نہ جانے شعر میں کس درد کا حوالہ تھا

کہ جو بھی لفظ تھا وہ دل دکھانے والا تھا

گھاس میں جذب ہوئے ہوں گے زمیں کے آنسو

پاؤں رکھتا ہوں تو ہلکی سی نمی لگتی ہے

سچ تو کہہ دوں مگر اس دور کے انسانوں کو

بات جو دل سے نکلتی ہے بری لگتی ہے

در بہ در ٹھوکریں کھائیں تو یہ معلوم ہوا

گھر کسے کہتے ہیں کیا چیز ہے بے گھر ہونا

نکل گئے ہیں جو بادل برسنے والے تھے

یہ شہر آب کو ترسے گا چشم تر کے بغیر

اتنی کاوش بھی نہ کر میری اسیری کے لیے

تو کہیں میرا گرفتار نہ سمجھا جائے

اس ایک چہرے میں آباد تھے کئی چہرے

اس ایک شخص میں کس کس کو دیکھتا تھا میں

کسی کو کیا بتاؤں کون ہوں میں

کہ اپنی داستاں بھولا ہوا ہوں

میں وہ معنی غم عشق ہوں جسے حرف حرف لکھا گیا

کبھی آنسوؤں کی بیاض میں کبھی دل سے لے کے کتاب تک

کون تو ہے کون میں کیسی وفا

حاصل ہستی ہیں کچھ رسوائیاں

چلی ہے موج میں کاغذ کی کشتی

اسے دریا کا اندازہ نہیں ہے

دکھ دے یا رسوائی دے

غم کو مرے گہرائی دے

خموشی کے ہیں آنگن اور سناٹے کی دیواریں

یہ کیسے لوگ ہیں جن کو گھروں سے ڈر نہیں لگتا

دیوتا بننے کی حسرت میں معلق ہو گئے

اب ذرا نیچے اتریے آدمی بن جائیے

میرا شور غرقابی ختم ہو گیا آخر

اور رہ گیا باقی صرف شور دریا کا

محلے والے میرے کار بے مصرف پہ ہنستے ہیں

میں بچوں کے لیے گلیوں میں غبارے بناتا ہوں

منزل کا پتا ہے نہ کسی راہ گزر کا

بس ایک تھکن ہے کہ جو حاصل ہے سفر کا

وہ جنوں کو بڑھائے جائیں گے

ان کی شہرت ہے میری رسوائی

مجھ سے کہتا ہے کہ سائے کی طرح ساتھ ہیں ہم

یوں نہ ملنے کا نکالا ہے بہانہ کیسا

کوئی نہیں جو پتا دے دلوں کی حالت کا

کہ سارے شہر کے اخبار ہیں خبر کے بغیر

کیسے قصے تھے کہ چھڑ جائیں تو اڑ جاتی تھی نیند

کیا خبر تھی وہ بھی حرف مختصر ہو جائیں گے

ساتھ اس کے رہ سکے نہ بغیر اس کے رہ سکے

یہ ربط ہے چراغ کا کیسا ہوا کے ساتھ

میں تجھ کو کتنا چاہتا ہوں

یہ کہنا غیر ضروری ہے

سخت بیوی کو شکایت ہے جوان نو سے

ریل چلتی نہیں گر جاتا ہے پہلے سگنل

یاد نے آ کر یکایک پردہ کھینچا دور تک

میں بھری محفل میں بیٹھا تھا کہ تنہا ہو گیا

نہیں رہا میں ترے راستے کا پتھر بھی

وہ دن بھی تھے ترے احساس میں خدا تھا میں

جتنا آنکھ سے کم دیکھوں

اتنی دور دکھائی دے

وہ بے خودی تھی محبت کی بے رخی تو نہ تھی

پہ اس کو ترک تعلق کو اک بہانہ ہوا

یہ چاہا تھا کہ پتھر بن کے جی لوں

سو اندر سے پگھلتا جا رہا ہوں

میں غم کو بسا رہا ہوں دل میں

بے گھر کو مکان دے رہا ہوں

خود اپنی دید سے اندھی ہیں آنکھیں

خود اپنی گونج سے بہرا ہوا ہوں

حال دل کون سنائے اسے فرصت کس کو

سب کو اس آنکھ نے باتوں میں لگا رکھا ہے

بارہا یوں بھی ہوا تیری محبت کی قسم

جان کر ہم نے تجھے خود سے خفا رکھا ہے

اک پتنگے نے یہ اپنے رقص آخر میں کہا

روشنی کے ساتھ رہیئے روشنی بن جائیے

سائے کو سائے میں گم ہوتے تو دیکھا ہوگا

یہ بھی دیکھو کہ تمہیں ہم نے بھلایا کیسے

بہت طویل مری داستان غم تھی مگر

غزل سے کام لیا مختصر بنانے کا

حال دل ناگفتنی ہے ہم جو کہتے بھی تو کیا

پھر بھی غم یہ ہے کہ اس نے ہم سے پوچھا ہی نہیں

آ کے اب جنگل میں یہ عقدہ کھلا

بھیڑیے پڑھتے نہیں ہیں فلسفہ

خوش نما لفظوں کی رشوت دے کے راضی کیجیے

روح کی توہین پر آمادہ رہتا ہے بدن

قرب بدن سے کم نہ ہوئے دل کے فاصلے

اک عمر کٹ گئی کسی نا آشنا کے ساتھ

سفر میں عشق کے اک ایسا مرحلہ آیا

وہ ڈھونڈتا تھا مجھے اور کھو گیا تھا میں

دل حسن کو دان دے رہا ہوں

گاہک کو دکان دے رہا ہوں

یہ نہیں ہے کہ نوازے نہ گئے ہوں ہم لوگ

ہم کو سرکار سے تمغہ ملا رسوائی کا

میں اس کو بھول گیا تھا وہ یاد سا آیا

زمیں ہلی تو میں سمجھا کہ زلزلہ آیا

لباس درد بھی ہم نے اتارا

یہ کپڑے اب پرانے ہو چکے ہیں

اک آگ سی جلتی رہی تا عمر لہو میں

ہم اپنے ہی احساس میں پکتے رہے تا دیر

یہ کیسے لوگ ہیں صدیوں کی ویرانی میں رہتے ہیں

انہیں کمروں کی بوسیدہ چھتوں سے ڈر نہیں لگتا

حال مت پوچھ محبت کا ہوا ہے کچھ اور

لا کے کس نے یہ سر راہ دیا رکھا ہے

آنسوؤں سے تو ہے خالی درد سے عاری ہوں میں

تیری آنکھیں کانچ کی ہیں میرا دل پتھر کا ہے

جس آگ سے دل سلگ رہے تھے

اب اس سے دماغ جل رہے ہیں