Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "maatho.n"

Nazm MATCHES FOR "maatho.n"

Nazm

aalam kitne

kitne maatho.n ke abhii sard hai.n ra.ngiin gulaab
gard afshaa.n hai.n abhii gesu-e-pur-KHam kitne

Jan Nisar Akhtar
Nazm

ek shaer dost se

ghar me.n baiThe hu.e kyaa likhte ho
baahar niklo
dekho kyaa haal hai duniyaa kaa
ye kyaa aalam hai
suunii aa.nkhe.n hai.n
sabhii KHushiyo.n se KHaalii jaise
aa.o in aa.nkho.n me.n KHushiyo.n kii chamak ham likh de.n
ye jo maathe hai.n
udaasii kii lakiiro.n ke tale
aa.o in maatho.n pe qismat kii damak ham likh de.n
chehro.n se gahrii ye maayuusii miTaa ke
aa.o
in pe ummiid kii ik ujlii kiran ham likh de.n
duur tak jo hame.n viiraane nazar aate hai.n
aa.o viiraano.n par ab ek chaman ham likh de.n
lafz-dar-lafz samundar saa bahe
mauj-ba-mauj
bahr-e-naGmaat me.n
har koh-e-sitam hal ho jaa.e
duniyaa duniyaa na rahe ek Gazal ho jaa.e

Javed Akhtar
Nazm

khanDar

yahii.n pe maatho.n kii raushnii jal ke bujh ga.ii hai
sapaaT chehro.n ke KHaalii panne khule hu.e hai.n
huruuf aa.nkho.n ke miT chuke hai.n

Gulzar
Nazm

restaurant

kitnii sanjiida baiThii hai ye ahbaab kii Tolii
kitne auj-e-balaaGat par hai KHaamoshii kii bolii
saarii quvvat chuus chukii din bhar kii shahr-navardii
maatho.n me.n se jhaa.nk rahii hai martii dhuup kii zardii

Ahmad Nadeem Qasmi
Nazm

tariKH ka nauha

shaaho.n ko KHabar nahii.n ho sakii
ki bulldozero.n se haTaa.ii ga.ii mayyato.n kii Dher me.n
kis kis ke ehraam par lahuu ne aayate.n raqam kii.n
haajiyo.n kii jam.a puu.njii se munaafe.a baTortii hukuumate.n
aab-e-zam-zam ke chashme aur petrol ke ku.e.n me.n
tamiiz karnaa bhuul jaa.e.n
to KHuun kii lakiir haram se nikal kar minaa tak pahu.nch jaatii hai
shaahii farmaan ko ibaadat kaa darja dene vaale
muftiyo.n ne ye kabhii nahii.n dekhaa
ki taariiKH ka.ii baar taKHt ko taKHta bante hu.e dekh chukii hai
shaitaan ko patthar maartaa hu.aa hujuum
apne aap ko rau.nd kar KHaak me.n mil jaataa hai
aur mansuur anal-haq kah kar har daur me.n amar hotaa rahaa
KHudaa
nadaamat ke aa.nsuu rone vaalo.n ko
mu.aaf karne me.n der nahii.n kartaa
aur shaitaan intiqaam lenaa nahii.n bhuultaa
lekin ham bhuul jaate hai.n
ki mehraab masjid ke ho.n yaa maatho.n ke
nekiyo.n aur badiyo.n kaa hisaab sirf KHudaa ke paas hai
gin gin kar patthar maarne vaale
un ka.nkaro.n kii gintii bhuul chuke hai.n
jo abaabiilo.n ne haathiyo.n par giraa.e the

Maqsood Wafa
Nazm

zalzala

chand lamho.n me.n ho ga.ii barbaad
ko.enaa kii hasiin aabaadii
jaane merii sitam-zada aa.nkhe.n us sisakte hu.e KHaraabe me.n
der se kyaa talaash kartii hai.n
muskuraahaT javaan chehro.n kii
aabgiina hasiin KHvaabo.n kaa
chuu.Diyaa.n narm narm haatho.n kii
chaa.ndnii surKH surKH maatho.n kii
us KHaraabe me.n kuchh nahii.n miltaa
us tarah se zamii.n ne karvaT lii
ho ga.ii hai uthal-puthal dhartii
jal ga.e sab bahaar ke sapne
sirf sapno.n kii raakh baaqii hai

