Sher on Aadmi

maiñ aadmī huuñ koī farishta nahīñ huzūr

maiñ aaj apnī zaat se ghabrā ke pī gayā

main aadmi hun koi farishta nahin huzur

main aaj apni zat se ghabra ke pi gaya

'zafar' aadmī us ko na jāniyegā vo ho kaisā hī sāhab-e-fahm-o-zakā

jise aish meñ yād-e-ḳhudā na rahī jise taish meñ ḳhauf-e-ḳhudā na rahā

'zafar' aadmi us ko na jaaniyega wo ho kaisa hi sahab-e-fahm-o-zaka

jise aish mein yaad-e-KHuda na rahi jise taish mein KHauf-e-KHuda na raha

maiñ āḳhir aadmī huuñ koī laġhzish ho hī jaatī hai

magar ik vasf hai mujh meñ dil-āzārī nahīñ kartā

main aaKHir aadmi hun koi laghzish ho hi jati hai

magar ek wasf hai mujh mein dil-azari nahin karta

ḳhush-hāl ghar sharīf tabī.at sabhī kā dost

vo shaḳhs thā ziyāda magar aadmī thā kam

KHush-haal ghar sharif tabiat sabhi ka dost

wo shaKHs tha ziyaada magar aadmi tha kam

aadmī kyā vo na samjhe jo suḳhan kī qadr ko

nutq ne haivāñ se musht-e-ḳhāk ko insāñ kiyā

aadmi kya wo na samjhe jo suKHan ki qadr ko

nutq ne haiwan se musht-e-KHak ko insan kiya

mirā ġhazāl ki vahshat thī jis ko saa.e se

lipaT gayā mire siine se aadmī kī tarah

mera ghazal ki wahshat thi jis ko sae se

lipaT gaya mere sine se aadmi ki tarah

aadmī kā aadmī har haal meñ hamdard ho

ik tavajjoh chāhiye insāñ ko insāñ kī taraf

aadmi ka aadmi har haal mein hamdard ho

ek tawajjoh chahiye insan ko insan ki taraf

maiñ tire dar kā bhikārī tū mire dar kā faqīr

aadmī is daur meñ ḳhuddār ho saktā nahīñ

main tere dar ka bhikari tu mere dar ka faqir

aadmi is daur mein KHuddar ho sakta nahin

aadmī aadmī se miltā hai

dil magar kam kisī se miltā hai

aadmi aadmi se milta hai

dil magar kam kisi se milta hai

raah meñ baiThā huuñ maiñ tum sañg-e-rah samjho mujhe

aadmī ban jā.ūñgā kuchh Thokareñ khāne ke ba.ad

rah mein baiTha hun main tum sang-e-rah samjho mujhe

aadmi ban jaunga kuchh Thokaren khane ke baad

har aadmī meñ hote haiñ das biis aadmī

jis ko bhī dekhnā ho ka.ī baar dekhnā

har aadmi mein hote hain das bis aadmi

jis ko bhi dekhna ho kai bar dekhna

husn-e-iḳhlās hī nahīñ varna

aadmī aadmī to aaj bhī hai

husn-e-iKHlas hi nahin warna

aadmi aadmi to aaj bhi hai

ittifāq apnī jagah ḳhush-qismatī apnī jagah

ḳhud banātā hai jahāñ meñ aadmī apnī jagah

ittifaq apni jagah KHush-qismati apni jagah

KHud banata hai jahan mein aadmi apni jagah

ajiib shaḳhs thā ḳhud apne dukh banātā thā

dil-o-dimāġh pe kuchh din asar rahā us kā

ajib shaKHs tha KHud apne dukh banata tha

dil-o-dimagh pe kuchh din asar raha us ka

zindagī se zindagī rūThī rahī

aadmī se aadmī barham rahā

zindagi se zindagi ruThi rahi

aadmi se aadmi barham raha

merī rusvā.ī ke asbāb haiñ mere andar

aadmī huuñ so bahut ḳhvāb haiñ mere andar

meri ruswai ke asbab hain mere andar

aadmi hun so bahut KHwab hain mere andar

girjā meñ mandiroñ meñ azānoñ meñ baT gayā

hote hī sub.h aadmī ḳhānoñ meñ baT gayā

