Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "taaro"

Nazm MATCHES FOR "taaro"

Nazm

jibrail-o-iblis

jibra.iil
hamdam-e-dairiina kaisaa hai jahaan-e-ra.ng-o-buu
ibliis
soz-o-saaz o dard o daaG o justujuu o aarzuu
jibra.iil
har gha.Dii aflaak par rahtii hai terii guftuguu
kyaa nahii.n mumkin ki teraa chaak daaman ho rafuu
ibliis
aah ai jibriil tuu vaaqif nahii.n is raaz se
kar gayaa sarmast mujh ko TuuT kar meraa subuu
ab yahaa.n merii guzar mumkin nahii.n mumkin nahii.n
kis qadar KHaamosh hai ye aalam-e-be-KaaKH-o-kuu
jis kii naumiidii se ho soz-e-daruun-e-kaa.enaat
us ke haq me.n taqnatuu achchhaa hai yaa laa-taqnatuu
jibra.iil
kho diye inkaar se tuu ne maqaamaat-e-buland
chashm-e-yazdaa.n me.n farishto.n kii rahii kyaa aabruu
ibliis
hai mirii jur.at se musht-e-KHaak me.n zauq-e-numuu
mere fitne jaama-e-aql-o-KHirad kaa taar-o-puu
dekhtaa hai tuu faqat saahil se razm-e-KHair-o-shar
kaun tuufaa.n ke tamaa.nche khaa rahaa hai mai.n ki tuu
KHizr bhii be-dast-o-paa ilyaas bhii be-dast-o-paa
mere tuufaa.n yam-ba-yam dariyaa-ba-dariyaa juu-ba-juu
gar kabhii KHalvat mayassar ho to puuchh allaah se
qissa-e-aadam ko ra.ngii.n kar gayaa kis kaa lahuu
mai.n khaTaktaa huu.n dil-e-yazdaa.n me.n kaa.nTe kii tarah
tuu faqat allaah-huu allaah-huu allaah-huu

Allama Iqbal
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

abul-ala-marri

kahte hai.n kabhii gosht na khaataa thaa ma.arrii
phal-phuul pe kartaa thaa hamesha guzar-auqaat
ik dost ne bhuunaa hu.aa tiitar use bhejaa
shaayad ki vo shaatir isii tarkiib se ho maat
ye KHvaan-e-tar-o-taaza ma.arrii ne jo dekhaa
kahne lagaa vo saahib-e-Gufraan-o-luzuumaat
ai murGak-e-bechaara zaraa ye to bataa tuu
teraa vo gunah kyaa thaa ye hai jis kii mukaafaat?
afsos-sad-afsos ki shaahii.n na banaa tuu
dekhe na tirii aa.nkh ne fitrat ke ishaaraat!
taqdiir ke qaazii kaa ye fatvaa hai azal se
hai jurm-e-za.iifii kii sazaa marg-e-mufaajaat!

Allama Iqbal
Nazm

bhaarat ke bachcho

bhaarat-maa.n kii aa.nkh ke taaro
nanhe-munne raaj-dulaaro
jaise mai.n ne tum ko sa.nvaaraa
vaise hii tum desh sa.nvaaro
bhaarat maa.n kii aa.nkh ke taaro

