Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "adad"

Nazm MATCHES FOR "adad"

Nazm

be-yaqin bastiyan

vo ik musaafir thaa jaa chukaa hai
bataa gayaa thaa ki be-yaqiino.n kii bastiyo.n me.n kabhii na rahnaa
kabhii na rahnaa ki un pe itne azaab utre.nge jin kii gintii adad se baahar
vo apne murde tumhaare kaa.ndho.n pe rakh ke tum ko judaa kare.nge
tum un janaazo.n ko qarya qarya liye phiroge
falak bhii jin se naa-aashnaa hai jinhe.n zamiine.n bhii rad kare.ngii
vo kah gayaa thaa hamesha zillat se duur rahnaa
ki bad-nasiibo.n kaa rizq-e-avval unhii.n zamiino.n se paidaa hotaa hai
jin zamiino.n pe bhuurii giddho.n kii nochii haDDii ke reze bikhrii.n
tum apnii raa.e ko istaqaamat kii aab denaa
jise pahaa.Do.n kii KHushk sa.ngii.n bulandiyo.n se KHiraaj bheje.n
Gulaam zehno.n pe aisii laanat kii rasm rakhnaa
jo terii naslo.n phir un kii naslo.n phir un kii naslo.n talak bhii jaa.e
tumhe.n KHabar ho shariif logo.n kii uu.nchii gardan lachak se aise hii be-KHabar hai
savaad-e-Gurbat me.n KHema-gaaho.n kii jaise gaa.Dii ho.n KHushk chobe.n
kabhii na shaane jhukaa ke chalnaa
ki past-qaamat tumhaare qadmo.n se apne qadmo.n ko jo.D de.nge
vahii nahuusat tumhe.n KHaraabo.n kii paasbaanii ataa karegii
saraab-aa.nkho.n ke raasto.n se tumhaare gurdo.n me.n ret phe.nke.nge aur siine ko kaaT de.nge
vo kah gayaa thaa yahii vo illat ke maare vahshii hai.n jin kii apnii zabaa.n nahii.n hai
ye jhaag u.Daate hai.n apne jab.Do.n se lajlaje kaa to ga.Dga.DaahaT kaa shor uThtaa hai
aur badbuu bikhertaa hai
yahii vo bad-baKHt be-hunar aur be-yaqii.n hai.n ki jin kii diyat na KHuu.n-bahaa hai
so in kii qurbat se duur rahnaa najaat-e-dil kaa sabab banegaa
vo ik musaafir thaa kah gayaa hai

Ali Akbar Natiq
Nazm

computer

computer kaa hai ye daur
ab jiine kaa badlaa taur
daftar daftar ghar ghar aaj
dekh lo computer kaa raaj
qadam qadam par sub.h o shaam
computer hii aa.e kaam
us se ham kyuu.n ho.n mahruum
jab computer kii hai dhuum
daur hamaaraa hai kuchh aur
computer siikho fil-faur
chiiz banii hairat-a.ngez
us kii memory hai tez
harf sabhii aur sab a.adaad
computer rakhtaa hai yaad
ilm-o-fan se hai aabaad
achchhaa-KHaasaa hai ustaad
har bhaashaa kar lo tahriir
aur banaa lo har tasviir
us par kar lo head aur tail
phir khelo man-chaahe khel
na.ii chalaa.ii us ne riit
us par bhii bajte hai.n giit
siikh ke computer bachcho
apne KHvaab ko sach kar lo

