Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ",RRa"

Nazm MATCHES FOR ",rra"

Nazm

daraKHt-e-zard

nahii.n ma.aluum 'zaryuun' ab tumhaarii umr kyaa hogii
vo kin KHvaabo.n se jaane aashnaa naa-aashnaa hogii
tumhaare dil ke is duniyaa se kaise silsile ho.nge
tumhe.n kaise gumaa.n ho.nge tumhe.n kaise gile ho.nge
tumhaarii sub.h jaane kin KHayaalo.n se nahaatii ho
tumhaarii shaam jaane kin malaalo.n se nibhaatii ho
na jaane kaun doshiiza tumhaarii zindagii hogii
na jaane us kii kyaa baayastagii shaa.istagii hogii
use tum phone karte aur KHat likhte rahe hoge
na jaane tum ne kitnii kam Galat urdu likhii hogii
ye KHat likhnaa to daqyaanuus kii pii.Dhii kaa qissa hai
ye sinf-e-nasr ham naa-baaliGo.n ke fan kaa hissa hai
vo ha.nstii ho to shaayad tum na rah paate ho haalo.n me.n
ga.Dhaa nanhaa saa pa.D jaataa ho shaayad us ke gaalo.n me.n
gumaa.n ye hai tumhaarii bhii rasaa.ii naa-rasaa.ii ho
vo aa.ii ho tumhaare paas lekin aa na paa.ii ho
vo shaayad maa.ide kii gand biryaanii na khaatii ho
vo naan-e-be-KHamiir-e-maida kam-tar hii chabaatii ho
vo doshiiza bhii shaayad daastaano.n kii ho dil-daada
use ma.aluum hogaa 'zaal' thaa 'sohraab' kaa daadaa
tahamtan ya.anii 'rustam' thaa giraamii 'saam' kaa vaaris
giraamii 'saam' thaa sulb-e-nar-e-'maanii' kaa KHush-zaada
(ye merii ek KHvaahish hai jo mushkil hai)
vo 'najm'-aafa.ndi-e-marhuum ko to jaantii hogii
vo nauho.n ke adab kaa tarz to pahchaantii hogii
use kad hogii shaayad un sabhii se jo lapaa.Dii ho.n
na ho.nge KHvaab us kaa jo gavayye aur khilaa.Dii ho.n

Jaun Eliya
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

bahut KHub-surat ho tum

bahut KHuub-suurat ho tum bahut KHuub-suurat ho tum
kabhii mai.n jo kah duu.n mohabbat hai tum se
to mujh ko KHudaa raa Galat mat samajhnaa
ki merii zaruurat ho tum bahut KHuub-suurat ho tum
hai.n phuulo.n kii Daalii pe baa.nhe.n tumhaarii
hai.n KHaamosh jaaduu nigaahe.n tumhaarii
jo kaa.nTe huu.n sab apne daaman me.n rakh luu.n
sajaa.uu.n mai.n kaliyo.n se raahe.n tumhaarii
nazar se zamaane kii KHud ko bachaanaa
kisii aur se dekho dil mat lagaanaa
ki merii amaanat ho tum
bahut KHuub-suurat ho tum
hai chehraa tumhaaraa ki din hai sunahraa
hai chehraa tumhaaraa ki din hai sunahraa
aur is par ye kaalii ghaTaa.o.n kaa pahraa
gulaabo.n se naazuk mahaktaa badan hai
ye lab hai.n tumhaare ki khiltaa chaman hai
bikhero jo zulfe.n to sharmaa.e baadal
farishte bhii dekhe.n to ho jaa.e.n paagal
vo paakiiza muurat ho tum bahut KHuub-suurat ho tum
jo ban ke kalii muskuraatii hai aksar
shab-e-hijr me.n jo rulaatii hai aksar
jo lamho.n hii lamho.n me.n duniyaa badal de
jo shaa.ir ko de jaa.e pahluu Gazal ke
chhupaanaa jo chaahe.n chhupaa.ii na jaa.e
bhulaanaa jo chaahe.n bhulaa.ii na jaa.e
vo pahlii mohabbat ho tum bahut KHuub-suurat ho tum

Tahir Faraz
Nazm

farman-e-KHuda

uTTho mirii duniyaa ke Gariibo.n ko jagaa do
kaaKH-e-umraa ke dar o diivaar hilaa do
garmaa.o Gulaamo.n kaa lahuu soz-e-yaqii.n se
kunjishk-e-faromaaya ko shaahii.n se la.Daa do
sulataani-e-jamhuur kaa aataa hai zamaana
jo naqsh-e-kuhan tum ko nazar aa.e miTaa do
jis khet se dahqaa.n ko mayassar nahii.n rozii
us khet ke har KHosha-e-gandum ko jalaa do
kyuu.n KHaaliq o maKHluuq me.n haa.il rahe.n parde
piiraan-e-kaliisaa ko kaliisaa se uThaa do
haq raa ba-sajuude sanamaa.n raa ba-tavaafe
behtar hai charaaG-e-haram-o-dair bujhaa do
mai.n naa-KHush o be-zaar huu.n marmar kii silo.n se
mere liye miTTii kaa haram aur banaa do
tahziib-e-navii kaargah-e-shiishagaraa.n hai
aadaab-e-junuu.n shaa.ir-e-mashriq ko sikhaa do

