Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dajla"

Nazm MATCHES FOR "dajla"

Nazm

tarana-e-milli

chiin-o-arab hamaaraa hindostaa.n hamaaraa
muslim hai.n ham vatan hai saaraa jahaa.n hamaaraa
tauhiid kii amaanat siino.n me.n hai hamaare
aasaa.n nahii.n miTaanaa naam-o-nishaa.n hamaaraa
duniyaa ke but-kado.n me.n pahlaa vo ghar KHudaa kaa
ham is ke paasbaa.n hai.n vo paasbaa.n hamaaraa
teGo.n ke saa.e me.n ham pal kar javaa.n hu.e hai.n
KHanjar hilaal kaa hai qaumii nishaa.n hamaaraa
maGrib kii vaadiyo.n me.n guu.njii azaa.n hamaarii
thamtaa na thaa kisii se sail-e-ravaa.n hamaaraa
baatil se dabne vaale ai aasmaa.n nahii.n ham
sau baar kar chukaa hai tuu imtihaa.n hamaaraa
ai gulistaan-e-undulus vo din hai.n yaad tujh ko
thaa terii Daaliyo.n me.n jab aashiyaa.n hamaaraa
ai mauj-e-dajla tuu bhii pahchaantii hai ham ko
ab tak hai teraa dariyaa afsaana-KHvaa.n hamaaraa
ai arz-e-paak terii hurmat pe kaT mare ham
hai KHuu.n tirii rago.n me.n ab tak ravaa.n hamaaraa
saalaar-e-kaarvaa.n hai miir-e-hijaaz apnaa
is naam se hai baaqii aaraam-e-jaa.n hamaaraa
'iqbaal' kaa taraana baa.ng-e-daraa hai goyaa
hotaa hai jaada-paimaa phir kaarvaa.n hamaaraa

Allama Iqbal
Nazm

hasan kuza-gar (1)

jahaan-zaad niiche galii me.n tire dar ke aage
ye mai.n soKHtaa-sar hasan-kuuzaa-gar huu.n!
tujhe sub.h baazaar me.n buu.Dhe attaar yuusuf
kii dukkaan par mai.n ne dekhaa
to terii nigaaho.n me.n vo taabnaakii
thii mai.n jis kii hasrat me.n nau saal diivaana phirtaa rahaa huu.n
jahaa.n-zaad nau saal diivaana phirtaa rahaa huu.n!
ye vo daur thaa jis me.n mai.n ne
kabhii apne ranjuur kuuzo.n kii jaanib
palaT kar na dekhaa
vo kuuze mere dast-e-chaabuk ke putle
gil-o-ra.ng-o-roGan kii maKHluuq-e-be-jaa.n
vo sar-goshiy.n me.n ye kahte
hasan kuuza-gar ab kahaa.n hai?
vo ham se KHud apne amal se
KHudaa-vand ban kar KHudaa.o.n ke maanind hai ruu-e-gardaa.n!
jahaa.n-zaad nau saal kaa daur yuu.n mujh pe guzraa
ki jaise kisii shahr-e-madfuun par vaqt guzre
taGaaro.n me.n miTTii
kabhii jis kii KHushbuu se vaarafta hotaa thaa mai.n
sa.ng-basta pa.Dii thii
suraahii-o-miinaa-o-jaam-o-subuu aur faanuus o gul-daa.n
mirii hech-maayaa ma.iishat ke iz.haar-e-fan ke sahaare
shikasta pa.De the
mai.n KHud mai.n hasan kuuza-gar paa-ba-gil KHaak-bar-sar barhana
sar-e-chaak zholiidaa-muu sar-ba-zaanuu
kisii Gam-zada devtaa kii tarah vaahima ke
gil-o-laa se KHvaabo.n ke sayyaal kuuze banaataa rahaa thaa
jahaa.n-zaad nau saal pahle
tuu naadaa.n thii lekin tujhe ye KHabar thii
ki mai.n ne hasan kuuza-gar ne
tirii qaaf kii sii ufuq-taab aa.nkho.n
me.n dekhii hai vo taabnaakii
ki jis se mere jism o jaa.n abr o mahtaab kaa
rah-guzar ban ga.e the
jahaa.n-zaad baGdaad kii KHvaab-guu.n raat
vo ruud-e-dajlaa kaa saahil
vo kashtii vo mallaah kii band aa.nkhe.n
kisii KHasta-jaa.n ra.nj-bar kuuza-gar ke liye
ek hii raat vo kohrbaa thii
ki jis se abhii tak hai paivast us kaa vajuud
us kii jaa.n us kaa paikar
magar ek hii raat kaa zauq dariyaa kii vo lahr niklaa
hasan kuuza-gar jis me.n Duubaa to ubhraa nahii.n hai!

