Search result for "sar-gamii-e-sabaa" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "sar-gamii-e-sabaa"

Nazm MATCHES FOR "sar-gamii-e-sabaa"

Nazm

nazm

na tum rahoge na ham rahe.nge
hamaare naqsh-e-qadam rahe.nge
hamaarii nekii kii lau rahegii
hamaare daaG-e-sitam rahe.nge
rahe.nge kab tak yuu.n sar-niguu.n ham
kahaa.n talak ye sanam rahe.nge
ye jaah-o-'azmat ke jhuuTe paikar
kahaa.n talak mohtaram rahe.nge
yaziidiyat kaa chalan vahii hai
jhuke.nge sar yaa qalam rahe.nge
'alam jo haq kaa uThaa.e ho.nge
vo har zamaane me.n kam rahe.nge
uThaa.e palko.n pe ghuumnaa hai
zamii.n pe vo kal-‘adam rahe.nge
'ajiib fitrat hai haq-navaa kii
dabe.nge aur taaza-dam rahe.nge
jo haar baiThegii zabt-e-KHilqat
'sabaa' kahaa.n phir bharam rahe.nge

Syed Saba Wasti

Nazm

kanar-e-ab ki ek sham

badan churaa.e hu.e sar-e-rahguzaar ko.ii javaa.n hasiina
sabaa-KHiraam-o-sabaa-qariina
KHamosh kuchh sochtii hu.ii KHvaab-gaah-e-ishrat ko jaa rahii hai
fazaa-e-taariik chhaa rahii hai

Krishna Mohan

Nazm

aaj ki shab to kisi taur guzar jaegi

terii aavaaz kaa jaaduu hai abhii mere liye
tere malbuus kii KHushbuu hai abhii mere liye
terii baa.nhe.n tiraa pahluu hai abhii mere liye
sab se ba.Dh kar mirii jaa.n tuu hai abhii mere liye
ziist karne ko mire paas bahut kuchh hai abhii
aaj kii shab to kisii taur guzar jaa.egii!
aaj ke baa'd magar ra.ng-e-vafaa kyaa hogaa
ishq hairaa.n hai sar-e-shahr-e-sabaa kyaa hogaa
mere qaatil tiraa andaaz-e-jafaa kyaa hogaa!

Parveen Shakir

Nazm

dawat-e-inqilab

insaaniyat kaa az-sar-e-nau haq adaa kare.n
phir baab-e-inqalaab-e-vatan aaj vaa kare.n
uTh halqa-e-farang kii har saf ko to.D kar
phir hurriyat ko daam-e-KHirad se rihaa kare.n
kuchh rah ga.ii.n rago.n me.n hai.n buu.nde.n jo KHuun kii
mehraab-e-amn-e-hind pe chal kar fidaa kare.n
barsaa.e.n inqalaab kii paiham vo baarishe.n
rangiin aaj chehra-e-mauj-e-sabaa kare.n
phir Garq kar ke maz.hab-e-nau kii har ek shai
is hind-e-bad-nasiib ke haq me.n du.aa kare.n
har shai hai inqalaab ke qadmo.n pe sajda-rez
aise me.n ham namaaz-e-baGaavat qazaa kare.n

Jauhar Nizami

Nazm

daricha

kisii pe karte hai.n abr-e-bahaar ko qurbaa.n
kisii pe qatl mah-e-taabnaak karte hai.n
kisii pe hotii hai sarmast shaaKH-saar-e-do-niim
kisii pe baad-e-sabaa ko halaak karte hai.n

Faiz Ahmad Faiz

Nazm

lab-e-dariya-e-suKHan par

ye vaqt-e-sahar baad-e-sabaa dhund kii chaadar
lagtaa hai ki shabnam abhii utrii hai gulo.n par
raqsaa.n hai.n sar-e-raah ka.ii shaaKH-e-sanobar
kuchh der me.n niklegaa ujaalo.n kaa payambar
mashriq se KHudaa-daad shu'aa'o.n ko pahan kar
maa.il-ba-taKHayyul hai abhii tab'-e-suKHanvar