Allama Iqbal
Nazm

KHizr-e-rah

shaa'ir
saahil-e-dariyaa pe mai.n ik raat thaa mahv-e-nazar
gosha-e-dil me.n chhupaa.e ik jahaan-e-iztiraab
shab sukuut-afzaa havaa aasuuda dariyaa narm sair
thii nazar hairaa.n ki ye dariyaa hai yaa tasviir-e-aab
jaise gahvaare me.n so jaataa hai tifl-e-shiir-KHvaar
mauj-e-muztar thii kahii.n gahraa.iyo.n me.n mast-e-KHvaab
raat ke afsuu.n se taa.ir aashiyaano.n me.n asiir
anjum-e-kam-zau giraftaar-e-tilism-e-maahtaab
dekhtaa kyaa huu.n ki vo paik-e-jahaa.n-paimaa KHizr
jis kii piirii me.n hai maanind-e-sahar ra.ng-e-shabaab
kah rahaa hai mujh se ai juuyaa-e-asraar-e-azal
chashm-e-dil vaa ho to hai taqdiir-e-aalam be-hijaab
dil me.n ye sun kar bapaa ha.ngaama-e-mahshar hu.aa
mai.n shahiid-e-justujuu thaa yuu.n suKHan-gustar hu.aa
ai tirii chashm-e-jahaa.n-bii.n par vo tuufaa.n aashkaar
jin ke hangaame abhii dariyaa me.n sote hai.n KHamosh
kashtii-e-miskiin-o-jaan-e-paak-o-diivaar-e-yatiim
ilm-e-muusaa bhii hai tire saamne hairat-farosh
chho.D kar aabaadiyaa.n rahtaa hai tuu sahraa-navard
zindagii terii hai be-roz-o-shab-o-fardaa-o-dosh
zindagii kaa raaz kyaa hai saltanat kyaa chiiz hai
aur ye sarmaaya-o-mehnat me.n hai kaisaa KHarosh
ho rahaa hai asia kaa KHirqa-e-deriina chaak
naujavaa.n aqvaam-e-nau-daulat ke hai.n pairaaya-posh
garche askandar rahaa mahruum-e-aab-e-zindagii
fitrat-e-askandarii ab tak hai garm-e-naa.o-nosh
bechtaa hai haashmii naamuus diin-e-mustafaa
KHaak-o-KHuu.n me.n mil rahaa hai turkamaan-e-saKHt-kosh
aag hai aulaad-e-ibraahiim hai namruud hai
kyaa kisii ko phir kisii kaa imtihaa.n maqsuud hai
javaab-e-KHizr
sahraa-navardii

Allama Iqbal
Nazm

zauq o shauq

qalb o nazar kii zindagii dasht me.n sub.h kaa samaa.n
chashma-e-aaftaab se nuur kii naddiyaa.n ravaa.n!
husn-e-azal kii hai numuud chaak hai parda-e-vajuud
dil ke liye hazaar suud ek nigaah kaa ziyaa.n!
surKH o kabuud badliyaa.n chho.D gayaa sahaab-e-shab!
koh-e-izam ko de gayaa ra.ng-ba-ra.ng tailisaa.n!
gard se paak hai havaa barg-e-naKHiil dhul ga.e
reg-e-navaah-e-kaazima narm hai misl-e-parniyaa.n
aag bujhii hu.ii idhar, TuuTii hu.ii tanaab udhar
kyaa KHabar is maqaam se guzre hai.n kitne kaarvaa.n
aa.ii sadaa-e-jibra.iil teraa maqaam hai yahii
ahl-e-firaaq ke liye aish-e-davaam hai yahii
kis se kahuu.n ki zahr hai mere liye mai-e-hayaat
kohna hai baz-e-kaa.inaat taaza hai.n mere vaardaat!
kyaa nahii.n aur Gaznavii kaargah-e-hayaat me.n
baiThe hai.n kab se muntazir ahl-e-haram ke somnaat!
zikr-e-arab ke soz me.n, fikr-e-ajam ke saaz me.n
ne arabii mushaahidaat, ne ajamii taKHaiyyulaat
qaafilaa-e-hijaaz me.n ek husain bhii nahii.n
garche hai taab-daar abhii gesuu-e-dajla-o-furaat!
aql o dil o nigaah kaa murshid-e-avvalii.n hai ishq
ishq na ho to shar-o-dii.n butkada-e-tasavvuraat!
sidq-e-KHaliil bhii hai ishq sabr-e-husain bhii hai ishq!
ma.arka-e-vajuud me.n badr o hunain bhii hai ishq!
aaya-e-kaa.enaat kaa ma.anii-e-der-yaab tuu!
nikle tirii talaash me.n qaafila-haa-e-ra.ng-o-buu!
jalvatiyaan-e-madrasa kor-nigaah o murda-zauq
jalvatyaan-e-maikada kam-talab o tahii-kaduu!
mai.n ki mirii Gazal me.n hai aatish-e-rafta kaa suraaG
merii tamaam sarguzisht kho.e hu.o.n kii justujuu!
baad-e-sabaa kii mauj se nash-o-numaa-e-KHaar-o-KHas!
mere nafas kii mauj se nashv-o-numaa-e-aarzuu!
KHuun-e-dil o jigar se hai merii navaa kii parvarish
hai rag-e-saaz me.n ravaa.n saahib-e-saaz kaa lahuu!
fursat-e-kashmukash me.n ii.n dil be-qaraar raa
yak do shikan zyaada kun gesuu-e-taabdaar raa
lauh bhii tuu, qalam bhii tuu, teraa vajuud al-kitaab!
gumbad-e-aabgiina-ra.ng tere muhiit me.n habaab!
aalam-e-aab-o-KHaak me.n tere zuhuur se faroG
zarra-e-reg ko diyaa tuu ne tuluu-e-aaftaab!
shaukat-e-sanjar-o-saliim tere jalaal kii numuud!
faqr-e-'juned'-o-'baayaziid' teraa jamaal be-naqaab!
shauq tiraa agar na ho merii namaaz kaa imaam
meraa qayaam bhii hijaab! meraa sujuud bhii hijaab!
terii nigaah-e-naaz se dono.n muraad paa ga.e
aql, Gayaab o justujuu ishq, huzuur o iztiraab!
tiira-o-taar hai jahaa.n gardish-e-aaftaab se!
tab-e-zamaana taaza kar jalva-e-be-hijaab se!
terii nazar me.n hai.n tamaam mere guzishta roz o shab
mujh ko KHabar na thii ki hai ilm-e-naKHiil be-rutab!
taaza mire zamiir me.n ma.arka-e-kuhan hu.aa!
ishq tamaam mustafaa! aql tamaam buu-lahab!
gaah ba-hiila mii-barad, gaah ba-zor mii-kashad
ishq kii ibtidaa ajab ishq kii intihaa ajab!
aalam-e-soz-o-saaz me.n vasl se ba.Dh ke hai firaaq
vasl me.n marg-e-aarzuu! hijr me.n lazzat-e-talab!
ain-e-visaal me.n mujhe hausla-e-nazar na thaa
garche bahaana-juu rahii merii nigaah-e-be-adab!
garmii-e-aarzuu firaaq! shorish-e-haa-o-huu firaaq!
mauj kii justujuu firaaq! qatre kii aabruu firaaq!