Noon Meem Rashid
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Nazm

zauq o shauq

qalb o nazar kii zindagii dasht me.n sub.h kaa samaa.n
chashma-e-aaftaab se nuur kii naddiyaa.n ravaa.n!
husn-e-azal kii hai numuud chaak hai parda-e-vajuud
dil ke liye hazaar suud ek nigaah kaa ziyaa.n!
surKH o kabuud badliyaa.n chho.D gayaa sahaab-e-shab!
koh-e-izam ko de gayaa ra.ng-ba-ra.ng tailisaa.n!
gard se paak hai havaa barg-e-naKHiil dhul ga.e
reg-e-navaah-e-kaazima narm hai misl-e-parniyaa.n
aag bujhii hu.ii idhar, TuuTii hu.ii tanaab udhar
kyaa KHabar is maqaam se guzre hai.n kitne kaarvaa.n
aa.ii sadaa-e-jibra.iil teraa maqaam hai yahii
ahl-e-firaaq ke liye aish-e-davaam hai yahii
kis se kahuu.n ki zahr hai mere liye mai-e-hayaat
kohna hai baz-e-kaa.inaat taaza hai.n mere vaardaat!
kyaa nahii.n aur Gaznavii kaargah-e-hayaat me.n
baiThe hai.n kab se muntazir ahl-e-haram ke somnaat!
zikr-e-arab ke soz me.n, fikr-e-ajam ke saaz me.n
ne arabii mushaahidaat, ne ajamii taKHaiyyulaat
qaafilaa-e-hijaaz me.n ek husain bhii nahii.n
garche hai taab-daar abhii gesuu-e-dajla-o-furaat!
aql o dil o nigaah kaa murshid-e-avvalii.n hai ishq
ishq na ho to shar-o-dii.n butkada-e-tasavvuraat!
sidq-e-KHaliil bhii hai ishq sabr-e-husain bhii hai ishq!
ma.arka-e-vajuud me.n badr o hunain bhii hai ishq!
aaya-e-kaa.enaat kaa ma.anii-e-der-yaab tuu!
nikle tirii talaash me.n qaafila-haa-e-ra.ng-o-buu!
jalvatiyaan-e-madrasa kor-nigaah o murda-zauq
jalvatyaan-e-maikada kam-talab o tahii-kaduu!
mai.n ki mirii Gazal me.n hai aatish-e-rafta kaa suraaG
merii tamaam sarguzisht kho.e hu.o.n kii justujuu!
baad-e-sabaa kii mauj se nash-o-numaa-e-KHaar-o-KHas!
mere nafas kii mauj se nashv-o-numaa-e-aarzuu!
KHuun-e-dil o jigar se hai merii navaa kii parvarish
hai rag-e-saaz me.n ravaa.n saahib-e-saaz kaa lahuu!
fursat-e-kashmukash me.n ii.n dil be-qaraar raa
yak do shikan zyaada kun gesuu-e-taabdaar raa
lauh bhii tuu, qalam bhii tuu, teraa vajuud al-kitaab!
gumbad-e-aabgiina-ra.ng tere muhiit me.n habaab!
aalam-e-aab-o-KHaak me.n tere zuhuur se faroG
zarra-e-reg ko diyaa tuu ne tuluu-e-aaftaab!
shaukat-e-sanjar-o-saliim tere jalaal kii numuud!
faqr-e-'juned'-o-'baayaziid' teraa jamaal be-naqaab!
shauq tiraa agar na ho merii namaaz kaa imaam
meraa qayaam bhii hijaab! meraa sujuud bhii hijaab!
terii nigaah-e-naaz se dono.n muraad paa ga.e
aql, Gayaab o justujuu ishq, huzuur o iztiraab!
tiira-o-taar hai jahaa.n gardish-e-aaftaab se!
tab-e-zamaana taaza kar jalva-e-be-hijaab se!
terii nazar me.n hai.n tamaam mere guzishta roz o shab
mujh ko KHabar na thii ki hai ilm-e-naKHiil be-rutab!
taaza mire zamiir me.n ma.arka-e-kuhan hu.aa!
ishq tamaam mustafaa! aql tamaam buu-lahab!
gaah ba-hiila mii-barad, gaah ba-zor mii-kashad
ishq kii ibtidaa ajab ishq kii intihaa ajab!
aalam-e-soz-o-saaz me.n vasl se ba.Dh ke hai firaaq
vasl me.n marg-e-aarzuu! hijr me.n lazzat-e-talab!
ain-e-visaal me.n mujhe hausla-e-nazar na thaa
garche bahaana-juu rahii merii nigaah-e-be-adab!
garmii-e-aarzuu firaaq! shorish-e-haa-o-huu firaaq!
mauj kii justujuu firaaq! qatre kii aabruu firaaq!