Mumtaz Iqbal

Nazm

bayaad-e-faiz ahmad faiz

vo chaman me.n jis ne kalii kalii ko mizaaj-e-baad-e-sabaa diyaa
vo har ek Gunche ke lab ko jis ne hai ik shu'uur-e-navaa diyaa
vo har ek haal me.n basta-lab na kisii se shikva na kuchh talab
Gam-e-'aashiqii tirii KHair ho tujhe yaadgaar banaa diyaa
vo shariik-e-bazm-e-saman-baraa.n vo sahiim-e-kulfat-e-be-kasaa.n
dil-e-reza-reza ko jis ne apne ravish ravish pe luTaa diyaa
rahaa kaj jabii.n pe sar-e-kafan vahii hausla vahii baa.nkpan
pas-e-marg mailaa nahii.n kafan ye ajal ko saaf bataa diyaa
jise qaid-o-band ke marhale na rah-e-vafaa se haTaa sake
ba-hama shaqaavat-e-dushmanaa.n bhii payaam-e-sidq-o-safaa diyaa
vo jo chaara-saaz-e-jahaa.n rahaa jo shariik-e-dard-e-nihaa.n rahaa
jo vatan kii ruuh-e-ravaa.n rahaa use ham ne kitnaa bhulaa diyaa
vo shahiid-e-sheva-e-dilbarii vo qatiil-e-naavak-e-dostii
vo KHatiib-e-mimbar-e-aashtii use apnii qaum ne kyaa diyaa

Faiz Tabassum Tonsvi

Nazm

magar ye zaKHm ye marham

na vo nashaat-e-tasavvur ki lo tum aa hii ga.e
na zaKHm-e-dil kii hai sozish ko.ii jo sahnii ho
na ko.ii va.ada-o-paimaa.n kii shaam hai na sahar
na shauq kii hai ko.ii daastaa.n jo kahnii ho
nahii.n jo mahmil-e-lailaa-e-aarzuu sar-e-raah
to ab fazaa me.n fazaa ke sivaa kuchh aur nahii.n
nahii.n jo mauj-e-sabaa me.n ko.ii shamiim-e-payaam
to ab sabaa me.n sabaa ke sivaa kuchh aur nahii.n

Jaun Eliya

Nazm

yakum may

qatl-e-gul qatl-e-sabaa qatl-e-sahar kii taqriib
mun.aqid hotii rahii baarhaa aivaano.n me.n
qila-e-jabr-o-tashaddud me.n
qasr-e-zulmat me.n
KHalvat-e-shab me.n
gaahe-gaahe sar-e-raahe
aur is baar ye taqriib ba.Dii shaan ke saath
mun.aqid ahl-e-havas ke haatho.n
rahguzaaro.n pe hu.ii
bar-sar-e-baazaar hu.ii
kuucha-e-shahr-e-nigaaraa.n me.n hu.ii
dasht-o-sahraa me.n hu.ii
kohsaaro.n me.n hu.ii
naam-e-gul naam-e-sabaa naam-e-sahar vird-e-zabaa.n
har-nafas gaam-ba-gaam
mohtaram hai ravish-e-makr-o-fareb-e-paiham
sheva-e-raahzanii kii KHair
pesha-e-qatl kii azmat kii duhaa.ii diije
dast-e-qaatil ke taqaddus kii qasam khaa.ii ga.ii
saathiyo chalte raho
ham rivaayaat-e-chicago ke amii.n
KHuun-e-fučík ke taqaddus ke amii.n
azmat-e-KHuun-e-lumumba ke amii.n
KHuun-e-naasir ke amii.n
nazr-e-KHuu.n dete rahe hai.n
sar-e-mahfil sar-e-zindaa.n sar-e-maqtal sar-e-daar
nazr-e-KHuu.n dete rahe.nge ham log

