Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "rome"

Nazm MATCHES FOR "rome"

Nazm

sarhaden

rome ke but ho.n ki paris kii ho monalisa
keats kii qabr ho yaa turbat-e-firdausii ho
qartaba ho ki ajantaa ki mohanjoda.Do
diida-e-shauq na mahruum-e-nazar-bosii ho

Ahmad Faraz
Nazm

rome

mai.n jaan.naa chaahtaa huu.n
jab rome jal rahaa thaa
tab vahaa.n kaun kaun log maujuud the
kis shaKHs ke kaan baa.nsurii kii aavaaz par lage hu.e the
aur kis shaKHs kii aa.nkhe.n
aag kii raushnii me.n chamak rahii thii.n

Zeeshan Sahil
Nazm

december aa gaya hai

yahaa.n goriich chaltii hai
to jaise ruuh chhiltii hai
zamistaa.n aa ke ruktaa hai
to ik ik rome dikhtaa hai
ta.ajjub hai mujhe pal pal
ki ab ke saal vaadii me.n
hamaarii shaal vaadii me.n
sunahrii dhuup ab tak parbato.n par raqs kartii hai
abhii tak saa.ns kii hiddat labo.n ko garm rakhtii hai
rago.n me.n KHuun kaa dauraan ab tak hai dopahro.n saa
KHizaa.n ke zard chehre par sharaarat ab bhii baaqii hai
abhii patto.n ne apne atlasii jaame nahii.n badle
sisaktii aur Dartii shaame.n ab tak muskuraatii hai.n
kyuu.n ab tak titliyaa.n phuulo.n pe aa ki khilkhilaatii hai.n
abhii niilaahaTe.n baadal ke dhoke me.n nahii.n aa.ii.n
abhii tak naddiyaa.n kohre ke qabze me.n nahii.n aa.ii.n
guzishta sab mahiino.n ko
yahaa.n saare makiino.n ko
ajab ye fikr laahiq hai
ye apne sard lahje me.n abhii tak kyuu.n nahii.n bolaa
ye us be-dard lahje me.n abhii tak kyuu.n nahii.n bolaa
december aa gayaa hai kyaa