Allama Iqbal
Nazm

hasan kuza-gar(3)

jahaa.n-zaad
intizaar aaj bhii mujhe hai kyuu.n vahii magar
jo nau baras ke daur-e-naa-sazaa me.n thaa?
ab intizaar aa.nsu.o.n ke dajla kaa
na gumrahii kii raat kaa
shab-e-gunah kii lazzato.n kaa itnaa zikr kar chukaa
vo KHud gunaah ban ga.ii.n!
halab kii kaarvaa.n-saraa ke hauz kaa, na maut kaa
na apnii is shikast-KHurdaa zaat kaa
ik intizaar-e-be-amaa.n kaa taar hai ba.ndhaa hu.aa!
kabhii jo chand saaniye zamaan-e-be-zamaa.n me.n aa ke ruk ga.e
to vaqt kaa ye baar mere sar se bhii utar gayaa
tamaam rafta o guzishta suurto.n, tamaam haadso.n
ke sust qaafile
mire daruu.n me.n jaag uThe
mere daruu.n me.n ik jahaan-e-baaz-yaaftaa kii rel-pel jaag uThii
bahisht jaise jaag uThe KHudaa ke laa-shu.uur me.n!
mai.n jaag uThaa Gunuudgii kii ret par pa.Daa hu.aa
Gunuudgii kii ret par pa.De hu.e vo kuuze jo
mire vajuud se baruu.n
tamaam reza reza ho ke rah ga.e the
mere apne-aap se firaaq me.n
vo phir se ek kul bane (kisii navaa-e-saaz-gaar kii tarah)
vo phir se ek raqs-e-be-zamaa.n bane
vo ruuyat-e-azal bane!

