Search result for "chuusaa" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chuusaa"

Nazm MATCHES FOR "chuusaa"

Nazm

hawwa ki beTi

shiddat-e-iflaas se jab zindagii thii tujh pe ta.ng
ishtihaa ke saath thii jab Gairat o ismat kii ja.ng
ghaat me.n terii rahaa ye KHud-Garaz sarmaaya-daar
kheltaa hai jo baraabar nau-e-insaa.n kaa shikaar
rafta rafta luuT lii terii mataa-e-aabruu
KHuub chuusaa terii rag rag se javaanii kaa lahuu
khelte hai.n aaj bhii tujh se yahii sarmaaya-daar
ye tamaddun ke KHudaa tahziib ke parvardigaar
saamne duniyaa ke tuf karte hai.n tere naam par
KHalvato.n me.n jo tire qadmo.n pe rakh dete hai.n sar
raaste me.n din ko le sakte nahii.n teraa salaam
raat ko jo tere haatho.n se cha.Dhaa jaate hai.n jaam
tere kuucha se jinhe.n ho kar guzarnaa hai gunaah
garm un kii saa.ns se rahtii hai terii KHvaab-gaah
mahfilo.n me.n tujh se kar sakte nahii.n jo guftuguu
tere aa.nchal me.n ba.ndhii hai un kii jhuuTii aabruu

Jan Nisar Akhtar

Nazm

aaya aam ka mausam aaya

june ne juu.nhii jalva dikhaayaa
dil ne KHushii kaa naGma gaayaa
aayaa aam kaa mausam aayaa
ham ne garmii kii chhuTTii me.n
miiThe aam kaa lutf uThaayaa
aayaa aam kaa mausam aayaa
shiddat jab garmii kii ba.Dhii to
mere rab ne me.nh barsaayaa
aayaa aam kaa mausam aayaa
pahle is ko freeze me.n rakkhaa
batn me.n is ke baad biThaayaa
aayaa aam kaa mausam aayaa
kuchh bhii na chho.Daa juz chhilko.n ke
guThlii chuusii guudaa khaayaa
aayaa aam kaa mausam aayaa
chau.nse kaa ras chuusaa ham ne
sindh.Dii kaa phir shake banaayaa
aayaa aam kaa mausam aayaa
KHud vo kitnaa miiThaa hogaa
jis ne shiirii.n aam banaayaa
aayaa aam kaa mausam aayaa

Shaheen Iqbal Asar

Nazm

dhup-bhari ajrak

us ne mujhe dhuup-bharii ajrak pesh kii
mai.n ne us dhuup ko apnii zamiin par rakhaa
kapaas aur khajuur ugaa.ii
khajuur se sharaab aur kapaas se apnii mahbuuba ke liye
mahiin malmal kaatii
malmal ne us ke badan ko chhu.aa
us par phuul nikal aa.e
sharaab ko zamiin me.n dabaayaa
us par taa.D ke daraKHt ug aa.e
is ne mujhe dhuup-bharii ajrak pesh kii
mai.n ne us dhuup ko apne dil par rakhaa
jo sarso.n kaa phuul ban ga.ii
us phuul se ek mausam paidaa hu.aa
jis kaa naam mai.n ne ishq aur saKHaavat kaa mausam rakh diyaa
us mausam ke biij se ek raasta
us ke ghar kii taraf niklaa
us biij se paa.nch kabuutar nikle
bharii hu.ii gaagar vaale faqiir ke rauze par jaa kar baiTh ga.e
us ne mujhe dhuup se bharii ajrak pesh kii
mai.n ne use tumhaare ghar ke ziine par phailaa diyaa
taaki tum dhuup kii sii.Dhiyo.n se mere dil me.n utar sako
mujhe yaad hai kabhii na kabhii kahii.n na kahii.n
meraa sitaara tumhaare sitaare ke qariib se guzraa hai
us ne mujhe dhuup-bharii ajrak pesh kii
mai.n ne use samundar me.n phailaa diyaa
havaa ne us kaa ras chuusaa
aur mad.hosh ho kar baadbaano.n se lipaT ga.ii
samundar ke andar ek aur samundar nii.nd se jaagaa
dono.n ek duusre ke KHarosh me.n
der tak is dhuup me.n aa.nkhe.n muu.nde leTe rahe
is ne mujhe dhuup-bharii ajrak pesh kii
phir mai.n ne vo ajrak shahbaaz qalandar ke ek
faqiir ko de dii
us ne mujhe du.aa kaa ek baadal diyaa
mai.n jise apne sar par liye phirtaa huu.n

