Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "vaada-e-naa-mo'tabar"

Nazm MATCHES FOR "vaada-e-naa-mo'tabar"

Nazm

chaaragaro

idhar bhii tishna-labii mustaqil nahii.n jaatii
yahaa.n bhii nashsha-e-naa-mo'tabar hai chaaragaro

Mustafa Zaidi
Nazm

waris

vo abnormal nahii.n thaa
sirf us ko normal ban.ne kii hasrat thii
ka.ii KHaano.n me.n us kii zindagii baTne lagii thii
vo apnii koshish-e-naa-mo'tabar se ta.ng aa kar
niim-jaa.n ho kar
ek KHaane me.n panah lene lagaa thaa
banii aamaat-gaah-e-tiir-e-nafrat shaKHsiyat us kii
use bhii KHud se nafrat ho chukii thii
magar is nafrat-e-maanuus kii takraar se us ne
durusht o naa-muvaafiq zindagii se sulh kar lii thii
yahii thaa kiisa-e-aKHlaaq us kaa
Gariibii ne sharaafat chhiin lii thii
aur us kii shaKHsiyat ke pairahan me.n
guhar-baaro.n ke badle sa.ng-reze ja.D diye the
vo abnormal nahii.n thaa
magar ab us me.n KHud ko normal karne kaa yaaraa bhii nahii.n thaa
use ab ye gavaaraa bhii nahii.n thaa
galii-kuucho.n kii saarii gandagii kaa
tiirgii kaa
vo ab haqdaar vaaris ban chukaa thaa

Akbar Hyderabadi
Nazm

kahan rauzan banaen

vahii qasme.n shab-e-naa-mo'atabar kii
vahii rasme.n hai.n shahr-e-sa.ng-dil kii
vahii diivaar-e-be-rauzan ki jis ko
zabaane.n din Dhale tak chaaTtii hai.n

Jawayd Anwar
Nazm

mere dil ko yaqin tha

mere dil ko yaqii.n thaa
kisii ne sach kahaa hai
ki rishte mar nahii.n sakte
hamaare darmiyaa.n jab raabte naa-mo'tabar Thahre.n
to rishte kaam aate hai.n
ye TuuTe raabto.n ko jo.D dete hai.n
mire dil ko yaqii.n thaa
magar in chand barso.n me.n
kuchh aise ajnabii mausam mire andar utar aa.e
samay ke saath ab mujh ko
yaqii.n hone lagaa hai
ki aisaa bhii to hotaa hai
hamaare darmiyaa.n jab raabte naa-mo'tabar Thahre.n
to rishte sar paTak ke mar bhii jaate hai.n

Mona Shahab
Nazm

shahr-e-arzu

ko.ii bataa.e kahaa.n shahr-e-aarzuu hogaa
ki jis maqaam pe daaman ke chaak silte hai.n
na.ii hayaat na.ii sub.h-o-shaam milte hai.n
udaas udaas hai.n raate.n udaas udaas hai.n din
kaTegii raah ko.ii daastaa.n sunaate chalo
hikaayat-e-but-e-laala-o-shaa.n sunaate chalo
kisii kii zuud-pashiimaa.n niigaahiyo.n kaa tilism
kisii KHaraab nigaah-e-karam kaa zikr karo
vafaa-e-vaada-o-qaul-o-qasam kaa zikr karo
har ek aabla-paa aur sar-e-junuu.n-pesha
dilo.n ke ka.abe me.n patthar sajaa.e phirtaa hai
ufuq ufuq pe nigaahe.n jamaa.e phirtaa hai
udaas ham-safaro suu-e-dil bhii ek nazar
uchhal rahaa hai ba.Dii der se lahuu apnaa
yahii.n kahii.n na mile shahr-e-aarzuu apnaa

Hameed Almas
Nazm

waqt ki qadr

nashaat-e-umr ko ummiid par nisaar na kar
visaal-e-sub.h-e-qayaamat kaa intizaar na kar
riyaaz-e-KHuld kii baato.n kaa e'tibaar na kar
fareb vaada-e-fardaa miTaa bhii jaa salmaa
bahaar biitne vaalii hai aa bhii jaa salmaa