Noon Meem Rashid
Nazm

Weapons of mas Destruction

ko.ii hai
ko.ii baGdaad kii fariyaad suntaa hai
ko.ii hogaa jise aavaaz aatii ho
kisii dushman ke Taapo.n kii
dhamaako.n kii
iraaqii kokh ko yuu.n rau.ndte hai.n
tank dushman ke
ki zaKHm KHuun thuukne lage baGdaadii badan ke
furaat-o-dajla ke paanii ko kis ne KHaak kar Daalaa
ki dushman ne mirii jannat ko bhii naapaak kar Daalaa
alf-lailaa shahzaadii ke kap.De phaa.D Daale hai.n
fara.ngii ne mire bachpan ke qisse phaa.D Daale hai.n
badan jalte hu.e bachcho.n kii ye bujhtii hu.ii aa.nkhe.n
iraaqii aasmaa.n se sar uThaa kar bas yahii puuchhe.n
abaabiile.n utartii kyuu.n nahii.n dikhtii.n zamiino.n par
hamaare dushmano.n ke sard siino.n par
vo bachche jaante kab hai.n
abaabiile.n shahr se duur apne gho.nslo.n me.n
sair ho kar nii.nd me.n gum hai.n
vo bachche jaante kab hai.n
abaabiile.n abaabiile.n nahii.n hai.n
mai.n aur tum hai.n
vo bachche jaante kab hai.n
ki un ke KHuun ke qatre hamaarii sarhado.n tak
aate aate suukh jaate hai.n
hamaarii had hai aur sarhad bhii hai haakim ke hukm se
KHudaa kaa hukm hai chhoTaa yahaa.n zaalim ke hukm se
sharaabo.n me.n Dubo dii hai.n mire haakim ne shamshiire.n
jilaa dii hai.n sabhii aabaa kii tasviire.n
musalmaano.n kii taqdiire.n
mire bachcho
mire baGdaad ke siine pe pa.De adh-mare bachcho
ko.ii iisaa na aa.egaa masiihaa.ii ko.ii le kar
tumhaarii ham se jo ummiid hai
vo be-samar hai
hamaarii apnii zamii.n hai
hamaaraa apnaa bhii ghar hai
tumhaarii aas andhii hai tumhaaraa KHvaab kaalaa hai
hamaare daur kii mariyam ne iisaa maar Daalaa hai

Ali Imran
Nazm

allama iqbaal

baato.n me.n thii daliil havaala suKHan me.n thaa
tuu thaa to guftuguu kaa mazaa anjuman me.n thaa
qur.aan kii fazaa me.n palaa thaa tiraa shu.uur
islaam kaa mizaaj tire baa.nkpan me.n thaa
dil-daada-e-uluum-e-farangii thaa dil tiraa
lekin KHayaal KHitta-e-arz-e-vatan me.n thaa
jahl-e-KHizaa.n kaa daur gulo.n se thaa duur duur
jab tak tiraa vajuud fazaa-e-chaman me.n thaa
likhii vo daastaan-e-Gam-e-dajla-o-furaat
chakkhaa vo zaa.iqa bhii jo gang-o-jaman me.n thaa
saaraa simaT ke aa gayaa tere kalaam me.n
jitnaa bhii husn laala-o-sarv-o-saman me.n thaa
ab is se ba.Dh ke bas me.n tire thaa bhii kuchh nahii.n
millat ko de diyaa vo lahuu jo badan me.n thaa
raah-e-amal dikhaataa rahaa qaum ko magar
tuu mutma.in thaa dil tiraa ranj-o-mehan me.n thaa
har dam madiina-o-najaf-o-karbalaa kii fikr
teraa kahaa.n javaab mohabbat ke fan me.n thaa