Allama Iqbal
Nazm

ishq aur maut

suhaanii numuud-e-jahaa.n kii gha.Dii thii
tabassum-fashaa.n zindagii kii kalii thii
kahii.n muhr ko taaj-e-zar mil rahaa thaa
ataa chaa.nd ko chaa.ndnii ho rahii thii
siyah pairahan shaam ko de rahe the
sitaaro.n ko ta.aliim-e-taabindagii thii
kahii.n shaaKH-e-hastii ko lagte the patte
kahii.n zindagii kii kalii phuuTtii thii
farishte sikhaate the shabnam ko ronaa
ha.nsii gul ko pahle-pahal aa rahii thii
ataa dard hotaa thaa shaa.ir ke dil ko
KHudii tishna-kaam mai-e-be-KHudii thii
uThii avval avval ghaTaa kaalii kaalii
ko.ii huur choTii ko khole kha.Dii thii
zamii.n ko thaa da.avaa ki mai.n aasmaa.n huu.n
makaa.n kah rahaa thaa ki mai.n laa-makaa.n huu.n
Garaz is qadar ye nazaara thaa pyaaraa
ki nazaargii ho saraapaa nazaaraa
malak aazmaate the parvaaz apnii
jabiino.n se nuur-e-azal aashkaaraa
farishta thaa ik ishq thaa naam jis kaa
ki thii rahbarii us kii sab kaa sahaaraa
farishta ki putlaa thaa be-taabiyo.n kaa
malak kaa malak aur paare kaa paaraa
pa.e sair firdaus ko jaa rahaa thaa
qazaa se milaa raah me.n vo qazaa-raa
ye puuchhaa tiraa naam kyaa kaam kyaa hai
nahii.n aa.nkh ko diid terii gavaaraa
hu.aa sun ke goyaa qazaa kaa farishta
ajal huu.n miraa kaam hai aashkaaraa
u.Daatii huu.n mai.n raKHt-e-hastii ke purze
bujhaatii huu.n mai.n zindagii kaa sharaaraa
mirii aa.nkh me.n jaaduu-e-niistii hai
payaam-e-fanaa hai usii kaa ishaaraa
magar ek hastii hai duniyaa me.n aisii
vo aatish hai mai.n saamne us ke paaraa
sharar ban ke rahtii hai insaa.n ke dil me.n
vo hai nuur-e-mutlaq kii aa.nkho.n kaa taaraa
Tapaktii hai aa.nkho.n se ban ban ke aa.nsuu
vo aa.nsuu ki ho jin kii talKHii gavaaraa
sunii ishq ne guftuguu jab qazaa kii
ha.nsii us ke lab par hu.ii aashkaaraa
girii is tabassum kii bijlii ajal par
a.ndhere kaa ho nuur me.n kyaa guzaaraa
baqaa ko jo dekhaa fanaa ho ga.ii vo
qazaa thii shikaar qazaa ho ga.ii vo

Allama Iqbal
Nazm

nala-e-firaq

tuu kahaa.n hai ai kaliim-e-zarra-e-siinaa-e-ilm!
thii tirii mauj-e-nafas baad-e-nashaat-afzaa-e-ilm
ab kahaa.n vo shauq-e-rah-paimaa.ii-e-sahraa-e-ilm
tere dam se thaa hamaare sar me.n bhii saudaa-e-ilm
''shor-e-lailaa ko ki baaz-aaraa.ish-e-saudaa kunad
KHaak-e-majnuu.n-raa Gubaar-e-KHaatir-e-sahraa kunad''