Muslim Shameem

Nazm

subh-e-azadi (August-47)

sunaa hai ho bhii chukaa hai firaaq-e-zulmat-o-nuur
sunaa hai ho bhii chukaa hai visaal-e-manzil-o-gaam
badal chukaa hai bahut ahl-e-dard kaa dastuur
nashaat-e-vasl halaal o azaab-e-hijr haraam
jigar kii aag nazar kii uma.ng dil kii jalan
kisii pe chaara-e-hijraa.n kaa kuchh asar hii nahii.n
kahaa.n se aa.ii nigaar-e-sabaa kidhar ko ga.ii
abhii charaaG-e-sar-e-rah ko kuchh KHabar hii nahii.n
abhii giraanii-e-shab me.n kamii nahii.n aa.ii
najaat-e-diida-o-dil kii gha.Dii nahii.n aa.ii
chale-chalo ki vo manzil abhii nahii.n aa.ii

Faiz Ahmad Faiz

Nazm

naya sal mubarak

aa baad-e-sabaa aa ki nayaa saal mubaarak
laa jald KHabar laa ki nayaa saal mubaarak

Iqbal Umar

Nazm

sanp kamra aur main

ta.ng kamre me.n kuchh saa.np hai.n
aur mai.n
farsh par laal aa.nkhe.n dikhaate hu.e surKH a.ngaaro.n se
KHud ko mahfuuz rakhne me.n masruuf huu.n
aur kamre kii chhat
raushnii kii lakiire.n sameTe kha.Dii hai
Garaz
paa.nv ko surKH a.ngaaro.n se
sar ko chubhtii hu.ii raushnii kii lakiiro.n se mahfuuz rakhne me.n mai.n
munhamik huu.n
kaale piile hare
saa.np bhii
mujh ko Dasne chale aa rahe hai.n
magar me.n unhe.n maar Daaluu.ngaa ik din ye mujh ko yaqii.n hai
phir achaanak mai.n ye sochtaa huu.n
mere kamre me.n rauzan nahii.n hai ko.ii
jis se baad-e-sabaa chupke dar aa ke sho.alo.n ko dahkaa sake
bulb KHaamosh hai
phir bhalaa saa.np kyuu.n aa.e.nge
jism se vasvaso.n kii ye bosiida chaadar haTaa kar
saaf-suthre se bistar pe mai.n so rahaa huu.n
kyuu.n ki pichhle janam se mai.n nirdosh huu.n
miraa ta.ng kamra
mujhe der se tak rahaa hai

Saeed Arifi

Nazm

tamir-e-nau

aa.o sab mil ke na.e mulk kii ta.amiir kare.n
sar-buland apne buzurgo.n kii ye jaagiir kare.n

Krishn Parvez

Nazm

hamd gati hai zamin

maalik-e-arz-o-samaa ko yaad kartaa hai jahaa.n
hamd gaatii hai zamii.n tasbiih pa.Dhtaa aasmaa.n
haath baa.ndhe pe.D saare jangalo.n me.n hai.n kha.De
sab maveshii us kii azmat me.n rukuu karte hu.e
jaanvar sab re.ngte sajde me.n hai.n goyaa pa.De
zarra zarra is zamii.n kaa rab kaa hai tasbiih-KHvaa.n
yaad kartaa hai KHudaa ko har gha.Dii saaraa jahaa.n
ye zamii.n allaah kii hamd-o-sanaa me.n hai magan
us kii paakii ko bayaa.n kartaa hu.aa niilaa gagan
azmat-e-rab ke qasiida-KHvaa.n hai.n ye koh-o-daman
ik usii ke naam se raushan hu.e kaun-o-makaa.n
yaad kartaa hai KHudaa ko har gha.Dii saaraa jahaa.n
us kii azmat ke shavaahid chaar jaanib hai.n ayaa.n
hai har ik zarre ke dil me.n maalik-e-mulk-e-jahaa.n
kyo.n magar insaan apne rab se Gaafil hai yahaa.n
maalik-e-arz-o-samaa ko yaad kartaa hai jahaa.n
hamd gaatii hai zamii.n tasbiih pa.Dhtaa aasmaa.n