Faragh Rohvi
Nazm

dimak

daa.ere qausain san taariiKH aadaad o shumaar
nuqta o zer-o-zabar tashdiid o mad

Waheed Akhtar
Nazm

kitab ka kiDa

diq tujh se kitaabe.n hai.n bahut karam kitaabii
tuu dushman-e-duzdiida hai KHaakii ho ki aabii
alfaaz kii khetii hai faqat terii charaa-gaah
ma.anii kii zamii.n tere sab saayo.n ne daabii
hone ko tirii asl hai sayyaad makii.n-gaah
kahne ko faqat terii haqiiqat hai saraabii
tuu ne to har ik samt lagaa.ii hai.n sura.nge.n
paariina ho farmaan kitaabe.n huu.n nisaabii
baadaamii ho kaaGaz to mazaa aur hii kuchh hai
luqma hu.aa tahriir kaa har maGz shitaabii
ghun saath hii gehuu.n ke hai pista hu.aa dekhaa
bargashta varaq laa na sakaa tujh pe KHaraabii
kyaa KHuub hai ye majlis-e-auraaq-e-kuhan bhii
viiraan kutub-KHaano.n kii diimak tirii loby
firdausii-o-KHulduu.n kii kitaabe.n hai.n hiraasaa.n
vo qil.a-e-ma.anii teraa hamla hai javaabii
parda hai KHamoshii tirii aaha.ng-e-fanaa kii
bhau.nraa hai faqat kunj-e-gulistaa.n kaa rabaabii
tuu chaaT gayaa daanish-e-kohna kii fasiile.n
buniyaad-e-imaarat ko hai Dhaanaa tirii hobby
a.adaad ke qaalib me.n hai to sifr kii taaqat
safhaat ke suuraaKH kaa be-naam hisaabii
taariiKH ke is cell me.n insaan ne paa.ii
ek aadh ko.ii mauj-e-nafs vo bhii habaabii
bikte sar-e-baazaar hai.n maanind-e-zaGaal aaj
jo taaza-nafas KHvaab-e-taGayyur the shahaabii
khaa jaatii hai ik din use sab gard-e-zamaana
miTTii kii vo sahnak ho ki chiinii kii rakaabii
badlii hu.ii duniyaa me.n taGayyur kaa amal hai
tuu kirm-e-kitaabii nahii.n ik kirm-e-KHalal hai

Aziz Hamid Madni
Nazm

machchhar aur machchraniyan

TuuTii phuuTii morii me.n ik machchhar saahab rahte hai.n
shaayad vo ghar me.n bhii apne machchhar hii kahlaate hai.n
biiviyaa.n un kii chaar adad hai.n machchraanii kahlaatii hai.n
morii vaale ghar me.n hii jii chaaro.n se bahlaate hai.n
ik din vo ghar se nikle to vaapas aanaa bhuul ga.e
mai.n to jaanuu.n isii tarah se roz kahii.n u.D jaate hai.n
biiviyaa.n un kii chup baiThii thii.n lekin fikr thii sab ko hii
chaaro.n aapas me.n kahtii thii.n ab aate ab aate hai.n
pahlii bolii sach kahtii huu.n mai.n aadat se vaaqif huu.n
aa.De tirchhe u.Dte vo ab biin bajaate aate hai.n
duusrii bolii sach kahtii huu.n mai.n aadat se vaaqif huu.n
laal khaTolaa hare bhare takiye un par loT lagaate hai.n
tiisrii bolii sach kahtii huu.n mai.n aadat se vaaqif huu.n
kuu.Daa ghar ke KHamiir ke uupar rah rah kar ma.nDlaate hai.n
chauthii bolii sach kahtii huu.n mai.n aadat se vaaqif huu.n
baasii baasii phalo.n ke ras me.n KHush ho ho ke nahaate hai.n