Sahir Ludhianvi
Nazm

tum sach mein bahut achchhi ho

tumhaaraa ye pyaar bharaa jumla
mujhe zindagii jiinaa aasaan banaataa hai
merii kum.hlaa.ii hu.ii zindagii ko
tar-o-taazgii sii baKHshtaa hai
tumhaare pyaar bhare alfaaz
kaano.n me.n ras gholne lagte hai.n
aa.nkho.n me.n ik chamak sii aa jaatii hai
ho.nTo.n pe muskaan chhaa jaatii hai
tum jab bhii mujh se ye kahte ho ki
tum sach me.n bahut achchhii ho
merii be-jaan sii ruuh me.n jaan aa jaatii hai
mai.n apnaa dukh-dard bhuul jaatii huu.n
apnii hii zaat ke gumbad me.n qaid
chahakne lagtii huu.n mahakne lagtii huu.n
tum jab bhii mujh se ye kahte ho ki
tum sach me.n bahut achchhii ho
tumhaarii yaad me.n kho.ii kho.ii sii
tumhaare pyaar kii KHushbuu se mo.attar
mai.n lamho.n me.n sadiyaa.n jii letii huu.n
haa.n lamho.n me.n sadiyaa.n jii letii huu.n
aur phir mai.n sochne lagtii huu.n
mujhe aisaa lagtaa hai ki
gar mai.n bahut achchhii huu.n to
mujhe dekhne vaalii vo aa.nkhe.n
dar-asl behad dilkash hai.n
vo dil jis me.n mai.n bastii huu.n
be-intihaa KHuubsuurat hai
mujhe jiine kaa hausla dene vaalii
tumhaarii pyaar bharii soch
sach me.n bahut achchhii hai
sach to ye hai ki
mai.n nahii.n tum bahut achchhe ho
tum sach me.n bahut achchhe ho
haa.n tum bahut hii achchhe ho

Zakira Shabnam
Nazm

chamko chamko pyare taro

chamko chamko pyaare taaro
ra.ngo.n aur ummiido.n vaale
aa.nkho.n me.n phir KHvaab utaaro
chamko chamko pyaare taaro
raat bahut hai kaalii kaalii
galiyaa.n hai.n sab KHaalii KHaalii
havaa chale to Dar lagtaa hai
suunaa suunaa ghar lagtaa hai
raushan saare manzar kar do
duniyaa ko KHushiyo.n se bhar do
chamko chamko pyaare taaro
chupke se khi.Dkii me.n aa.o
achchhe achchhe giit sunaa.o
sab se bach kar sab se chhup ke
baat kare.nge chupke chupke
baadal se tum duur hii rahnaa
jo kahnaa ho ham se kahnaa
chamko chamko pyaare taaro
ra.ngo.n aur ummiido.n vaale
aa.nkho.n me.n phir KHvaab utaaro
chamko chamko pyaare taaro

Amjad Islam Amjad
Nazm

wahi kashf-e-zat ki aarzu

miraa dil giro mirii jaa.n giro
chalaa aa ki hai miraa dar khulaa
tuu miraa nasiib hai raah-rau
ye havaa ye barq ye ra.ad-o-abr ye tiirgii
rah-e-intizaar kii naarasii
mire jaan-o-dil pe hai.n lau buto
mire mehmaa.n mire raah-rau
ai gurez-paa tuu saraab-e-dasht KHalaa na ban
vo navaa na ban jo fareb-e-raah-guzaar ho
vo fusuun-e-arz-o-samaa na ban
jise dil-girafto.n se aar ho
jo tujhe bulaatii hai pai-ba-pai
vo sadaa jilaajal-e-jaa.n kii hai
vo sadaa muruur-e-zamaa.n kii hai
kise us sadaa se faraar ho
miraa dil giro mirii jaa.n giro
tirii kun-ma-kun tirii rau-ma-rau
mujhe baar-e-jaa.n
ki mai.n harf jis kaa bayaa.n hai tuu
mai.n vo jism jis kii ravaa.n hai tuu
tuu kalaam hai mai.n tirii zabaa.n
tuu vo sham.a hai ki mai.n jis kii lau
kisii naqsh-e-kaar kaa ik nafas
ka.ii suurate.n jo sadaa se tishna-e-ra.ng thii.n
hu.ii.n vasl-e-ma.anii se baarvar
kisii but-taraash kii ik nigah
ka.ii sa.ng-e-aziyat-e-yaas-o-marg
se bach ga.e
hu.e samt-e-raah se baa-KHabar
chalaa aa ki merii nidaa me.n bhii
vahii ruuyat-e-azalii ki hai
jise yaad Gaayat-e-ra.ng-o-buu
jise yaad raaz-e-mai-o-subuu
jise yaad vaada-e-taar-o-puu
chalaa aa ki merii nidaa me.n bhii
isii kashf-e-zaat kii aarzuu

