Sher on Hadsa

ye jabr bhī dekhā hai tārīḳh kī nazroñ ne

lamhoñ ne ḳhatā kī thī sadiyoñ ne sazā paa.ī

ye jabr bhi dekha hai tariKH ki nazron ne

lamhon ne KHata ki thi sadiyon ne saza pai

vaqt kartā hai parvarish barsoñ

hādisa ek dam nahīñ hotā

waqt karta hai parwarish barson

hadisa ek dam nahin hota

tum abhī shahr meñ kyā na.e aa.e ho

ruk ga.e raah meñ hādsa dekh kar

tum abhi shahr mein kya nae aae ho

ruk gae rah mein hadsa dekh kar

zindagī ik hādsa hai aur kaisā hādsa

maut se bhī ḳhatm jis kā silsila hotā nahīñ

zindagi ek hadsa hai aur kaisa hadsa

maut se bhi KHatm jis ka silsila hota nahin

hamāre pesh-e-nazar manzileñ kuchh aur bhī thiiñ

ye hādsa hai ki ham tere paas aa pahuñche

hamare pesh-e-nazar manzilen kuchh aur bhi thin

ye hadsa hai ki hum tere pas aa pahunche

kis darja dil-shikan the mohabbat ke hādse

ham zindagī meñ phir koī armāñ na kar sake

kis darja dil-shikan the mohabbat ke hadse

hum zindagi mein phir koi arman na kar sake

'bānī' zarā sambhal ke mohabbat kā moḌ kaaT

ik hādsa bhī taak meñ hogā yahīñ kahīñ

'bani' zara sambhal ke mohabbat ka moD kaT

ek hadsa bhi tak mein hoga yahin kahin

har na.e hādse pe hairānī

pahle hotī thī ab nahīñ hotī

har nae hadse pe hairani

pahle hoti thi ab nahin hoti

unheñ sadiyoñ na bhūlegā zamāna

yahāñ jo hādse kal ho ga.e haiñ

unhen sadiyon na bhulega zamana

yahan jo hadse kal ho gae hain

kise ḳhabar thī ki ye vāqi.a bhī honā thā

ki khel khel meñ ik hādsa bhī honā thā

kise KHabar thi ki ye waqia bhi hona tha

ki khel khel mein ek hadsa bhi hona tha

vo hādse bhī dahr meñ ham par guzar ga.e

jiine kī aarzū meñ ka.ī baar mar ga.e

wo hadse bhi dahr mein hum par guzar gae

jine ki aarzu mein kai bar mar gae

tasvīr-e-zindagī meñ nayā rañg bhar ga.e

vo hādse jo dil pe hamāre guzar ga.e

taswir-e-zindagi mein naya rang bhar gae

wo hadse jo dil pe hamare guzar gae

rañgīni-e-hayāt baḌhāne ke vāste

paḌtī hai hādsoñ kī zarūrat kabhī kabhī

rangini-e-hayat baDhane ke waste

paDti hai hadson ki zarurat kabhi kabhi

hādse raah ke zevar haiñ musāfir ke liye

ek Thokar jo lagī hai to irāda na badal

hadse rah ke zewar hain musafir ke liye

ek Thokar jo lagi hai to irada na badal

bastiyoñ meñ hone ko hādse bhī hote haiñ

pattharoñ kī zad par kuchh aa.ine bhī hote haiñ

bastiyon mein hone ko hadse bhi hote hain

pattharon ki zad par kuchh aaine bhi hote hain