Allama Iqbal
Nazm

ilm ki zarurat

jahaa.n me.n har taraf hai ilm hii kii garm-baazaarii
zamii.n se aasmaa.n tak bas isii kaa faiz hai jaarii
yahii sar-chashma-e-aslii hai tahziib-o-tamaddun kaa
baGair is ke bashar honaa bhii hai ik saKHt biimaarii
banaataa hai yahii insaan ko kaamil-tariin insaa.n
sikhaataa hai yahii aKHlaaq o iisaar o ravaa-daarii
yahii qaumo.n ko pahu.nchaataa hai baam-e-auj-o-rif.at par
yahii mulko.n ke andar phuu.nktaa hai ruuh-e-bedaarii
isii ke naam kaa chaltaa hai sikka saare aalam me.n
isii ke sar pe rahtaa hai hamesha taaj-e-sardaarii
isii ke sab karishme ye nazar aate hai.n duniyaa me.n
isii ke dam se raunaq aalam-e-imkaa.n kii hai saarii
ye laa-silkii, ye telephone ye raile.n, ye tayyaare
ye zer-e-aab o baalaa-e-falak insaa.n kii tarraarii
huduud-e-istavaa qutbain se yuu.n ho ga.e mudGam
ki hai ab rub.a masko.n jaise ghar kii chaar-diivaarii
samundar ho ga.e paayaab sahraa bin ga.e gulshan
kiyaa science ne bhii e.ataraaf-e-ijz-o-naachaarii
buKHaar o barq kaa jarraar lashkar hai ab aamaada
ugalvaa le zamiin o aasmaa.n kii daulate.n saarii
Garaz chaaro.n taraf ab ilm hii kii baadshaahii hai
ki us ke baazuu.o.n me.n quvvat-e-dast-e-ilaahii hai
nigaah-e-Gaur se dekho agar haalaat-e-insaanii
to ho saktaa hai hal ye uqda-e-mushkil ba-aasaanii
vahii qaume.n taraqqii ke madaarij par hai.n faa.eq-tar
ki hai jin me.n tamaddun aur siyaasat kii faraavaanii
isii ke zo.am me.n hai germany charKH-e-tafaaKHur par
isii ke zor par mirriiKH kaa ham-sar hai jaapaanii
isii kii quvvat-e-baazuu pe hai maGruur america
isii ke bil par la.Dkii ho rahii hai rustam-e-saanii
ishaare par isii ke naql-o-harakat hai sab italy kii
isii ke taaba-e-farmaan hai.n ruusii o iiraanii
isii ke jumbish-e-abruu pe hai england kaa Garra
isii ke hai.n sab aavurde francisi o albaanii
ko.ii mulk ab nahii.n jin me.n ye jauhar ho na raKHshanda
na Gaafil is se chiinii hai.n na shaamii hai.n na afGaanii
baGair is ke jo rahnaa chaahte hai.n is zamaane me.n
samajh rakkhe.n fanaa un ke liye hai hukm-e-rabbaanii
zamaana phe.nk degaa KHud unhe.n qa.ar-e-halaakat me.n
vo apne haath se ho.nge KHud apnii qabr ke baanii
zamaane me.n jise ho saahib-e-fat.h-o-zafar honaa
zaruurii hai use ilm-o-hunar se bahra-var honaa
taraqqii kii khulii hai.n shaahraahe.n dahr me.n har suu
nazar aataa hai tahziib-o-tamaddun se jahaa.n mamluu
chale jaate hai.n u.Dte shahsavaaraan-e-falak-paimaa
KHiraaj-e-tahniyat lete hu.e karte hu.e jaaduu
guzarte jaa rahe hai.n duusro.n ko chho.Dte piichhe
kabhii hotaa hai sahraa mustaqar un kaa kabhii Taapu
kamar baa.ndhe hu.e din raat chalne par hai.n aamaada
dimaaG afkaar se aur dil vufuur-e-shauq se maluul
alag rah kar KHayaal-e-zahmat o ehsaas-e-raahat se
lage hai.n apnii apnii fikr me.n baa-KHaatir-e-yaksuu
magar ham hai.n ki aslan his nahii.n ham ko ko.ii is kii
hamaare paa-e-himmat in maraahil me.n hai.n be-qaabuu
jahaa.n pahlaa qadam rakkhaa thaa roz-e-avvalii.n ham ne
nahii.n sarke is apne aslii markaz se ba-qadr-e-muu
ye haalat hai ki ham par band hai har ek darvaaza
nazar aataa nahii.n hargiz ko.ii ummiid kaa pahluu
magar vaa-hasrataa phir bhii ham apne zo.am-e-baatil me.n
samajhte hai.n zamaane bhar se aage KHud ko manzil me.n
zaruurat hai ki ham me.n raushnii ho ilm kii paidaa
nazar aa.e hame.n bhii taaki asl-e-haalat-e-duniyaa
hame.n ma.aluum ho haalaat ab kyaa hai.n zamaane ke
hamaare saath kaa jo qaafila thaa vo kahaa.n pahu.nchaa
jo pastii me.n the ab vo jalva-gar hai.n baam-e-rif.at par
jo baalak be-nishaa.n the aaj hai in kaa alam barpaa
hamaarii KHuubiyaa.n sab duusro.n ne chhiin lii.n ham se
zamaane ne hame.n itnaa jhi.njho.Daa kar diyaa na.ngaa
ravaa-daarii, uKHuvvat, dostii, iisaar, hamdardii
KHayaal-e-mulk-o-millat dard-e-qaum, andesha-e-fardaa
ye sab jauhar hamaare the kabhii ai vaa.e-mahruumii
bane hai.n KHuubii-e-qismat se jo ab Gair kaa hissaa
agar ho jaa.e.n raaGib ab bhii ham ta.aliim kii jaanib
to kar sakte hai.n ab bhii mulk me.n ham zindagii paidaa
bahut kuchh vaqt ham ne kho diyaa hai lekin is par bhii
agar chaahe.n to kar de.n pesh-rau ko apne ham paspaa
nikammaa kar diyaa hai kaahilii ne go hame.n lekin
rago.n me.n hai hamaarii KHuun abhii tak dau.Dtaa phirtaa
ko.ii maKHfii haraarat gar hamaare dil ko garmaa de
hamaare jism me.n phir zindagii kii ruuh dau.Daa de
vatan vaalo bahut Gaafil rahe ab hosh me.n aa.o
uTho be-daar ho aql-o-KHirad ko kaam me.n laa.o
tumhaare qaum ke bachcho.n me.n hai ta.aliim kaa fuqdaa.n
ye gutthii saKHt pechiida hai is ko jald suljhaa.o
yahii bachche bil-aaKHir tum sabho.n ke jaa-nashii.n ho.nge
tum apne saamne jaisaa unhe.n chaaho banaa jaa.o
bahut hii ra.nj-dah ho jaa.egii us vaqt kii Gaflat
kahii.n aisaa na ho mauqa.a nikal jaane pe pachhtaa.o
ye hai kaar-e-aham do chaar is ko kar nahii.n sakte
KHudaa-raa tum bhii apne farz kaa ehsaas farmaa.o
ye bojh aisaa nahii.n jis ko uThaa le.n chaar chhe mil kar
sahaaraa do, sahaaraa duusro.n se is me.n dilvaa.o
jo zii-ehsaas hai.n haasil karo tum KHidmate.n un kii
jo zii-parvaa hai.n un ko jis tarah ho us taraf laa.o
Garaz jaise bhii ho jis shakl se bhii ho ye laazim hai
tum apne qaum ke bachcho.n ko ab ta.aliim dilvaa.o
agar tum musta.iddii ko banaa loge shi.aar apnaa
yaqii.n jaano ki mustaqbil hai behad shaandaar apnaa
KHudaavandaa! du.aa.o.n me.n hamaarii ho asar paidaa
shab-e-Gaflat hamaarii phir kare nuur-e-sahar paidaa
hamaare saare KHvaabiida qavaa be-daar ho jaa.e.n
sar-e-nau ho phir in me.n zindagii kii karr-o-farr paidaa
hame.n ehsaas ho ham kaun the aur aaj ham kyaa hai.n
kare.n maahaul-e-mulkii ke liye gahrii nazar paidaa
milaa rakkhaa hai apne jauhar-e-kaamil ko miTTii me.n
ham ab bhii KHaak se kar sakte hai.n la.al-o-guhar paidaa
agar chaahe.n to ham mushkil vatan kii dam me.n hal kar de.n
hazaaro.n suurate.n kar sakte hai.n ham kaargar paidaa
ba-zaahir go ham ik tuuda hai.n bilkul raakh kaa lekin
agar chaahe.n to KHaakistar se kar de.n sau sharar paidaa
vatan kaa nakbat o aflaas kho de.n ham ishaare me.n
jahaa.n Thokar lagaa de.n ho vahii.n se kaan-e-zar paidaa
ham is manzil ke aaKHir par pahu.nch kar bil-yaqii.n dam le.n
agar kuchh taaza-dam ho jaa.e.n apne ham-safar paidaa
jo koshish muttahid ho kar kahii.n ik baar ho jaa.e
yaqii.n hai mulk kii qismat kaa be.Daa paar ho jaa.e

