میں بھی بہت عجیب ہوں اتنا عجیب ہوں کہ بس

خود کو تباہ کر لیا اور ملال بھی نہیں

جو گزاری نہ جا سکی ہم سے

ہم نے وہ زندگی گزاری ہے

یہ مجھے چین کیوں نہیں پڑتا

ایک ہی شخص تھا جہان میں کیا

میں جو ہوں جونؔ ایلیا ہوں جناب

اس کا بے حد لحاظ کیجئے گا

یوں جو تکتا ہے آسمان کو تو

کوئی رہتا ہے آسمان میں کیا

کتنی دل کش ہو تم کتنا دلجو ہوں میں

کیا ستم ہے کہ ہم لوگ مر جائیں گے

زندگی کس طرح بسر ہوگی

دل نہیں لگ رہا محبت میں

ساری دنیا کے غم ہمارے ہیں

اور ستم یہ کہ ہم تمہارے ہیں

کس لیے دیکھتی ہو آئینہ

تم تو خود سے بھی خوب صورت ہو

کون اس گھر کی دیکھ بھال کرے

روز اک چیز ٹوٹ جاتی ہے

بہت نزدیک آتی جا رہی ہو

بچھڑنے کا ارادہ کر لیا کیا

کیا ستم ہے کہ اب تری صورت

غور کرنے پہ یاد آتی ہے

کیسے کہیں کہ تجھ کو بھی ہم سے ہے واسطہ کوئی

تو نے تو ہم سے آج تک کوئی گلہ نہیں کیا

وہ جو نہ آنے والا ہے نا اس سے مجھ کو مطلب تھا

آنے والوں سے کیا مطلب آتے ہیں آتے ہوں گے

کیا تکلف کریں یہ کہنے میں

جو بھی خوش ہے ہم اس سے جلتے ہیں

کیا کہا عشق جاودانی ہے!

آخری بار مل رہی ہو کیا

مستقل بولتا ہی رہتا ہوں

کتنا خاموش ہوں میں اندر سے

ہم کو یاروں نے یاد بھی نہ رکھا

جونؔ یاروں کے یار تھے ہم تو

مجھے اب تم سے ڈر لگنے لگا ہے

تمہیں مجھ سے محبت ہو گئی کیا

سوچتا ہوں کہ اس کی یاد آخر

اب کسے رات بھر جگاتی ہے

یارو کچھ تو ذکر کرو تم اس کی قیامت بانہوں کا

وہ جو سمٹتے ہوں گے ان میں وہ تو مر جاتے ہوں گے

علاج یہ ہے کہ مجبور کر دیا جاؤں

وگرنہ یوں تو کسی کی نہیں سنی میں نے

ایک ہی حادثہ تو ہے اور وہ یہ کہ آج تک

بات نہیں کہی گئی بات نہیں سنی گئی

اس گلی نے یہ سن کے صبر کیا

جانے والے یہاں کے تھے ہی نہیں

اور تو کیا تھا بیچنے کے لئے

اپنی آنکھوں کے خواب بیچے ہیں

دل کی تکلیف کم نہیں کرتے

اب کوئی شکوہ ہم نہیں کرتے

اب مری کوئی زندگی ہی نہیں

اب بھی تم میری زندگی ہو کیا

بن تمہارے کبھی نہیں آئی

کیا مری نیند بھی تمہاری ہے

زندگی ایک فن ہے لمحوں کو

اپنے انداز سے گنوانے کا

حاصل کن ہے یہ جہان خراب

یہی ممکن تھا اتنی عجلت میں

تمہارا ہجر منا لوں اگر اجازت ہو

میں دل کسی سے لگا لوں اگر اجازت ہو

میری بانہوں میں بہکنے کی سزا بھی سن لے

اب بہت دیر میں آزاد کروں گا تجھ کو

ہاں ٹھیک ہے میں اپنی انا کا مریض ہوں

آخر مرے مزاج میں کیوں دخل دے کوئی

میں رہا عمر بھر جدا خود سے

یاد میں خود کو عمر بھر آیا

میری ہر بات بے اثر ہی رہی

نقص ہے کچھ مرے بیان میں کیا

اب نہیں کوئی بات خطرے کی

اب سبھی کو سبھی سے خطرہ ہے

کوئی مجھ تک پہنچ نہیں پاتا

اتنا آسان ہے پتا میرا

ہیں دلیلیں ترے خلاف مگر

سوچتا ہوں تری حمایت میں

جان لیوا تھیں خواہشیں ورنہ

وصل سے انتظار اچھا تھا

اے شخص میں تیری جستجو سے

بے زار نہیں ہوں تھک گیا ہوں

کتنے عیش سے رہتے ہوں گے کتنے اتراتے ہوں گے

جانے کیسے لوگ وہ ہوں گے جو اس کو بھاتے ہوں گے

نہیں دنیا کو جب پروا ہماری

تو پھر دنیا کی پروا کیوں کریں ہم

مجھ کو عادت ہے روٹھ جانے کی

آپ مجھ کو منا لیا کیجے

بولتے کیوں نہیں مرے حق میں

آبلے پڑ گئے زبان میں کیا

نیا اک رشتہ پیدا کیوں کریں ہم

بچھڑنا ہے تو جھگڑا کیوں کریں ہم

یاد اسے انتہائی کرتے ہیں

سو ہم اس کی برائی کرتے ہیں

اب تو ہر بات یاد رہتی ہے

غالباً میں کسی کو بھول گیا

اس کے ہونٹوں پہ رکھ کے ہونٹ اپنے

بات ہی ہم تمام کر رہے ہیں

ایک ہی تو ہوس رہی ہے ہمیں

اپنی حالت تباہ کی جائے

کام کی بات میں نے کی ہی نہیں

یہ مرا طور زندگی ہی نہیں