Hamidullah Afsar
Nazm

yaad aur mohabbat

mai.n apne aap ko bahut yaad kar rahaa huu.n
kaash mai.n apne paas hotaa apne saath
apne ka.ndhe se haath laTkaa.e
KHud ko dilaaso.n kaa ek tohfa detaa
zindagii Table par mere saath baiThii
mujhe dekh kar muskuraa rahii hai
vo mujh se bhii ek adad muskuraahaT
kii KHvaahish rakhtii hai
lekin shaayad vo nahii.n jaantii
muskuraahaT aur mai.n do baras pahle
alag ho chuke hai.n
ab mai.n apnii puraanii tasviiro.n se
nafrat kartaa huu.n kyo.n ki
in me.n maujuud shaKHs muskuraa rahaa hai
zehn par zor dene se bhii vo vajah
yaad nahii.n aatii jo mujhe
maazii me.n muskuraahaT se navaaztii thii
haa.n itnaa yaad hai ki vo mohabbat nahii.n thii
tum jaante ho mohabbat kyaa hai
mohabbat ek jo.De kii pahlii aulaad hai
jo parvaan cha.Dhte hii apno.n ke
kiye ehsaan bhuul jaatii hai
mohabbat glacier hai jo tho.Dii sii
garmii se pighal jaataa hai
mohabbat ek beva kii udaasii hai
mohabbat baa.njh aurat kii
aulaad kii KHvaahish hai
viiraane me.n apne gaal par bosa
denaa mohabbat hai
mohabbat banjar chehre par muskuraahaT kii
fasl ugne kii KHvaahish hai
magar meraa mohabbat muskuraahaT
aur KHvaahisho.n se ko.ii ta'alluq nahii.n
mai.n KHud ko Dhuu.nD rahaa huu.n
mai.n do baras pahle mohabbat naamii
ek doshiiza ke hamraah gum gayaa thaa
mai.n aaj bhii KHud ko bahut yaad kartaa huu.n

Manzar Latif
Nazm

waqt bhi marham nahin hai

mujhe saa.np sii.Dhii ke
is khel se
aaj ghin aa rahii hai
mire dil ke paa.nse pe khode ga.e
ye adad
mujh ko mahduud karne lage hai.n
bisaat-e-ziyaa.n par
mire KHvaab kaa reshmii azhdahaa
chaal ke pairahan ko nigalne lagaa hai
merii jast kii sii.Dhiyaa.n
soKHta haDDiyo.n kii tarah
bhurnhurii ho ke
jha.Dne lagii hai.n
khel hii khel me.n
sabz chaukor KHaane
kisii qabr kii chaar diivaar ban kar
miraa dam nigalne lage hai.n
so ai vaqt!
mere muqaabil khilaa.Dii
aaj se tuu bhii aazaad hai
mai.n bhii aazaad huu.n

Sarwat Zehra
Nazm

waba ke dinon mein 5

ye a.adaad kii qaus kab siidhii hogii
hame.n kyaa KHabar bas
KHudaa ko KHabar hai
naqaabo.n kii qause.n thii.n zimme hamaare
jo chehro.n pe siidhe kiye hai.n
kivaa.Do.n kii qause.n thii.n zimme hamaare
jo khulte nahii.n hai.n
hamaarii bha.nvo.n kii kamaane.n
du.aa me.n uThe haath
sajdo.n ukuu.o.n kii qause.n
aka.Dne lagii hai.n
badan qaus the jo badalne lage hai.n
dahan qaus hote nahii.n hai.n
KHudaa terii qaus-e-quzah kab khulegii

Arsalan Ahmad
Nazm

usi ke liye

aadaad o alfaaz kii bhii.D me.n
kis qadar mai.n akelaa huu.n
tujh ko KHabar hai

Ali Mohammad Farshi
Nazm

dam-e-wapsin

mire nafs kii vaadiyo.n me.n yahaa.n se nikal chalne jaisii havaa chal rahii hai
ufuq-taa-ufuq ik mahaktaa dhu.aa.n hai
sadaa zaa.iqe rang aur lams KHushbuu me.n tahliil hone lage hai.n
mah-o-saal-e-rafta shab-o-roz-e-aa.inda lamhe me.n tabdiil hone lage hai.n
zamaa.n ek sakta
makaa.n ek nuqta
lakiire.n adad harf saare
nam-aaluud kaaGaz kii tarkiib me.n ghul rahe hai.n
qabaa-e-badan sarsaraatii hai asraar-e-ja.n zer-e-band-e-qabaa khul rahe hai.n
ko.ii sarmadii lau sii uTThii hai jis se fazaa jal rahii hai
havaa chal rahii hai

