maiñ ek baab thā afsāna-e-vafā kā magar

tumhārī bazm se uTThā to ik kitāb banā

main ek bab tha afsana-e-wafa ka magar

tumhaari bazm se uTTha to ek kitab bana

ġham se bikhrā na pā.emāl huā

maiñ to ġham se hī be-misāl huā

gham se bikhra na paemal hua

main to gham se hi be-misal hua

kuchh usūloñ kā nasha thā kuchh muqaddas ḳhvāb the

har zamāne meñ shahādat ke yahī asbāb the

kuchh usulon ka nasha tha kuchh muqaddas KHwab the

har zamane mein shahadat ke yahi asbab the

ai sabā maiñ bhī thā āshufta-saroñ meñ yaktā

pūchhnā dillī kī galiyoñ se mirā naam kabhī

ai saba main bhi tha aashufta-saron mein yakta

puchhna dilli ki galiyon se mera nam kabhi

kisī ne Dūbtī sub.hoñ taḌaptī shāmoñ ko

ġhazal ke jaam meñ shab kā ḳhumār bhejā hai

kisi ne Dubti subhon taDapti shamon ko

ghazal ke jam mein shab ka KHumar bheja hai

itnā royā huuñ ġham-e-dost zarā sā hañs kar

muskurāte hue lamhāt se jī Dartā hai

itna roya hun gham-e-dost zara sa hans kar

muskuraate hue lamhat se ji Darta hai

ḳhalvat-e-ummīd meñ raushan hai ab tak vo charāġh

jis se uThtā hai qarīb-e-shām yādoñ kā dhuāñ

KHalwat-e-ummid mein raushan hai ab tak wo charagh

jis se uThta hai qarib-e-sham yaadon ka dhuan

itnā dil-e-'na.īm' ko vīrāñ na kar hijāz

ro.egī mauj-e-gañg jo us tak ḳhabar ga.ī

itna dil-e-'naim' ko viran na kar hijaz

roegi mauj-e-gang jo us tak KHabar gai

kyā firāq o faiz se lenā thā mujh ko ai 'na.īm'

mere aage fikr-o-fan ke kuchh na.e ādāb the

kya firaq o faiz se lena tha mujh ko ai 'naim'

mere aage fikr-o-fan ke kuchh nae aadab the

sarā-e-dil meñ jagah de to kaaT luuñ ik raat

nahīñ hai shart ki mujh ko sharīk-e-ḳhvāb banā

sara-e-dil mein jagah de to kaT lun ek raat

nahin hai shart ki mujh ko sharik-e-KHwab bana

'iqbāl' kī navā se musharraf hai go 'na.īm'

urdu ke sar pe 'mīr' kī ġhazloñ kā taaj hai

'iqbaal' ki nawa se musharraf hai go 'naim'

urdu ke sar pe 'mir' ki ghazlon ka taj hai

kaun mujh se pūchhtā hai roz itne pyaar se

kaam kitnā ho chukā hai vaqt kitnā rah gayā

kaun mujh se puchhta hai roz itne pyar se

kaam kitna ho chuka hai waqt kitna rah gaya

jur.at kahāñ ki apnā pata tak batā sakūñ

jiitā huuñ apne mulk meñ auroñ ke naam se

jurat kahan ki apna pata tak bata sakun

jita hun apne mulk mein auron ke nam se

gard-e-shohrat ko bhī dāman se lipaTne na diyā

koī ehsān zamāne kā uThāyā hī nahīñ

gard-e-shohrat ko bhi daman se lipaTne na diya

koi ehsan zamane ka uThaya hi nahin

payambaroñ ne kahā thā ki jhuuT hāregā

magar ye dekhiye apnā mushāhida kyā hai

payambaron ne kaha tha ki jhuT haarega

magar ye dekhiye apna mushahida kya hai

ḳhair se dil ko tirī yaad se kuchh kaam to hai

vasl kī shab na sahī hijr kā hañgām to hai

KHair se dil ko teri yaad se kuchh kaam to hai

wasl ki shab na sahi hijr ka hangam to hai

koī mausam ho yahī soch ke jī lete haiñ

ik na ik roz shajar ġham kā harā to hogā

koi mausam ho yahi soch ke ji lete hain

ek na ek roz shajar gham ka hara to hoga

sach to ye ki abhī dil ko sukūñ hai lekin

apne āvāra ḳhayālāt se jī Dartā hai

sach to ye ki abhi dil ko sukun hai lekin

apne aawara KHayalat se ji Darta hai

maiñ apnī ruuh meñ us ko basā chukā itnā

ab us kā husn bhī parda dikhā.ī detā hai

main apni ruh mein us ko basa chuka itna

ab us ka husn bhi parda dikhai deta hai

jo bhī kahnā hai kaho saaf shikāyat hī sahī

in ishārāt-o-kināyāt se jī Dartā hai

jo bhi kahna hai kaho saf shikayat hi sahi

in ishaaraat-o-kinayat se ji Darta hai

pai-ba-pai talvār chaltī hai yahāñ āfāt kī

dast-o-bāzū kī ḳhabar luuñ to samajhiye sar gayā

pai-ba-pai talwar chalti hai yahan aafat ki

dast-o-bazu ki KHabar lun to samajhiye sar gaya

jo mere dasht-e-junūñ meñ thā farq-e-rū-e-bahār

vahī ḳhirad ke ḳharābe meñ ik gulāb banā

jo mere dasht-e-junun mein tha farq-e-ru-e-bahaar

wahi KHirad ke KHarabe mein ek gulab bana

ek dariyā paar kar ke aa gayā huuñ us ke paas

ek sahrā ke sivā ab darmiyāñ koī nahīñ

ek dariya par kar ke aa gaya hun us ke pas

ek sahra ke siwa ab darmiyan koi nahin

paañv se lag ke khaḌī hai ye ġharīb-ul-vatanī

us ko samjhāo ki ham apne vatan aa.e haiñ

panw se lag ke khaDi hai ye gharib-ul-watani

us ko samjhao ki hum apne watan aae hain

aa base kitne na.e log makān-e-jāñ meñ

bām-o-dar par hai magar naam usī kā likkhā

aa base kitne nae log makan-e-jaan mein

baam-o-dar par hai magar nam usi ka likkha

jahāñ dikhā.ī na detā thā ek Tiila bhī

vahāñ se log uThā kar pahāḌ laa.e haiñ

jahan dikhai na deta tha ek Tila bhi

wahan se log uTha kar pahaD lae hain

kam nahīñ ai dil-e-betāb matā-e-ummīd

dast-e-mai-ḳhvār meñ ḳhālī hī sahī jaam to hai

kam nahin ai dil-e-betab mata-e-ummid

dast-e-mai-KHwar mein KHali hi sahi jam to hai

mauja-e-ashk se bhīgī na kabhī nok-e-qalam

vo anā thī ki kabhī dard na jī kā likkhā

mauja-e-ashk se bhigi na kabhi nok-e-qalam

wo ana thi ki kabhi dard na ji ka likkha

ruuh kā lambā safar hai ek bhī insāñ kā qurb

maiñ chalā barsoñ to un tak jism kā saayā gayā

ruh ka lamba safar hai ek bhi insan ka qurb

main chala barson to un tak jism ka saya gaya