Akhtar Shirani
Nazm

wada

vo va.ada aap kaa
va.ada
na ab tak ho sakaa puuraa
zamii.n badlii zamaa.n badlaa
magar vo va.ada-e-fardaa
abhii tak ik mu.amma hai
agarche ye haqiiqat hai ki
rang-e-khusravii badlaa
jahaan-e-KHud-e-faraamoshii
ke baadal chhaT ga.e saare
shafaq phuuTii kiran phuuTii dhanak ubhrii
magar suuraj jo niklaa sub.h-dam to
KHud apnii tiira-baKHtii par
pashemaa.n aur
magar vo va.ada-e-fardaa
abhii tak ik mu.amma hai
KHabar ho aap ko shaayad ki
zulmat ke shikanje me.n
sadaaqat
sub.h kii dahliiz par
ghuT ghuT ke
martii hai sahar KHvaab-e-pareshaa.n hai
vo va.ada aap kaa
va.ada
na jaane kab
hadiis-e-dil banegaa aur
miizaan-e-sadaaqat me.n
tulegaa ruu-ba-ruu sab ke

Jameel Azimabadi
Nazm

KHuda wo waqt na lae

KHudaa vo vaqt na laa.e ki sogvaar ho tuu
sakuu.n kii nii.nd tujhe bhii haraam ho jaa.e
tirii masarrat-e-paiham tamaam ho jaa.e
tirii hayaat tujhe talKH jaam ho jaa.e
Gamo.n se aa.iina-e-dil gudaaz ho teraa
hujuum-e-yaas se betaab ho ke rah jaa.e
vufuur-e-dard se siimaab hoke rah jaa.e
tiraa shabaab faqat KHvaab ho ke rah jaa.e
Guruur-e-husn saraapaa niyaaz ho teraa
taviil raato.n me.n tuu bhii qaraar ko tarse
tirii nigaah kisii Gam-gusaar ko tarse
KHizaa.n-rasiida tamannaa bahaar ko tarse
ko.ii jabii.n na tire sa.ng-e-aastaa.n pe jhuke
ki jins-e-ijz-o-aqiidat se tujh ko shaad kare
fareb-e-vaada-e-fardaa pe e'timaad kare
KHudaa vo vaqt na laa.e ki tujh ko yaad aa.e
vo dil ki tere liye be-qaraar ab bhii hai
vo aa.nkh jis ko tiraa intizaar ab bhii hai

Faiz Ahmad Faiz
Nazm

mujhe aawaz mat dena

nihaayat saaf-go.ii se mujhe us ne bataayaa hai
mujhe aavaaz mat denaa
kabhii pur-nuur sub.ho.n me.n
kabhii rangiin shaamo.n me.n
kabhii KHvaabiida KHvaabo.n me.n
mujhe aavaaz mat denaa
ki saut-o-harf ke jitne ta'alluq tum se qaa.em the
vo sab naa-mo'tabar Thahre
mohabbat kii junuu.n-KHezii to bas ik aarzii shai thii
qabaa-e-shauq ke sab rang kachche the
so mai.n ne ab dupaTTe ke kisii pahluu se
ko.ii bhii girah baaqii nahii.n rakkhii
ko.ii KHvaahish ko.ii chaahat ko.ii hasrat nahii.n rakhii
jo ko.ii kaa.nch kaa Tuk.Daa
kisii vaade kaa bosiida tayaqqun
yaa ko.ii ummiid kaa ik pal
tumhaare paas hai
to lauTaa do
mujhe ab yaad aayaa hai
ki aaKHir ko ye honaa thaa
yahii aaKHir me.n honaa hai

Salman Basit
Nazm

jhuTi taraqqi

ye shafaq-faam zard-ruu afraad
saalahaa saal se asiir-e-hayaat
zinda rahne kii kuchh KHushii hai inhe.n
na hii marne kaa kuchh zaraa bhii malaal
ye vo jaa.n-daar hai.n ki jin ke liye
lafz-e-aasuudgii bahisht-e-KHayaal
kitne bosiida KHaal-o-KHad in ke
jism bas haDDiyo.n kaa Dhaa.ncha hai
ruuh virse me.n jo milii in ko
ek naa-mo'tabar asaasa hai
kyaa kiyaa ham ne itnii sadiyo.n me.n
kyaa? taraqqii! jo ek dhoka hai
ek muflis Gariib bechaara
kal bhii bhuukaa thaa ab bhii bhuukaa hai
log ab bhii guzishta kii maanind
dafn hai.n apnii KHvaahisho.n ke tale
ye taraqqii hai ek kizb-e-mahaz
itnii sadiyo.n me.n ham nahii.n badle