Habeeb Jaunpuri
Nazm

baghdad

hasan jis shahr me.n
tuu giilii miTTii se
kabhii kuuze banaataa thaa
tujhe is shahr me.n miTTii nahii.n
ab sar mile.nge
hazaaro.n KHasta-tan
laasho.n se ristaa KHuun
tere shahr kii miTTii ko
yuu.n sairaab kartaa hai
ki ab jo tuu kabhii
miTTii se khelegaa
to har kuuza suraahii jaam-o-miinaa
lahuu ke rang ke ho.nge
tirii naqsh-o-nigaarii
aur tire haatho.n kii sannaa.ii
na in kuuzo.n ko baKHshegii vo hairat
vo nudrat aur vo naqqaashii
jo bas teraa hii hissa thii
vo is miTTii kii so.ndhii tez KHushbuu
puraane KHuun kii badbuu me.n mil kar
aisii badlii hai
tujhe mahsuus hogaa
tuu kisii marghaT me.n baiThaa hai
tujhe dajla kaa vo shaffaaf paanii yaad hai kyaa
vo jis se tere kuuzo.n kii ziyaa thii
vo jis se pyaas bujhtii thii
tire suukhe badan kii
vo dajla surKH hai
ma.asuum bachcho.n ke lahuu se
hasan ataa yuusuf kii dukaa.n ke saamne
kal bam phaTaa thaa
na jaane kitne kuuza-gar mare
jin ke gharo.n me.n
isii miTTii ke pyaale hai.n magar KHaalii
ta.Daptii bhuuk hai aur lab savaalii
na jaane kitne kaarii-gar mare
ab kaun gintaa hai
hasan is shahr me.n ab ko.ii marjiina nahii.n hai
na duniyaa-zaad, na haasib kariimuddiin kaa ghar hai
ajaa.ib-ghar hai.n na vo dars-gaahe.n
kutub-KHaano.n me.n lashkar so rahe hai.n
ko.ii zinda nahii.n is shahr me.n
bas maut zinda hai
hasan tuu mujh se va.ada kar
ki chaahe kuchh bhii ho jaa.e
palaT kar is shahr me.n
phir kabhii vaapas na aa.egaa

Salman Ansari
Nazm

maine bagh ki jaanib piTh kar li

mai.n ne dajla-o-furaat ke mashriq me.n
ek qadiim aur raushan pe.D ke niiche
sajdo.n kaa KHiraaj vasuul kiyaa
aur phaldaar daraKHto.n se Dhake
baaG me.n muqiim havaa
jise mere aur us aurat ke liye
aaraasta kiyaa gayaa thaa
jis kii janm-bhuumii
merii daa.ii.n paslii thii

Jawaz Jafri
Nazm

main zer-e-lab apna shajra-e-nasab dohra raha tha

chhaTii baar
vo dajla-o-furaat ke darmiyaan
miinaara-e-baabul ke saa.e me.n
mujh par munkashif ho.ii
vo muqaddas miinaar kii saatvii.n manzil par baiThii
aayat-dar-aayat bikhre sitaaro.n kii
tilaavat par maamuur thii

Jawaz Jafri
Nazm

qissa-e-chahaar-KHwab

avval
halqa-e-yaaraa.n me.n kan.aa.n raat ke pichhle pahar
bastiyo.n se duur nahro.n ke kinaare KHema-zan
vo daraKHto.n kii havaa.o.n me.n sitaare KHema-zan
bastiyo.n se duur sahraa ke nazaare KHema-zan
halqa-e-yaaraa.n me.n kitne naaznii.n naazuk kamar
dom
raqs ke ha.ngaam kitne baazu.o.n kaa pech-o-KHam
dekhne vaalo.n kii nazro.n me.n utar aane ko hai
ye badan kaa loch jaise ruuh bal khaane ko hai
ye nazar ke saamne kitne hii aalam KHvaab se
raqs ke ha.ngaam ubhar aate hai.n kitne shoKH ra.ng
aur kitne tez ho jaate hai.n nazro.n ke KHada.ng
ye KHayaalo.n ke gulistaa.n ye nigaaho.n ke qafas
raqs ke ye daa.ere shola-ba-daamaa.n har nafas
soyam
rasm adaa hone na paa.ii thii ki KHemo.n ke qariib
shah-nashii.n kii samt dau.De is tarah vahshii naqiib
kitne armaa.n kitne Gam ashko.n me.n Dhal kar rah ga.e
ain jashn-e-rasm ke ha.ngaam kan.aa.n kaa gurez
kitne manzar aariz-o-lab ke pighal kar rah ga.e
kitne lab hasrat-chashiida kitnii aa.nkhe.n ashk-rez
jaise saaGar aa.e.n haatho.n me.n magar TuuTe hu.e
chhe.Diyo mat zindagii ke baal-o-par TuuTe hu.e
taar hai.n is saaz ke ai naGma-gar TuuTe hu.e
chahaarum
ye qabiilo.n ke shuyuuKH-e-puKHta-umr o saKHt-kosh
vaadii-e-dajla ke shahrii kurd ke KHaana-ba-dosh
la.D rahe hai.n apnii apnii kaj-kulaahii ke liye
kaun daaruu ban ke aa.e kam-nigaahii ke liye
garmi-e-guftaar se mumkin nahii.n dil kaa rafuu
guftuguu se aur ba.Dh jaataa hai josh-e-guftuguu