Noon Meem Rashid
Nazm

urdu-e-mualla

faarsii hindii kii aamezish se hai is kaa vajuud
yaadgaar-e-ittihaad-e-ahl-e-islaam-o-hanuud
dhuup chhaa.n ke rang kii hai vo qabaa-e-hast-o-buud
kaar-gaah-e-hind se mansuub jis ke taar-o-puud
suft-o-sa.ngii.n yaa libaas-e-aariyat baariik hai
jaama-zebii se qad-e-mauzuu.n par is ke Thiik hai

Safi Lakhnavi
Nazm

tamasha-gah-e-lala-zar

tamaashaa-gah-e-laala-zaar
magar nauha-KHvaanii kii ye sargiraanii kahaa.n tak?
ki manzil hai dushvaar Gam se Gam-e-jaavedaa.n tak!
vo sab the kushaada-dil o hosh-ma.nd o parastaar-e-rabb-e-kariim
vo sab KHair ke raah-daa.n raah-shanaas
hame.n aaj mohsin-kush o naa-sipaas
vo shaahanshahaan-e-aaziim
vo pindaar-e-rafta kaa jaah-o-jalaal-e-qadiim
hamaarii haziimat ke sab be-bahaa taar-o-puu the
fanaa un kii taqdiir ham un kii taqdiir ke nauhagar hai.n
usii kii tamannaa me.n phir sogvaar
tamaashaa-gah-e-laala-zaar!

Noon Meem Rashid
Nazm

gandhi-ji ki aawaz

salaam ai ufuq-e-hind ke hasii.n taaro
salaam tum pe sip.har-e-vatan ke mah-paaro
salaam tum pe mire bachcho ai mire pyaaro
bhulaa.e baiThe ho tum mujh ko kis liye yaaro
jalaa.o mere payaamaat ke diye yaaro
suno ki merii tamannaa-o-aarzuu tum ho
suno ki maadar-e-bhaarat kii aabruu tum ho
suno ki amn-e-zamaana kii justujuu tum ho
KHamosh baiThe ho kyuu.n apne lab siye yaaro
jalaa.o mere payaamaat ke diye yaaro
salaam tum pe ki mere chaman ke phuul ho tum
mirii nazar mirii fitrat miraa usuul ho tum
magar ye kyaa hu.aa kis vaaste maluul ho tum
ye tum ne chand Galat kaam kyuu.n kiye yaaro
jalaa.o mere payaamaat ke diye yaaro
vatan me.n KHuun ke dariyaa bahaa diye tum ne
sabhii nuquush-e-ahinsaa miTaa diye tum ne
rivaaj-kaar-e-mohabbat bhalaa diye tum ne
rusuum-e-mehr-o-vafaa tark kar diye yaaro
jalaa.o mere payaamaat ke diye yaaro
sabaq pa.Dhaayaa thaa tum ko adam-tashaddud kaa
tumhe.n bataayaa thaa mai.n ne gunaah hai hinsaa
ye tum ne kis liye teG-o-tabar se kaam liyaa
tumhaare haatho.n me.n KHanjar hai.n kis liye yaaro
jalaa.o mere payaamaat ke diye yaaro
tumhaare zehno.n me.n makruuh saazish aur fasaad
dilo.n me.n nafrat-o-kiina hai aur buGz-o-inaad
magar labo.n pe hai baabaa-e-qaum zindabaad
mujhe ye khokhle na.are na chaahiye yaaro
jalaa.o mere payaamaat ke diye yaaro
zamiin naanak-o-chishtii pukaartii hai tumhe.n
dayaar-e-budh kii tajallii pukaartii hai tumhe.n
suno kanhaiyaa kii bansii pukaartii hai tumhe.n
ab aur der bhii karnii na chaahiye yaaro
jalaa.o mere payaamaat ke diye yaaro
uTho zamaana-e-haazir hai ik payaam-e-amal
uTho ki kaa.np rahii hai navaa-e-saaz-e-Gazal
uTho ki maa.nd na ho jaa.e husn-e-taaj-mahal
uTho ki siino.n me.n phir raushnii jiye yaaro
jalaa.o mere payaamaat ke diye yaaro
phir apne zehno.n me.n lahkaa.o dostii kaa chaman
phir apnii saa.nso.n se mahkaa.o pyaar kaa madhuuban
phir apne kaamo.n se chamkaa.o sar-zamiin-e-vatan
tumhaare mai-kade me.n dahr phir piye yaaro
jalaa.o mere payaamaat ke diye yaaro
na chho.Do zinda vatan me.n kisii luTere ko
kuchal do ba.Dh ke har ik saa.np ko sapere ko
miTaa.o firqa-parastii ke har a.ndhere ko
bachaa.o desh ko bhagvaan ke liye yaaro
jalaa.o mere payaamaat ke diye yaaro
mujhe ye khokhle na.are na chaahiye yaaro