Injeel Saheefa
Nazm

sayyaron ki mahfil

zamiin
mirii nazro.n me.n ai mirriiKH teraa darja a.alaa hai
bulandii par tuu rahtaa hai tirii qismat bhii baalaa hai
mirriiKH
bulandii aur pastii kaa kabhii dhokaa nahii.n khaa.e.n
zamii.n uupar dikhaa.ii de agar mirriiKH par aa.e.n
zamiin
tujhe maanaa hai devtaa ja.ng kaa naadaan logo.n ne
tabaahii kaa diyaa ilzaam tujh ko rome vaalo.n ne
tujhe bhaarat ke daanish-var sadaa manhuus kahte hai.n
tujhe kahte rahe ma.ngal kabhii jallaad kahte hai.n
bataa ai surKH sayyaare tire haalaat kaise hai.n
tire taalaab kaise hai.n tire baaGaat kaise hai.n
tire paakiiza daaman me.n manaazir kaise kaise hai.n
tirii aaGosh ke andar navaadir kaise kaise hai.n
mirriiKH
nahii.n mirriiKH par jhiile.n na chashma hii ubaltaa hai
samundar hai na dariyaa hai na ko.ii motii miltaa hai
na bulbul ke taraane hai.n na ko.ii gul mahaktaa hai
parinda bhii nahii.n ko.ii KHushii se jo chahaktaa hai
yahaa.n jugnuu nahii.n ko.ii jo zulmat me.n chamaktaa hai
na hiiraa aur niilam hai hamesha jo damaktaa hai
havaa kaa ko.ii jho.nkaa hai na sabza lahlahaataa hai
na battaKHo.n kii qataare.n hai.n na taa.ir chachahaataa hai
nasiim-e-sub.h chaltii hai na baadal aur paanii hai
na gulshan hai yahaa.n ko.ii na maujo.n kii ravaanii hai
mire qutbain ko dekho vahaa.n yaKH-basta paanii hai
yahii paanii yahaa.n par zindagaanii kii nishaanii hai
zamii.n ke log kahte hai.n ki nahro.n kii ravaanii hai
haqiiqat me.n nahii.n aisaa faqat jhuuTii kahaanii hai
yahaa.n suurat nazar aatii hai aabshaaro.n kii
nazar aatii hai kasrat har taraf sa.nglaaKH Gaaro.n kii
yahaa.n hai gahraa sannaaTaa KHamoshii kii hukuumat hai
fazaa bhii KHushk hai merii nahii.n ko.ii ratuubat hai
zamiin
shariik-e-bazm ho mister ataarid tum bhii kuchh bolo
zabaa.n par lag gayaa taalaa to is mahfil me.n tum kholo
ataarad
pa.Dosii huu.n mai.n suuraj kaa namuuna huu.n jahannum kaa
yahaa.n shiddat kii garmii hai to mumkin hii nahii.n jiinaa
zamiin
mire nazdiik ho zohra bahut raKHshanda sayyaara
yahaa.n sab log kahte hai.n ki tum ho sub.h kaa taara
zohra
munavvar meraa chehra hai mai.n garmii kaa maaraa huu.n
zamii.n hai mujh ko pyaarii mai.n zamii.n vaalo.n kaa pyaaraa huu.n
zamiin
aziimushshaan jussa hai hamaarii mantarii tum ho
jise zebaa hai sardaarii vo be-shak mushtarii tum ho
mushtarii
ba.Daa hai jism meraa aur ziinat kuchh nahii.n mujh me.n
ba.Daa saa gol-gappaa huu.n sabaahat kuchh nahii.n mujh me.n
zamiin
hamaarii anjuman me.n ai zuhal tum hii niraale ho
tumhaare gird halqa hai anokhii shakl vaale ho
zuhal
gale me.n tauq hai mere mirii suurat niraalii hai
agar nazdiik se dekhe.n to ye shai tez aa.ndhii hai
nazar aataa hai jo halqa vo hai.n chhoTe ba.De patthar
lagaate hai.n ba.Dii ta.adaad me.n chaaro.n taraf chakkar
zamiin
mire do bhaa.ii hai.n aage tumhaaraa haal kaisaa hai
vahaa.n hai kaifiyat kaisii vahaa.n maahaul kaisaa hai
uranus
yahaa.n shiddat kii sardii hai lihaazaa mai.n bhii ThanDaa huu.n
zaraa merii taraf dekho ba.Daa saa golaa ganDaa huu.n
neptune
mujhe neptune kahte hai.n usii kumbe kaa huu.n member
bahut duurii hai suuraj se lagaataa huu.n ba.Daa chakkar
mirriiKH
mai.n pahu.nchaa is natiije par zamii.n par KHush-numaa.ii hai
KHudaa ne phuul aur paudo.n se ye duniyaa sajaa.ii hai
zamii.n par zindagii hai husn hai aur dilrubaa.ii hai
mujhe ulfat zamii.n se hai vahii dil me.n samaa.ii hai
vahaa.n aabaad hai.n insaa.n vahaa.n shaan-e-KHudaa.ii hai
hamaarii kahkashaa.n me.n aisii qismat kis ne paa.ii hai

Abdul Qadir
Nazm

apne jaise aashiqon ke nam

mai.n ta.Daptaa huu.n
mai.n bahut ta.Daptaa huu.n
ki vahaa.n lauT jaa.uu.n jahaa.n se merii umr shuruu.a hu.ii thii
jahaa.n mere din raat merii miTTii kii mahak se mahakte the
zamiin bhar kii dhuup me.n se mere hisse kii dhuup
mere rome rome ko se.nktii thii
sitaaro.n bhare aasmaan me.n se mere naam kaa sitaara
badan kii agnii ban ke mere hisse kii dulhan ko
nadii ke paanii se banii hu.ii sej pe utaartaa thaa
aur an-dekhii tah me.n tairtii machhliyo.n kii saa.ns ko sa.ngiit kar detaa thaa
raat me.n chhupe hu.e din ko
aur din me.n chhupii hu.ii raat ko
ek duusre ke paas laa ke KHud kahii.n chhup jaataa thaa
phir jhaag se jhaag nikaltaa thaa
aur jhaag se an-ginat muurtiyaa.n bantii thii.n
tab unhe.n puujne kii tijaarat iijaad nahii.n hu.ii thii
tab aag harii ghaas ko nahii.n jalaatii thii
sivaa.e is ke ki paa.nv par re.ngtii hu.ii chyuu.nTii haath kii paka.D me.n aa jaatii thii
kaa.enaat bhar kii bhuuk aur pyaas kii
sii.nchaa.ii karte hu.e kisaan aur khudaa.ii karte hu.e mazduur
abhii khet aur fasl aur kachche pakke ghar aur diivaaro.n aur jiivan maran
aur shamshaan bhuum aur qabro.n se pahchaane to jaate the
abhii baazaaro.n me.n ghuumte phirte na.nge paagalo.n
aur un ke hisse kii gaaliyo.n aur pattharo.n kii pahchaan se zindagii kii pahchaan to hotii thii
abhii raat ke safar me.n kisii an-dekhe jahaan se
merii duniyaa ke ja.ngalo.n me.n utarte jugnu.o.n ke jhunD chahak chahak ke
sudhaarii hu.ii ruuho.n kaa ataa pataa bataate the
afsos ab mai.n vahaa.n lauTnaa chaahuu.n bhii
to KHud par itnaa guzar chukaa huu.n ki lauT nahii.n saktaa

