Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".elat"

Nazm MATCHES FOR ".elat"

Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

lenin

ai anfus o aafaaq me.n paidaa tirii aayaat
haq ye hai ki hai zinda o paa.inda tirii zaat
mai.n kaise samajhtaa ki tuu hai yaa ki nahii.n hai
har dam mutaGayyar the KHirad ke nazriyaat
mahram nahii.n fitrat ke suruud-e-azlii se
biinaa-e-kavaakib ho ki daanaa-e-nabaataat
aaj aa.nkh ne dekhaa to vo 'aalam hu.aa saabit
mai.n jis ko samajhtaa thaa kaliisaa ke KHuraafaat
ham band-e-shab-o-roz me.n jak.De hu.e bande
tuu KHaaliq-e-aasaar-o-nigaaranda-e-aanaat
ik baat agar mujh ko ijaazat ho to puuchhuu.n
hal kar na sake jis ko hakiimo.n ke maqaalaat
jab tak mai.n jiyaa KHema-e-aflaak ke niiche
kaa.nTe kii tarah dil me.n khaTaktii rahii ye baat
guftaar ke usluub pe qaabuu nahii.n rahtaa
jab ruuh ke andar mutalaatum ho.n KHayaalaat
vo kaun saa aadam hai ki tuu jis kaa hai maa'buud
vo aadam-e-KHaakii ki jo hai zer-e-samaavaat
mashriq ke KHudaavand safedaan-e-ra.ngii
maGrib ke KHudaavand daraKHshanda filizzaat
europe me.n bahut raushni-e-ilm-o-hunar hai
haq ye hai ki be-chashma-e-haivaa.n hai ye zulmaat
raa.naa.i-e-taamiir me.n raunaq me.n safaa me.n
girjo.n se kahii.n ba.Dh ke hai.n banko.n kii imaaraat
zaahir me.n tijaarat hai haqiiqat me.n ju.aa hai
suud ek kaa laakho.n ke liye marg-e-mufaajaat
ye 'ilm ye hikmat ye tadabbur ye hukuumat
piite hai.n lahuu dete hai.n taaliim-e-musaavaat
bekaarii o 'uryaanii o mai-KHvaarii o iflaas
kyaa kam hai.n fara.ngii madniyat kii futuuhaat
vo qaum ki faizaan-e-samaavii se ho mahruum
had us ke kamaalaat kii hai barq o buKHaaraat
hai dil ke liye maut mashiino.n kii hukuumat
ehsaas-e-muravvat ko kuchal dete hai.n aalaat
aasaar to kuchh kuchh nazar aate hai.n ki aaKHir
tadbiir ko taqdiir ke shaatir ne kiyaa maat
mai-KHaana kii buniyaad me.n aayaa hai tazalzul
baiThe hai.n isii fikr me.n piiraan-e-KHaraabaat
chehro.n pe jo surKHii nazar aatii hai sar-e-shaam
yaa Gaaza hai yaa saaGar o miinaa kii karaamaat
tuu qaadir o 'aadil hai magar tere jahaa.n me.n
hai.n talKH bahut banda-e-mazduur ke auqaat
kab Duubegaa sarmaaya-parastii kaa safiina
duniyaa hai tirii muntazir-e-roz-e-mukaafaat

