Search result for ".rvti" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".rvti"

Nazm MATCHES FOR ".rvti"

Nazm

daraKHt-e-zard

na jaane aariba kyuu.n aa.e kyuu.n musta.araba aa.e
muzir ke log to chhaane hii vaale the so vo chhaa.e
mire jad haashim-e-aalii ga.e gazza me.n dafnaa.e
mai.n naaqe ko pilaa.uu.ngaa mujhe vaa.n tak vo le jaa.e
liduu lilmauti vabnuu lilhizaabi san KHaraabaatii
vo mard-e-uus kahtaa hai haqiiqat hai KHuraafaatii
ye zaalim tiisraa paig ik aqaaniimii bidaayat hai
uluuhii harzaa-farmaa.ii kaa sirr-e-tuur-e-luknat hai
bhalaa huurab kii jhaa.Dii kaa vo ramz-e-aatishii.n kyaa thaa
magar huurab kii jhaa.Dii kyaa ye kis se kis kii nisbat hai
ye nisbat ke bahut se qaafiye hai.n hai gilaa is kaa
magar tujh ko to yaaraa! qaafiyo.n kii be-tarah lat hai
gumaa.n ye hai ki shaayad bahr se KHaarij nahii.n huu.n mai.n
zaraa bhii haal ke aaha.ng me.n haarij nahii.n huu.n
tanaa-tan tan tanaa-tan tan tanaa-tan tan tanaa-tan tan
tanaa-tan tan nahii.n mehnat-kasho.n kaa tan na pairaahan
na pairaahan na puurii aadhii roTii ab rahaa saalan
ye saale kuchh bhii khaane ko na paa.e.n gaaliyaa.n khaa.e.n
hai in kii be-hisii me.n to muqaddas-tar haraamii-pan

Jaun Eliya

Nazm

ai sharif insano

tank aage ba.Dhe.n ki pichhe haTe.n
kokh dhartii kii baa.njh hotii hai
fat.h kaa jashn ho ki haar kaa sog
zindagii mayyato.n pe rotii hai

Sahir Ludhianvi

Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal

Nazm

kutte

na aaraam shab ko na raahat savere
Galaazat me.n ghar naaliyo.n me.n basere
jo big.De.n to ik duusre ko la.Daa do
zaraa ek roTii kaa Tuk.Daa dikhaa do
ye har ek kii Thokare.n khaane vaale
ye faaqo.n se uktaa ke mar jaane vaale
ye mazluum maKHluuq gar sar uThaa.e
to insaan sab sar-kashii bhuul jaa.e
ye chaahe.n to duniyaa ko apnaa banaa le.n
ye aaqaa.o.n kii haDDiyaa.n tak chabaa le.n
ko.ii in ko ehsaas-e-zillat dilaa de
ko.ii in kii so.ii hu.ii dum hilaa de

Faiz Ahmad Faiz

Nazm

KHizr-e-rah

banda-e-mazduur ko jaa kar miraa paiGaam de
KHizr kaa paiGaam kyaa hai ye payaam-e-kaa.enaat
ai ki tujh ko khaa gayaa sarmaaya-daar-e-hiila-gar
shaaKH-e-aahuu par rahii sadiyo.n talak terii baraat
dast-e-daulat-aafrii.n ko muzd yuu.n miltii rahii
ahl-e-sarvat jaise dete hai.n Gariibo.n ko zakaat
saahir-al-muut ne tujh ko diyaa barg-e-hashiish
aur tuu ai be-KHabar samjhaa use shaaKH-e-nabaat
nasl qaumiyat kaliisaa saltanat tahziib rang
KHvaajgii ne KHuub chun chun ke banaa.e muskiraat
kaT maraa naadaa.n KHayaalii devtaa.o.n ke liye
sukr kii lazzat me.n tuu luTvaa gayaa naqd-e-hayaat
makr kii chaalo.n se baazii le gayaa sarmaaya-daar
intihaa-e-saadgii se khaa gayaa mazduur maat
uTh ki ab bazm-e-jahaa.n kaa aur hii andaaz hai
mashriq-o-maGrib me.n tere daur kaa aaGaaz hai
himmat-e-aalii to dariyaa bhii nahii.n kartii qubuul
Guncha saa.n Gaafil tire daaman me.n shabnam kab talak
naGma-e-bedaarii-e-jamhuur hai saamaan-e-'aish
qissa-e-KHvaab-aavar askandar-o-jam kab talak
aaftaab-e-taaza paidaa batn-e-giitii se hu.aa
aasmaan Duube hu.e taaro.n kaa maatam kab talak
to.D Daalii.n fitrat-e-insaa.n ne zanjiire.n tamaam
duurii-e-jannat se rotii chashm-e-aadam kab talak
baaGbaan-e-chaara-farmaa se ye kahtii hai bahaar
zaKHm-e-gul ke vaaste tadbiir-e-marham kab talak
kirmak-e-naadaa.n tavaaf-e-sham.a se aazaad ho
apnii fitrat ke tajallii-zaar me.n aabaad ho
duniyaa-e-islaam

