Sher on Khamoshi

jise sayyād ne kuchh gul ne kuchh bulbul ne kuchh samjhā

chaman meñ kitnī mānī-ḳhez thī ik ḳhāmushī mirī

jise sayyaad ne kuchh gul ne kuchh bulbul ne kuchh samjha

chaman mein kitni mani-KHez thi ek KHamushi meri

aap ne tasvīr bhejī maiñ ne dekhī ġhaur se

har adā achchhī ḳhamoshī kī adā achchhī nahīñ

aap ne taswir bheji main ne dekhi ghaur se

har ada achchhi KHamoshi ki ada achchhi nahin

rañg darkār the ham ko tirī ḳhāmoshī ke

ek āvāz kī tasvīr banānī thī hameñ

rang darkar the hum ko teri KHamoshi ke

ek aawaz ki taswir banani thi hamein

chaTaḳh ke TuuT ga.ī hai to ban ga.ī āvāz

jo mere siine meñ ik roz ḳhāmushī huī thī

chaTaKH ke TuT gai hai to ban gai aawaz

jo mere sine mein ek roz KHamushi hui thi

sabab ḳhāmoshiyoñ kā maiñ nahīñ thā

mire ghar meñ sabhī kam bolte the

sabab KHamoshiyon ka main nahin tha

mere ghar mein sabhi kam bolte the

merī ḳhāmoshiyoñ meñ larzāñ hai

mere nāloñ kī gum-shuda āvāz

meri KHamoshiyon mein larzan hai

mere nalon ki gum-shuda aawaz

use bechain kar jā.ūñgā maiñ bhī

ḳhamoshī se guzar jā.ūñgā maiñ bhī

use bechain kar jaunga main bhi

KHamoshi se guzar jaunga main bhi

maiñ tere kahe se chup huuñ lekin

chup bhī to bayān-e-mudda.ā hai

main tere kahe se chup hun lekin

chup bhi to bayan-e-muddaa hai

chheḌ kar jaise guzar jaatī hai doshīza havā

der se ḳhāmosh hai gahrā samundar aur maiñ

chheD kar jaise guzar jati hai doshiza hawa

der se KHamosh hai gahra samundar aur main

zor qismat pe chal nahīñ saktā

ḳhāmushī iḳhtiyār kartā huuñ

zor qismat pe chal nahin sakta

KHamushi iKHtiyar karta hun

har ek baat zabāñ se kahī nahīñ jaatī

jo chupke baiThe haiñ kuchh un kī baat bhī samjho

har ek baat zaban se kahi nahin jati

jo chupke baiThe hain kuchh un ki baat bhi samjho

ham ne avval to kabhī us ko pukārā hī nahīñ

aur pukārā to pukārā bhī sadāoñ ke baġhair

hum ne awwal to kabhi us ko pukara hi nahin

aur pukara to pukara bhi sadaon ke baghair

bolte kyuuñ nahīñ mire haq meñ

aable paḌ ga.e zabān meñ kyā

bolte kyun nahin mere haq mein

aable paD gae zaban mein kya

mustaqil boltā hī rahtā huuñ

kitnā ḳhāmosh huuñ maiñ andar se

mustaqil bolta hi rahta hun