Nazm

farjam

tum mirii khoj me.n
yuu.n hii taariik Gaaro.n maTho.n maabado.n KHaanqaaho.n me.n
ghuT ghuT ke mar jaa.oge
mai.n nahii.n mil sakuu.ngaa tumhe.n ab kabhii
dharm me.n singh me.n dhyaan me.n gyaan me.n
niile saagar kii tah me.n utar kar
brazil ke ja.ngalo.n me.n bhaTak kar
himaala kii choTii pe cha.Dh kar
mujhe tum na aavaaz do

Sadiq
Nazm

raat ki aankh mein nam

sahar ke agar aise lamhaat me.n jaagte ho
sitaare bhii jab uu.ngh jaa.e.n
agar duudhiyaa chaa.ndnii ke javaa.n jism kii maut dekhe hu.e ho
agar soch me.n sar khujaate daraKHto.n kii
viiraa.n pur-asraar tanhaa.iyo.n biich
pichhle sitaare kii chhaa.nv tale
gaam do gaam
so.ii hu.ii saa.ato.n me.n
chale ho
to tum ham se ho
tum magar tab kahaa.n the
sidhaarat ne jab aaKHirii raat me.n
do sitaaro.n ke maatho.n pe bosa diyaa
aur aafaaq me.n kho gayaa
duur sadiyo.n kii pahnaa.ii par
mai.n jo hairaa.n kha.Daa dekhtaa thaa
akelaa ka.ii qarn rotaa rahaa huu.n

Ehsan Akbar
Nazm

dasht hi kafi hai

saa.ns lene ke liye
qasr-o-kaashaana zaruurii to nahii.n
ko.ii viiraana ko.ii dasht hii kaafii hai
jahaa.n
aasmaa.n aur zamii.n roz gale milte hai.n
sub.h-dam baad-e-sabaa
shaaKH-dar-shaaKH luTaatii hai namii
KHushbuu phailaatii hai aa.nchal apnaa
khilkhilaatii hu.ii doshiiza kalii ke ruKHsaar
shoKH bha.nvre kii nigaaho.n se shafaq hote hai.n
maKHmalii.n paa.nv tale
sabza-e-baaliida ko.ii
chhamchhamaatii hu.ii baarish me.n nahaa jaataa hai
shaam
darmaa.nda parindo.n kii panah-gaaho.n me.n
qumqume kirmak-e-shab-taab ke raushan kar ke
shab kii aaGosh me.n so jaatii hai
an-ginat hiiro.n kii nannhii kaniyaa.n
jagmagaa uThtii hai.n taaro.n ke hasii.n maatho.n par
chaa.nd duudh kaToraa le kar
buu.Dhii naanii kii kahaanii me.n samaa jaatii hai
ko.ii aavaaz na saaz
ko.ii naGma na alaap
na ko.ii bahas na tamhiis na takraar ko.ii
na siyaasat na KHabaasat na shamaatat ko.ii
iKHtilaafaat se duur
saare mafaadaat se duur
sab KHuraafaat se duur
chhal kapaT jhuuT na dhokaa na fareb
ko.ii uljhan ko.ii fitna na ko.ii jhu.njhlaahaT
ko.ii shikva na gila
fikr-e-fardaa na hii andesha-e-imroz ko.ii
ek anjaan masarrat kii kiran
an-chhu.e KHvaabo.n kii ThanDii bauchhaar
ajnabii sii kisii KHvaahish kaa KHumaar
kisii be-naam se ehsaas kaa lams
arsa-e-jaa.n me.n utar jaataa hai
zinda rahne kaa amal
kitnaa jaa.n-baKHsh nazar aataa hai
saa.ns lene ke liye
qasr-o-kaashaana zaruurii to nahii.n
ko.ii viiraana
ko.ii dasht hii kaafii hai
magar
dasht
vo dasht
jise dekh ke ghar yaad na aa.e

Rafia Shabnam Abidi
Nazm

ye mahlon ye taKHton ye tajon ki duniya

ye mahlo.n ye taKHto.n ye taajo.n kii duniyaa
ye insaa.n ke dushman samaajo.n kii duniyaa
ye daulat ke bhuuke rivaajo.n kii duniyaa
ye duniyaa agar mil bhii jaa.e to kyaa hai