Asghar Nadeem Syed

Nazm

aisa karo

halkii-phulkii baadbaanii jarsiyaa.n pahnaa karo
chaashnii Dalvaa ke gole barf ke chuusaa karo

Ataur Rahman Tariq

Nazm

numu

KHizaa.n ke daur me.n phailii barahna shaaKHo.n ne
ja.Do.n kii tarah se ra.ng-e-shafaq ko chuusaa thaa
sunahrii dhuup kii taabaaniyo.n ko jazb kiyaa
safed barf kii narmii ko yuu.n samoyaa thaa
ki ab bahaar ke aane pe vo gulaabii shafaq
gulo.n ke ruup me.n shaaKHo.n pe phuuT aa.ii hai
safed barf ne phuulo.n kii pa.nkhu.Dii kaa badan
sunahrii dhuup ne piile gulo.n ko Dhaalaa hai
bahaar kaa ye tasavvur javaan rakhtaa hai
KHizaa.n-o-yaas ke phailaa.e yaKH nazaaro.n me.n
KHayaal-e-ziist KHushii kaamraaniyo.n ko mirii

Shehla H. Naqvi

Nazm

mujhse pahle

mai.n ne maanaa ki vo begaana-e-paimaan-e-vafaa
kho chukaa hai jo kisii aur kii ra.anaa.ii me.n
shaayad ab lauT ke aa.e na tirii mahfil me.n
aur ko.ii dukh na rulaa.e tujhe tanhaa.ii me.n

Ahmad Faraz

Nazm

kabhi kabhi

kabhii kabhii mire dil me.n KHayaal aataa hai
ki zindagii tirii zulfo.n kii narm chhaa.nv me.n
guzarne paatii to shaadaab ho bhii saktii thii
ye tiirgii jo mirii ziist kaa muqaddar hai
tirii nazar kii shu.aa.o.n me.n kho bhii saktii thii
ajab na thaa ki mai.n begaana-e-alam ho kar
tire jamaal kii ra.anaa.iyo.n me.n kho rahtaa
tiraa gudaaz-badan terii niim-baaz aa.nkhe.n
inhii hasiin fasaano.n me.n mahv ho rahtaa
pukaartii.n mujhe jab talKHiyaa.n zamaane kii
tire labo.n se halaavat ke ghuu.nT pii letaa
hayaat chiiKHtii phirtii barahna sar aur mai.n
ghanerii zulfo.n ke saa.e me.n chhup ke jii letaa
magar ye ho na sakaa aur ab ye aalam hai
ki tuu nahii.n tiraa Gam terii justujuu bhii nahii.n
guzar rahii hai kuchh is tarah zindagii jaise
ise kisii ke sahaare kii aarzuu bhii nahii.n
zamaane bhar ke dukho.n ko lagaa chukaa huu.n gale
guzar rahaa huu.n kuchh an-jaanii rahguzaaro.n se
muhiib saa.e mirii samt ba.Dhte aate hai.n
hayaat o maut ke pur-haul KHaarzaaro.n se
na ko.ii jaada-e-manzil na raushnii kaa suraaG
bhaTak rahii hai KHalaa.o.n me.n zindagii merii
inhii KHalaa.o.n me.n rah jaa.uu.ngaa kabhii kho kar
mai.n jaantaa huu.n mirii ham-nafas magar yuu.nhii
kabhii kabhii mire dil me.n KHayaal aataa hai