girja mein mandiron mein azanon mein baT gaya

hote hi subh aadmi KHanon mein baT gaya

na jaane bāhar bhī kitne aaseb muntazir hoñ

abhī maiñ andar ke aadmī se Darā huā huuñ

na jaane bahar bhi kitne aaseb muntazir hon

abhi main andar ke aadmi se Dara hua hun

farishta hai to taqaddus tujhe mubārak ho

ham aadmī haiñ to aib-o-hunar bhī rakhte haiñ

farishta hai to taqaddus tujhe mubarak ho

hum aadmi hain to aib-o-hunar bhi rakhte hain

aadmī huuñ vasf-e-paiġhambar na maañg

mujh se mere dost merā sar na maañg

aadmi hun wasf-e-paighambar na mang

mujh se mere dost mera sar na mang

ruup rañg miltā hai ḳhadd-o-ḳhāl milte haiñ

aadmī nahīñ miltā aadmī ke paikar meñ

rup rang milta hai KHadd-o-KHal milte hain

aadmi nahin milta aadmi ke paikar mein

isī liye to yahāñ ab bhī ajnabī huuñ maiñ

tamām log farishte haiñ aadmī huuñ maiñ

isi liye to yahan ab bhi ajnabi hun main

tamam log farishte hain aadmi hun main

yahāñ libās kī qīmat hai aadmī kī nahīñ

mujhe gilās baḌe de sharāb kam kar de

yahan libas ki qimat hai aadmi ki nahin

mujhe gilas baDe de sharab kam kar de

vo kaun thā jo din ke ujāle meñ kho gayā

ye chāñd kis ko DhūñDne niklā hai shaam se

wo kaun tha jo din ke ujale mein kho gaya

ye chand kis ko DhunDne nikla hai sham se

samjhegā aadmī ko vahāñ kaun aadmī

banda jahāñ ḳhudā ko ḳhudā māntā nahīñ

samjhega aadmi ko wahan kaun aadmi

banda jahan KHuda ko KHuda manta nahin

ai ġhubār-e-ḳhvāhish-e-yak-umr apnī raah le

is galī meñ tujh se pahle ik jahāñ maujūd hai

ai ghubar-e-KHwahish-e-yak-umr apni rah le

is gali mein tujh se pahle ek jahan maujud hai

jānvar aadmī farishta ḳhudā

aadmī kī haiñ saikaḌoñ qismeñ

jaanwar aadmi farishta KHuda

aadmi ki hain saikaDon qismen

hazār chehre haiñ maujūd aadmī ġhā.eb

ye kis ḳharābe meñ duniyā ne lā ke chhoḌ diyā

hazar chehre hain maujud aadmi ghaeb

ye kis KHarabe mein duniya ne la ke chhoD diya

itnā be-āsrā nahīñ huuñ maiñ

aadmī huuñ ḳhudā nahīñ huuñ maiñ

itna be-asra nahin hun main

aadmi hun KHuda nahin hun main

bhiiḌ tanhā.iyoñ kā melā hai

aadmī aadmī akelā hai

bhiD tanhaiyon ka mela hai

aadmi aadmi akela hai

miltā hai aadmī hī mujhe har maqām par

aur maiñ huuñ aadmī kī talab se bharā huā

milta hai aadmi hi mujhe har maqam par

aur main hun aadmi ki talab se bhara hua

abhī farq hai aadmī aadmī meñ

abhī duur hai aadmī aadmī se

abhi farq hai aadmi aadmi mein

abhi dur hai aadmi aadmi se

TaTolo parakh lo chalo aazmā lo

ḳhudā kī qasam bā-ḳhudā aadmī huuñ

TaTolo parakh lo chalo aazma lo

KHuda ki qasam ba-KHuda aadmi hun

ḳhudā badal na sakā aadmī ko aaj bhī 'hosh'

aur ab tak aadmī ne saikḌoñ ḳhudā badle

KHuda badal na saka aadmi ko aaj bhi 'hosh'

aur ab tak aadmi ne saikDon KHuda badle

sab se pur-amn vāqi.a ye hai

aadmī aadmī ko bhuul gayā

sab se pur-amn waqia ye hai

aadmi aadmi ko bhul gaya