اس سفر میں نیند ایسی کھو گئی

ہم نہ سوئے رات تھک کر سو گئی

ہاں انہیں لوگوں سے دنیا میں شکایت ہے ہمیں

ہاں وہی لوگ جو اکثر ہمیں یاد آئے ہیں

یہ چراغ جیسے لمحے کہیں رائیگاں نہ جائیں

کوئی خواب دیکھ ڈالو کوئی انقلاب لاؤ

دل کی کھیتی سوکھ رہی ہے کیسی یہ برسات ہوئی

خوابوں کے بادل آتے ہیں لیکن آگ برستی ہے

زندگی ڈھونڈھ لے تو بھی کسی دیوانے کو

اس کے گیسو تو مرے پیار نے سلجھائے ہیں

ہم نے اپنے جینے کی یہ راہ نکالی یارو

ہر دریا پر تھوڑی تھوڑی پیاس بجھا لی یارو

بجلیاں ڈھونڈھ رہی ہیں کوئی گرنے کی جگہ

اتنے محفوظ نہیں آج نشیمن والے

میرے ساتھ مرا سورج ہے میرے ساتھ مرا سایہ

تنہائی تو ان کی دیکھوں جن کے ساتھ زمانہ ہے

کیسے کوئی تصویر بناؤں رنگ اڑے جاتے ہیں

گھولے کتنے رنگ مگر ہے چاند کا پیالہ خالی

غیر اندھیرے کی آنکھوں میں گھول کے آنسو اپنے

جب رات آئی شوق سحر کی شمع جلالی یارو

کبھی مقتل رہا ہوگا یقیناً

جہاں زنجیر کی جھنکار ٹھہری

سر بکف گھر سے نکلنا تو ہے شرط اول

اتنا آسان نہیں چاک گریباں ہونا

مزا آتا نصیحت میں بھی شاید

اگر ناصح ذرا دیوانہ ہوتا

دشت جنوں کی ضد ہے کہ لکھ خیریت کا خط

میں پوچھتا ہوں کس کو لکھوں اور کہاں لکھوں

دھوپ کڑی ہے سایہ مت دے سائے کا امکان تو ہے

اے صحرا تجھ سے تو ہماری اتنی پرانی یاری ہے

مہک پہچانتی ہے خون دل کی

زمین کوچۂ دل دار ٹھہری

لگتا ہے شہروں میں جنوں کے موسم اب نہیں آتے

ہم تو صحرا میں بیٹھے ہیں دھوپ کا فرش بچھائے

ململ کی ساری ہے تن پر ہاتھوں میں پچکاری ہے

ہم نے سنا ہے اس کی گلی میں ہولی کی تیاری ہے

سناٹا پیڑوں پر بیٹھا سناٹا ہر چھت پر

سناٹے سے سب ڈرتے ہیں کون آواز لگائے

اپنا سر وہ کیسے جھکائے اس ساگر کی چوکھٹ پر

گنگا جی کے تٹ پر یارو جس جوگی کا ٹھکانہ ہے

اس کے گلابی رخساروں پر پھیلی بوند پسینے کی

یا کچنار کے دامن پر یہ اوس کی ہلکی دھاری ہے

سولیاں نصب رہیں قحط جنوں ہے بھی تو کیا

کچھ نہ کچھ اب بھی نکل آئیں گے گردن والے

نہ جب اہل خرد نے بات مانی

تو پھر شرط صلیب و دار ٹھہری

میں اک گھائل بوڑھا برگد میری بات سنو

لگتا ہے کل ہر وادی سے صحرا نکلے گا

کل کی جانب دیکھیں کیسے ایک بڑی دشواری ہے

آنکھ اٹھانا سہل نہیں ہے سپنا اتنا بھاری ہے

جس کو مل جانا ہو مل جاؤ مگر مشکل سے

دیکھو اس شہر میں آنا تو نہ آساں ہونا

جس کے آگے آگے بادل جس کے پیچھے خوشبو

ہم صحرا والوں تک کوئی وہ موسم لے آئے