Nazish Partap Gadhi
Nazm

mohabbat

mohabbat KHudaa kii haqiiqat kaa nuur
mohabbat kisii kaa payaam-e-zuhuur
mohabbat ke paiGaambar ambiyaa
mohabbat ke zer-e-asar auliyaa
mohabbat nuquush-e-bayaaz-e-vajuud
tar-o-taaza is se riyaaz-e-shuhuud
mohabbat nahii.n to nahii.n zindagii
mohabbat se hai dil-nashii.n zindagii
mohabbat se har zarra paivasta hai
tarab zaa mohabbat kaa guldasta hai
nashaat-e-mohabbat rafiiq-e-hayaat
kiye us ne hal zindagii ke nikaat
mohabbat se har ik haqiiqat ayaa.n
mohabbat se maa.n kii faziilat ayaa.n
mohabbat se shaan-e-pidar sar-buland
mohabbat se vasf-e-pisar arjumand
mohabbat se mazbuut ajzaa-e-qaum
mohabbat se marbuut aaraa-e-qaum
mohabbat se qaa.em nizaam-e-hayaat
taGayyur me.n bhii un kaa nuur-e-sabaat
mohabbat nahii.n hai to kuchh bhii nahii.n
mohabbat hii hai asal duniyaa-o-dii.n

Ali Manzoor Hyderabadi
Nazm

judai

yahaa.n sab log kahte hai.n
judaa.ii maut jaisii hai
ki zinda laash ho kar bas
bachii saa.nse.n hii chaltii hai.n
ki jiinaa bhuul jaataa hai
ye saa.nse.n shor kartii hai.n
ye aa.nkhe.n KHushk aur banjar
ki aa.nsuu dil pe girte hai.n
ye saare log kahte hai.n
suno
ai chho.Dne vaale
yahii tum ne bhii jaanaa thaa
bichha.D ke jii na paa.uu.ngii
tumhaaraa vahm thaa saaraa
faqat ye zo'm thaa aur bas
mai.n bilkul pahle jaisii huu.n
tar-o-taaza hai.n din mere
mirii raate.n sukuu.n-aavar
na tum ye jaan paa.e ho
mohabbat naam kis kaa hai
mohabbat me.n judaa.ii kaa
ko.ii ma.anaa nahii.n hotaa
tumhaare saath me.n guzre
vo kuchh lamhe mohabbat ke
mire jiine ko kaafii hai.n
judaa.ii maar dii mai.n ne

Omainuz Zahra Sayyad
Nazm

sahaara DhunDta hun

mohabbat kaa ishaara Dhuu.nDhtaa huu.n
mai.n jiine kaa sahaaraa Dhuu.nDhtaa huu.n
vo bekas huu.n ki har ik mauj-e-Gam me.n
masarrat kaa kinaara Dhuu.nDhtaa huu.n
siyah-baKHtii ke saa.e hai.n magar mai.n
muqaddar kaa sahaaraa Dhuu.nDhtaa huu.n
mire haatho.n se chhuu kar u.D gayaa jo
vahii daaman tumhaaraa Dhuu.nDhtaa huu.n
hasii.n taaro mire dil me.n na jhaa.nko
mai.n apnaa maah-paara Dhuu.nDtaa huu.n
zaraa ai chashm rok apne ye aa.nsuu
mai.n zabt-e-Gam kaa yaaraa Dhuu.nDtaa huu.n
merii gintii hii kyaa mahfil me.n terii
ki mai.n apnaa shumaara Dhuu.nDhtaa huu.n

Ram Lal Varma Hindi
Nazm

zaruri hai

prem kii KHushbuu chappe chappe me.n tum ko phailaanaa hai
sun lo merii aa.nkh ke taaro ye elaan zaruurii hai