Allama Iqbal
Nazm

march 1907

zamaana aayaa hai be-hijaabii kaa aam diidaar-e-yaar hogaa
sukuut thaa parda-daar jis kaa vo raaz ab aashkaar hogaa
guzar gayaa ab vo daur-e-saaqii ki chhup ke piite the piine vaale
banegaa saaraa jahaan mai-KHaana har ko.ii baada-KHvaar hogaa
kabhii jo aavaara-e-junuu.n the vo bastiyo.n me.n phir aa base.nge
barahna-paa.ii vahii rahegii magar nayaa KHaarzaar hogaa
sunaa diyaa gosh-e-muntazir ko hijaaz kii KHaamushii ne aaKHir
jo ahd sahraa.iyo.n se baa.ndhaa gayaa thaa phir ustuvaar hogaa
nikal ke sahraa se jis ne ruumaa kii saltanat ko ulaT diyaa thaa
sunaa hai ye qudsiyo.n se mai.n ne vo sher phir hoshiyaar hogaa
kiyaa miraa tazkira jo saaqii ne baada-KHvaaro.n kii anjuman me.n
to piir-e-mai-KHaana sun ke kahne lagaa ki mu.nh-phaT hai KHvaar hogaa
dayaar-e-maGrib ke rahne vaalo KHudaa kii bastii dukaa.n nahii.n hai
kharaa jise tum samajh rahe ho vo ab zar-e-kam-ayaar hogaa
tumhaarii tahziib apne KHanjar se aap hii KHud-kushii karegii
jo shaaKH-e-naazuk pe aashiyaana banegaa naa-paa.edaar hogaa
safiina-e-barg-e-gul banaa legaa qaafila mor-e-naa-tavaa.n kaa
hazaar maujo.n kii ho kashaakash magar ye dariyaa se paar hogaa
chaman me.n laala dikhaataa phirtaa hai daaG apnaa kalii kalii ko
ye jaantaa hai ki is dikhaave se dil-jalo.n me.n shumaar hogaa
jo ek thaa ai nigaah tuu ne hazaar kar ke hame.n dikhaayaa
yahii agar kaifiyat hai terii to phir kise e'tibaar hogaa
kahaa jo qumrii se mai.n ne ik din yahaa.n ke aazaad paa-ba-gil hai.n
tuu Gunche kahne lage hamaare chaman kaa ye raazdaar hogaa
KHudaa ke aashiq to hai.n hazaaro.n bano.n me.n phirte hai.n maare maare
mai.n us kaa banda banuu.ngaa jis ko KHudaa ke bando.n se pyaar hogaa
ye rasm-e-bazm-e-fanaa hai ai dil gunaah hai jumbish-e-nazar bhii
rahegii kyaa aabruu hamaarii jo tuu yahaa.n be-qaraar hogaa
mai.n zulmat-e-shab me.n le ke nikluu.ngaa apne dar-maa.nda kaarvaa.n ko
sharar-fishaa.n hogii aah merii nafas miraa shola-baar hogaa
nahii.n hai Gair-az-numuud kuchh bhii jo mudda.aa terii zindagii kaa
tuu ik nafas me.n jahaa.n se miTnaa tujhe misaal-e-sharaar hogaa
na puuchh 'iqbaal' kaa Thikaanaa abhii vahii kaifiyat hai us kii
kahii.n sar-e-raah-guzaar baiThaa sitam-kash-e-intizaar hogaa

Allama Iqbal
Nazm

mere bhi hain kuchh KHwab

ai ishq-e-azal-giir o abad-taab
kuchh KHvaab ki madfuun hai.n ajdaad ke KHud-saaKHta asmaar ke niiche
uj.De hu.e maz.hab ke banaa reKHta auhaam kii diivaar ke niiche
shiiraaz ke majzuub-e-tunak-jaam ke afkaar ke niiche
tahziib-e-niguu.n-saar ke aalaam ke ambaar ke niiche

Noon Meem Rashid
Nazm

KHatun-e-mashriq

daf.atan guu.njii sadaa phir aalam-e-anvaar me.n
aurte.n duniyaa kii haazir ho.n mire darbaar me.n

Josh Malihabadi
Nazm

mashwara

raato.n ko sone se pahle
na.ii puraanii yaado.n ko
ulaT-palaT karte rahnaa
varna kaalii pa.D jaa.e.ngii
idhar udhar se sa.D jaa.e.ngii

Mohammad Alvi
Nazm

pompiye

Dhero.n pathraa.e hu.e vaqt ke safho.n ko ulaT kar dekhaa
ek bhuulii hu.ii tahziib ke purze se bichhe the har-suu
munjamid laave me.n ak.De hu.e insaano.n ke guchchhe the vahaa.n
aag aur laave se ghabraa ke jo lipTe ho.n ge