kitna KHamosh hun main andar se

ilm kī ibtidā hai hañgāma

ilm kī intihā hai ḳhāmoshī

ilm ki ibtida hai hangama

ilm ki intiha hai KHamoshi

tumhāre ḳhat meñ nazar aa.ī itnī ḳhāmoshī

ki mujh ko rakhne paḌe apne kaan kāġhaz par

tumhaare KHat mein nazar aai itni KHamoshi

ki mujh ko rakhne paDe apne kan kaghaz par

bahut gahrī hai us kī ḳhāmushī bhī

maiñ apne qad ko chhoTā pā rahī huuñ

bahut gahri hai us ki KHamushi bhi

main apne qad ko chhoTa pa rahi hun

ḳhamoshī se adā ho rasm-e-dūrī

koī hañgāma barpā kyuuñ kareñ ham

KHamoshi se ada ho rasm-e-duri

koi hangama barpa kyun karen hum

tamām shahr pe ik ḳhāmushī musallat hai

ab aisā kar ki kisī din mirī zabāñ se nikal

tamam shahr pe ek KHamushi musallat hai

ab aisa kar ki kisi din meri zaban se nikal

chup raho to pūchhtā hai ḳhair hai

lo ḳhamoshī bhī shikāyat ho ga.ī

chup raho to puchhta hai KHair hai

lo KHamoshi bhi shikayat ho gai

TūTte bartan kā shor aur gūñgī bahrī ḳhāmushī

ham ne rakh lī hai bachā kar ek gahrī ḳhāmushī

TuTte bartan ka shor aur gungi bahri KHamushi

hum ne rakh li hai bacha kar ek gahri KHamushi

bol paḌtā to mirī baat mirī hī rahtī

ḳhāmushī ne haiñ diye sab ko fasāne kyā kyā

bol paDta to meri baat meri hi rahti

KHamushi ne hain diye sab ko fasane kya kya

ḳhamoshī merī ma.anī-ḳhez thī ai aarzū kitnī

ki jis ne jaisā chāhā vaisā afsāna banā Daalā

KHamoshi meri mani-KHez thi ai aarzu kitni

ki jis ne jaisa chaha waisa afsana bana Dala

mohabbat soz bhī hai saaz bhī hai

ḳhamoshī bhī hai ye āvāz bhī hai

mohabbat soz bhi hai saz bhi hai

KHamoshi bhi hai ye aawaz bhi hai

vo boltā thā magar lab nahīñ hilātā thā

ishāra kartā thā jumbish na thī ishāre meñ

wo bolta tha magar lab nahin hilata tha

ishaara karta tha jumbish na thi ishaare mein

saut kyā shai hai ḳhāmushī kyā hai

ġham kise kahte haiñ ḳhushī kyā hai

saut kya shai hai KHamushi kya hai

gham kise kahte hain KHushi kya hai

ye hāsil hai mirī ḳhāmoshiyoñ kā

ki patthar āzmāne lag ga.e haiñ

ye hasil hai meri KHamoshiyon ka

ki patthar aazmane lag gae hain

chup-chāp apnī aag meñ jalte raho 'farāz'

duniyā to arz-e-hāl se be-ābrū kare

chup-chap apni aag mein jalte raho 'faraaz'

