میں ایسے جمگھٹے میں کھو گیا ہوں

جہاں میرے سوا کوئی نہیں ہے

شام سے پہلے تری شام نہ ہونے دوں گا

زندگی میں تجھے ناکام نہ ہونے دوں گا

میں سوچتا ہوں مجھے انتظار کس کا ہے

کواڑ رات کو گھر کا اگر کھلا رہ جائے

عمر بھر لکھتے رہے پھر بھی ورق سادہ رہا

جانے کیا لفظ تھے جو ہم سے نہ تحریر ہوئے

خزاں کی رت ہے جنم دن ہے اور دھواں اور پھول

ہوا بکھیر گئی موم بتیاں اور پھول

کچھ بے ٹھکانہ کرتی رہیں ہجرتیں مدام

کچھ میری وحشتوں نے مجھے در بدر کیا

ملوں تو کیسے ملوں بے طلب کسی سے میں

جسے ملوں وہ کہے مجھ سے کوئی کام تھا کیا

صبح کی سیر کی کرتا ہوں تمنا شب بھر

دن نکلتا ہے تو بستر میں پڑا رہتا ہوں

نہ انتظار کرو ان کا اے عزا دارو

شہید جاتے ہیں جنت کو گھر نہیں آتے

شکایت اس سے نہیں اپنے آپ سے ہے مجھے

وہ بے وفا تھا تو میں آس کیوں لگا بیٹھا

یہ زخم عشق ہے کوشش کرو ہرا ہی رہے

کسک تو جا نہ سکے گی اگر یہ بھر بھی گیا

اس سے بچھڑ کے ایک اسی کا حال نہیں میں جان سکا

ویسے خبر تو ہر پل مجھ تک دنیا بھر کی آتی رہی

پہلے بھی خدا کو مانتا تھا

اور اب بھی خدا کو مانتا ہوں

وہ جاگ رہا ہو شاید اب تک

یہ سوچ کے میں بھی جاگتا ہوں

عجب اک بے یقینی کی فضا ہے

یہاں ہونا نہ ہونا ایک سا ہے

وہ کیوں نہ روٹھتا میں نے بھی تو خطا کی تھی

بہت خیال رکھا تھا بہت وفا کی تھی

بے وفا لوگوں میں رہنا تری قسمت ہی سہی

ان میں شامل میں ترا نام نہ ہونے دوں گا

ظفرؔ ہے بہتری اس میں کہ میں خموش رہوں

کھلے زبان تو عزت کسی کی کیا رہ جائے

نئے کپڑے بدل اور بال بنا ترے چاہنے والے اور بھی ہیں

کوئی چھوڑ گیا یہ شہر تو کیا ترے چاہنے والے اور بھی ہیں

بنا ہوا ہے مرا شہر قتل گاہ کوئی

پلٹ کے ماؤں کے لخت جگر نہیں آتے

ہر شخص بچھڑ چکا ہے مجھ سے

کیا جانیے کس کو ڈھونڈھتا ہوں

میں نے گھاٹے کا بھی اک سودا کیا

جس سے جو وعدہ کیا پورا کیا

دور تک ایک خلا ہے سو خلا کے اندر

صرف تنہائی کی صورت ہی نظر آئے گی

تمہیں تو قبر کی مٹی بھی اب پکارتی ہے

یہاں کے لوگ بھی اکتائے ہیں چلے جاؤ

وہ لوگ آج خود اک داستاں کا حصہ ہیں

جنہیں عزیز تھے قصے کہانیاں اور پھول

نظر سے دور ہیں دل سے جدا نہ ہم ہیں نہ تم

گلہ کریں بھی تو کیا بے وفا نہ ہم ہیں نہ تم

بدن نے چھوڑ دیا روح نے رہا نہ کیا

میں قید ہی میں رہا قید سے نکل کے بھی

کیسے کریں بندگی ظفرؔ واں

بندوں کی جہاں خدائیاں ہیں

اک آدھ بار تو جاں وارنی ہی پڑتی ہے

محبتیں ہوں تو بنتا نہیں بہانہ کوئی

کتنی بے سود جدائی ہے کہ دکھ بھی نہ ملا

کوئی دھوکہ ہی وہ دیتا کہ میں پچھتا سکتا

ہم اتنا چاہتے تھے ایک دوسرے کو ظفرؔ

میں اس کی اور وہ میری مثال ہو کے رہا

اپنی یادیں اس سے واپس مانگ کر

میں نے اپنے آپ کو یکجا کیا

اے کاش خود سکوت بھی مجھ سے ہو ہم کلام

میں خامشی زدہ ہوں صدا چاہیئے مجھے

ہر درجے پہ عشق کر کے دیکھا

ہر درجے میں بے وفائیاں ہیں

نامہ بر کوئی نہیں ہے تو کسی لہر کے ہاتھ

بھیج ساحل کی طرف اپنی خبر پانی سے

یہ ابتدا تھی کہ میں نے اسے پکارا تھا

وہ آ گیا تھا ظفرؔ اس نے انتہا کی تھی

شاعری پھول کھلانے کے سوا کچھ بھی نہیں ہے تو ظفرؔ

باغ ہی کوئی لگاتا کہ جہاں کھیلتے بچے جا کر

یہاں ہے دھوپ وہاں سائے ہیں چلے جاؤ

یہ لوگ لینے تمہیں آئے ہیں چلے جاؤ

سر شام لٹ چکا ہوں سر عام لٹ چکا ہوں

کہ ڈکیت بن چکے ہیں کئی شہر کے سپاہی

گزارتا ہوں جو شب عشق بے معاش کے ساتھ

تو صبح اشک مرے ناشتے پہ گرتے ہیں

کہتی ہے یہ شام کی نرم ہوا پھر مہکے گی اس گھر کی فضا

نیا کمرہ سجا نئی شمع جلا ترے چاہنے والے اور بھی ہیں

مڑ کے جو آ نہیں پایا ہوگا اس کوچے میں جا کے ظفرؔ

ہم جیسا بے بس ہوگا ہم جیسا تنہا ہوگا

پہلا قدم ہی آخری زینے پہ رکھ دیا

یعنی جو دل کا بوجھ تھا سینے پہ رکھ دیا

کسی زنداں میں سوچنا ہے عبث

دہر ہم میں ہے یا کہ دہر میں ہم

وہ ایک بار بھی مجھ سے نظر ملائے اگر

تو میں اسے بھی کوئی مہرباں شمار کروں

علاج اہل ستم چاہئے ابھی سے ظفرؔ

ابھی تو سنگ ذرا فاصلے پہ گرتے ہیں

کسی خیال کی سرشاری میں جاری و ساری یاری میں

اپنے آپ کوئی آئے گا اور بن جائے گا مہمان

پڑا نہ فرق کوئی پیرہن بدل کے بھی

لہو لہو ہی رہا جم کے بھی پگھل کے بھی

ظفرؔ وہاں کہ جہاں ہو کوئی بھی حد قائم

فقط بشر نہیں ہوتا خدا بھی ہوتا ہے