkin par mujhe chalnaa nahii.n aataa
mire chashmo.n me.n shor-e-aab yakjaa bar-shakaalii hai
nadii maqruuz baadal kii
miraa dariyaa savaalii hai
rag-e-harf-e-zubuu.n me.n jo charaaG-e-KHuu.n safar me.n hai
abhii us nuqta-e-aaKHir ke ziine tak nahii.n aataa
jahaa.n jallaad kaa ghar hai
jahaa.n diivaar-e-sub.h-e-zaat ke raKHne se nigah-e-KHashmagii.n
baaruud kii chashmak Daraatii hai
jahaa.n suulii ke mimbar par payambar baat karte hai.n
2
ab in baato.n ke sikke jeb ke andar khanakte hai.n ki jin par
qasr-e-shaahii ke manaazir
aslaha-KHaano.n se jaarii hukm kunda hai.n
bhare baazaar me.n tifl-e-tahii-kiisa pareshaa.n hai ki us ke paa.nv
Taksaalo.n ke raste se abhii naa-aashnaa hai.n
aur us kaa baap guu.ngaa hai
nadii ruk ruk ke chaltii hai
takallum rehn rakhne se safar aasaa.n nahii.n hotaa
hu.aa paspaa jahaa.n paanii
jahaa.n maujo.n ne zanjiir-e-vafaa pahnii sipar girdaab kii rakh dii
alam rakhe qalam rakhe
KHafaa baadal ne jin paayaab dariyaa.o.n se mu.nh mo.Daa
jahaa.n taaraaj hai khetii
jahaa.n qarya uja.Dtaa hai
tanaab-e-raah kaTtii hai kahii.n KHema ukha.Dtaa hai
vahaa.n se duur hai nadii
vahaa.n se duur hai bachcha ki us ke paa.nv
dariyaa.o.n ke raste se abhii naa-aashnaa hai.n
aur us kaa baap guu.ngaa hai
use chalnaa nahii.n aataa
fasiil-e-sub.h-e-mumkin par use chalnaa nahii.n aataa
3
sahar ke paas hai.n mansuuKH sharte.n sulh-naame kii
sabaa dars-e-ziyaa.n-aamoz kii tafsiil rakhtii hai
kisii tamsiil me.n tum ho
kisii ijmaal me.n mai.n huu.n
kahii.n qirtaas KHaalii kaa vo be-unvaan saahil hai
jahaa.n aashuftagaan-e-adl ne hathiyaar Daale hai.n
bahut zaate.n hai.n sadmo.n kii
ka.ii hisse hai.n siine me.n nafas gum-karda lamhe ke
ka.ii tabqaat hai.n din ke
kahii.n sub.h-e-mukaafaat-e-suKHan ke mantaqe me.n tum muqayyad ho
kisii pichhle pahar ke sulh-naame kii adaalat me.n
ka.Dii sharto.n par apne dastaKHat ke ruu-ba-ruu mai.n huu.n
suno qirtaas-e-KHaalii ke sipar-andaaz saahil se
havaa kyaa baat kahtii hai
idhar us duusre saahil se jo mallaah aayaa hai
zamiine.n bechtii bastii se kyaa paiGaam laayaa hai
ko.ii ta.aziir kii dhamkii
ko.ii va.ada rihaa.ii kaa
ko.ii aa.nsuu
ko.ii chhuTTii

Akhtar Husain Jafri
Nazm

bachche baDon se behtar hain

ma.asuum farishta-paikar hai.n
ham bachche ba.Do.n se behtar hai.n
aapas me.n la.Daa.ii karte hai.n
phir sulh safaa.ii karte hai.n
dukh pahu.nche kisii se ham ko agar
milte hai.n dobaara phir hans kar
kuchh ham ko nahii.n hai KHauf-o-KHatar
rakhte hai.n bharosa allah par
dil saaf hamaare man sachche
ham yaksaa.n andar baahar se
ma.asuum farishto.n ke jaise
qaumo.n kii amaanat ham bachche
ham mustaqbil ke rahbar hai.n
ham bachche ba.Do.n se behtar hai.n
ho.n jin me.n KHasaa.il bachcho.n ke
vo rutbe paa.e.n valiyo.n ke