duniya to arz-e-haal se be-abru kare

shor jitnā hai kā.enāt meñ shor

mere andar kī ḳhāmushī se huā

shor jitna hai kaenat mein shor

mere andar ki KHamushi se hua

'bāqī' jo chup rahoge to uTTheñgī uñgliyāñ

hai bolnā bhī rasm-e-jahāñ bolte raho

'baqi' jo chup rahoge to uTThengi ungliyan

hai bolna bhi rasm-e-jahan bolte raho

ḳhamoshī meñ har baat ban jaa.e hai

jo bole hai dīvāna kahlā.e hai

KHamoshi mein har baat ban jae hai

jo bole hai diwana kahlae hai

ḳhāmushī chheḌ rahī hai koī nauha apnā

TūTtā jaatā hai āvāz se rishta apnā

KHamushi chheD rahi hai koi nauha apna

TuTta jata hai aawaz se rishta apna

jo chup rahā to vo samjhegā bad-gumān mujhe

burā bhalā hī sahī kuchh to bol aa.uuñ maiñ

jo chup raha to wo samjhega bad-guman mujhe

bura bhala hi sahi kuchh to bol aaun main

ham laboñ se kah na paa.e un se hāl-e-dil kabhī

aur vo samjhe nahīñ ye ḳhāmushī kyā chiiz hai

hum labon se kah na pae un se haal-e-dil kabhi

aur wo samjhe nahin ye KHamushi kya chiz hai

ek din merī ḳhāmushī ne mujhe

lafz kī oT se ishāra kiyā

ek din meri KHamushi ne mujhe

lafz ki oT se ishaara kiya

mirī ḳhāmoshiyoñ par duniyā mujh ko ta.an detī hai

ye kyā jaane ki chup rah kar bhī kī jaatī haiñ taqrīreñ

meri KHamoshiyon par duniya mujh ko tan deti hai

ye kya jaane ki chup rah kar bhi ki jati hain taqriren

maiñ chup rahā ki vazāhat se baat baḌh jaatī

hazār sheva-e-husn-e-bayāñ ke hote hue

main chup raha ki wazahat se baat baDh jati

hazar shewa-e-husn-e-bayan ke hote hue

ḳhāmushī terī mirī jaan liye letī hai

apnī tasvīr se bāhar tujhe aanā hogā

KHamushi teri meri jaan liye leti hai

apni taswir se bahar tujhe aana hoga

kyā batā.ūñ maiñ ki tum ne kis ko sauñpī hai hayā

is liye sochā mirī ḳhāmoshiyāñ hī Thiik haiñ

kya bataun main ki tum ne kis ko saunpi hai haya

is liye socha meri KHamoshiyan hi Thik hain

'vahshat' us but ne taġhāful jab kiyā apnā shi.ār

kaam ḳhāmoshī se maiñ ne bhī liyā fariyād kā

'wahshat' us but ne taghaful jab kiya apna shiar

kaam KHamoshi se main ne bhi liya fariyaad ka

ḳhamoshī dil ko hai furqat meñ din raat

ghaḌī rahtī hai ye āThoñ pahar band

KHamoshi dil ko hai furqat mein din raat

ghaDi rahti hai ye aaThon pahar band

suntī rahī maiñ sab ke dukh ḳhāmoshī se

kis kā dukh thā mere jaisā bhuul ga.ī

sunti rahi main sab ke dukh KHamoshi se

kis ka dukh tha mere jaisa bhul gai

nikāle ga.e is ke ma.anī hazār

ajab chiiz thī ik mirī ḳhāmushī

nikale gae is ke mani hazar

ajab chiz thi ek meri KHamushi

har taraf thī ḳhāmoshī aur aisī ḳhāmoshī

raat apne saa.e se ham bhī Dar ke ro.e the

har taraf thi KHamoshi aur aisi KHamoshi

raat apne sae se hum bhi Dar ke roe the

chup chup kyuuñ rahte ho 'nāsir'

ye kyā rog lagā rakkhā hai

chup chup kyun rahte ho 'nasir'

ye kya rog laga rakkha hai

duur ḳhāmosh baiThā rahtā huuñ

is tarah haal dil kā kahtā huuñ

dur KHamosh baiTha rahta hun

is tarah haal dil ka kahta hun

ajiib shor machāne lage haiñ sannāTe

ye kis tarah kī ḳhamoshī har ik sadā meñ hai

ajib shor machane lage hain sannaTe

ye kis tarah ki KHamoshi har ek sada mein hai

ḳhāmoshī meñ chāhe jitnā begāna-pan ho

lekin ik aahaT jānī-pahchānī hotī hai

KHamoshi mein chahe jitna begana-pan ho

lekin ek aahaT jaani-pahchani hoti hai

merī arz-e-shauq be-ma.anī hai un ke vāste

un kī ḳhāmoshī bhī ik paiġhām hai mere liye

meri arz-e-shauq be-mani hai un ke waste

un ki KHamoshi bhi ek paigham hai mere liye

jab ḳhāmushī hī bazm kā dastūr ho ga.ī

maiñ aadmī se naqsh-ba-dīvār ban gayā

jab KHamushi hi bazm ka dastur ho gai

main aadmi se naqsh-ba-diwar ban gaya