Ahmaq Phaphoondvi
Nazm

ek waqt mein ek kaam

hai kaam ke vaqt kaam achchhaa
aur khel ke vaqt khel zebaa
jab kaam kaa vaqt ho karo kaam
bhuule se bhii khel kaa na lo naam
haa.n khel ke vaqt KHuub khelo
kuudo phaa.ndo ki Da.nD pelo
KHush rahne kaa hai yahii tariiqa
har baat kaa siikhiye saliiqa
himmat ko na haariyo KHudaa-raa
mat Dhuu.nDiyo Gair kaa sahaaraa
apnii himmat se kaam karnaa
mushkil ho to chaahiye na Darnaa
jo kuchh ho so apne dam qadam se
kyaa kaam hai Gair ke karam se
mat chho.Diyo kaam ko adhuuraa
be-kaar hai jo hu.aa na puuraa
har vaqt mai.n sirf ek hii kaam
paa saktaa hai behtarii se anjaam
jab kaam me.n kaam aur chhe.Daa
dono.n hii me.n pa.D gayaa bakhe.Daa
jo vaqt guzar gayaa akaarat
afsos! hu.aa KHazaana Gaarat
hai kaam ke vaqt kaam achchhaa
aur khel ke vaqt khel zebaa

Ismail Merathi
Nazm

tawaif

merii nazro.n ko KHudaa-raa daavat-e-kaavish na de
jagmagaate motiyo.n ke haar ko jumbish na de

Mahirul Qadri
Nazm

be-jurat-e-rindana har ishq hai rubahi

be-jur.at-e-rindaana har 'ishq hai ruubaahii
baazuu hai qavii jis kaa vo 'ishq yadullaahii
jo saKHtii-e-manzil ko saamaan-e-safar samjhe
ai vaa.e tan-aasaanii naapaid hai vo raahii
vahshat na samajh is ko ai mardak-e-maidaanii
kohsaar kii KHalvat hai taa'liim-e-KHud-aagaahii
duniyaa hai rivaayaatii 'uqbaa hai munaajaatii
dar-baaz do-'aalam-raa iin ast shahanshaahii