Mohammad Asadullah

Nazm

saba viran

sulaimaa.n sar-ba-zaanuu aur sabaa viiraa.n
sabaa viiraa.n, sabaa aaseb kaa maskan
sabaa aalaam kaa ambaar-e-be-paayaa.n!
gayaah o sabza o gul se jahaa.n KHaalii
havaa.e.n tishna-e-baaraa.n,
tuyuur is dasht ke minqaar-e-zer-e-par
tuu surma var guluu insaa.n
sulaimaa.n sar-ba-zaanuu aur sabaa viiraa.n!
sulaimaa.n sar-ba-zaanuu tursh-ruu Gam-gii.n, pareshaa.n-muu
jahaa.n-girii, jahaa.n-baanii faqat tarraara-e-aahuu
mohabbat shola-e-paraa.n havas buu-e-gul be-buu
za-raaz-e-dahr kam-tar-go!
sabaa viiraa.n ke ab tak is zamii.n par hai.n
kisii ayyaar ke Gaarat-garo.n ke naqsh-e-paa baaqii
sabaa baaqii, na mahru-e-sabaa baaqii!
sulaimaa.n sar-ba-zaanuu
ab kahaa.n se qaasid-e-farKHanda-pai aa.e?
kahaa.n se, kis subuu se kaasa-e-piirii me.n mai aa.e?

Noon Meem Rashid

Nazm

sachche watan-parast ka git

KHauf-e-aafat se kahaa.n dil me.n riyaa aa.egii
baat sachchii hai jo vo lab pe sadaa aa.egii
dil se niklegii na mar kar bhii vatan kii ulfat
merii miTTii se bhii KHushbu-e-vafaa aa.egii
mai.n uThaa luu.ngaa ba.De shauq se us ko sar par
KHidmat-e-qaum-o-vatan me.n jo balaa aa.egii
saamnaa sabr o shujaa.at se karuu.ngaa mai.n bhii
khi.nch ke mujh tak jo kabhii teG-e-jafaa aa.egii
Gair zo.am aur KHudii se jo karegaa hamla
merii imdaad ko KHud zaat-e-KHudaa aa.egii
aatmaa huu.n mai.n badal Daaluu.ngaa fauran cholaa
kyaa bigaa.Degii agar merii qazaa aa.egii
KHuun ro.egii samaa par mere marne pe shafaq
Gam manaane ke liye kaalii ghaTaa aa.egii
abr-e-tar ashk bahaa.egaa mire laashe par
KHaak u.Daane ke liye baad-e-sabaa aa.egii
zindagaanii me.n to milne se jhijaktii hai 'falak'
KHalq ko yaad mirii ba.ad-e-fanaa aa.egii

Lal Chand Falak

Nazm

do mashware

sumuum tez hai mauj-e-sabaa ko aam karo
KHizaa.n ke ruKH ko palaTne kaa ehtimaam karo
bikhar rahe ho mazaamiin-e-shaa.erii kii tarah
kisii maqaam pe jam jaa.o ko.ii kaam karo
sabaq milaa hai ye taariiKH ke navishto.n se
ki teG-e-haidar-e-karraar be-niyaam karo
jabii.n pe KHaak hai kis aastaan-e-daulat kii
kabhii to apnii aanaa kaa bhii ehtiraam karo
ye mashvare hai.n ka.ii din se qasr-e-shaahii me.n
kisii tariiq se daanishvaro.n ko raam karo
qalam kii shoKH-nigaarii ko rokne ke liye
zabaa.n-daraaz adiibo.n ko zer-e-daam karo
jhukaa ke sar kisii farmaa.n-ravaa kii chaukhaT par
zabaan-e-tohmat-o-ilzaam be-lagaam karo
'zafar' alii kii zabaa.n me.n hai mashvara meraa
mirii taraf se ise dosto.n me.n aam karo
is ibtilaa se KHudaa kii hazaar-baar panaah
ki jhuk ke tum kisii naa-ahl ko salaam karo