Ataur Rahman Tariq
Nazm

man arafa nafsahu

raushnii kii ek nannhii sii lakiir
mere kamre ke a.ndhere kaa badan
chupke chupke TaToltii hai
jis tarah habshii hasiina ke Dhale
sandal ke se
aabnuusii jism ke a.asaab me.n
tez suu.ii kii achaanak ik chubhan
sarsaraate saa.np kii maanind dau.Daatii hai KHuu.n
jhanjhanaa uThte hai.n saare taar-o-puu
aur phir aahista aahista kahii.n
zer-e-sat.h-e-jaan-o-dil
ye talaatum
ruk ke so jaataa hai
ya.anii
azhdar-e-aasuuda-KHaatir kii tarah
KHvaab-noshii.n ke u.Daataa hai maze

Shamsur Rahman Faruqi
Nazm

zinda dar-gor

mai.n KHudaa kii qabr huu.n
KHudaa mere andar dafn hai
bha.ii, mai.n ne apne haatho.n se dafn kiyaa hai use!
farq ye hai ki dafn hone ke baavajuud zinda hai vo
zinda dar-gor
uupar se malba haTaane kii der hai
andar se KHudaa nikal aa.egaa
haa.n haa.n mere andar se nikal aa.egaa
ye jo mano.n miTTii Daal rakkhii hai mai.n ne us par
aqiido.n aur nazaryo.n kii
KHayaalo.n aur vaahimo.n kii
KHvaahisho.n aur laGviyaat kii
agar kisii roz kisii tuufaan baarish me.n bah ga.ii
to dekhnaa isii mere TuuTe-phuuTe badan kii ujaa.D qabr se
jiitaa-jaagtaa tar-o-taaza KHudaa kaise numuudaar ho jaa.egaa
jaise sar-ba-falak pahaa.Diyo.n kii yaKH-basta vaadiyo.n me.n
barf pighalne ke ba.ad
dekhte hii dekhte
taa-hadd-e-nazar
phuul khil uThte hai.n

Mohammad Haneef Rame
Nazm

koyal

o chaman kii ajnabii chi.Diyaa! kahaa.n thii aah! tuu
kyaa kisii sahraa ke daaman me.n nihaa.n thii aah! tuu
tere dilkash zamzame the sabza-zaaro.n me.n KHamosh
aashiyaana thaa tiraa gulshan me.n bazm-e-be-KHarosh
khii.nchtii vaqt-e-sahar dil ko tirii kuu-kuu na thii
chhaa.nv me.n taaro.n kii mahv-e-naGma-e-dil-juu na thii
mausam-e-sarmaa me.n ai sarmaaya-e-sabr-o-shakeb
be-sadaa teraa pas-e-parda thaa saaz-e-dil-fareb
marhabaa ai paikar-e-paik-e-subuk-gaam-e-bahaar
le ke phir tuu garmiyo.n me.n aa.ii paiGaam-e-bahaar
tuu idhar aa.ii fazaa-e-gul kaa daur aayaa udhar
tuu ne gaa.e giit aur aamo.n kaa baur aayaa udhar
taa.iraan-e-baaG ne chhe.Daa hai saaz-e-imbisaat
tere maqdam me.n hai shaaKHo.n par ham-aahang-e-nashaat
pahnii nannhii nannhii kaliyo.n ne qabaa-e-shabnamii.n
aa rahii hai kaan me.n terii sadaa-e-dil-nashii.n
ko.ii anjum aasmaa.n kaa aur subuk parvaaz-e-shauq
rahnumaa hai kyaa tiraa dil-daada-e-andaaz-e-shauq
tuu jo aane vaale mausam kaa nishaa.n paatii hu.ii
apnii manzil par pahu.nch jaatii hai yuu.n gaatii hu.ii
tere maqdam me.n shakeb-e-KHaatir-e-naa-shaad mai.n
mausam-e-gul ko bhii detaa huu.n mubaarakbaad mai.n
tuu chaman me.n u.D ke kyaa aa.ii ki aa pahu.nchii bahaar
gaa rahii hai.n chhoTii chi.Diyaa.n sabz kunjo.n me.n malhaar
daaman-e-ra.ngii.n me.n ik doshiiza-e-naakat-KHudaa
chun rahii hai nannhii nannhii surKH kaliyaa.n KHushnumaa
aur tujh se ham-suruud-e-naGma-e-ejaaz hai
bazm-e-qudrat me.n tirii goyaa shariik-e-raaz hai
miiThe naGme gaane vaalii o chaman kii naaznii.n
hai tar-o-taaza hamesha teraa kunj-e-dil-nashii.n
aur musaffaa hai fazaa-e-aasmaa.n tere liye
hai shafaq-jaam-e-sharaab-e-arGavaa.n tere liye
tere naGmo.n me.n asar andoh-e-hirmaa.n kaa nahii.n
saal me.n tere guzar fasl-e-zamistaa.n kaa nahii.n
mujh ko qassam-e-azal detaa agar do baal-o-par
u.D ke hotaa mai.n bhii tere saath sargarm-e-safar
ban ke ham dono.n rafiiq-e-mausam-e-josh-e-bahaar
karte KHush KHush har baras gul-gasht-e-dasht-o-kohsaar