Gulzar
Nazm

fasla

na phir vo mai.n thaa
na phir vo tum the
na jaane kitnii masaafate.n darmiyaa.n kha.Dii thii.n
us ek lamhe ke aa.iine par
na jaane kitne baras pareshaan dhuul kii tarah se jame the
jinhe.n rifaaqat samajh ke ham dono.n mutma.in the
is ek lamhe ke aa.iine me.n
jab apne apne naqaab ulaT kar
KHud apne chehro.n ko ham ne dekhaa
to ek lamha
vo ek lamhe kaa aa.iina kitnii sadiyo.n kitne hazaar miilo.n kii shakl me.n
darmiyaa.n kha.Daa thaa
na phir vo mai.n thaa na phir vo tum the
bas ek viiraa.n KHamosh sahraa bas ek viiraa.n KHamosh sahraa

Bashar Nawaz
Nazm

chhabbis january

ghuu.nghaT ulaT rahii hai chaman kii kalii kalii
shaaKHe.n to te.Dhii-me.Dhii hai.n suurat bhalii bhalii
ra.ngiiniyaa.n hai.n baaG me.n KHushbuu galii galii
shabnam se hai kalii kii piyaalii bharii bharii
aa tuu bhii aa ki aa ga.ii chhabbiis january

Nazeer Banarasi
Nazm

nur-jahan ka mazar

jalva.o.n se ayaa.n jin ke hu.aa tuur kaa aalam
turbat pe hai un ke shab-e-daijuur kaa aalam

Tilok Chand Mahroom
Nazm

tarah-e-nau

insaa.n ulaT rahaa hai ruKH-e-ziist se naqaab
maz.hab ke ehtimaam fusuu.n-parvarii kii KHair

Sahir Ludhianvi
Nazm

bhuka bangal

puurab des me.n Duggii baajii phailaa sukh kaa haal
dukh kii aaganii kaun bujhaa.e suukh ga.e sab taal
jin haatho.n me.n motii ro le aaj vahii ka.ngaal
aaj vahii ka.ngaal
bhuukaa hai ba.ngaal re saathii bhuukaa hai ba.ngaal
piiTh se apne peT lagaa.e laakho.n ulTe khaaT
bhiik-ma.ngaa.ii se thak thak kar utre maut ke ghaaT
jiyan-maran ke Daa.nDe milaa.e baiThe hai.n chanDaal re saathii
baiThe hai.n chanDaal
bhuukaa hai ba.ngaal re saathii bhuukaa hai ba.ngaal
naddii naale galii Dagar par laasho.n ke ambaar
jaan kii aisii mah.ngii shai kaa ulaT gayaa bevpaar
muTThii bhar chaaval se ba.Dh kar sastaa hai ye maal re saathii
sastaa hai ye maal
bhuukaa hai ba.ngaal re saathii bhuukaa hai ba.ngaal
koThariyo.n me.n gaa.nje baiThe baniye saaraa anaaj
sundar-naarii bhuuk kii maarii beche ghar-ghar laaj
chaupaT-nagarii kaun sambhaale chaar taraf bhuu.nchaal
chaar taraf bhuu.nchaal
bhuukaa hai ba.ngaal re saathii bhuukaa hai ba.ngaal
purkho.n ne ghar baar luTaayaa chho.D ke sab kaa saath
maa.e.n ro.ii.n bilak bilak kar bachche bha.e anaath
sadaa suhaagan bidhuvaa baaje khole sar ke baal re saathii
khole sar ke baal
bhuukaa hai ba.ngaal re saathii bhuukaa hai ba.ngaal
aattii-pattii chabaa-chabaa kar juujh rahaa hai des
maut ne kitne ghuu.nghaT maare badle sau sau bhes
kaal bakaT phailaa.e rahaa hai biimaarii kaa jaal re saathii
biimaarii kaa jaal
bhuukaa hai ba.ngaal re saathii bhuukaa hai ba.ngaal