Deedar Akbarpuri
Nazm

payam

dil-e-fasurda ko ab taaqat-e-qaraar nahii.n
nigaah-e-shauq ko ab taab-e-intizaar nahii.n
nahii.n nahii.n mujhe bardaasht ab nahii.n kii nahii.n
KHudaa ke vaaste kahnaa na ab kii baar ''nahii.n''
hamesha va.ade kiye ab ke mil hii jaa aa kar
hayaat o va.ada o duniyaa kaa e'tibaar nahii.n
dikhaa.ii apnii mohabbat ko chiir kar siina
magar numuud miraa sheva-o-shi.aar nahii.n
mirii bahan mirii mahbuuba hub ajab shai hai
jahaan-e-KHaak nahii.n kuchh jo dost-daar nahii.n

Ze Khe Sheen
Nazm

magar ye zaKHm ye marham

na vo nashaat-e-tasavvur ki lo tum aa hii ga.e
na zaKHm-e-dil kii hai sozish ko.ii jo sahnii ho
na ko.ii va.ada-o-paimaa.n kii shaam hai na sahar
na shauq kii hai ko.ii daastaa.n jo kahnii ho
nahii.n jo mahmil-e-lailaa-e-aarzuu sar-e-raah
to ab fazaa me.n fazaa ke sivaa kuchh aur nahii.n
nahii.n jo mauj-e-sabaa me.n ko.ii shamiim-e-payaam
to ab sabaa me.n sabaa ke sivaa kuchh aur nahii.n

Jaun Eliya
Nazm

tark-e-talluq

paa-ba-gul raat Dhalegii na sahar aa.egii
ko.ii suuraj kisii mashriq se na niklegaa kabhii
reza reza hu.e mahtaab zamaane guzre
bujh ga.e vaada-e-mauhuum ke saare jugnuu
ab ko.ii barq hii chamkegii na abr aa.egaa
chaar-suu ghor a.ndheraa hai ghanaa jangal hai
tuu kahaa.n jaa.egii phunkaarte sannaaTe me.n
sarhad-e-yaad-e-guzishta se pare kuchh bhii nahii.n
dekh israar na kar maan bhii le lauT bhii jaa
mai.n tirii raah kaa patthar sahii ye baat to sun
aage khaa.ii hai agar raah kaa patthar haT jaa.e

Shaz Tamkanat
Nazm

shikwa

kyo.n na apnii hastii-e-naashaad kaa shikvaa karuu.n
ranj-o-Gam ghere ho.n jab mujh ko to mai.n bhii kyaa karuu.n
merii qismat me.n likhii hai KHaar-e-sahraa kii KHalish
kis tavaqqo par tamannaa-e-gul-e-raa.anaa karuu.n
sabr kaa phal log kahte hai.n milegaa ek din
aah kab tak intizaar-e-va.ada-e-fardaa karuu.n
kaun kartaa hai mudaavaa KHaatir-e-naashaad kaa
apnii mahruumii kaa kis ke saamne charchaa karuu.n
dil ke daaGo.n ko samajh luu.n kis tarah gulhaa-e-tar
Gam se kaise saaz-o-saamaan-e-KHushii paidaa karuu.n
gardish-e-dauraa.n se kah do is pe mai.n raazii nahii.n
chand saa.at muskuraa kar umr-bhar royaa karuu.n
mai.n azal se darmiyaan-e-ranj-o-raahat huu.n asiir
Gam ko apnaa.uu.n ki raahat ko karuu.n to kyaa karuu.n
ek muddat se pareshaa.n KHaatir-e-naashaad hai
sochtaa huu.n paara-haa-e-dil ko phir yakjaa karuu.n
ek haalat par kabhii rahtaa nahii.n mujh ko qaraar
har sukuu.n ke baa'd ye hai aarzuu ta.Dpaa karuu.n
vo sukuun-e-mustaqil hai ye hai paiham iztiraab
zindagaanii kaa gila yaa maut kaa shikvaa karuu.n

