Sher on Dost

daaġh duniyā ne diye zaḳhm zamāne se mile

ham ko tohfe ye tumheñ dost banāne se mile

dagh duniya ne diye zaKHm zamane se mile

hum ko tohfe ye tumhein dost banane se mile

aish ke yaar to aġhyār bhī ban jaate haiñ

dost vo haiñ jo bure vaqt meñ kaam aate haiñ

aish ke yar to aghyar bhi ban jate hain

dost wo hain jo bure waqt mein kaam aate hain

dushmanoñ kī jafā kā ḳhauf nahīñ

dostoñ kī vafā se Darte haiñ

dushmanon ki jafa ka KHauf nahin

doston ki wafa se Darte hain

aql kahtī hai dobāra āzmānā jahl hai

dil ye kahtā hai fareb-e-dost khāte jā.iye

aql kahti hai dobara aazmana jahl hai

dil ye kahta hai fareb-e-dost khate jaiye

ai dost maiñ ḳhāmosh kisī Dar se nahīñ thā

qaa.il hī tirī baat kā andar se nahīñ thā

ai dost main KHamosh kisi Dar se nahin tha

qail hi teri baat ka andar se nahin tha

bahut zaḳhīm kitāboñ se chun ke laayā huuñ

inheñ paḌho varaq-e-intiḳhāb haiñ mire dost

bahut zaKHim kitabon se chun ke laya hun

inhen paDho waraq-e-intiKHab hain mere dost

yuuñ lage dost tirā mujh se ḳhafā ho jaanā

jis tarah phuul se ḳhushbū kā judā ho jaanā

yun lage dost tera mujh se KHafa ho jaana

jis tarah phul se KHushbu ka juda ho jaana

aa gayā 'jauhar' ajab ulTā zamāna kyā kaheñ

dost vo karte haiñ bāteñ jo adū karte nahīñ

aa gaya 'jauhar' ajab ulTa zamana kya kahen

dost wo karte hain baaten jo adu karte nahin

ham ko aġhyār kā gilā kyā hai

zaḳhm khā.eñ haiñ ham ne yāroñ se

hum ko aghyar ka gila kya hai

zaKHm khaen hain hum ne yaron se

sunā hai aise bhī hote haiñ log duniyā meñ

ki jin se miliye to tanhā.ī ḳhatm hotī hai

suna hai aise bhi hote hain log duniya mein

ki jin se miliye to tanhai KHatm hoti hai

vo koī dost thā achchhe dinoñ kā

jo pichhlī raat se yaad aa rahā hai

wo koi dost tha achchhe dinon ka

jo pichhli raat se yaad aa raha hai

kahne ko ġham-e-hijr baḌā dushman-e-jāñ hai

par dost bhī is dost se behtar nahīñ miltā

kahne ko gham-e-hijr baDa dushman-e-jaan hai

par dost bhi is dost se behtar nahin milta

'arsh' kis dost ko apnā samjhūñ

sab ke sab dost haiñ dushman kī taraf

'arsh' kis dost ko apna samjhun

sab ke sab dost hain dushman ki taraf

jo dost haiñ vo māñgte haiñ sulh kī duā

dushman ye chāhte haiñ ki aapas meñ jañg ho

jo dost hain wo mangte hain sulh ki dua

dushman ye chahte hain ki aapas mein jang ho

apne begāne se ab mujh ko shikāyat na rahī

dushmanī kar ke mire dost ne maarā mujh ko

apne begane se ab mujh ko shikayat na rahi

dushmani kar ke mere dost ne mara mujh ko

toḌ kar aaj ġhalat-fahmī kī dīvāroñ ko

dosto apne ta.alluq ko sañvārā jaa.e

toD kar aaj ghalat-fahmi ki diwaron ko

dosto apne talluq ko sanwara jae

terī bāteñ hī sunāne aa.e

dost bhī dil hī dukhāne aa.e

teri baaten hi sunane aae

dost bhi dil hi dukhane aae

dost ne dil ko toḌ ke naqsh-e-vafā miTā diyā

samjhe the ham jise ḳhalīl ka.aba usī ne Dhā diyā

dost ne dil ko toD ke naqsh-e-wafa miTa diya

samjhe the hum jise KHalil kaba usi ne Dha diya

ye dil lagāne meñ maiñ ne mazā uThāyā hai

milā na dost to dushman se ittihād kiyā

ye dil lagane mein main ne maza uThaya hai

mila na dost to dushman se ittihad kiya

dushmanoñ se pyaar hotā jā.egā

dostoñ ko āzmāte jā.iye

dushmanon se pyar hota jaega

doston ko aazmate jaiye

dostoñ se is qadar sadme uThā.e jaan par

dil se dushman kī adāvat kā gila jaatā rahā

doston se is qadar sadme uThae jaan par

dil se dushman ki adawat ka gila jata raha

din ek sitam ek sitam raat karo ho

vo dost ho dushman ko bhī tum maat karo ho

din ek sitam ek sitam raat karo ho

wo dost ho dushman ko bhi tum mat karo ho

na udaas ho na malāl kar kisī baat kā na ḳhayāl kar

ka.ī saal ba.ad mile haiñ ham tere naam aaj kī shaam hai

na udas ho na malal kar kisi baat ka na KHayal kar

kai sal baad mile hain hum tere nam aaj ki sham hai

mujhe dost kahne vaale zarā dostī nibhā de

ye mutālba hai haq kā koī iltijā nahīñ hai

mujhe dost kahne wale zara dosti nibha de

ye mutalba hai haq ka koi iltija nahin hai

dost har aib chhupā lete haiñ

koī dushman bhī tirā hai ki nahīñ

dost har aib chhupa lete hain

