اپنے مرکز کی طرف مائل پرواز تھا حسن

بھولتا ہی نہیں عالم تری انگڑائی کا

پیدا وہ بات کر کہ تجھے روئیں دوسرے

رونا خود اپنے حال پہ یہ زار زار کیا

زبان دل کی حقیقت کو کیا بیاں کرتی

کسی کا حال کسی سے کہا نہیں جاتا

خود چلے آؤ یا بلا بھیجو

رات اکیلے بسر نہیں ہوتی

لطف بہار کچھ نہیں گو ہے وہی بہار

دل ہی اجڑ گیا کہ زمانہ اجڑ گیا

جھوٹے وعدوں پر تھی اپنی زندگی

اب تو وہ بھی آسرا جاتا رہا

ہجر کی رات کاٹنے والے

کیا کرے گا اگر سحر نہ ہوئی

ہمیشہ تنکے ہی چنتے گزر گئی اپنی

مگر چمن میں کہیں آشیاں بنا نہ سکے

آئینہ چھوڑ کے دیکھا کئے صورت میری

دل مضطر نے مرے ان کو سنورنے نہ دیا

بتاؤ ایسے مریضوں کا ہے علاج کوئی

کہ جن سے حال بھی اپنا بیاں نہیں ہوتا

تم نے چھیڑا تو کچھ کھلے ہم بھی

بات پر بات یاد آتی ہے

یہ تیری آرزو میں بڑھی وسعت نظر

دنیا ہے سب مری نگہ‌ انتظار میں

وہی حکایت دل تھی وہی شکایت دل

تھی ایک بات جہاں سے بھی ابتدا کرتے

ہائے کیا چیز تھی جوانی بھی

اب تو دن رات یاد آتی ہے

مانا کہ بزم حسن کے آداب ہیں بہت

جب دل پہ اختیار نہ ہو کیا کرے کوئی

اتنا بھی بار خاطر گلشن نہ ہو کوئی

ٹوٹی وہ شاخ جس پہ مرا آشیانہ تھا

شمع بجھ کر رہ گئی پروانہ جل کر رہ گیا

یادگار‌ حسن و عشق اک داغ دل پر رہ گیا

عزیزؔ منہ سے وہ اپنے نقاب تو الٹیں

کریں گے جبر اگر دل پہ اختیار رہا

کبھی جنت کبھی دوزخ کبھی کعبہ کبھی دیر

عجب انداز سے تعمیر ہوا خانۂ دل

دعائیں مانگی ہیں ساقی نے کھول کر زلفیں

بسان دست کرم ابر دجلہ بار برس

تمہیں ہنستے ہوئے دیکھا ہے جب سے

مجھے رونے کی عادت ہو گئی ہے

نزع کا وقت ہے بیٹھا ہے سرہانے کوئی

وقت اب وہ ہے کہ مرنا ہمیں منظور نہیں

دل سمجھتا تھا کہ خلوت میں وہ تنہا ہوں گے

میں نے پردہ جو اٹھایا تو قیامت نکلی

بے خودی کوچۂ جاناں میں لیے جاتی ہے

دیکھیے کون مجھے میری خبر دیتا ہے

دل نہیں جب تو خاک ہے دنیا

اصل جو چیز تھی وہی نہ رہی

اداسی اب کسی کا رنگ جمنے ہی نہیں دیتی

کہاں تک پھول برسائے کوئی گور غریباں پر

ہے دل میں جوش حسرت رکتے نہیں ہیں آنسو

رستی ہوئی صراحی ٹوٹا ہوا سبو ہوں

مصیبت تھی ہمارے ہی لئے کیوں

یہ مانا ہم جئے لیکن جئے کیوں

جب سے زلفوں کا پڑا ہے اس میں عکس

دل مرا ٹوٹا ہوا آئینہ ہے

ہم تو دل ہی پر سمجھتے تھے بتوں کا اختیار

نسب کعبہ میں بھی اب تک ایک پتھر رہ گیا

تمام انجمن وعظ ہو گئی برہم

لئے ہوئے کوئی یوں ساغر شراب آیا

بے پیے واعظ کو میری رائے میں

مسجد جامع میں جانا ہی نہ تھا

آپ جس دل سے گریزاں تھے اسی دل سے ملے

دیکھیے ڈھونڈھ نکالا ہے کہاں سے میں نے

اسی کو حشر کہتے ہیں جہاں دنیا ہو فریادی

یہی اے میر دیوان جزا کیا تیری محفل ہے

قتل اور مجھ سے سخت جاں کا قتل

تیغ دیکھو ذرا کمر دیکھو

پھوٹ نکلا زہر سارے جسم میں

جب کبھی آنسو ہمارے تھم گئے

میں تو ہستی کو سمجھتا ہوں سراسر اک گناہ

پاک دامانی کا دعویٰ ہو تو کس بنیاد پر

ہمیشہ سے مزاج حسن میں دقت پسندی ہے

مری دشواریاں آسان ہونا سخت مشکل ہے

اب چمن میں بھی کسی صورت سے جی لگتا نہیں

ہاں مگر جب تک قفس میں تھے قفس بدنام تھا

بنی ہیں شہر آشوب تمنا

خمار آلودہ آنکھیں رات بھر کی

دل کی آلودگیٔ زخم بڑھی جاتی ہے

سانس لیتا ہوں تو اب خون کی بو آتی ہے

مرے دہن میں اگر آپ کی زباں ہوتی

تو پھر کچھ اور ہی عنوان داستاں ہوتا

قفس میں جی نہیں لگتا ہے آہ پھر بھی مرا

یہ جانتا ہوں کہ تنکا بھی آشیاں میں نہیں

تقلید اب میں حضرت واعظ کی کیوں کروں

ساقی نے دے دیا مجھے فتویٰ جواز کا

یہ مشورہ بہم اٹھے ہیں چارہ جو کرتے

کہ اب مریض کو اچھا تھا قبلہ رو کرتے

سبق آ کے گور غریباں سے لے لو

خموشی مدرس ہے اس انجمن میں

منزل ہستی میں اک یوسف کی تھی مجھ کو تلاش

اب جو دیکھا کارواں کا کارواں ملتا نہیں

دنیا کا خون دور محبت میں ہے سفید

آواز آ رہی ہے لب جوئے شیر سے

حادثات دہر میں وابستۂ ارباب درد

لی جہاں کروٹ کسی نے انقلاب آ ہی گیا

حسن آراستہ قدرت کا عطیہ ہے مگر

کیا مرا عشق جگر سوز خدا داد نہیں