Shorish kashmiri

Nazm

shahar-e-yaran

aasmaa.n kii god me.n dam to.Dtaa hai tifl-e-abr
jam rahaa hai abr ke ho.nTo.n pe KHuu.n-aaluud kaf
bujhte bujhte bujh ga.ii hai arsh ke hujro.n me.n aag
dhiire dhiire bichh rahii hai maatamii taaro.n kii saf
ai sabaa shaayad tire ham-raah ye KHuu.n-naak shaam
sar jhukaa.e jaa rahii hai shahr-e-yaaraa.n kii taraf
shahr-e-yaaraa.n jis me.n is dam Dhuu.nDhtii phirtii hai maut
sher-dil baa.nko me.n apne tiir-o-nashtar ke hadaf
ik taraf bajtii hai.n josh-e-ziist kii shahnaa.iyaa.n
ik taraf chi.nghaa.Dte hai.n ahrman ke tabl-o-daf
jaa ke kahnaa ai sabaa ba.ad-az-salaam-e-dostii
aaj shab jis dam guzar ho shahr-e-yaaraa.n kii taraf
dasht-e-shab me.n is gha.Dii chup-chaap hai shaayad ravaa.n
saaqii-e-sub.h-e-tarab naGma-ba-lab saaGar-ba-kaf
vo pahu.nch jaa.e to hogii phir se barpaa anjuman
aur tartiib-e-maqaam-o-mansab-o-jaah-o-sharaf

Faiz Ahmad Faiz

Nazm

zindagi

puuchh baiThaa puuchhne vaalaa ki kyaa hai zindagii
shoKHii-e-gul ne kahaa baad-e-sabaa hai zindagii
ek titlii ne kahaa husn-o-adaa hai zindagii
mast-o-be-KHud ha.ns ke bolaa mai-kada hai zindagii
husn kaa shaidaa kahe gul kii adaa hai zindagii
ek dul.han ne kahaa rang-e-hinaa hai zindagii
ek 'aashiq ne kahaa ik dilrubaa hai zindagii
ik mufakkir ne kahaa qaa.em sadaa hai zindagii
ek shaa'ir ne kahaa soz-e-navaa hai zindagii
ek birhan ro ke bolii bevafaa hai zindagii
ek ahl-e-fan kahe aab-e-baqaa hai zindagii
ek momin ne kahaa qurb-e-KHudaa hai zindagii
ek jaabir ne kahaa jaur-o-jafaa hai zindagii
taalib-e-sarvat kahe paisa Takaa hai zindagii
ek bhuuke ne kahaa vaafir Gizaa hai zindagii
ik mujaahid ne kahaa naaz-e-viGaa hai zindagii
qaul-e-KHud-sar thaa ki taaqat kaa nasha hai zindagii
ik qariib-ul-marg bolaa KHvaab saa hai zindagii
sab kii sun kar faisla us ne diyaa hai zindagii
ruu-baruu jis ke jo ruKH aayaa lagaa hai zindagii
ranj-o-raahat me.n sabhii kii kaT to jaatii hai magar
jo jiyaa har haal me.n KHush vo jiyaa hai zindagii

Shaheen Bhatti

Nazm

aaine ka aadmi

sub.h ke zaafraanii labo.n par
jo shafqat kii halkii sii muskaan thii
ek ThiThurii hu.ii raat kii dhu.nd me.n
kho chukii hai
mire chhoTe bhaa.ii ne
mujh ko likhaa hai
ki aa.ngan me.n jo niim kaa pe.D thaa
ab ke tuufaan me.n gir chukaa hai
vahaa.n ThanDii chhaa.nv nahii.n
dhuup kaa silsila
magar khoj me.n naan-o-nafqa kii
niklaa huu.n
ek kamzor saa aadmii
apne KHvaabo.n kii baisaakhiyo.n par Ta.ngaa
zindagii-bhar
jo suukhe hu.e ho.nT kii pii.Dhiyo.n se
ku.n.e.n tak ke
be-ant rasto.n pe chaltaa rahaa
aaj bhii vo mire saamne
aa.ine me.n kha.Daa hai

Saba Ikram

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now