Qamar Jameel
Nazm

dajla ke KHwab

ye adaa.e.n raqs ke ha.ngaam kitnii raqs-KHez
vo javaanaan-e-qabiila hosh se baahar chale
kaakulo.n ke sumbulistaa.n aarizo.n par aks-rez
jaise saahil kaa nazaaraa aab-e-dariyaa par chale
ik ta.assur hai ki raqsaa.n ho rahaa hai har taraf
sham.e.n raushan hai.n charaaGaa.n ho rahaa hai har taraf
aag ke atraaf raushan jaise ik faanuus-e-raqs
raqs kartii la.Dkiyaa.n kuchh aag ke atraaf yuu.n
jaise sat.h-e-aab par mahtaab ke haale kaa aks
jis ko jhuule me.n jhulaa.e.n mauj-haa-e-siimguu.n
mil ke jab jhuktii hai.n lagtii hai.n kalii mu.nh-band sii
aur jab tantii hai.n kis darja bhalii dil-band sii
ik taraf vo surKH mish.al haath me.n le kar chale
kuchh hasii.n kuchh naaznii.n kuchh sarv-qad kuchh siim-tan
jaise kuchh phuulo.n ke naazuk narm-rau lashkar chale
narm-raftaarii me.n dajla ke tamavvuj kii phaban
jaise sahraa.o.n ke aahuu mahv-e-gul-gasht-e-chaman
ye hasii.n aahuu-qadam aahuu-nafas aahuu-mizaaj
le rahe hai.n nau-javaanan-e-qabiila se KHiraaj
jalva-pairaa jalva-saamaa.n kitne dilkash maahtaab
kitne afsaano.n ke paikar kitne ra.ng-o-buu ke KHvaab
vo jabiino.n ke araq me.n jaise sho.alo.n ke saraab
jaise sandal me.n sharaaro.n ke tabassum mahv-e-KHvaab
sho.ala-afshaa.n kaakulo.n me.n surKH phuulo.n ke charaaG
jaise taariikii me.n mil jaa.e.n ujaale ke suraaG
aarizo.n kii chaa.ndnii phailii hu.ii sii har taraf
har taraf hai ek tarkash ek aahuu har qadam
kar rahe hai.n raqs daf par mahvishaan-e-jalva-taab
har taraf bikhre hu.e hai.n vaadi-e-dajla ke KHvaab
kuchh ka.nval kuchh nastaran kuchh sumbulistaa.n kuchh gulaab

Qamar Jameel
Nazm

shams-e-tabrez

rago.n me.n us ke dajla thaa
nigaah me.n furaat thaa
vo chehra-e-sifaat thaa
vo vajah-e-mumkinaat thaa
vo ek lamha sub.h thaa
to lamha-e-digar
Guruub-e-aaftaab thaa
shafaq bharaa ufuq
kabhii tuluu.a-e-maahtaab thaa

Saeed-ul-Zafar Chughtai
Nazm

bhuk

ek khaa.uu.n
do khaa.uu.n
yaa tiin khaa.uu.n
sun.ne vaale shaiKH-chillii kii ye baat ha.nsii me.n Taal ga.e
taaham us ne dajla-o-furaat kaa paanii piyaa
aur abbaasiyo.n ke ugaa.e hu.e anaaj se banii roTii khaa.ii
ek ek luqma halaq se utaarte hu.e
duusrii roTii par jhapTaa
ek khaa.uu.n
do khaa.uu.n
yaa tiin khaa.uu.n
saarii duniyaa chaukannii thii lekin KHaamosh
cha.nd billiyaa.n Gurraa.ii.n
to un ke saamne kuchh Tuk.De Daal diye ga.e
amn-e-aalam kii baqaa ke liye
shaiKH-chillii kii nazar ab tiisrii roTii par hai
us kaa anaaj kahaa.n se aayaa
kin dariyaa.o.n ne use guu.ndhaa
aa.nch kis chuulhe kii lagtii hai
tavaa kis lohe kaa banaa hai
shaiKH-chillii bhuuk ba.Dhtii hii jaa rahii hai
sun.ne vaale us kii baat ab ha.nsii me.n nahii.n Taalte
balki sahm jaate hai.n aur sochte hai.n
vo chauthii roTii kaun sii hai
jo shaiKH-chillii kaa luqma ban.ne vaalii hai