Allama Iqbal
Nazm

KHidmat-e-watan

vatan kii KHidmat-e-be-laus hai har shaKHs par laazim
yahii vo kaam hai jo aadmii ke kaam aataa hai
lagaa dii jaatii hai hubb-e-vatan me.n sar kii baazii bhii
ik aisaa bhii vufuur-e-josh me.n ha.ngaam aataa hai
palaTne hii ko hai qismat tumhaarii ai vatan vaalo
tumhaare vaaste ye arsh se paiGaam aataa hai
Gulaamii duur hotii hai tumhaarii ab ko.ii dam me.n
hukuumat aur sardaarii kaa phir ha.ngaam aataa hai
musiibat hai ye bilkul aarzii is par na ghabraanaa
bas ab aataa hai ahd-e-raahat-o-aaraam aataa hai
vahii phir bhii bazm hogii phir vahii ra.ngiiniyaa.n ho.ngii
vahii paimaana aataa hai vahii phir jaam aataa hai
tum apnii naa-tavaanii se pareshaa.n is qadar kyuu.n ho
kabhii kamzor honaa bhii bashar ke kaam aataa hai
miTaa detaa hai dam me.n naKHvat-e-namruud ik machchhar
kabhii aisaa bhii daur-e-gardish-e-ayyaam aataa hai
KHudaa-raa is nizaa-e-baahamii ko KHatm farmaa do
zaraa socho ki tum par kis qadar ilzaam aataa hai
kabhii chi.Dtaa hai gar mazkuur, qaumo.n kii jahaalat kaa
to sab se pahle kaano.n me.n tumhaaraa naam aataa hai
ye nukta yaad rakkho us ko bhuulaa kah nahii.n sakte
jo vaqt-e-sub.h jaa kar, ghar pe vaqt-e-shaam aataa hai

Ahmaq Phaphoondvi
Nazm

mazdur be-chaara

hotaa nahii.n dam-bhar bhii sukuu.n us ko gavaaraa
jis KHaatir-e-betaab kii fitrat hii hai paaraa
mazluum kii fariyaad se jal jaa.egaa aalam
sad-shoa.la-ba-damaa.n hai un aaho.n kaa sharaaraa
Gam-diido.n ko de aish-o-tarab aur ataa kar
taaj-e-sar-e-sultaanii-e-taimuur gadaa-raa
garmaa de rage.n us kii imaarat ke lahuu se
jis hastii-e-be-maaya kaa Gurbat hai sahaaraa
taKHriib ke bando.n ko bas ab ho nahii.n saktii
insaan kii insaan se tafriiq gavaaraa
paaband sahii dahr me.n aa.iin-e-jahaa.n ke
piiraan-e-kaliisaa kaa hai kyaa us me.n ijaaraa
tahziib-o-tamaddun hai.n imaarat ke sahaare
mazduur kii Gurbat kaa nahii.n ko.ii sahaaraa

Hindi gorakhpurii
Nazm

yaran-e-najd

ai baad-e-sub.h-gaahii dil keii kalii khilaa de
viiraana mere dil kaa rashk-e-chaman banaa de
us bazm-e-jaa.n-fazaa kaa nazzaara phir dikhaa de
gulzaar-e-aarzuu me.n phir taaza gul khilaa de
ye kaar-zaar-e-hastii hai ranj-o-Gam keii bastii
phir yaad-e-bazm-e-jam me.n ik jaam-e-jam pilaa de
ab shaam-e-zindagii keii zulmat hai chhaane vaalii
vo sub.h-e-dil-kushaa kaa nazzaara phir dikhaa de
pastii me.n paa-ba-gil hai umr-e-ravaa.n kaa dariyaa
phir uu.nchii vaadiyo.n ke manzar use dikhaa de
vo ahd-e-shaadmaanii vo itr-e-zindagaanii
ai daur-e-aasmaanii vaapas kahii.n se laade
ai baaGbaa.n ho tujh ko taKHt-e-chaman mubaarak
mujh ko vo ham-navaa de vo meraa gho.nsla de
kin hasrato.n se 'naazir' us anjuman se nikle
melaa saa lag rahaa hai jab ham chaman se nikle
ahvaal-e-bazm-e-gulshan ai naama-bar sunaanaa
vo daastaa.n hai dilkash ra.ngii.n hai vo fasaana
us bazm-e-dil-kushaa me.n ulfat keii us fazaa me.n
taaro.n keii raushnii me.n yaaro.n kaa mil ke gaanaa
kaano.n me.n rach rahii hai koyal keii kuuk ab tak
'naazir' kaa hai vaziifa us dhun me.n gungunaanaa
collage keii sarzamii.n thii yaa naqsh-e-dil-nashii.n thii
dil se KHayaal us kaa mumkin nahii.n bhulaanaa
dariyaa me.n mil ke jaise ho.n naddiyaa.n ham-aaGosh
begaana kal jo aayaa vo aaj thaa yagaana
bahr-e-tavaaf jaanaa piir-e-muGaa.n ke dar par
aur us keii ik nigah se sarmast ho ke aanaa
us chashm-e-mast me.n thii ye turfa ik karaamat
phirtii vo jis taraf ko phirtaa udhar zamaanaa
ai vaqt-e-rafta aa jaa phir vo samaa.n dikhaa jaa
aisaa bhii kyaa thaa jaanaa phir lauT kar na aanaa
ai naaKHudaa bha.nvar se kashtii merii bachaa kar
yaaraan-e-aashnaa se bahr-e-KHudaa milaanaa
dar fasl-e-gul ki gulshan naqsh-o-nigaar bando
'naazir' KHayaal-e-KHud-raa aur bazm-e-yaar bando