Suroor Jahanabadi
Nazm

renge lamhon ka KHauf

mai.n atom-bomb ke Dher pe baiThaa soch rahaa thaa
ye raushniyo.n aur ra.ngo.n kaa sailaab-e-ravaa.n
ye resham ke lachchho.n aisaa narm badan
ye barf ke gaale se is nanhe seb kii nii.nd
ye us kii farishto.n jaisii maasuumaana ha.nsii
ye gandum ke daano.n se nanhe nanhe daa.nt
ye kaliyo.n kii maanind tar-o-taaza ruKHsaar
ye gesuu.n kii KHushbuu se naa-vaaqif naak
ye cigarette ke dhu.e.n se begaana dahan
ye mere apne dil sii kushaada peshaanii
ye sub.h kii pahlii kirno.n jaise us ke baal
ye sab kuchh us kaa apnaa hai lekin phir bhii
ye sab kuchh aaKHir kab tak us kaa apnaa hai
ye meraa apnaa KHuun hai mere haatho.n me.n
yaa merii sahmii sahmii be-KHvaab aa.nkho.n me.n
ye mustaqbil kaa ko.ii bhayaanak sapnaa hai
mai.n KHud apnii hii socho.n ke par noch rahaa thaa
mai.n atom-bomb ke Dher pe baiThaa soch rahaa thaa

Kausar Niyazi
Nazm

yaaden

ahd-e-maazii ke jharoko.n se chalii aatii hai.n
muskuraatii hu.ii yaade.n merii
gungunaatii hu.ii yaade.n merii
aur mahsuus ye hotaa hai mujhe
jaise banjar sii zamii.n
qatra-e-abr-e-guhar-baar se shaadaab banii
jaise sahraa me.n bhaTakte hu.e ik raahii ko
chashma-e-aab milaa
jaise paamaal tamannaa.e.n tarashshoh paa kar
phir tar-o-taaza hu.ii.n
jaise tarsiida kalii
muskuraahaT se dil-aavez bane
ek lamhe ke liye
siina-e-sozaa.n miraa
shabnamii yaad se muskaata hai
ek lamhe ke liye
kapkapaatii hu.ii sahmii hu.ii hastii me.n
unhe.n yaado.n kii halaavat me.n samaa jaatii hai
yahii yaade.n to mirii ziist kaa sarmaaya hai.n
muskuraatii hu.ii yaade.n merii
gungunaatii hu.ii yaade.n merii

Zareena Sani
Nazm

rishte

suukhe patto.n kii tarah TuuT ke gir jaate hai.n rishte bhii agar in ko mohabbat kii tar-o-taaza havaa paanii jo ehsaas kii miTTii me.n faraaham na kare.n
haa.n magar
bhuule se jab TuuT ke gir jaa.e.n kabhii kuchh rishte
to phir achchhaa hai ke un ristho ko yakjaa kar ke
vaqt ke jalte sulagte hu.e chuulhe ke havaale kar de.n

Mohsin Aftab Kelapuri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now