Bismillah Adeem
Nazm

shair ka dil

mudda.ii tuu ne abhii dekhaa nahii.n shaa.ir kaa dil
jalva-haa-e-rang-o-buu hote hai.n jis me.n muntaqil
dil nahii.n ik mustaqil aa.iina hai jazbaat kaa
aks khi.nch aataa hai jis me.n saare maujuudaat kaa
kaun shaa.ir jis kaa siina mahram-e-raaz-e-hayaat
kaun shaa.ir jis ke qaalib me.n hai ruuh-e-kaa.enaat
tarjumaan-e-kun-fakaa.n jis kaa lab-e-ejaaz hai
jis kii hastii par yahaa.n qudrat ko sau-sau naaz hai
kahiye jis kii quvvat-e-taKH.iil ko aafaaq-giir
arsh-o-farsh-o-kursii-o-lauh-o-qalam jis me.n asiir
sau tarah ke soz-e-pinhaa.n jis ke har ik saaz me.n
husn jaise karvaTe.n letaa hai KHvaab-e-naaz me.n
Dar use kyaa intiqaam-e-gardish-e-ayyaam se
jo yahaa.n vaaqif hai har aaGaaz se anjaam se
guu.njtaa hai zindagii kaa giit jis ke raag me.n
jo hamesha kuud pa.Dtaa hai paraa.ii aag me.n
jis kaa maz.hab amn-juu.ii jis kaa mashrab sulh-e-kul
jis ke naGmo.n kii lataafat hai javaab-e-barg-e-gul
jis kii tar-daamaaniyaa.n behtar hai.n zohd-e-KHushk se
fikr kii KHushbuu hai jis kii tez buu-e-mushk se
TuuTnaa koh-e-giraa.n kaa jis ke aage be-vaqaar
TuuT kar shiishe kaa Tuk.Daa jis ko kar de be-qaraar
ahl-e-zaahir kab samajh sakte hai.n ye raaz-o-niyaaz
ashk hai jis kaa vuzuu aur dard hai jis kii namaaz
Daal kar sho.alo.n me.n is ko ko.ii kar le is kii jaa.nch
jism to jal jaa.egaa par aa.egii dil par na aa.nch
zauq-e-irfaa.n hai tujhe to jaa kisii shaa.ir se mil
mudda.ii tuu ne abhii dekhaa nahii.n shaa.ir kaa dil

Amjad Najmi
Nazm

fasana-e-ibrat

ta.ajjub me.n huu.n dekh kar ra.ng-e-aalam
ilaahii ye kyaa aa gayaa hai zamaanaa
na pahlii sii vo mehr-o-ulfat kii baate.n
na aglaa saa chaahat kaa vo kaar-KHaana
jidhar dekhiye bas ta.assub, jihaalat
jahaa.n jaa.iye sirf la.Dnaa la.Daanaa
jo ta.aliim detaa hai ja.ng-o-jadal kii
vo hai intihaa.ii KHirad-mand-o-daanaa
jo talqiin kartaa hai sulh-o-safaa kii
vo hai tiir-e-zajr-o-jafaa kaa nishaanaa
na ma.aluum kab ye jihaalat miTegii
kab aa.egaa aish-o-KHushii kaa zamaanaa
mile.nge gale kab baham milne vaale
bajaa.egaa iqbaal kab shaadiyaana
bas ab chho.D do ye zide.n varna yaaro
jahaa.n me.n hai mushkil tumhaaraa Thikaanaa
rahoge yuu.nhii paa.emaal-e-jafaa tum
rahegaa yahii roz ronaa-rulaanaa
natiija ye hogaa ki ban jaa.oge tum
fanaa ho ke ik ibrato.n kaa fasaana
ye sab barkate.n ahl-e-england kii hai.n
karo jald unhe.n ab yahaa.n se ravaanaa

Ahmaq Phaphoondvi
Nazm

suKHan darmanda hai

mire mahbuub kaa va.ada
isii tishna sitaare ke ta.aaqub me.n suKHan apnaa falak mahtaab o anjum ke safiino.n se
bharaa dariyaa ga.nvaa baiThaa
masaafat satr se taa-satr kis suuraj pe tai hogii
ko.ii Tuk.Daa falak kaa haath aa.e to rajaz likkhe.n
du.aa ke baadbaa.n khole.n
kise kis ghaaT utarnaa hai?
kaho un se jo agle morcho.n se sulh kaa paiGaam dete hai.n
muqaabil lauh-e-mazmuun-e-tasallii bhii hai
lahn-e-KHud-girafta bhii
kise kis ghaaT utarnaa hai
saraab-e-ra.ng me.n mahv-e-safar un aahuvaan-e-naafaa-e-gum-karda se, kuchh puuchho
kise kis ghaaT utarnaa hai

Akhtar Husain Jafri
Nazm

waris

vo abnormal nahii.n thaa
sirf us ko normal ban.ne kii hasrat thii
ka.ii KHaano.n me.n us kii zindagii baTne lagii thii
vo apnii koshish-e-naa-mo'tabar se ta.ng aa kar
niim-jaa.n ho kar
ek KHaane me.n panah lene lagaa thaa
banii aamaat-gaah-e-tiir-e-nafrat shaKHsiyat us kii
use bhii KHud se nafrat ho chukii thii
magar is nafrat-e-maanuus kii takraar se us ne
durusht o naa-muvaafiq zindagii se sulh kar lii thii
yahii thaa kiisa-e-aKHlaaq us kaa
Gariibii ne sharaafat chhiin lii thii
aur us kii shaKHsiyat ke pairahan me.n
guhar-baaro.n ke badle sa.ng-reze ja.D diye the
vo abnormal nahii.n thaa
magar ab us me.n KHud ko normal karne kaa yaaraa bhii nahii.n thaa
use ab ye gavaaraa bhii nahii.n thaa
galii-kuucho.n kii saarii gandagii kaa
tiirgii kaa
vo ab haqdaar vaaris ban chukaa thaa

Akbar Hyderabadi
Nazm

laxman-rekha

raavano.n me.n sulh-juu.ii ke liye
behad zaruurii chiiz hai,
laxman kii rekhaa

Muzaffar Hanfi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now