Allama Iqbal

Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal

Nazm

duri

ab vo KHvaab me.n dulhan ban kar
mere paas chalii aatii hai
mai.n us ko taktaa rahtaa huu.n
lekin vo rotii jaatii hai

Muneer Niyazi

Nazm

ye bachcha kis ka bachcha hai

ye bachcha kis kaa bachcha hai
ye bachcha kaisaa bachcha hai
jo ret pe tanhaa baiThaa hai
naa is ke peT me.n roTii hai
naa is ke tan par kap.Daa hai
naa is ke sar par Topii hai
naa is ke pair me.n juutaa hai
naa is ke paas khilauno.n me.n
ko.ii bhaaluu hai, ko.ii gho.Daa hai
naa is kaa jii bahlaane ko
ko.ii lorii hai, ko.ii jhuulaa hai
naa is kii jeb me.n dhelaa hai
naa is ke haath me.n paisaa hai
naa is ke ammii abbuu hai.n
naa is kii aapaa KHaalaa hai

Ibn۔e۔Insha

Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi

Nazm

clerk ka naghma-e-mohabbat

sab raat mirii sapno.n me.n guzar jaatii hai aur mai.n sotaa huu.n
phir sub.h kii devii aatii hai
apne bistar se uThtaa huu.n mu.nh dhotaa huu.n
laayaa thaa kal jo double-roTii
us me.n se aadhii khaa.ii thii
baaqii jo bachii vo meraa aaj kaa naashta hai

