میں ایک باب تھا افسانۂ وفا کا مگر

تمہاری بزم سے اٹھا تو اک کتاب بنا

غم سے بکھرا نہ پائمال ہوا

میں تو غم سے ہی بے مثال ہوا

کچھ اصولوں کا نشہ تھا کچھ مقدس خواب تھے

ہر زمانے میں شہادت کے یہی اسباب تھے

اے صبا میں بھی تھا آشفتہ سروں میں یکتا

پوچھنا دلی کی گلیوں سے مرا نام کبھی

کسی نے ڈوبتی صبحوں تڑپتی شاموں کو

غزل کے جام میں شب کا خمار بھیجا ہے

اتنا رویا ہوں غم دوست ذرا سا ہنس کر

مسکراتے ہوئے لمحات سے جی ڈرتا ہے

خلوت امید میں روشن ہے اب تک وہ چراغ

جس سے اٹھتا ہے قریب شام یادوں کا دھواں

اتنا دل نعیمؔ کو ویراں نہ کر حجاز

روئے گی موج گنگ جو اس تک خبر گئی

کیا فراق و فیض سے لینا تھا مجھ کو اے نعیمؔ

میرے آگے فکر و فن کے کچھ نئے آداب تھے

سرائے دل میں جگہ دے تو کاٹ لوں اک رات

نہیں ہے شرط کہ مجھ کو شریک خواب بنا

اقبالؔ کی نوا سے مشرف ہے گو نعیمؔ

اردو کے سر پہ میرؔ کی غزلوں کا تاج ہے

کون مجھ سے پوچھتا ہے روز اتنے پیار سے

کام کتنا ہو چکا ہے وقت کتنا رہ گیا

جرأت کہاں کہ اپنا پتہ تک بتا سکوں

جیتا ہوں اپنے ملک میں اوروں کے نام سے

گرد شہرت کو بھی دامن سے لپٹنے نہ دیا

کوئی احسان زمانے کا اٹھایا ہی نہیں

پیمبروں نے کہا تھا کہ جھوٹ ہارے گا

مگر یہ دیکھیے اپنا مشاہدہ کیا ہے

خیر سے دل کو تری یاد سے کچھ کام تو ہے

وصل کی شب نہ سہی ہجر کا ہنگام تو ہے

کوئی موسم ہو یہی سوچ کے جی لیتے ہیں

اک نہ اک روز شجر غم کا ہرا تو ہوگا

سچ تو یہ کہ ابھی دل کو سکوں ہے لیکن

اپنے آوارہ خیالات سے جی ڈرتا ہے

میں اپنی روح میں اس کو بسا چکا اتنا

اب اس کا حسن بھی پردہ دکھائی دیتا ہے

جو بھی کہنا ہے کہو صاف شکایت ہی سہی

ان اشارات و کنایات سے جی ڈرتا ہے

پے بہ پے تلوار چلتی ہے یہاں آفات کی

دست و بازو کی خبر لوں تو سمجھئے سر گیا

جو میرے دشت جنوں میں تھا فرق روئے بہار

وہی خرد کے خرابے میں اک گلاب بنا

ایک دریا پار کر کے آ گیا ہوں اس کے پاس

ایک صحرا کے سوا اب درمیاں کوئی نہیں

پاؤں سے لگ کے کھڑی ہے یہ غریب الوطنی

اس کو سمجھاؤ کہ ہم اپنے وطن آئے ہیں

آ بسے کتنے نئے لوگ مکان جاں میں

بام و در پر ہے مگر نام اسی کا لکھا

جہاں دکھائی نہ دیتا تھا ایک ٹیلہ بھی

وہاں سے لوگ اٹھا کر پہاڑ لائے ہیں

کم نہیں اے دل بے تاب متاع امید

دست مے خوار میں خالی ہی سہی جام تو ہے

موجۂ اشک سے بھیگی نہ کبھی نوک قلم

وہ انا تھی کہ کبھی درد نہ جی کا لکھا

روح کا لمبا سفر ہے ایک بھی انساں کا قرب

میں چلا برسوں تو ان تک جسم کا سایہ گیا