Shahnaz Nabi
Nazm

daraKHt-e-zard

nahii.n ho tum mire aur meraa fardaa bhii nahii.n meraa
so mai.n ne saahat-e-diiroz me.n Daalaa hai ab Deraa
mire diiroz me.n zahr-e-halaahal teG-e-qaatil hai
mire ghar kaa vahii sarnaam-tar hai jo bhii bismil hai
guzasht-e-vaqt se paimaan hai apnaa ajab saa kuchh
so ik ma.amuul hai imraan ke ghar kaa ajab saa kuchh

Jaun Eliya
Nazm

kitaben

jo miTTii ke sakoro.n kii tarah bikhrii pa.Dii hai.n
gilaaso.n ne unhe.n matruuk kar Daalaa
zabaa.n par zaa.iqa aataa thaa jo safhe palaTne kaa
ab u.nglii click karne se bas ik
jhapkii guzartii hai
bahut kuchh tah-ba-tah khultaa chalaa jaataa hai parde par

Gulzar
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

pandrah august

chamak dikhaate hai.n zarre ab aasmaano.n ko
zabaan mil ga.ii hai saare be-zabaano.n ko
jo zulm sahte the vo ab hisaab maa.ngte hai.n
savaal karte hai.n aur phir javaab maa.ngte hai.n
ye kal kii baat hai sadiyo.n puraanii baat nahii.n
ki kal talak thaa yahaa.n kuchh bhii apne haath nahii.n
videshii raaj ne sab kuchh nicho.D Daalaa thaa
hamaare desh kaa har karghaa to.D Daalaa thaa
jo mulk suu.ii kii KHaatir thaa auro.n kaa muhtaaj
hazaaro.n chiize.n vo duniyaa ko de rahaa hai aaj
nayaa zamaana liye ik uma.ng aayaa hai
karo.Do.n logo.n ke chehre pe rang aayaa hai
ye sab kisii ke karam se na hai inaayat se
yahaa.n tak aayaa hai bhaarat KHud apnii mehnat se

Javed Akhtar
Nazm

aadat

muddato.n mai.n ik andhe ku.e.n me.n asiir
sar paTaktaa rahaa gi.Dgi.Daataa rahaa
raushnii chaahiye، chaa.ndnii chaahiye، zindagii chaahiye
raushnii pyaar kii, chaa.ndnii yaar kii, zindagii daar kii
apnii aavaaz suntaa rahaa raat din
dhiire dhiire yaqii.n dil ko aataa rahaa
suune sansaar me.n
bevafaa yaar me.n
daamn-e-daar me.n
raushnii bhii nahii.n
chaa.ndnii bhii nahii.n
zindagii bhii nahii.n
zindagii ek raat
vaahima kaa.enaat
aadmii be-bisaat
log kotaah-qad
shahr shahr-e-hasad
gaa.nv in se bhii bad
in a.ndhero.n ne jab piis Daalaa mujhe
phir achaanak ku.e.n ne uchhaalaa mujhe
apne siine se baahar nikaalaa mujhe
saik.Do.n misr the saamne
saik.Do.n us ke baazaar the
ek buu.Dhii zuleKHaa nahii.n
jaane kitne KHariidaar the
ba.Dhtaa jaataa thaa yuusuf kaa mol
log bikne ko tayyaar the

Kaifi Azmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now