Abdul Ahad Saaz
Nazm

nind mein chalti maut

vo kyaa silsila thaa
jo ik god se gor tak reshmii taar saa tan gayaa
jis pe chalte zamaane
KHudaa-vand-e-a.alaa ke ahkaam-e-rahmat uThaa.e hu.e
raqs karte guzarte
to miTTii pe naqsh-o-nigaaraan-e-Gam muskuraate
tujhe yaad aate
tujhe yaad karte hu.e
yuu.n guzre
ki jaise kisii bhed-bhaav bharii chaa.ndnii raat se
chaa.nd kaa baa.nkpan
baadalo.n ke la.Dakpan ke gaale u.Daate hu.e
KHvaab-labrez pariyo.n se
chhup-chhup ke guzre
ye dikhne dikhaane kii saarii mashii.at
ye chhupne chhupaane kii saarii aziyyat
ko.ii jheltaa hai
jo tuu ne akele me.n jhelii
mai.n kitne dino.n baad aaya tire paa.nv chhuune
hisaab is KHajaalat kaa karte hu.e
kitne aa.nsuu gire
mai.n nahii.n gin sakaa
bhiigte phailte lafz a.adaad jab bhii samundar banaate
tire naam kii naav mujh ko kinaare lagaatii
magar ye kinaara ko.ii kahkashaa.n to nahii.n thaa
ki mai.n tere laa-vaqt saahil pe
KHud apne paa.nv ke miTte nishaa.n dekh kar muskuraataa
vo gintii kaa maa'kuusii ziina thaa
taht-us-saraa tak ravaa.n re.ngtii aabnaa.e thii
aa.nkho.n kaa kaarez thii
terii mohabbat kii vo daastaa.n
jis ko likhne kii koshish me.n laakho.n varaq
mai.n ne kaale kiye
magar ek lamha bhii mere qalam par
vo KHush-rang ilhaam ban kar na utraa
jise tere ho.nTo.n kii tasdiiq miltii

Ali Mohammad Farshi
Nazm

nazm

ghar se office jaate hu.e
mai.n roz sa.Dak ke daa.e.n baa.e.n
daraKHto.n ko gintaa hu.aa chaltaa huu.n
hamesha gine hu.e daraKHto.n kii taadaad muKHtalif hotii hai
kabhii do sau biis
kabhii tiin sau gyaarah
kabhii kabhii to daraKHto.n kii taadaad itnii ba.Dh jaatii hai
ki mujhe guzishta din ke aadaad o shumaar par
shak hone lagtaa hai
par ek din pataa chalaa
raaste ke daraKHt aadhe bhii nahii.n rahe
kyaa aadhe daraKHt kaaT diye ga.e hai.n
lekin agle roz daraKHto.n kii taadaad itnii thii
ki meraa KHud par se e'timaad uTh gayaa
mujhe yuu.n lagaa
jaise kuchh daraKHt mujhe dekh kar
idhar udhar ho jaate hai.n
kuchh duusre daraKHto.n ke piichhe chhup jaate hai.n
kuchh daraKHt raato.n raat is liye ug aate hai.n
ki mujhe hairaan kar de.n
aur kuchh is liye Gaa.eb ho jaate hai.n
ki meraa KHud par se e'timaad hii jaataa rahe

Saeeduddin
Nazm

kulliya

ek andaaz se dekhuu.n to humaa.uu.n tum ho
aur ik tarz kii baabar mai.n huu.n
roz-o-shab dard ke phero.n me.n rahe.n
baar-e-Gam KHud pe uThaane kii du.aa.o.n ke sivaa
mustajaabii kaa ko.ii Dha.ng na ho
tandurustii bhii ko.ii taaq adad ho jaise
do pe taqsiim nahii.n ho saktii
mere aazaar me.n jitnaa bhii izaafa hogaa
us qadar tum ko shifaa pahu.nchegii