Sahir Ludhianvi
Nazm

aurat ne janam diya mardon ko mardon ne use bazar diya

aurat ne janam diyaa mardo.n ko mardo.n ne use baazaar diyaa
jab jii chaahaa maslaa kuchlaa jab jii chaahaa dhutkaar diyaa
tultii hai kahii.n diinaaro.n me.n biktii hai kahii.n baazaaro.n me.n
na.ngii nachvaa.ii jaatii hai ayyaasho.n ke darbaaro.n me.n
ye vo be-izzat chiiz hai jo baT jaatii hai izzat-daaro.n me.n
aurat ne janam diyaa mardo.n ko mardo.n ne use baazaar diyaa
mardo.n ke liye har zulm ravaa aurat ke liye ronaa bhii KHataa
mardo.n ke liye har aish kaa haq aurat ke liye jiinaa bhii sazaa
mardo.n ke liye laakho.n seje.n, aurat ke liye bas ek chitaa
aurat ne janam diyaa mardo.n ko mardo.n ne use baazaar diyaa
jin siino.n ne in ko duudh diyaa un siino.n ko bevpaar kiyaa
jis kokh me.n in kaa jism Dhalaa us kokh kaa kaarobaar kiyaa
jis tan se uge ko.npal ban kar us tan ko zaliil-o-KHvaar kiyaa
sansaar kii har ik be-sharmii Gurbat kii god me.n paltii hai
chaklo.n hii me.n aa kar ruktii hai faaqo.n se jo raah nikaltii hai
mardo.n kii havas hai jo aksar aurat ke paap me.n Dhaltii hai
aurat ne janam diyaa mardo.n ko mardo.n ne use baazaar diyaa
aurat sansaar kii qismat hai phir bhii taqdiir kii heTii hai
autaar payambar jannatii hai phir bhii shaitaan kii beTii hai
ye vo bad-qismat maa.n hai jo beTo.n kii sej pe leTii hai
aurat ne janam diyaa mardo.n ko mardo.n ne use baazaar diyaa

Sahir Ludhianvi
Nazm

bachche ki dua

zindagii ho mirii parvaane kii suurat yaa-rab
ilm kii sham.a se ho mujh ko mohabbat yaa-rab
ho miraa kaam Gariibo.n kii himaayat karnaa
dard-mando.n se za.iifo.n se mohabbat karnaa
mire allaah! buraa.ii se bachaanaa mujh ko
nek jo raah ho us rah pe chalaanaa mujh ko

Allama Iqbal
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

parchhaiyan

KHaamosh zamii.n ke siine me.n KHemo.n kii tanaabe.n ga.Dne lagii.n
makkhan sii mulaa.em raaho.n par buuTo.n kii KHaraashe.n pa.Dne lagii.n
faujo.n ke bhayaanak band tale charKHo.n kii sadaa.e.n Duub ga.ii.n

Sahir Ludhianvi
Nazm

safar ke waqt

ye bank-kaar manager ye apne technocrat
ko.ii bhii shub.h nahii.n hai.n ye ek abas kaa ThiThol
mai.n KHud bhii in ko cro-magnon samajhtii huu.n
ye shaandaar janaavar hai.n daftaro.n kaa maKHaul

Jaun Eliya
Nazm

jamhuriyat

saik.Do.n hasan naasir
hai.n shikaar nafrat ke
sub.h-o-shaam luTte hai.n
qaafile mohabbat ke
jab se kaale baaGo.n ne
aadmii ko gheraa hai
mish.ale.n karo raushan
duur tak a.ndheraa hai
mere des kii dhartii
pyaar ko tarastii hai
pattharo.n kii baarish hii
is pe kyuu.n barastii hai
mulk ko bachaa.o bhii
mulk ke nigahbaano
das karo.D insaano!
bolne pe paabandii
sochne pe ta.aziire.n
paa.nv me.n Gulaamii kii
aaj bhii hai.n zanjiire.n
aaj harf-e-aaKHir hai
baat chand logo.n kii
din hai chand logo.n kaa
raat chand logo.n kii
uTh ke dard-mando.n ke
sub.h-o-shaam badlo bhii
jis me.n tum nahii.n shaamil
vo nizaam badlo bhii
dosto.n ko pahchaano
dushmano.n ko pahchaano
das karo.D insaano!