Jagdish Sahay Saxena
Nazm

wahi kashf-e-zat ki aarzu

miraa dil giro mirii jaa.n giro
chalaa aa ki hai miraa dar khulaa
tuu miraa nasiib hai raah-rau
ye havaa ye barq ye ra.ad-o-abr ye tiirgii
rah-e-intizaar kii naarasii
mire jaan-o-dil pe hai.n lau buto
mire mehmaa.n mire raah-rau
ai gurez-paa tuu saraab-e-dasht KHalaa na ban
vo navaa na ban jo fareb-e-raah-guzaar ho
vo fusuun-e-arz-o-samaa na ban
jise dil-girafto.n se aar ho
jo tujhe bulaatii hai pai-ba-pai
vo sadaa jilaajal-e-jaa.n kii hai
vo sadaa muruur-e-zamaa.n kii hai
kise us sadaa se faraar ho
miraa dil giro mirii jaa.n giro
tirii kun-ma-kun tirii rau-ma-rau
mujhe baar-e-jaa.n
ki mai.n harf jis kaa bayaa.n hai tuu
mai.n vo jism jis kii ravaa.n hai tuu
tuu kalaam hai mai.n tirii zabaa.n
tuu vo sham.a hai ki mai.n jis kii lau
kisii naqsh-e-kaar kaa ik nafas
ka.ii suurate.n jo sadaa se tishna-e-ra.ng thii.n
hu.ii.n vasl-e-ma.anii se baarvar
kisii but-taraash kii ik nigah
ka.ii sa.ng-e-aziyat-e-yaas-o-marg
se bach ga.e
hu.e samt-e-raah se baa-KHabar
chalaa aa ki merii nidaa me.n bhii
vahii ruuyat-e-azalii ki hai
jise yaad Gaayat-e-ra.ng-o-buu
jise yaad raaz-e-mai-o-subuu
jise yaad vaada-e-taar-o-puu
chalaa aa ki merii nidaa me.n bhii
isii kashf-e-zaat kii aarzuu

Noon Meem Rashid
Nazm

baDa pur-haul rasta tha

ba.Daa pur-haul rasta thaa
badan ke jauhar-e-KHufta me.n ko.ii quvvat-e-laahuut mudGam thii
kisii Guul bayaabaanii kii gardish mere dast-o-paa kii mahram thii
dahaan-e-jaa.n se KHaarij hone vaalii bhaap me.n the saalimaat-e-dard raushan
guzargaaho.n ke sab naa-mo'tabar patthar
KHalaa me.n u.Dne vaalii past miTTii ke siyah zarre
pahaa.D aur aa.ine saa.e kure pe.Do.n ke patte
paaniyo.n kii gol lahre.n
raat kii laa-ilm chiize.n
shash-jihat ke sab anaasir zor se piichhe haTe the
aur mai.n aage hazaaro.n kos aage ba.Dh gayaa thaa
ik ajab raftaar merii aag me.n thii
kis qadar pur-haul rasta thaa
pa.Daav ke liye kitne jaziire darmiyaa.n aa.e
zamii.n mu.D mu.D ke aa.ii aur ik ik kar ke saato.n aasmaa.n aa.e
musalsal chal rahaa thaa mai.n
havaa me.n Dhal rahaa thaa mai.n
masaamo.n se shu.aa-e-be-nihaayat phuuTii pa.Dtii thii
abad kaa ik ja.Daav taaj mere sar pe rakhaa thaa
ba.Daa pur-haul rasta thaa
ko.ii barq-e-shabaahat aarzuu-bardaar merii aag me.n thii
ik ajab raftaar merii aag me.n thii

Rafiq Sandelvi
Nazm

didani

merii palko.n ko mat dekho
in kaa uThnaa in kaa jhapaknaa jism kaa naa-mahsuus amal hai
merii aa.nkho.n ko mat dekho
in kii oT me.n shaam-e-Gariibaa.n in kii aa.D me.n dasht-e-azal hai
mere chehre ko mat dekho
is me.n ko.ii vaada-e-fardaa is me.n ko.ii aaj na kal hai
ab is dariyaa tak mat aa.o jis kii lahre.n TuuT chukii hai.n
is siine se lau na lagaa.o jis kii nabze.n chhuuT chukii hai.n
ab mere qaatil ko chaaho
meraa qaatil marham marham dariyaa dariyaa saahil saahil
qaazi-e-shahr kaa maathaa chuumo
jis ke qalam me.n zahr-e-halaahal jis ke suKHan me.n lahn-e-halaahal
ab us raqs kii dhun pe naacho
jis kii giit pe luT gayaa qaazii jis kii lai par bik gayaa qaatil