Saima Esma
Nazm

shahid

mushtahar maut kii aarzuu ne use
muztarib kar diyaa is qadar ek din
vo saliibo.n ke a.adaad par roz-o-shab
Gaur karne lagaa
imtihaa.n ke liye dasht ko chal diyaa
apne hisse kii jab muntaKHab kar chukaa
us ne taariiKH ke zard aur ek par
naam apnaa KHushii se raqam kar diyaa

Balraj Komal
Nazm

nae aadam ki tashkil

hechrii me.n aadmii ik din Dhale.nge dekhnaa
pahle ik saa.ncha banegaa us ko parkhaa jaa.egaa
nasl dekhii jaa.egii rangat nikhaarii jaa.egii
qadd-o-qaamat dekh kar a.azaa taraashe jaa.e.nge
aadmii aadam banaa.egaa nayaa bilkul nayaa
phir usii aadam kii taKHliiq-e-mukarrar silsila-dar-silsila
saare saa.nche to.D de.nge is na.e paikar ke baa'd
ek rangat ik qad-o-qaamat zabaan-o-nasl ek
gintiyaa.n ho.ngii adad ho.nge bajaa.e nasb-o-naam
be-KHabar maazii se mustaqbil se naa-aagaah sab
haal me.n jiite rahe.nge haal me.n mar jaa.e.nge
aadamiyyat dostii insaaf amn-o-aashatii
yaanii farsuuda luGaat-e-ilm
ta.aliim-o-talammuz ek saath
sab se gahrii khaa.ii me.n taariiKH kii
dafn kar ke un se fursat paa.e.nge
phir sitaaro.n kaa jahaa.n hogaa
vahii.n u.D jaa.e.nge

Rizwanullah
Nazm

gintiyon ki fath

maaddii daur ke javaano.n ne
ahd-e-haazir ke paasbaano.n ne
gintiyo.n kaa banaa ke ik lashkar
kar liyaa qabza saarii duniyaa par
hindise ho ga.e KHirad ke naqiib
zarb-o-taqsiim se banii tahziib
dahr kii rahnumaa hu.ii ta.adaad
kuchh na baaqii rahaa ba-juz a.adaad
aadamiyyat kaa Gam miTaa Daalaa
ism ko bhii adad banaa Daalaa

Akhtar Bastavi
Nazm

TukDe

‘adad riyaazii kaa
KHauf-o-dahshat kaa zaa.ida ban ke
KHuunii panje nikaale apnaa
lahuu kaa pyaasaa
chahaar-jaanib se vaar kartaa
mohabbato.n ko khurach rahaa hai
ye khel kaisaa ki saare jhag.De
ye zarb-o-taqsiim jam’-o-tafriiq
bapaa hu.e nafrat-o-mohabbat ke darmiyaa.n jo
shikast insaaniyat ke hisse me.n aa ga.ii kyo.n
ye rat-jago.n kaa shikaar aa.nkhe.n
labaada-e-KHauf me.n lipaT kar
bhaTak rahii hai.n
KHayaal kii pechdaar galiyo.n me.n
sochtii hai.n
ye KHvaab dekhe.n
yaa aagahii kaa 'azaab palko.n ke naam likh kar
parind-e-KHush-rang KHvaab ke sab
u.Daa de.n apnii mu.nDer se ham