Habib Jalib
Nazm

KHwab jo bikhar gae

jo marhalo.n me.n saath the vo manzilo.n pe chhuT ga.e
jo raat me.n luTe na the vo dopahar me.n luT ga.e
magan thaa mai.n ki pyaar ke bahut se giit gaa.u.ngaa
zabaan gu.ng ho ga.ii, gale me.n giit ghuT ga.e
kaTii hu.ii hai.n u.ngliyaa.n rubaab Dhuu.nDhtaa huu.n mai.n
jinhe.n sahar nigal ga.ii vo KHvaab Dhuu.nDhtaa huu.n mai.n
kahaa.n ga.ii vo nii.nd kii sharaab Dhuu.nDhtaa huu.n mai.n

Amir Usmani
Nazm

ek laDka

ma.iishat duusro.n ke haath me.n hai mere qabze me.n
juz ik zehn-e-rasaa kuchh bhii nahii.n phir bhii magar mujh ko
KHarosh-e-umr ke itmaam tak ik baar uThaanaa hai
anaasir muntashir ho jaane nabze.n Duub jaane tak
navaa-e-sub.h ho yaa naala-e-shab kuchh bhii gaanaa hai
zafar-mando.n ke aage rizq kii tahsiil kii KHaatir
kabhii apnaa hii naGma un kaa kah kar muskuraanaa hai
vo KHaama-sozii shab-bedaariyo.n kaa jo natiija ho
use ik khoTe sikke kii tarah sab ko dikhaanaa hai
kabhii jab sochtaa huu.n apne baare me.n to kahtaa huu.n
ki tuu ik aabla hai jis ko aaKHir phuuT jaanaa hai
Garaz gardaa.n huu.n baad-e-sub.h-gaahii kii tarah lekin
sahar kii aarzuu me.n shab kaa daaman thaamtaa huu.n jab
ye la.Dkaa puuchhtaa hai aKHtar-ul-iimaan tum hii ho
ye la.Dkaa puuchhtaa hai jab to mai.n jhallaa ke kahtaa huu.n
vo aashufta-mizaaj andoh-parvar iztiraab-aasaa
jise tum puuchhte rahte ho kab kaa mar chukaa zaalim
use KHud apne haatho.n se kafan de kar farebo.n kaa
isii kii aarzuu.o.n kii lahad me.n phe.nk aayaa huu.n
mai.n us la.Dke se kahtaa huu.n vo sho.ala mar chukaa jis ne
kabhii chaahaa thaa ik KHaashaak-e-aalam phuu.nk Daalegaa
ye la.Dkaa muskuraataa hai ye aahista se kahtaa hai
ye kizb-o-iftiraa hai jhuuT hai dekho mai.n zinda huu.n

Akhtarul Iman
Nazm

kya dhoka dene aaogi

in kaa.nch ke manko.n ke badle
haa.n bolo gorii kyaa logii?
tum ek jahaan kii ashrafiyaa.n?
yaa dil aur jaan kii ashrafiyaa.n?

Ibn۔e۔Insha
Nazm

mujhe mat batana

mujhe mat bataanaa
ki tum ne mujhe chho.Dne kaa iraada kiyaa thaa
to kyuu.n
aur kis vaj.h se
abhii to tumhaare bichha.Dne kaa dukh bhii nahii.n kam hu.aa
abhii to mai.n
baato.n ke va.ado.n ke shahr-e-tilismaat me.n
aa.nkh par KHush-gumaanii kii paTTii liye
tum ko pe.Do.n ke piichhe daraKHto.n ke jhunD
aur diivaar kii pusht par Dhuu.nDne me.n magan huu.n
kahii.n par tumhaarii sadaa aur kahii.n par tumhaarii mahak
mujh pe ha.nsne me.n masruuf hai
abhii tak tumhaarii ha.nsii se nabard-aazmaa huu.n
aur is ja.ng me.n
meraa hathiyaar
apnii vafaa par bharosa hai aur kuchh nahii.n
use kund karne kii koshish na karnaa
mujhe mat bataanaa.....

Parveen Shakir
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now