Khushi Mohammad Naazir
Nazm

meri shaeri aur naqqad

ai mire sher ke naqqaad tujhe hai ye gila
ki nahii.n hai mire ehsaas me.n sarmastii o kaif
ki nahii.n hai mire anfaas me.n buu-e-mai-e-jaam
chaman-e-dahr kii taqdiir ki mai.n huu.n vo ghaTaa
jis ne siikhaa hii nahii.n abr-e-bahaarii kaa KHiraam
raat taariik hai aur mai.n huu.n vo ik sham-e-hazii.n
jis ke sho.ale me.n nahii.n sub.h-e-daraKHshaa.n kaa payaam
mere phuulo.n me.n sabaa.on na bahaaro.n kaa guzar
merii raato.n me.n sitaaro.n na sharaaro.n kaa guzar
merii mahfil me.n na mutrib na muGannii kaa suruud
mere mai-KHaane me.n mauj-e-mai-e-ummiid haraam
mai.n vo naqqaash huu.n khoyaa hu.aa bhaTkaa naqqaash
jis ke har naqsh me.n taKH.iil ke har paikar me.n
muskuraatii hai ba.De naaz se ruuh-e-aalaam

Moin Ahsan Jazbi
Nazm

main shair hun

KHudaa rakkhe mirii begam Gariiq-e-nukta-chiinii hai
mujassam barhamii naa-vaaqif-e-KHanda-jabiinii hai
na is kii baat me.n narmii na lab me.n angbiinii hai
ba-faiz-e-shaa.irii ghar me.n na ghii hai aur na chiinii hai
tabii.at ab to hai aamaada-e-tark-e-Gazal-KHvaanii
che raa kaarii kunad aaqil ki baaz aayad pashemaanii

Asad Jafri
Nazm

malik-ram

saahab-e-mulk-e-ilm maalik-raam
maalik-e-mulk-e-hilm maalik-raam
maulid-e-paak phaaliya kii zamii.n
hiir-o-raanjhaa kii sar-zamii.n ke qarii.n
shahr-e-gujraat me.n rahe hai ye muqiim
arz-e-lahore me.n hu.ii ta.aliim
nekii-o-KHair-o-KHalq me.n faiyyaz
dostii ke bahut ba.De nabbaaz
kaarvaa.n kaar-gaah-e-hikmat ke
la.al ik ma.adan-e-mohabbat ke
talabaa ke shafiiq-o-yaavar hai.n
bahr tahqiiq ke shanaavar hai.n
akmal-o-afazal-o-aliim-o-KHatiib
akram-o-aazam-o-shariif-o-nahiif
saahib-e-ifqra-o-banda-e-durvesh
dosto.n ke ba.De aqiide kesh
un ke maslak me.n be-riyaa.ii hai
un kii rindii me.n paarsaa.ii hai
nasr me.n un kii nazm kii buu-baas
nazm kii intihaa ke ramz-shanaas
kis qadar aan-baan hai un kii
be-niyaazaana shaan hai un kii
ab bhii chehre pe hai shabaab kaa nuur
sar-basar ilm kii sharaab kaa nuur
baat karne me.n phuul jha.Dte hai.n
kabhii la.Dte na ye jhaga.Dte hai.n
ilm kii justujuu pe jaan nisaar
bahar-e-tahqiiq roz-o-shab bedaar
raah-e-tahqiiq pe chale hai.n mudaam
chhaan Daale iraaq-o-misr-o-shaam
Germany ruus belgium london
har jagah dekhe ilm ke ma.adan
kaarvaa.n ilm kaa hai tez KHiraam
aur us ke amiir maalik-raam
saahab-e-ilm-o-saahab-e-iKHlaaq
dostii me.n ye fard KHalq me.n taaq
aashtii aur ilm kaa ik ganj
un se pahu.nchaa nahii.n kisii ko ra.nj
ramz-daa.n hai.n ye fikr-e-Gaalib ke
hai.n musannif ye zikr-e-Gaalib ke
mohtaram dost arsh-e-farshii ke
hai.n murattab ye nazr-e-arshii ke
hai.n ba-har-ra.ng aalimo.n ke habiib
nazr-e-zaakir unho.n ne dii tartiib
arabii faarsii ho yaa urdu
un kii baato.n me.n sab kii hai KHushbuu
un kii tasniif aurat aur islaam
paa.egii dahr me.n baqaa-e-davaam
KHuub likhaa talaazimaa kaa haal
KHaandaan-e-asad kaa husn maqaal
gul-e-ra.anaa hai nusKHa-e-arta.ng
ye bhii baa-kaif hai gul-e-sad-ra.ng
baratnaa bam ki armuGaa.n ba-daham
bas Ganiimat ki qalb-o-jaa.n ba-daham
ilm raa daada az nazar-e-tamkii.n
rahnumaa-e-ba-raah-e-ilm-o-yaqii.n
zehn farKHanda maGz taabinda
baad dar shahr-e-ilm paa.inda
ro raaz-e-hirs-o-aaz-o-tama-o-havas
nek-KHuu nek-qalb-o-nek-nafs
sahhr-e-naa-murdamaan-o-had-e-aazaad
bas hame.n mard-ast KHush-atvaar
mulk-e-ma.anii kaa baadshaah hai ye
shahr-e-inshaa kaa kaj-kulaah hai ye
KHatm hai arsh ab du.aa pe kalaam
ye rahe.n baa-muraad-o-shaad mudaam
husn-e-siirat kii sham.a jaltii rahe
shaaKH-e-ummiid aur phaltii rahe
zindagii ko mile nashaat tamaam
pur hamesha rahe suruur kaa jaam
nuur-e-KHurshiid kii tarah damke
ilm-o-tahqiiq kii ziyaa chamke
ilm kii raushnii ba.Dhaate rahe.n
ham ko bhii kuchh na kuchh sikhaate rahe.n