Qamar Jahan Naseer
Nazm

udasi ki kokh se janm leti ek nazm

aah afsos
mai.n ne kiyaa kuchh nahii.n sahaa magar phir bhii
merii qismat haamila ho kar ek
haqiiqii KHushii ko janm na de sakii
vo biga.Dtaa zehnii tavaazun
school ke bench par akele baiThne kaa dukh
murda-KHaane se apnii laash na milne kaa Gam
haa.e vo dosto.n ke badle ravayye
vo chand ummiido.n ke janaaze jinhe.n mai.n ne
KHud se chhupaa kar hii KHud me.n dafn kar diyaa
vo KHvaabo.n ke TuuTe hu.e chand Tuk.De
jinhe.n mai.n ne kisii udaas naGme ke havaale kar diyaa
meraa har KHvaab signal pe soyaa rahaa
aur log apnii gaa.Diyo.n se unhe.n kuchal kar chal diye
mai.n yuunaanii qadiim shahro.n ke uu.nche malbo.n pe
kaaGaz kii chi.Diyaa jaise u.D kar aise giraa
jaise mujh par sadiyo.n ke sadmo.n kaa bojh thaa
abhii bhii tum puuchhte ho yaar hu.aa kyaa hai
mai.n ne kitne jhuuTe dilaaso.n ke peg banaa.e
aur aise nosh kiye jaise kabhii kuchh hu.aa hii nahii.n thaa
ye sab haadse
mere dil pe kisii rail-gaa.Dii kii tarah chalte rahe
aur us ke Tuk.De KHalaa.o.n me.n bikhar ga.e
vahii dil jis me.n
ummiide.n armaan chand KHvaab aur ek 'adad meraa pasandiida shaKHs bastaa thaa
mai.n apnii barbaadii pe royaa to mere aa.nsu.o.n se
merii qismat me.n likhii saarii KHushiyaa.n
kisii anjaan dariyaa me.n bah ga.ii.n
mai.n apnii bebasii pe ha.nstaa
signal pe apne KHvaabo.n ko gaaliyaa.n baktaa rahaa
KHud-kushiyaa.n karne vaale
KHvaabo.n me.n mujhe sabr kaa dars dete rahe
aur mai.n apnii paamaalii pe udaasii
kii kokh se nazme.n jantaa rahaa
ek ke baa'd ek haadisa merii zindagii ke canvas se
rang nahii.n muskuraahaTe.n chhiin le gayaa
magar monis-e-jaa.n aise bhii kyaa
mere kandhe tere dilaase kii thapkii ke liye taraste rahe
aur tuu yuunaanii KHudaa.o.n kii maujuudgii pe
mashkuuk bahs me.n gum rahaa
mai.n ne kyaa kuchh nahii.n sahaa monis-e-jaa.n
quetta-cafe kii chhat pe baiThe
haadso.n kaa maaraa ek la.Dkaa ro ro ke apne dosto.n ko bataataa rahaa
ki haa.n mai.n ne ye sab sahaa hai
us kaa banjar chehra chiiKH chiiKH kar us kii bebasii bayaa.n kar rahaa thaa
aur us kii dahliiz par ek nayaa haadisa us ke intizaar me.n thaa

Manzar Latif
Nazm

katba

mai.n agar aisaa na kar sakaa
tuu mere katbe par likhvaa denaa
yahaa.n ek aisaa shaKHs dafn hai
jis ke naam ke pahle hii harf ke a.adaad
sab se zyaada the
ya.anii puure ek hazaar
lekin vo
ek bhii na thaa

Ghayas Mateen
Nazm

panDora

mire sanduuq me.n ik aa.ina thaa
jo mujhe chehre dikhaataa
saat darzo.n par jo parde the
unhe.n aahista aahista haTaataa
ziist ke nange badan kii daastaa.n mujh ko sunaataa muskuraataa
mujhe aa.iina gintii bhii sikhaataa
nau adad tak rok detaa thaa
mujhe ma.aluum thaa
nau ke adad me.n ism-e-aazam hai
hayaat-e-nau isii nau ke adad kaa raaz-e-sar-basta
ye nau din aur nau raato.n kaa ik rangii.n drama hai
phir is ke baad
KHaalii sifr tak kuchh hone vaalaa hai

Rasheed Nisar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now