Ahmad Hamesh
Nazm

jangal na sahi

savere aisaa lagaa
jaise ko.ii darvaaze par dastak de rahaa hai
uTh kar dekhaa to ko.ii nahii.n thaa
khaT khaT kii aavaaz par dhyaan diyaa
to khi.Dkii ke paT par baiThaa nazar aayaa ek parinda
cho.nch se banaa rahaa thaa naqsh-o-nigaar
kyo.n bha.ii mai.n ne puuchhaa to kahne lagaa
kiraa.e par chaahiye ek Tahnii jis par banaa sakuu.n apnaa gho.nsla
apnii to jaise-taise kaT hii jaa.egii
lekin baal-bachcho.n kaa kyaa hogaa
aap ke bhaa.ii bando.n ne kaaT Daale ja.ngal
aur de diyaa des nikaalaa
savaab kii niyyat se bhale aadmii daalaan me.n rakh dete hai.n paanii kii kaTorii aur daana
peT kii aag bujhaane ko tho.Daa saa khaa pii lete hai.n
chhat bhale na ho khaanaa to chaahiye hii
kabhii lagtaa hai bijlii ke taar chhuu kar KHud-kushii kar luu.n
yaa uu.nche mobile Taavaro.n se Takraa kar jaan de duu.n
jaise kisaano.n ko KHud-kushii ke baad sarkaar kuchh imdaad de detii hai
shaayad ko.ii gosha hame.n bhii allot kar de bachcho.n ke liye
ye sun kar mai.n to chakraa gayaa
is taraf to sach-much mai.n ne ko.ii dhyaan nahii.n diyaa thaa
ja.ngalo.n ko kaaTte samay kis ne sochaa hogaa ki
ye be-zabaan kahaa.n jaa.e.nge
mai.n ne haath jo.D kar kahaa
in zaalimo.n kii taraf se mai.n mu.aafii maa.ngtaa huu.n
KHudaa ke vaaste KHud-kushii kaa KHayaal dil me.n na laanaa
jab tak jii chaahe merii kunDii me.n lage one rome kitchen hii me.n guzaara kar lo
kuchh ta.ngii sahii lekin intizaam ho jaa.egaa
us ne kahaa
mehrbaanii magar mai.n kiraaya adaa karne kaa ahal nahii.n
mai.n ne kahaa sub.h-shaam apnii miiThii bolii sunaa diyaa karnaa bas
mujhe aur kuchh nahii.n chaahiye
us ne kahaa
mere dhanye bhaag ki aap jaise hamdard insaan se mulaaqaat ho ga.ii
lekin har ko.ii to aap jaisaa nahii.n
aur phir mere baaqii ham-jinso.n kaa kyaa hogaa
mai.n ne kahaa
unhe.n bhii kahii.n na kahii.n sar chhupaane ko jagah mill jaa.egii
magar KHudaaraa tum KHud-kushii kaa iraada tark kar do
ham jhaa.D lagaa.e.nge aur un kii hifaazat bhii kare.nge
ye sunte hii vo KHushii KHushii tinke jam.a karne me.n magan ho gayaa
aur
mai.n ghar me.n aap ko ye saaraa maajraa sunaane chalaa aayaa
is nanhe se parinde kii khaT khaT ne goyaa mere dil-o-dimaaG ke
darvaaze khol diye
ye sun kar yaa pa.Dh kar aap bhii apne aa.ngan me.n ek jhaa.D to
lagaa.e.nge naa
yaa kunDii me.n ek biij to bo.e.nge naa
kam-az-kam ek biij