Sahir Ludhianvi

Nazm

nisar main teri galiyon ke

nisaar mai.n tirii galiyo.n ke ai vatan ki jahaa.n
chalii hai rasm ki ko.ii na sar uThaa ke chale
jo ko.ii chaahne vaalaa tavaaf ko nikle
nazar churaa ke chale jism o jaa.n bachaa ke chale
hai ahl-e-dil ke liye ab ye nazm-e-bast-o-kushaad
ki sa.ng-o-KHisht muqayyad hai.n aur sag aazaad

Faiz Ahmad Faiz

Nazm

subh-e-azadi (August-47)

sunaa hai ho bhii chukaa hai firaaq-e-zulmat-o-nuur
sunaa hai ho bhii chukaa hai visaal-e-manzil-o-gaam
badal chukaa hai bahut ahl-e-dard kaa dastuur
nashaat-e-vasl halaal o azaab-e-hijr haraam
jigar kii aag nazar kii uma.ng dil kii jalan
kisii pe chaara-e-hijraa.n kaa kuchh asar hii nahii.n
kahaa.n se aa.ii nigaar-e-sabaa kidhar ko ga.ii
abhii charaaG-e-sar-e-rah ko kuchh KHabar hii nahii.n
abhii giraanii-e-shab me.n kamii nahii.n aa.ii
najaat-e-diida-o-dil kii gha.Dii nahii.n aa.ii
chale-chalo ki vo manzil abhii nahii.n aa.ii

Faiz Ahmad Faiz

Nazm

daraKHt-e-zard

ye ik shaam-e-azaab-e-be-sarokaana haalat hai
hu.e jaane kii haalat me.n huu.n bas fursat hii fursat hai
nahii.n ma.aluum tum is vaqt kis ma.aluum me.n hoge
na jaane kaun se ma.anii me.n kis mafhuum me.n hoge
mai.n thaa mafhuum naa-mafhuum me.n gum ho chukaa huu.n mai.n
mai.n thaa ma.aluum naa-maaluum me.n gum ho chukaa huu.n mai.n

Jaun Eliya

Nazm

ai ishq hamein barbaad na kar

jis din se mile hai.n dono.n kaa sab chain gayaa aaraam gayaa
chehro.n se bahaar-e-sub.h ga.ii aa.ankho.n se faroG-e-shaam gayaa
haatho.n se KHushii kaa jaam chhuTaa ho.nTo.n se ha.nsii kaa naam gayaa

Akhtar Shirani

Nazm

ye meri ghazlen ye meri nazmen

jo zindagii ke na.e safar me.n
tujhe kisii vaqt yaad aa.e.n
to ek ik harf jii uThegaa
pahan ke anfaas kii qabaa.e.n
udaas tanhaa.iyo.n ke lamho.n
me.n naach uTThe.ngii ye apsaraa.e.n
mujhe tire dard ke alaava bhii
aur dukh the ye maantaa huu.n
hazaar Gam the jo zindagii kii
talaash me.n the ye jaantaa huu.n
mujhe KHabar thii ki tere aa.nchal me.n
dard kii ret chhaantaa huu.n
magar har ik baar tujh ko chhuu kar
ye ret ra.ng-e-hinaa banii hai
ye zaKHm gulzaar ban ga.e hai.n
ye aah-e-sozaa.n ghaTaa banii hai
ye dard mauj-e-sabaa hu.aa hai
ye aag dil kii sadaa banii hai
aur ab ye saarii mataa-e-hastii
ye phuul ye zaKHm sab tire hai.n
ye dukh ke nauhe ye sukh ke naGme
jo kal mire the vo ab tire hai.n
jo terii qurbat tirii judaa.ii
me.n kaT ga.e roz-o-shab tire hai.n
vo teraa shaa.ir tiraa muGannii
vo jis kii baate.n ajiib sii thii.n
vo jis ke andaaz KHusravaana the
aur adaa.e.n Gariib sii thii.n
vo jis ke jiine kii KHvaahishe.n bhii
KHud us ke apne nasiib sii thii.n
na puuchh is kaa ki vo divaana
bahut dino.n kaa uja.D chukaa hai
vo kohkan to nahii.n thaa lekin
ka.Dii chaTaano.n se la.D chukaa hai
vo thak chukaa thaa aur us kaa tesha
usii ke siine me.n ga.D chukaa hai