Meeraji

Nazm

roTiyan

jab aadmii ke peT me.n aatii hai.n roTiyaa.n
phuulii nahii.n badan me.n samaatii hai.n roTiyaa.n
aa.nkhe.n parii-ruKHo.n se la.Daatii hai.n roTiyaa.n
siine upar bhii haath chalaatii hai.n roTiyaa.n
jitne maze hai.n sab ye dikhaatii hai.n roTiyaa.n
roTii se jis kaa naak talak peT hai bharaa
kartaa pare hai kyaa vo uchhal kuud jaa-ba-jaa
diivaar phaa.nd kar ko.ii koThaa uchhal gayaa
ThaTThaa ha.nsii sharaab sanam saaqii is sivaa
sau sau tarah kii dhuum machaatii hai.n roTiyaa.n
jis jaa pe haa.nDii chuulhaa tavaa aur tanuur hai
KHaaliq kii qudrato.n kaa usii jaa zuhuur hai
chuulhe ke aage aa.nch jo chaltii huzuur hai
jitne hai.n nuur sab me.n yahii KHaas nuur hai
is nuur ke sabab nazar aatii hai.n roTiyaa.n
aave tave tanuur kaa jis jaa zabaa.n pe naam
yaa chakkii chuulhe ke jahaa.n gulzaar ho.n tamaam
vaa.n sar jhukaa ke kiije Da.nDvat aur salaam
is vaaste ki KHaas ye roTii ke hai.n maqaam
pahle inhii.n makaano.n me.n aatii hai.n roTiyaa.n
in roTiyo.n ke nuur se sab dil hai.n bor bor
aaTaa nahii.n hai chhalnii se chhan-chhan gire hai nuur
pe.Daa har ek us kaa hai barfii o motii chuur
hargiz kisii tarah na bujhe peT kaa tanuur
is aag ko magar ye bujhaatii hai.n roTiyaa.n
puuchhaa kasii ne ye kisii kaamil faqiir se
ye mehr-o-maah haq ne banaa.e hai.n kaahe ke
vo sun ke bolaa baabaa KHudaa tujh ko KHair de
ham to na chaa.nd samjhe.n na suuraj hai.n jaante
baabaa hame.n to ye nazar aatii hai.n roTiyaa.n
phir puuchhaa us ne kahiye ye hai dil kaa tuur kyaa
is ke mushaahide me.n hai khultaa zuhuur kyaa
vo bolaa sun ke teraa gayaa hai shu.uur kyaa
kashf-ul-quluub aur ye kashf-ul-qubuur kyaa
jitne hai.n kashf sab ye dikhaatii hai.n roTiyaa.n
roTii jab aa.ii peT me.n sau qand ghul ga.e
gulzaar phuule aa.nkho.n me.n aur aish tul ga.e
do tar nivaale peT me.n jab aa ke Dhul ga.e
chaudah tabaq ke jitne the sab bhed khul ga.e
ye kashf ye kamaal dikhaatii hai.n roTiyaa.n
roTii na peT me.n ho to phir kuchh jatan na ho
mele kii sair KHvaahish-e-baaG-o-chaman na ho
bhuuke Gariib dil kii KHudaa se lagan na ho
sach hai kahaa kasii ne ki bhuuke bhajan na ho
allaah kii bhii yaad dilaatii hai.n roTiyaa.n
ab aage jis ke maal-puu.e bhar ke thaal hai.n
puure bhagat unhe.n kaho saahab ke laal hai.n
aur jin ke aage roGnii aur shiir-maal hai.n
aarif vahii hai.n aur vahii saahab-kamaal hai.n
pakkii-pakaa.ii ab jinhe.n aatii hai.n roTiyaa.n
kap.De kisii ke laal hai.n roTii ke vaaste
lambe kisii ke baal hai.n roTii ke vaaste
baa.ndhe ko.ii rumaal hai.n roTii ke vaaste
sab kashf aur kamaal hai.n roTii ke vaaste
jitne hai.n ruup sab ye dikhaatii hai.n roTiyaa.n
roTii se naache pyaada qavaa.ed dikhaa dikhaa
asvaar naache gho.De ko kaava lagaa lagaa
ghu.nghruu ko baa.ndhe paik bhii phirtaa hai naachtaa
aur is sivaa jo Gaur se dekhaa to jaa-ba-jaa
sau sau tarah ke naach dikhaatii hai.n roTiyaa.n
roTii ke naach to hai.n sabhii KHalq me.n pa.De
kuchh bhaa.nD bhiigte ye nahii.n phirte naachte
ye ranDiyaa.n jo naache hai.n ghuu.nghaT ko mu.nh pe le
ghuu.nghaT na jaano dosto tum ziinhaar use
is parde me.n ye apne kamaatii hai.n roTiyaa.n
ashraafo.n ne jo apnii ye zaate.n chhupaa.ii hai.n
sach puuchhiye to apnii ye shaane.n ba.Dhaa.ii hai.n
kahiye unho.n kii roTiyaa.n kis kis ne khaa.ii hai.n
ashraaf sab me.n kahiye to ab naan-baa.ii hai.n
jin kii dukaa.n se har kahii.n jaatii hai.n roTiyaa.n
duniyaa me.n ab badii na kahii.n aur niko.ii hai
yaa dushmanii o dostii yaa tund-KHuu.ii hai
ko.ii kisii kaa aur kisii kaa na ko.ii hai
sab ko.ii hai usii kaa ki jis haath Do.ii hai
naukar nafar Gulaam banaatii hai.n roTiyaa.n
roTii kaa ab azal se hamaaraa to hai KHamiir
ruukhii hii roTii haq me.n hamaare hai shahd-o-shiir
yaa patlii hove moTii KHamiirii ho yaa fatiir
gehuu.n javaar baajre kii jaisii ho 'naziir'
ham ko to sab tarah kii KHush aatii hai.n roTiyaa.n