Wamiq Jaunpuri
Nazm

to main kya karun

sikandar ne poras se kii thii la.Daa.ii jo kii thii la.Daa.ii to mai.n kyaa karuu.n
jo kaurav ne paa.nDav se kii haathaa-paa.ii jo kii haathaa-paa.ii to mai.n kyaa karuu.n
jo pii yuu T put hai to bii yuu T but hai zamaane kaa dastuur kitnaa ulaT hai
pa.Dhaate hai.n sab mujh ko ulTii pa.Dhaa.ii hai ulTii pa.Dhaa.ii to mai.n kyaa karuu.n
hai jaahil ghasiiTaa magar khaa.e halva ye har roz luuTe miThaa.ii kaa jalva
ye duudh me.n paanii milaataa hai bhaa.ii na aa.e malaa.ii to mai.n kyaa karuu.n
ye b-a hai lekin chalaa.e ye Thelaa ye m.a hai lekin ye beche karailaa
agar tiin din se ye bhuukaa hai bhaa.ii jo bhuukaa hai bhaa.ii to mai.n kyaa karuu.n
ye suuraj jo shaam-o-sahar ghuumtaa hai ise ghuumne do agar ghuumtaa hai
zamii.n gol agar hai to hone do bhaa.ii jo chipTii hai bhaa.ii to mai.n kyaa karuu.n

Raja Mehdi Ali Khan
Nazm

ainak ke shishe par

ainak ke shiishe par saraktii chyuu.nTii
aage ke paa.nv uupar havaa me.n uThaa kar
pichhle paa.nv par kha.Dii
hinhinaatii hai gho.De kii tarah
ainak ke niiche dabe aKHbaar me.n
do havaa.ii jahaaz Takraa jaate hai.n
musaafiro.n se ladii ik kashtii ulaT jaatii hai
ek bas khaa.ii me.n gir pa.Dtii hai
paa.nch buu.Dhe faqiir sardii se mar jaate hai.n
ko.ila-kaan me.n paanii bhar jaataa hai
radio pukaartaa hai pachchiis paise me.n tiin
ainak kaa shiisha saaf kartii chyuu.nTii
aahista se aage ba.Dh jaatii hai

Adil Mansuri
Nazm

chup

raat kii kaalii baarish ne
chehro.n kii vardii
kiicha.D se bhar dii hai
mere siine ke pinjre me.n
KHuun kaa gardish karne vaalaa laTTuu
nafrat ke paudo.n ke uupar
ghuum rahaa hai
tum ne aise kaa.nTe
merii shiryaano.n me.n bo.e hai.n
aisii dopahro.n kii zardii
mere gaalo.n pe liipii hai
ki mai.n bistar kii shikno.n me.n
apnii aa.nkhe.n bo kar rotaa huu.n
pahlii baar jab Gam kii putlii qaash ko
chehre se nochaa thaa
jab Gurbat ke auraaq
havaa me.n u.Dte the
jab KHaalii me.ade kii tasviir banaa kar
us me.n chiize.n rakhtaa thaa
phaTe hu.e kap.Do.n me.n jab
tasviir chhupaa kar rakhtaa thaa
merii shahvat
ku.nvaar pane kii dahliizo.n par
apnaa KHutba likhtii thii
biis baras un galiyo.n kii diivaaro.n se
Takraa Takraa kar
mere ka.ndhe ret ke pushte ban kar
Dhete jaate hai.n
mai.n jo terii raano.n ke jangal me.n
kaale phuul ko to.Dne niklaa thaa
ab dekh rahaa huu.n
dil kii korii miTTii me.n
tere jism kii patlii shaaKHe.n ugii hu.ii thii.n
aur ik aavaara sannaaTaa
chhato.n par bhaarii qadmo.n se
ba.Dii aahistagii ke saath chaltaa hai
to vo chupke se mere paas aatii hai
aur apne dhiime lahje me.n
vo saarii daastaane.n kah sunaatii hai
jinhe.n sun kar mai.n dhiimii aa.nch par
pahro.n sulagtaa huu.n
kisii girje ke viiraa.n lawn me.n
jab january
apne sunahrii gesu.o.n ko khol kar
ko.ii puraanaa giit gaatii hai
to vo ik an-chhuu.ii nan kii tarah
patthar ke bencho.n par
mire kaa.ndhe par sar rakhe
mire chehre pe apnii u.ngliyo.n me.n
kabhii jab shaam rotii hai
siyah kaafii ke pyaalo.n se
lapaktii bhaap me.n
phir aa.ndhii kii aamad se aisii gard hu.ii
aisaa habs mirii saa.nso.n me.n phailaa
tere jism kii kashtii me.n
mai.n apne kap.De bhuul aayaa
par tum ne aadhii raat ko aisii chuTkii lii
nii.nd kii Dholak
ghuTno.n kii zarbo.n se chaknaachuur hu.ii
ab mu.nh se shiira bahtaa hai
un zaKHmo.n kaa
jin ke Taa.nke andar hii andar TuuTe hai.n
bijlii kii taaro.n ke uupar
kavve qataar me.n baiThe hai.n
baarish ke paanii me.n jin ke
askarii baazuu hilte hai.n
raano.n kii ye niilii variide.n
jin me.n du.aa kaa naqshii kuuza
ulaT gayaa hai
mai.n ne un galiyo.n me.n
apne marne kii afvaah sunii hai
KHush-ilhaan mo.azzin kii
aavaaz se chi.Diyaa.n u.Dtii hai.n
ai rasto.n kii raadhaa
tere vasl kii KHaatir
jism ke nijii hisse dho kar
lauT ke phir mai.n aayaa huu.n