Ahmad Faraz

Nazm

parinde ki fariyaad

jab se chaman chhuTaa hai ye haal ho gayaa hai
dil Gam ko khaa rahaa hai Gam dil ko khaa rahaa hai
gaanaa ise samajh kar KHush ho.n na sun.ne vaale
dukhte hu.e dilo.n kii fariyaad ye sadaa hai
aazaad mujh ko kar de o qaid karne vaale
mai.n be-zabaa.n huu.n qaidii tuu chho.D kar du.aa le!

Allama Iqbal

Nazm

waqt

kabhii kabhii mai.n ye sochtaa huu.n
ki chaltii gaa.Dii se pe.D dekho
to aisaa lagtaa hai
duusrii samt jaa rahe hai.n
magar haqiiqat me.n
pe.D apnii jagah kha.De hai.n
to kyaa ye mumkin hai
saarii sadiyaa.n
qataar-andar-qataar apnii jagah kha.Dii ho.n
ye vaqt saakit ho
aur ham hii guzar rahe ho.n
is ek lamhe me.n
saare lamhe
tamaam sadiyaa.n chhupii hu.ii ho.n
na ko.ii aa.inda
na guzishta
jo ho chukaa hai
jo ho rahaa hai
jo hone vaalaa hai
ho rahaa hai
mai.n sochtaa huu.n
ki kyaa ye mumkin hai
sach ye ho
ki safar me.n ham hai.n
guzarte ham hai.n
jise samajhte hai.n ham
guzartaa hai
vo thamaa hai
guzartaa hai yaa thamaa hu.aa hai
ikaa.ii hai yaa baTaa hu.aa hai
hai munjamid
yaa pighal rahaa hai
kise KHabar hai
kise pataa hai
ye vaqt kyaa hai

Javed Akhtar

Nazm

tasawwur

to kyaa mujhe tum jalaa hii logii gale se apne lagaa hii logii
jo phuul juu.De se gir pa.Daa hai ta.Dap ke us ko uThaa hii logii
bha.Dakte sho.alo.n, ka.Daktii bijlii se meraa KHirman bachaa hii logii
ghanerii zulfo.n kii chhaa.nv me.n muskuraa ke mujh ko chhupaa hii logii
ki aaj tak aazmaa rahii ho
ye KHvaab kaisaa dikhaa rahii ho
nahii.n mohabbat kii ko.ii qiimat jo ko.ii qiimat adaa karogii
vafaa kii fursat na degii duniyaa hazaar azm-e-vafaa karogii
mujhe bahalne do ranj-o-Gam se sahaare kab tak diyaa karogii
junuu.n ko itnaa na gudgudaa.o, paka.D luu.n daaman to kyaa karogii
qariib ba.Dhtii hii aa rahii ho
ye KHvaab kaisaa dikhaa rahii ho

Kaifi Azmi

Nazm

KHwabon ke byopari

ab ghaaT na ghar dahliiz na dar
ab paas rahaa hai kyaa baabaa
bas tan kii gaThrii baaqii hai
jaa ye bhii tuu le jaa baabaa
ham bastii chho.De jaate hai.n
tuu apnaa qarz chukaa baabaa