Mustafa Zaidi
Nazm

kis ki bad-gumani par

husn ko bad-gumaan rahne de
raaz-e-dil raaz-daan rahne de
nigah-e-niim kash kii umr daraaz
naubat ik darmiyaan rahne de
hasrat-e-unfavaan-e-raaz-o-niyaaz
ruuh par hukmaraan rahne de
ishq kii kaa.enaat hai hirmaa.n
aarzuu kaa ziyaan rahne de
naqsh-e-naa-kuda ke tasavvur kaa
ye miTaa saa nishaan rahne de
qismat-e-ishq to hai qismat-e-ishq
baare mannat kii shaan rahne de
naa-sazaa-vaariyo.n kaa kyaa kahnaa
bas inhe.n mehrbaan rahne de
haa.n mujhe KHud hai e'tiraaf-e-shikast
ab miraa imtihaan rahne de
va.ada-e-shauq thaa fareb-aamez
bas use raa.egaan rahne de
dost kis kis kaa thaa dil-e-be-dost
ye zubuu.n daastaan rahne de
hadiye kyaa kyaa diye the kis kis ko
sharh ye qissa-KHvaan rahne de
mere tahtush-shu.uur kii duniyaa
tah-nashii.n aur nihaan rahne de
rahii kin gul-ruKHo.n se sheftagii
ab ye sheva bayaan rahne de
bhuul phuulo.n kii pyaar shaahii.n kaa
svaa.ng ye gul-fishaan rahne de
hai jahaa.n gard aur hijaaz-parast
laa-ubaalii javaan rahne de
Gaayat-e-aashiqii havas-kaarii
hai bajaa merii jaan rahne de
shauq thaa shauq taa-Gubaar-e-gumaa.n
miT chukaa vo jahaan rahne de

Meem Hasan Lateefi
Nazm

pat-jhaD

vo baad-e-sard kii be-mehr tezii hai
ki KHuun-e-dil bhii ab kuchh munjamid ma.aluum hotaa hai
na vo shoriidgii baaqii na ab vo shor-e-girya hai
mire daaG-e-jigar se vo taraavish bhii nahii.n hotii
mirii ra.anaa.iyaa.n mujh se gurezaa.n hai.n
vo merii fitrat-e-ma.asuum vo merii jigar-sozii
vo merii dard-mandii vo KHamoshii vo kam-aamezii
vo ashko.n kii dil-aavezii
har ik shai maa.il-e-parvaaz ho jaise
mujhe is kaa bahut Gam hai
abhii tak is zavaal-e-dilbarii kaa dil ko maatam hai
mai.n hairaa.n huu.n ki kyaa yazdaa.n bhii ko.ii tifl-e-maktab hai
ki jo yuu.n khel kar par noch letaa hai pata.ngo.n ke
vo kaisii suurate.n ho.ngii jo zer-e-KHaak pinhaa.n hai.n
magar vo log jo miTne se pahle maa.nd pa.D jaa.e.n
vo jin kii guftuguu bhii ek sargoshii sii ban jaa.e
vo afsurda pashemaa.n muzmahil maayuus aa.e jo
faraamoshii kii manzil kii taraf chupke se ba.Dhte hai.n
bhalaa un kii talaafii va.ada-e-ra.ngii.n se kyaa hogii
KHudaa-e-do-jahaa.n hai tuu bhii kitnaa shoKH-o-be-parvaa

Obaidur Rahman Azmi
Nazm

rang jo KHushbu na tha

vaadii-e-majnuun me.n
aabruu-e-KHuun me.n
ruu-e-sarshaar-o-hasii.n
manzar-e-shab ke qarii.n
mai.n tumhe.n tartiib duu.n
qurb kii tarGiib duu.n
'aks kii taariif me.n
rasm kii tahriif me.n
ek afsaana kahuu.n
sub.h tak jaltaa rahuu.n

Balraj Komal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now