Abdur Rasheed
Nazm

an-paDh gunge ka rajaz

KHaamoshii meraa lashkar hai
lafzo.n kii daldal
aur us me.n palne vaalii jo.nke.n
ye muta.affin aavaaze.n
merii yalGaar ke aage saabit-qadam rahe.ngii?
kyaa tum vaaqa.ii aisaa samajhte ho
ki tumhaare maidaan itne faraaKH hai.n
ki mere asp-e-asiil ko thakaa de.nge
tumhaare samundar itne mavvaaj hai.n
ki meraa rizq ulaT de.nge
aur tumhaare pahaa.D itne sa.nglaaKH hai.n
ki meraa jhanDaa na thaame.nge

Ahmad Javaid
Nazm

marsiya gopal krishn gokhle

laraz rahaa thaa vatan jis KHayaal ke Dar se
vo aaj KHuun rulaataa hai diida-e-tar se
sadaa ye aatii hai phal phuul aur patthar se
zamii.n pe taaj giraa qaum-e-hind ke sar se
habiib qaum kaa duniyaa se yuu.n ravaana hu.aa
zamii.n ulaT ga.ii kyaa munqalib zamaana hu.aa

Chakbast Braj Narayan
Nazm

etimad

bolii KHud-sar havaa ek zarra hai tuu
yuu.n u.Daa duu.ngii mai.n, mauj-e-dariyaa ba.Dhii
bolii mere liye ek tinkaa hai tuu
yuu.n bahaa duu.ngii mai.n, aatish-e-tu.nd kii
ik lapaT ne kahaa mai.n jalaa Daaluu.ngii
aur zamii.n ne kahaa mai.n nigal jaa.uu.ngii
mai.n ne chehre se apne ulaT dii naqaab
aur ha.ns kar kahaa, mai.n sulaimaan huu.n
ibn-e-aadam huu.n mai.n yaanii insaan huu.n