Nazeer Akbarabadi

Nazm

ek aur raat

raat chup-chaap dabe paa.nv chale jaatii hai
raat KHaamosh hai rotii nahii.n ha.nstii bhii nahii.n
kaa.nch kaa niilaa saa gumbad hai u.Daa jaataa hai
KHaalii KHaalii ko.ii bajraa saa bahaa jaataa hai

Gulzar

Nazm

manzil

mai.n rango.n me.n huu.n kabhii brush me.n
kabhii canvas pe sajii huu.n mai.n
mai.n qaus-e-quzah huu.n huruuf kii
alfaaz kii ik la.Dii huu.n mai.n
mujhe KHud bhii apnaa pataa nahii.n
mai.n kahaa.n nahii.n aur kahaa.n huu.n mai.n
ab talaash karne se faa.eda
mai.n jo mil bhii jaa.uu.n to kyaa bhalaa
phir bhii ek KHalish sii hai
terii justujuu sub.h shaam hai
ye jo KHvaahishe.n hai.n fuzuul sii
ik 'umr se mire saath hai.n
jo mai.n daaman in se chhu.Daa sakuu.n
to sukuu.n tasavvuf me.n paa sakuu.n
magar shaffaaf parde tasavvuf ke hai.n
mujhe kis tarah se chhupaa.e.nge
mujhe qaid karnaa muhaal hai
mai.n magan huu.n apnii hii zaat me.n
kaun-o-makaa.n se be-KHabar
mujhe aarzuu thii kabhii mile
ko.ii raaz-daa.n ko.ii ham-navaa
magar kabhii ko.ii aisaa milaa nahii.n
jahaa.n ro sakuu.n kabhii rakh ke sar
jo milaa vo apnaa hii kaa.ndhaa hai
jahaa.n roTii huu.n mai.n jhukaa ke sar
mai.n muhiib raat kaa pahar huu.n
nahii.n sahar mere nasiib me.n
ye sahar terii hai to rakh ise
mai.n to sahar se bahut duur huu.n
mai.n na haath ab kabhii aa.uu.ngii
mujhe Dhuu.nDhnaa bhii fuzuul hai
ye jo raaste hai.n chahaar-suu
le jaa.e.nge mujhe kuu-ba-kuu
bahut manzile.n hai.n yahaa.n vahaa.n
merii manzil in me.n
ko.ii nahii.n
haa.n merii manzil nahii.n ko.ii
mai.n to apnii manzil aap huu.n

Fauzia Mughal

Nazm

bhuk

har taraf a.ndheraa hai
ghaaT par akelaa huu.n
sii.Dhiyaa.n hai.n patthar kii
sii.Dhiyo.n pe leTaa huu.n
ab mai.n uTh nahii.n saktaa
aasmaa.n ko taktaa huu.n
aasmaa.n ko thaalii me.n
chaa.nd ek roTii hai
jhuk rahii hai.n ab palke.n
Duubtaa hai ye manzar
hai zamiin gardish me.n
mere ghar me.n chuulhaa thaa
roz khaanaa paktaa thaa
roTiyaa.n sunahrii hai.n
garm garm ye khaanaa
khul nahii.n rahii aa.nkhe.n
kyaa mai.n marne vaalaa huu.n
maa.n ajiib thii merii
roz apne haatho.n se
mujh ko vo khilaatii thii
kaun sard haatho.n se
chhuu rahaa hai chehre ko
ik nivaalaa haathii kaa
ik nivaalaa gho.De kaa
ik nivaalaa bhaaluu kaa
maut hai ki be-hoshii
jo bhii Ganiimat hai
maut hai ki be-hoshii
jo bhii hai Ganiimat hai
aaj tiisraa din thaa.......... aaj tiisraa din thaa