Ataur Rahman Tariq
Nazm

priti

tum nahii.n ho miTne vaalii nahii.n
paatii ho janam tum na.e na.e
har na.ii bahaar ke phuulo.n me.n
maanind-e-hayaat tumhaare patte bhii piile pa.D jaate hai.n
maanind-e-hayaat tumhe.n bhii Dhak detii hai barf
par tumhaarii miTTii me.n priitii
pakke bachno.n ke biij dabe hai.n
puuraa honaa hai jin ko basar away me.n bhii
piit na karne kii ye dhun be-kaar hai
ye mahkaar bharaa jho.nkaa
lauT aataa hai ek na ek din
aatm nagar me.n
jaise raat sitaaro.n bharii
aur samaane lagtii ho tum rome rome me.n priitii
pahle se paakiiza
tum paak ho aur isii kaaran hu.aa amar
jab tum hotii ho tab niilaahaT se
jhunD ke jhunD safed mulaa.em hanso.n ke
jin ko ham mare-khape samjhe the
lauT aate hai.n
phuul phuul se pattiyaa.n khilaatii rahtii ho tum na.ii na.ii
tum sadaa sadaa ke nuur ko raag banaa detii ho
na.ii na.ii aavaazo.n se janmaa hu.aa raag
tum amar ho priitii
jaise bahaar

Shafiq Fatima Shera
Nazm

doctor fancho

kisii roz mai.n shahr ke paagalo.n ko dinner par bulaa.uu.ngaa
an se kahuu.ngaa ki
ai dosto, dushmano.n, meharbaano, kamiino
ye maanaa ki tum kahkashaa.n ke jaraasiim ho
aur sab raaste rome hii ko ga.e hai.n
magar ab
iTaalii se aatii hu.ii ik sa.Dak ke sipaahii kii siiTii suno
jo kahtii hai tum mar chuke ho
nahii.n to mai.n chaltii hu.ii kaar se kuud kar apne battiis daa.nto.n
ko footpath par
doctor faancho ke havaale kardu.ngaa

Rais Farogh
Nazm

la-yaKHul

2
udhar jab vaqt kaa sayyaal dhaaraa
ek do lamho.n ko ruktaa hai
na jaane kyuu.n mire andar lahuu kaa tez-tar ho kar
hariim-e-dil kii diivaaro.n se apnaa sar paTaktaa hai
ye piir-e-rome ke marqad pe raqsaa.n
un KHudaa-aagaah durvesho.n kii suurat raqs kartaa hai
jinhe.n KHud apne tan-man kii ko.ii sudh-budh nahii.n rahtii
vo sar-taa-paa faqat ruuh-e-taam kii tamsiil lagte hai.n
kisii aise abad lamhe me.n jism-o-jaa.n kii is vahdat kaa ko.ii naam to hogaa
saraapaa raqs kii us haalat-e-be-naam kaa anjaam to hogaa
tumhii bolo ki us kaa naam kyaa anjaam kyaa hai
haa.n tumhii bolo girah kholo

Tahseen Firaqi
Nazm

zahr-e-baad

iishvar kii hattyaa karne ke ba.ad
ek be-kohaan la.ng.De uu.nT par
har ujaalaa aur a.ndheraa phaa.ndtaa
saur-mandal ke marusthal me.n
hiraasaa.n bhaagtaa huu.n
mere piichhe aane vaalaa
chiiKHte chi.nghaa.Dte bichh.De gajo.n kaa Gol
mujh ko
zad se baahar dekh
vaapas jaa rahaa hai
aur maqtuul iishvar kii
aatmaa kii
vish bujhii kuchh suu.iyaa.n sii
rome chhidro.n me.n musalsal chubh rahii hai.n
aur saare jism me.n
KHauf ghultaa jaa rahaa hai