Akhtarul Iman
Nazm

be-yaqin bastiyan

vo ik musaafir thaa jaa chukaa hai
bataa gayaa thaa ki be-yaqiino.n kii bastiyo.n me.n kabhii na rahnaa
kabhii na rahnaa ki un pe itne azaab utre.nge jin kii gintii adad se baahar
vo apne murde tumhaare kaa.ndho.n pe rakh ke tum ko judaa kare.nge
tum un janaazo.n ko qarya qarya liye phiroge
falak bhii jin se naa-aashnaa hai jinhe.n zamiine.n bhii rad kare.ngii
vo kah gayaa thaa hamesha zillat se duur rahnaa
ki bad-nasiibo.n kaa rizq-e-avval unhii.n zamiino.n se paidaa hotaa hai
jin zamiino.n pe bhuurii giddho.n kii nochii haDDii ke reze bikhrii.n
tum apnii raa.e ko istaqaamat kii aab denaa
jise pahaa.Do.n kii KHushk sa.ngii.n bulandiyo.n se KHiraaj bheje.n
Gulaam zehno.n pe aisii laanat kii rasm rakhnaa
jo terii naslo.n phir un kii naslo.n phir un kii naslo.n talak bhii jaa.e
tumhe.n KHabar ho shariif logo.n kii uu.nchii gardan lachak se aise hii be-KHabar hai
savaad-e-Gurbat me.n KHema-gaaho.n kii jaise gaa.Dii ho.n KHushk chobe.n
kabhii na shaane jhukaa ke chalnaa
ki past-qaamat tumhaare qadmo.n se apne qadmo.n ko jo.D de.nge
vahii nahuusat tumhe.n KHaraabo.n kii paasbaanii ataa karegii
saraab-aa.nkho.n ke raasto.n se tumhaare gurdo.n me.n ret phe.nke.nge aur siine ko kaaT de.nge
vo kah gayaa thaa yahii vo illat ke maare vahshii hai.n jin kii apnii zabaa.n nahii.n hai
ye jhaag u.Daate hai.n apne jab.Do.n se lajlaje kaa to ga.Dga.DaahaT kaa shor uThtaa hai
aur badbuu bikhertaa hai
yahii vo bad-baKHt be-hunar aur be-yaqii.n hai.n ki jin kii diyat na KHuu.n-bahaa hai
so in kii qurbat se duur rahnaa najaat-e-dil kaa sabab banegaa
vo ik musaafir thaa kah gayaa hai