Javed Akhtar

Nazm

haqiqat

titlii jugnuu rang-o-KHushbuu
gul-o-bulbul jaise
isti'aare nahii.n hai.n paas mire
kyuu.nke mai.n ne
sisaktii sulagtii ta.Daptii hu.ii
zindagii ko dekhaa hai
khulii aa.nkh se
mai.n ne dekhii hai
lahuu se tar sa.Dke.n
mai.n ne dekhe hai.n general ward me.n
bebasii se e.Diyaa.n raga.Dte hu.e
bachche buu.Dhe laachaar
mai.n ne dekhii hai.n
roTii ke badle
ridaa hotii hu.ii
taar-taar
mire shu'uur me.n
aaj bhii taaza hai
'saara-shagufta’ ke binaa kafan ke
phuul jaise bachche kii laash
mai.n ne dekhii hai
masjid kii TuuTtii hu.ii mehraab
ab mirii be-nuur aa.nkhe.n
kaise dekhe ko.ii hasiin KHvaab

Fauzia Mughal

Nazm

aurat aur namak

izzat kii bahut sii qisme.n hai.n
ghuu.nghaT thappa.D gandum
izzat ke taabuut me.n qaid kii meKHe.n Tho.nkii ga.ii hai.n
ghar se le kar footpath tak hamaaraa nahii.n
izzat hamaare guzaare kii baat hai
izzat ke neze se hame.n daaGaa jaataa hai
izzat kii kanii hamaarii zabaan se shuruu.a hotii hai
ko.ii raat hamaaraa namak chakh le
to ek zindagii hame.n be-zaa.iqa roTii kahaa jaataa hai
ye kaisaa baazaar hai
ki ra.ng-saaz hii phiikaa pa.Daa hai
KHalaa kii hathelii pe pata.nge.n mar rahii hai.n
mai.n qaid me.n bachche jantii huu.n
jaa.ez aulaad ke liye zamiin khilanDarii honii chaahiye
tum Dar me.n bachche jantii ho isii liye aaj tumhaarii ko.ii nasl nahii.n
tum jism ke ek band se pukaarii jaatii ho
tumhaarii haisiyat me.n to chaal rakh dii ga.ii hai
ek KHuubsuurat chaal
chhoTii muskuraahaT tumhaare labo.n pe taraash dii ga.ii hai
tum sadiyo.n se nahii.n ro.ii.n
kyaa maa.n aisii hotii hai
tumhaare bachche phiike kyo.n pa.De hai.n

Sara Shagufta

Nazm

daraKHt mere dost

daraKHt! mere dost
tum mil jaate ho kisii na kisii mo.D par
aur aasaan kar dete ho safar
tumhaare pair kii u.ngliyaa.n
jamii rahii.n paataal ke bhedo.n par
qaa.em rahe mere dost
tumhaare tane kii mataanat aur quvvat
dhuup aur baarish tumhe.n apne tohfo.n se navaaztii rahe
tum bahut pur-vaqaar aur saada ho
mere thaile ko jaan.naa chaahte ho
zaruur.... ye lo mai.n ise kholtaa huu.n
roTiyaa.n du.aa.e.n aur nazme.n
mere paas is se ziyaada kuchh nahii.n
ek shaa.er ke paas is se ziyaada kuchh nahii.n hotaa
dost dukh denaa tum ne siikhaa hii nahii.n
tum ne na to mujh se shaa.erii kaa matlab puuchhaa
aur na kabhii mere mutaale.e par shak kiyaa
aisaa hii honaa chaahiye dosto.n ko
agar mere paas ik aur zindagii hotii to
to mai.n apnii pahlii zindagii tumhaarii ja.Do.n par guzaar detaa
magar mai.n ghar se KHaandaan bhar KHushiyo.n ke liye niklaa huu.n
aur vahaa.n meraa intizaar kiyaa jaa rahaa hai
tum ne mere dost
haa.n tum ne
bahut kuchh sikhaayaa hai mujhe
maslan zamiin aur aasmaanii bijlii
aur havaa
aur intizaar
aur duusro.n ke liye zinda rahnaa
bahut qiimtii hai.n ye baate.n
mai.n kyaa de saktaa huu.n is fayyaazii kaa javaab
mere paas tumhaare liye
ek roTii aur du.aa hai
roTii: tumhaarii chiyuu.nTiyo.n ke liye
du.aa tumhaare aaKHirii din ke liye
mujhe ma.aluum hai tum ne kulhaa.Dii ke musaafahe
aur aarii kii ha.nsii se kabhii KHauf nahii.n khaayaa
magar tum rok nahii.n sakte inhe.n
ko.ii bhii nahii.n rok saktaa
KHudaa kare
KHudaa kare tumhaarii shaaKHo.n se ek jho.npa.Dii banaa.ii jaa.e
baazu.o.n ke ghere me.n na aane vaale tumhaare
tane kii lak.Dii
bahut kaafii hai
do pahiyo.n aur ek kashtii ke liye
dost: ham phir mile.nge
musaafir aur chhak.Daa
musaafir aur kashtii
kahii.n na kahii.n ham phir ek saath ho.nge
kahii.n na kahii.n
ek saath.... ham saamnaa kare.nge
havaa kaa aur raasto.n kaa
masarrat aur maut kaa....