Sadiq
Nazm

goDo

bataa.uu.n kis se ki mai.n muntazir huu.n jis din kaa
vo shaayad ab na kabhii aa.egaa zamaane me.n
kahaa.n pe hai miraa goDo mujhe KHabar hii nahii.n
use mai.n Dhuu.nD chukaa rome aur london me.n
na moscow me.n milaa aur na chiin o paris me.n
bhalaa milegaa kahaa.n bamba.ii kii galiyo.n me.n

Baqar Mehdi
Nazm

wo hatif ki zaban mein kalam karne lagi

aglii shaam
vo mujhe erosion ke ma.abad me.n milii
jis ke chaaro.n or
siyaah jangal kii baa.Dh thii
us ma.abad ko saaraa rome
ummiid bharii nazro.n se dekhtaa thaa

Jawaz Jafri
Nazm

baiza-e-mahram

‘ahd-e-paariina me.n bhii
ziist par thaa vahm kaa kitnaa asar
ek ‎oracle kii talqii.n maan kar
shaah augustus kii biivii livia
apnii a.ngiyaa kii fazaa-e-garm me.n rakhtii thii ik murGii kaa anDaa roz-o-shab
us ko ye vishvaas thaa
us ke hone vaale bachche aur us chuuze kii jins
ek ho ga.ii aaKHirash yuu.nhii hu.aa
aashiyaan-e-garm-o-shoKH-o-narm se
ek nar niklaa to us kii kokh se bhii ek nar paidaa hu.aa Tiberius
aur phir is ittifaaqii vaaqa'e ne to zabaan-e-rome me.n
'aam kar dii baiza-e-mahram kii tarbiyyat kii rasm

Krishna Mohan
Nazm

raqib se!

jab kahii.n baiTh ke rote hai.n vo bekas jin ke
ashk aa.nkho.n me.n bilakte hu.e so jaate hai.n
naa-tavaano.n ke nivaalo.n pe jhapaTte hai.n uqaab
baazuu tole hu.e ma.nDlaate hu.e aate hai.n

Faiz Ahmad Faiz
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

aaj bazar mein pa-ba-jaulan chalo

chashm-e-nam jaan-e-shoriida kaafii nahii.n
tohmat-e-ishq-e-poshiida kaafii nahii.n
aaj baazaar me.n paa-ba-jaulaa.n chalo
dast-afshaa.n chalo mast o raqsaa.n chalo
KHaak-bar-sar chalo KHuu.n-ba-daamaa.n chalo
raah taktaa hai sab shahr-e-jaanaa.n chalo
haakim-e-shahr bhii majma-e-aam bhii
tiir-e-ilzaam bhii sang-e-dushnaam bhii
sub.h-e-naashaad bhii roz-e-naakaam bhii
un kaa dam-saaz apne sivaa kaun hai
shahr-e-jaanaa.n me.n ab baa-safaa kaun hai
dast-e-qaatil ke shaayaa.n rahaa kaun hai

Faiz Ahmad Faiz
Nazm

daraKHt-e-zard

hamaaraa faKHr thaa faqr aur daanish apnii puu.njii thii
nasab-naamo.n ke ham ne kitne hii parcham lapeTe hai.n
mire ham-shahr 'zaryuun' ik fusuu.n hai nasl ham, dono.n
faqat aadam ke beTe hai.n faqat aadam ke beTe hai.n
mai.n jab ausaan apne khone lagtaa huu.n to ha.nstaa huu.n
mai.n tum ko yaad kar ke rone lagtaa huu.n to ha.nstaa huu.n
hamesha mai.n KHudaa haafiz hamesha mai.n KHudaa haafiz
KHudaa haafiz
KHudaa haafiz

Jaun Eliya
Nazm

ai ishq hamein barbaad na kar

ham raato.n ko uTh kar rote hai.n ro ro ke du.aa.e.n karte hai.n
aa.ankho.n me.n tasavvur dil me.n KHalish sar dhunte hai.n aa.he.n bharte hai.n
ai ishq ye kaisaa rog lagaa jiite hai.n na zaalim marte hai.n

Akhtar Shirani
Nazm

KHwabon ke byopari

jab dhartii sahraa sahraa thii
ham dariyaa dariyaa ro.e the
jab haath kii rekhaa.e.n chup thii.n
aur sur sa.ngiit me.n so.e the
tab ham ne jiivan-khetii me.n
kuchh KHvaab anokhe bo.e the

Ahmad Faraz
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now