Arsh Malsiyani
Nazm

bus ka safar

un hii se puuchhtaa huu.n mai.n safar karte hai.n jo bus me.n
ki de dete ho apnii zindagii kyuu.n Gair ke bas me.n
ye bus vo hai ki bas ho jaa.e jab motor to bantii hai
sa.Dak par ruuTh jaa.e to ba.Dii mushkil se mantii hai
ye akasr baiThne vaalo.n ke dhakko.n se khisaktii hai
kabhii kashtii me.n dariyaa hai kabhii dariyaa me.n kashtii hai
safar karte hai.n is me.n jab baraatii aur dulhan duulhaa
to ban jaatii hai motor jaa.idaad-e-Gair-manquula
aur is ke baa'd agar taariik hai shab duur manzil hai
to karte hai.n tavaaf is kaa vo majnuu.n jin kii mahmil hai
cleaner se yahii kahtaa hai shofer ho ke bechaaraa
''ki kas nakashuud-o-nakashaayad ba-hikmat ii.n mu.amma raa''
agar us vaqt me.n sardii bhii lag jaa.e to kyaa Gam hai
''ye fitna aadmii kii KHaana-viiraanii ko kyaa kam hai''
jo ruk jaa.e ravaa.n kyuu.n ho jo ba.Dhiyaa hai javaa.n kyuu.n ho
''hu.ii ye dost jin kii dushman un kaa aasmaa.n kyuu.n ho''
baraatii khii.nchte ye jaa.idaad aate hai.n shahro.n me.n
jo rasta chand gha.Diyo.n kaa hai vo kaTtaa hai pahro.n me.n
zaraa se ek pa.nkchar se biga.Dtaa hai si.nghaar is kaa
havaa par jis kii hastii ho bhalaa kyaa e'tibaar us kaa
Gubaar aur gard kaa aur tel kii buu kaa KHaziina hai
ye motor-car aur ''gaDDe'' kii aulaad-e-nariina hai
milii gaDDe se ra.anaa.ii o zebaa.ii viraasat me.n
KHar-e-dajjaal se miltii hai suurat me.n malaahat me.n
samaate hai.n phir us me.n Thas ke yuu.n be-lutf-o-aasaa.ish
nahii.n rahtii hai naalo.n ke nikalne kii bhii gunjaa.ish
baso.n kii chhat pe lad kar duudh ke bartan jo aate hai.n
saro.n par shiir kaa baaraan-e-rahmat vo giraate hai.n
vo naadaa.n hai.n jo is baarish pe naak aur bhau.n cha.Dhaate hai.n
sile me.n saKHt-jaanii ke ye juu-e-shiir paate hai.n
pa.Daa hogaa baso.n me.n aap ko aiso.n se bhii paalaa
uThii khujlii to apne saath saathii ko khujaa Daalaa

Syed Mohammad Jafri
Nazm

takmil

''tumhe.n saabit karnaa hogaa ki tum ho''! us ne mujhe jhinjho.Daa
''magar mai.n ye saabit nahii.n kar saktii'' mai.n ne ehtijaaj kiyaa
us ne mujhe muTThii me.n bhar kar zamii.n par bikher diyaa aur KHushii se chillaayaa! ''tum sabza hii sabza ho, rang hii rang ho''
''Thahro! zaraa socho! mujhe jald KHizaa.n ke naadiida haath ma.aduum kar de.nge...... tum ye saabit nahii.n kar sakoge ki mai.n huu.n''
us ne ghabraa kar mujhe phir sameT liyaa aur zaraa tavaqquf ke baa'd fazaa me.n uchhaal diyaa aur pur-josh ho kar bolaa
''dekhaa tum raushnii hii raushnii ho''
''haa.n magar taariikii mujhe nigalne ko betaab hai! mai.n ne kahaa thaa naa mai.n KHud ko saabit karne se qaasir huu.n''
us ne hiraasaa.n ho kar mujhe muTThii me.n jaka.D liyaa....... naa-tamaamii ke dard se merii aa.nkhe.n chhalak pa.Dii.n
us ne mujhe bahne ke liye nasheb me.n chho.D diyaa aur muskuraayaa
''dekhaa tum maaya hii maaya ho''
''mujhe vaqt kii tez dhuup jald KHushk kar degii'' mai.n ne duhaa.ii dii
vo Gusse se kaa.npne lagaa.... phir mujhe saamne rakh kar gi.Dgi.Daayaa
''KHud ko saabit karo KHudaa-raa nahii.n to mai.n miT jaa.uu.ngaa!
hamaarii takmiil zaruurii hai''
''naa-guziir hai! mai.n ne taa.iid kii
aa.o mai.n tumhe.n zeb-e-tan kar luu.n! nahii.n to ham tasdiiq ke haq se mahruum ho jaa.e.nge, ham kabhii saabit na ho sake.nge''
''haa.n hame.n apnii tasdiiq karnii hogii'' us ne mujh me.n zam hote hu.e kahaa
......aur phir ham ne dekhaa... ra.ng... roshnii... sabza... maya... husn aur hairat sab hamaare butuun kii jaagiire.n thii.n
baahar to sirf dhu.aa.n thaa

Naina Adil
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now