koi dushman bhi tera hai ki nahin

dost dil rakhne ko karte haiñ bahāne kyā kyā

roz jhūTī ḳhabar-e-vasl sunā jaate haiñ

dost dil rakhne ko karte hain bahane kya kya

roz jhuTi KHabar-e-wasl suna jate hain

dushmanoñ ne jo dushmanī kī hai

dostoñ ne bhī kyā kamī kī hai

dushmanon ne jo dushmani ki hai

doston ne bhi kya kami ki hai

ilāhī mire dost hoñ ḳhairiyat se

ye kyuuñ ghar meñ patthar nahīñ aa rahe haiñ

ilahi mere dost hon KHairiyat se

ye kyun ghar mein patthar nahin aa rahe hain

ab vo titlī hai na vo umr ta.āqub vaalī

maiñ na kahtā thā bahut duur na jaanā mire dost

ab wo titli hai na wo umr taaqub wali

main na kahta tha bahut dur na jaana mere dost

tartīb de rahā thā maiñ fahrist-e-dushmanān

yāroñ ne itnī baat pe ḳhanjar uThā liyā

tartib de raha tha main fahrist-e-dushmanan

yaron ne itni baat pe KHanjar uTha liya

ye fitna aadmī kī ḳhāna-vīrānī ko kyā kam hai

hue tum dost jis ke dushman us kā āsmāñ kyuuñ ho

ye fitna aadmi ki KHana-virani ko kya kam hai

hue tum dost jis ke dushman us ka aasman kyun ho

ai dost tujh ko rahm na aa.e to kyā karūñ

dushman bhī mere haal pe ab āb-dīda hai

ai dost tujh ko rahm na aae to kya karun

dushman bhi mere haal pe ab aab-dida hai

dekhā jo khā ke tiir kamīñ-gāh kī taraf

apne hī dostoñ se mulāqāt ho ga.ī

dekha jo kha ke tir kamin-gah ki taraf

apne hi doston se mulaqat ho gai

dushmanoñ se pashemān honā paḌā hai

dostoñ kā ḳhulūs āzmāne ke ba.ad

dushmanon se pasheman hona paDa hai

doston ka KHulus aazmane ke baad

dushmanoñ ke saath mere dost bhī āzād haiñ

dekhnā hai khīñchtā hai mujh pe pahlā tiir kaun

dushmanon ke sath mere dost bhi aazad hain

dekhna hai khinchta hai mujh pe pahla tir kaun

merī to jaan hī nikal ga.ī jab

dost kah kar mujhe pukārā gayā

meri to jaan hi nikal gai jab

dost kah kar mujhe pukara gaya

dost do-chār nikalte haiñ kahīñ lākhoñ meñ

jitne hote haiñ sivā utne hī kam hote haiñ

dost do-chaar nikalte hain kahin lakhon mein

jitne hote hain siwa utne hi kam hote hain

juz tire koī bhī din raat na jaane mere

tū kahāñ hai magar ai dost purāne mere

juz tere koi bhi din raat na jaane mere

tu kahan hai magar ai dost purane mere

jis bazm meñ sāġhar ho na sahbā ho na ḳhum ho

rindoñ ko tasallī hai ki us bazm meñ tum ho

jis bazm mein saghar ho na sahba ho na KHum ho

rindon ko tasalli hai ki us bazm mein tum ho

zikr merā aa.egā mahfil meñ jab jab dosto

ro paḌeñge yaad kar ke yaar sab yaarī mirī

zikr mera aaega mahfil mein jab jab dosto

ro paDenge yaad kar ke yar sab yari meri

ahbāb bhī ġhairoñ kī adā siikh ga.e haiñ

aate haiñ magar dil ko dukhāne nahīñ aate

ahbab bhi ghairon ki ada sikh gae hain

aate hain magar dil ko dukhane nahin aate

zamānoñ ba.ad mile haiñ to kaise muñh pherūñ

mire liye to purānī sharāb haiñ mire dost

zamanon baad mile hain to kaise munh pherun

mere liye to purani sharab hain mere dost

tum takalluf ko bhī iḳhlās samajhte ho 'farāz'

dost hotā nahīñ har haath milāne vaalā

tum takalluf ko bhi iKHlas samajhte ho 'faraaz'

dost hota nahin har hath milane wala

dostī jab kisī se kī jaa.e

dushmanoñ kī bhī raa.e lī jaa.e

dosti jab kisi se ki jae

dushmanon ki bhi rae li jae

ye kahāñ kī dostī hai ki bane haiñ dost nāseh

koī chārasāz hotā koī ġham-gusār hotā

ye kahan ki dosti hai ki bane hain dost naseh

koi chaarasaz hota koi gham-gusar hota

dostī aam hai lekin ai dost

dost miltā hai baḌī mushkil se

dosti aam hai lekin ai dost

dost milta hai baDi mushkil se

bahut chhoTe haiñ mujh se mere dushman

jo merā dost hai mujh se baḌā hai

bahut chhoTe hain mujh se mere dushman

jo mera dost hai mujh se baDa hai

aadmī huuñ vasf-e-paiġhambar na maañg

mujh se mere dost merā sar na maañg

aadmi hun wasf-e-paighambar na mang

mujh se mere dost mera sar na mang

dostoñ aur dushmanoñ meñ kis tarah tafrīq ho

dostoñ aur dushmanoñ kī be-ruḳhī hai ek sī

doston aur dushmanon mein kis tarah tafriq ho

doston aur dushmanon ki be-ruKHi hai ek si

yaad karne pe bhī dost aa.e na yaad

dostoñ ke karam yaad aate rahe

yaad karne pe bhi dost aae na yaad

doston ke karam yaad aate rahe