ہیں اور بھی دنیا میں سخنور بہت اچھے

ہم جیسا مگر ذوق قوافی نہیں رکھتے

میں اب تو شہر میں اس بات سے پہچانا جاتا ہوں

تمہارا ذکر کرنا اور کرتے ہی چلے جانا

کیا جانیں سفر خیر سے گزرے کہ نہ گزرے

تم گھر کا پتہ بھی مرے سامان میں رکھنا

سو میری پیاس کا دونوں طرف علاج نہیں

ادھر ہے ایک سمندر ادھر ہے ایک سراب

بیتے ہوئے لمحات کو پہچان میں رکھنا

مرجھائے ہوئے پھول بھی گلدان میں رکھنا

بہت ثابت قدم نکلیں گئے وقتوں کی تہذیبیں

کہ اب ان کے حوالوں سے کھنڈر آباد ہوتے ہیں

خمار قربت منزل تھا نارسی کا جواز

گلی میں آ کے میں اس کا مکان بھول گیا

انسان کی نیت کا بھروسہ نہیں کوئی

ملتے ہو تو اس بات کو امکان میں رکھنا

کیسا فراق کیسی جدائی کہاں کا ہجر

وہ جائے گا اگر تو خیالوں میں آئے گا

وحشت ہجر بھی تنہائی بھی میں بھی انجمؔ

جب اکٹھے ہوئے سب ایک غزل اور کہی

زرفشاں ہے مری زرخیز زمینوں کا بدن

ذرہ ذرہ مرے پنجاب کا پارس نکلا

ستم تو یہ ہے کہ فوج ستم میں بھی انجمؔ

بس اپنے لوگ ہی دیکھوں جدھر نگاہ کروں

اگر آتا ہوں ساحل پر تو آندھی گھیر لیتی ہے

سمندر میں اترتا ہوں تو طغیانی نہیں جاتی

کہو کیا بات کرتی ہے کبھی صحرا کی خاموشی

کہا اس خامشی میں بھی تو اک تقریر ہوتی ہے

تحیر ہے بلا کا یہ پریشانی نہیں جاتی

کہ تن ڈھکنے پہ بھی جسموں کی عریانی نہیں جاتی

فراق رت میں بھی کچھ لذتیں وصال کی ہیں

خیال ہی میں ترے خال و خد ابھارا کریں

ان سنگ زنوں میں کوئی اپنا بھی تھا شاید

جو ڈھیر سے یہ قیمتی پتھر نکل آئے

کہو کیا مہرباں نا مہرباں تقدیر ہوتی ہے

کہا ماں کی دعاؤں میں بڑی تاثیر ہوتی ہے

بس اے نگار زیست یقیں آ گیا ہمیں

یہ تیری بے رخی یہ تامل نہ جائے گا

سروں سے تاج بڑے جسم سے عبائیں بڑی

زمانے ہم نے ترا انتخاب دیکھ لیا

ہاتھ آئے گا کیا ساحل لب سے ہمیں انجمؔ

جب دل کا سمندر ہی گہر بار نہیں ہے

اذیتوں کی بھی اپنی ہی ایک لذت ہے

میں شہر شہر پھروں نیکیاں تلاش کروں

مری ہوس کے مقابل یہ شہر چھوٹے ہیں

خلا میں جا کے نئی بستیاں تلاش کروں

زباں بندی کے موسم میں گلی کوچوں کی مت پوچھو

پرندوں کے چہکنے سے شجر آباد ہوتے ہیں

خود کو اذیتیں نہ دے مجھ کو اذیتیں نہ دے

خود پہ بھی اختیار رکھ مجھ پہ بھی اعتبار کر

مری تعمیر بہتر شکل میں ہونے کو ہے انجمؔ

کہ جنگل صاف ہونے سے نگر آباد ہوتے ہیں

یہ کون ہے کہ جس کو ابھارے ہوئے ہے موج

وہ شخص کون تھا جو تہہ آب رہ گیا

اللہ کے گھر دیر ہے اندھیر نہیں ہے

تو یاس کے موسم میں بھی امید کا فن سیکھ

جن کو کہا نہ جا سکا جن کو سنا نہیں گیا

وہ بھی ہیں کچھ حکایتیں ان کو بھی تو شمار کر

ہم ایسے لوگ بہت خوش گمان ہوتے ہیں

یہ دل ضرور ترا اعتبار کر لے گا

ذرا سی میں نے ترجیحات کی ترتیب بدلی تھی

کہ آپس میں الجھ کر رہ گئے دنیا و دیں میرے

مرے جنوں کو ہوس میں شمار کر لے گا

وہ میرے تیر سے مجھ کو شکار کر لے گا

زمیں کی گود میں اتنا سکون تھا انجمؔ

کہ جو گیا وہ سفر کی تھکان بھول گیا

اسی شرر کو جو اک عہد یاس نے بخشا

کبھی دیا کبھی جگنو کبھی ستارہ کریں

یہ کون نکل آیا یہاں سیر چمن کو

شاخوں سے مہکتے ہوئے زیور نکل آئے

مری خاطر سے یہ اک زخم جو مٹی نے کھایا ہے

ذرا کچھ اور ٹھہرو اس کے بھرتے ہی چلے جانا

نخل انا میں زور نمو کس غضب کا تھا

یہ پیڑ تو خزاں میں بھی شاداب رہ گیا

اک غزل لکھی تو غم کوئی پرانا جاگا

پھر اسی غم کے سبب ایک غزل اور کہی

خاطر سے جو کرنا پڑی کج فہم کی تائید

لگتا تھا کہ انکار کشی ایک ہنر ہے