Ahmad Faraz

Nazm

tarana-e-milli

chiin-o-arab hamaaraa hindostaa.n hamaaraa
muslim hai.n ham vatan hai saaraa jahaa.n hamaaraa
tauhiid kii amaanat siino.n me.n hai hamaare
aasaa.n nahii.n miTaanaa naam-o-nishaa.n hamaaraa
duniyaa ke but-kado.n me.n pahlaa vo ghar KHudaa kaa
ham is ke paasbaa.n hai.n vo paasbaa.n hamaaraa
teGo.n ke saa.e me.n ham pal kar javaa.n hu.e hai.n
KHanjar hilaal kaa hai qaumii nishaa.n hamaaraa
maGrib kii vaadiyo.n me.n guu.njii azaa.n hamaarii
thamtaa na thaa kisii se sail-e-ravaa.n hamaaraa
baatil se dabne vaale ai aasmaa.n nahii.n ham
sau baar kar chukaa hai tuu imtihaa.n hamaaraa
ai gulistaan-e-undulus vo din hai.n yaad tujh ko
thaa terii Daaliyo.n me.n jab aashiyaa.n hamaaraa
ai mauj-e-dajla tuu bhii pahchaantii hai ham ko
ab tak hai teraa dariyaa afsaana-KHvaa.n hamaaraa
ai arz-e-paak terii hurmat pe kaT mare ham
hai KHuu.n tirii rago.n me.n ab tak ravaa.n hamaaraa
saalaar-e-kaarvaa.n hai miir-e-hijaaz apnaa
is naam se hai baaqii aaraam-e-jaa.n hamaaraa
'iqbaal' kaa taraana baa.ng-e-daraa hai goyaa
hotaa hai jaada-paimaa phir kaarvaa.n hamaaraa

Allama Iqbal

Nazm

parchhaiyan

na jaane kitnii kashaakash se kitnii kaavish se
ye sote jaagte lamhe churaa ke laa.e hai.n

Sahir Ludhianvi

Nazm

wo kamra yaad aata hai

mai.n jab bhii
zindagii kii chilchilaatii dhuup me.n tap kar
mai.n jab bhii
duusro.n ke aur apne jhuuT se thak kar
mai.n sab se la.D ke KHud se haar ke
jab bhii us ek kamre me.n jaataa thaa
vo halke aur gahre kattha.ii ra.ngo.n kaa ik kamra
vo behad mehrbaa.n kamra
jo apnii narm muTThii me.n mujhe aise chhupaa letaa thaa
jaise ko.ii maa.n
bachche ko aa.nchal me.n chhupaa le
pyaar se Daa.nTe
ye kyaa aadat hai
jaltii dopahar me.n maare maare ghuumte ho tum
vo kamra yaad aataa hai
dabiiz aur KHaasaa bhaarii
kuchh zaraa mushkil se khulne vaalaa vo shiisham kaa darvaaza
ki jaise ko.ii akkha.D baap
apne khurdure siine me.n
shafqat ke samundar ko chhupaa.e ho
vo kursii
aur us ke saath vo ju.Dvaa.n bahan us kii
vo dono.n
dost thii.n merii
vo ik gustaaKH mu.nh-phaT aa.iina
jo dil kaa achchhaa thaa
vo be-ha.ngam sii almaarii
jo kone me.n kha.Dii
ik buu.Dhii annaa kii tarah
aa.iine ko tambiih kartii thii
vo ik gul-daan
nanhaa saa
bahut shaitaan
un dino.n pe ha.nstaa thaa
dariicha
yaa zehaanat se bharii ik muskuraahaT
aur dariiche par jhukii vo bel
ko.ii sabz sargoshii
kitaabe.n
taaq me.n aur shelf par
sanjiida ustaanii banii baiThii.n
magar sab muntazir is baat kii
mai.n un se kuchh puuchhuu.n
sirhaane
nii.nd kaa saathii
thakan kaa chaara-gar
vo narm-dil takiya
mai.n jis kii god me.n sar rakh ke
chhat ko dekhtaa thaa
chhat kii ka.Diyo.n me.n
na jaane kitne afsaano.n kii ka.Diyaa.n thii.n
vo chhoTii mez par
aur saamne diivaar par
aavezaa.n tasviire.n
mujhe apnaa.iyat se aur yaqii.n se dekhtii thii.n
muskuraatii thii.n
unhe.n shak bhii nahii.n thaa
ek din
mai.n un ko aise chho.D jaa.uu.ngaa
mai.n ik din yuu.n bhii jaa.uu.ngaa
ki phir vaapas na aa.uu.ngaa

Javed Akhtar

Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now