Ali Akbar Natiq
Nazm

safir-e-laila-4

hariim-e-mahmil me.n aa gayaa huu.n salaam le lo
salaam le lo ki mai.n tumhaaraa amiin-e-qaasid KHajil musaafir azaa kii vaadii se lauT aayaa
mai.n lauT aayaa magar saraasiima is tarah se
ki pichhle qadmo.n palaT ke dekhaa na guzre rasto.n ke faaslo.n ko
jahaa.n pe mere nishaan-e-paa ab thake thake se gire pa.De the
hariim-e-mahmil me.n vo safiir-e-naved-parvar
jise zamaane ke past o baalaa ne itne qisse pa.Dhaa diye the
jo pahle qarno.n kii tiirgii ko ujaal dete
tumhe.n KHabar hai
ye meraa siina qadiim ahraam me.n akelaa vo ik haram thaa
aziim raazo.n ke kohna taabuut jis kii ka.Diyo.n me.n bas rahe the
unhii.n havaa.o.n kaa Dar nahii.n thaa
na sahraa-zaado.n ke naslii kaa hii un kii gird-e-KHabar ko pahu.nche
hariim-e-mahmil me.n vo amaanat kaa paasbaa.n huu.n
jo charm-e-aahuu ke narm kaaGaz pe likkhe naame ko le ke niklaa
vahii ki jis ke savaar hone ko tum ne baKHshaa jahaaz-e-sahraa
taviil raaho.n me.n KHaalii mashko.n kaa baar le kar hazaar sadiyaa.n safar me.n gardaa.n
kahii.n saraabo.n kii bahtii chaa.ndii kahii.n chaTaano.n kii saKHt qaashe.n
mayaan-e-raah-e-safar kha.De the jaka.Dne vaale nazar ke lobhii
magar na bhaTkaa bhaTakne vaalaa
jo dam liyaa to azaa me.n jaa kar
hariim-e-mahmil suno fasaane jo sun sako to
mai.n chalte chalte safar ke aaKHir pe aisii vaadii me.n jaa ke Thahraa
aur us pe guzre hariis lamho.n ke un nishaano.n ko dekh aayaa
jahaa.n ke naqshe biga.D ga.e hai.n
jahaa.n ke tabqe ulaT ga.e hai.n
vahaa.n kii fasle.n zaqquum kii hai.n
havaa.e.n kaalii hai.n raakh u.D kar kha.nDar me.n aise phunkaartii hai
ki jaise azhdar chahaar jaanib se jab.De khole Gadar machaate
zamii.n pe kiina nikaalte ho.n
kasiif zahro.n kii thailiyo.n ko Gazab se baahar uchhaalte ho.n
muhiib saa.e me.n devtaa.o.n kaa raqs jaarii thaa
TuuTe haatho.n kii haDDiyo.n se vo dohl-e-baatil ko piiTte the
za.iif kavvo.n ne ahl-e-qarya kii qabre.n khodii.n
tuu un ke naaKHun nahiif panjo.n se jha.D ke aise bikhar rahe the
chako.ndaro.n ne chabaa ke phe.nke ho.n jaise haDDii ke KHushk reze
hariim-e-mahmil vahii vo manzil thii jis ke siine pe mai.n tumhaarii nazar se pahu.nchaa uThaa.e mehr o vafaa ke naame
vahii.n pe baiThaa thaa sar-ba-zaanuu tumhaaraa mahram
kha.nDar ke bosiida pattharo.n par haziin o Gamgii.n
vahii.n pe baiThaa thaa
qatl-naamo.n ke mahzaro.n ko vo pa.Dh rahaa thaa
jo pastiyo.n ke kotaah haatho.n ne us kii qismat me.n likh diye the
hariim-e-mahmil mai.n apne naaqa se niiche utraa to mai.n ne dekhaa ki us kii aa.nkhe.n KHamosh o viiraa.n
Gubaar-e-sahraa mizha pe larzaa.n thaa ret diido.n me.n u.D rahii thii
magar sharaafat kii ek lau thii ki us ke chehre pe narm haala kiye hu.e thii
vo mere lahje ko jaantaa thaa
hazaar manzil kii duuriyo.n ke sataa.e qaasid ke ukh.De qadmo.n kii chaap sunte hii uTh kha.Daa thaa
dayaar-e-vahshat me.n bas rahaa thaa
pe terii saa.nso.n ke zer-o-bam se uThii haraarat se aashnaa thaa
vo kah rahaa thaa yahaa.n se jaa.o ki yaa.n KHaraabo.n ke kaar-KHaane hai.n
roz o shab ke jo silsile hai.n khule KHasaaro.n kii manDiyaa.n hai.n
vo Dar rahaa thaa tumhaaraa qaasid kahii.n KHasaaro.n me.n baT na jaa.e
hariim-e-mahmil mai.n kyaa bataa.uu.n vahii.n pe khoyaa thaa meraa naaqa
faqat KHaraabe ke chand lamhe hii us ke guude ko khaa ga.e the
usii maqaam-e-tilism-gar me.n vo ustaKHvaano.n me.n Dhal gayaa thaa
jahaa.n pe bikhraa pa.Daa thaa pahle tumhaare mahram kaa asp-e-taazii
aur ab vo naaqa ke ustuKHvaa.n bhii
tumhaare mahram ke asp-e-taazii ke ustaKHvaano.n me.n mil ga.e hai.n
hariim-e-mahmil vahii vo patthar the jin pe rakkhe the mai.n ne mehr o vafaa ke naame
jahaa.n pe zinda ruto.n me.n baa.ndhe the tum ne paimaan o ahd apne
magar vo patthar ki ab ajaa.ib kii kaargah hai.n
tumhaare naame kii us ibaarat ko khaa ga.e hai.n
shifaa ke haatho.n se jis ko tum ne raqam kiyaa thaa
so ab na naaqa na ko.ii naama na le ke aayaa javaab-e-naama
mai.n naa-muraad o KHajil musaafir
magar tumhaaraa amiin qaasid azaa kii vaadii se lauT aayaa
aur us najiib o kariim mahram-e-vafaa ke paikar ko dekh aayaa
jo aane vaale dino.n kii gha.Diyaa.n abad kii saa.nso.n se gin rahaa hai

Ali Akbar Natiq
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now