Sarvat Husain

Nazm

bint-e-hawwa

kitne valiyo.n ne mire haath kii roTii khaa.ii
kitne shaaho.n ne mire paa.nv me.n jannat paa.ii

Hina Rizvi

Nazm

ek laDki shadan

ik la.Dkii thii chhoTii sii
dublii sii aur moTii sii
nannhii sii aur munnii sii
bilkul hii than mathnii sii
us ke baal the kaale se
siidhe ghu.nghraale se
mu.nh par us ke laalii sii
chaTTii sii maTyaalii sii
us kii naak pako.Dii sii
nokiilii sii chau.Dii sii
aa.nkhe.n kaalii niilii sii
surKH safed aur piilii sii
kap.De us ke thaile se
ujle se aur maile se
ye la.Dkii thii bholii sii
bii bii sii aur golii sii
har dam khel thaa kaam us kaa
shaadaa.n bii-bii naam thaa us kaa
ha.nstii thii aur rotii thii
jaagtii thii aur sotii thii
har dam us kii ammaa.n-jaan
khii.nchaa kartii us ke kaan
kahtii thii.n maktab ko jaa
khelo.n me.n mat vaqt ga.nvaa
ammii sab kuchh kahtii thii
shaadaa.n kheltii rahtii thii
ik din shaadaa.n khel me.n thii
aa.e us ke abbaa jii
vo lahore se aa.e the
chiize.n viize.n laa.e the
box me.n thii.n ye chiize.n sab
KHair tamaashaa dekho ab
abbaa ne aate hii kahaa
shaadaa.n aa kuchh pa.Dh ke sunaa
gum thii ik muddat se kitaab
kyaa detii is vaqt javaab
do bahne.n thii.n shaadaa.n kii
chhoTii nannhii munnii sii
naam thaa ma.njhlii kaa siimaa.n
gu.Diyaa sii nannhii naadaa.n
vo bolii ai abbaa jii
ab to pa.Dhtii huu.n mai.n bhii
billii hai c a T cat
chuhaa hai r a T rat
mu.nh mouth hai naak hai nose
aur gulaab kaa phuul hai rose
mai.n ne abbaa jii dekhaa
KHuub sabaq hai yaad kiyaa
shaadaa.n ne us vaqt kahaa
mai.n ne hii to sikhaayaa thaa
lekin abbaa ne chup chaap
kholaa box ko uTh kar aap
is me.n jo chiize.n nikle.n
saarii siimaa.n ko de de.n
ik chiinii kii gu.Diyaa thii
ik jaaduu kii pu.Diyaa thii
ik nannhii sii thii motor
aap hii chaltii thii far-far
ge.ndo.n kaa ik jo.Daa thaa
ik lak.Dii kaa gho.Daa thaa
ik siiTii thii ik baajaa
ek thaa miTTii kaa raajaa
shaadaa.n ko kuchh bhii na milaa
ya.anii khel kii paa.ii sazaa
ab vo Gaur se pa.Dhtii hai
puure taur se pa.Dhtii hai

Hafeez Jalandhari

Nazm

tum yaad mujhe aa jate ho

jab raat kaa ba.Dhtaa hai sannaaTaa chain se duniyaa sotii hai
tab aa.nkh mirii khul jaatii hai aur dil kii rag rag rotii hai

Behzad Lakhnavi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now