ek muddat se tirī yaad bhī aa.ī na hameñ

aur ham bhuul ga.e hoñ tujhe aisā bhī nahīñ

ek muddat se teri yaad bhi aai na hamein

aur hum bhul gae hon tujhe aisa bhi nahin

bahut pahle se un qadmoñ kī aahaT jaan lete haiñ

tujhe ai zindagī ham duur se pahchān lete haiñ

bahut pahle se un qadmon ki aahaT jaan lete hain

tujhe ai zindagi hum dur se pahchan lete hain

koī samjhe to ek baat kahūñ

ishq taufīq hai gunāh nahīñ

koi samjhe to ek baat kahun

ishq taufiq hai gunah nahin

tum muḳhātib bhī ho qarīb bhī ho

tum ko dekheñ ki tum se baat kareñ

tum muKHatib bhi ho qarib bhi ho

tum ko dekhen ki tum se baat karen

ham se kyā ho sakā mohabbat meñ

ḳhair tum ne to bevafā.ī kī

hum se kya ho saka mohabbat mein

KHair tum ne to bewafai ki

ġharaz ki kaaT diye zindagī ke din ai dost

vo terī yaad meñ hoñ yā tujhe bhulāne meñ

gharaz ki kaT diye zindagi ke din ai dost

wo teri yaad mein hon ya tujhe bhulane mein

shaam bhī thī dhuāñ dhuāñ husn bhī thā udaas udaas

dil ko ka.ī kahāniyāñ yaad sī aa ke rah ga.iiñ

sham bhi thi dhuan dhuan husn bhi tha udas udas

dil ko kai kahaniyan yaad si aa ke rah gain

aa.e the hañste khelte mai-ḳhāne meñ 'firāq'

jab pī chuke sharāb to sanjīda ho ga.e

aae the hanste khelte mai-KHane mein 'firaq'

jab pi chuke sharab to sanjida ho gae

ab to un kī yaad bhī aatī nahīñ

kitnī tanhā ho ga.iiñ tanhā.iyāñ

ab to un ki yaad bhi aati nahin

kitni tanha ho gain tanhaiyan

raat bhī niiñd bhī kahānī bhī

haa.e kyā chiiz hai javānī bhī

raat bhi nind bhi kahani bhi

hae kya chiz hai jawani bhi

sunte haiñ ishq naam ke guzre haiñ ik buzurg

ham log bhī faqīr usī silsile ke haiñ

sunte hain ishq nam ke guzre hain ek buzurg

hum log bhi faqir usi silsile ke hain

ik umr kaT ga.ī hai tire intizār meñ

aise bhī haiñ ki kaT na sakī jin se ek raat

ek umr kaT gai hai tere intizar mein

aise bhi hain ki kaT na saki jin se ek raat

zarā visāl ke ba.ad aa.ina to dekh ai dost

tire jamāl kī doshīzgī nikhar aa.ī

zara visal ke baad aaina to dekh ai dost

tere jamal ki doshizgi nikhar aai

zabt kiije to dil hai añgārā

aur agar roiye to paanī hai

zabt kije to dil hai angara

aur agar roiye to pani hai

laa.ī na aisoñ-vaisoñ ko ḳhātir meñ aaj tak

ūñchī hai kis qadar tirī nīchī nigāh bhī

lai na aison-waison ko KHatir mein aaj tak

unchi hai kis qadar teri nichi nigah bhi

kaun ye le rahā hai añgḌā.ī

āsmānoñ ko niiñd aatī hai

kaun ye le raha hai angDai

aasmanon ko nind aati hai

isī khañDar meñ kahīñ kuchh diye haiñ TuuTe hue

inhīñ se kaam chalāo baḌī udaas hai raat

isi khanDar mein kahin kuchh diye hain TuTe hue

inhin se kaam chalao baDi udas hai raat

kamī na kī tire vahshī ne ḳhaak uḌāne meñ

junūñ kā naam uchhaltā rahā zamāne meñ

kami na ki tere wahshi ne KHak uDane mein

junun ka nam uchhalta raha zamane mein