Sher on Shaam

shaam bhī thī dhuāñ dhuāñ husn bhī thā udaas udaas

dil ko ka.ī kahāniyāñ yaad sī aa ke rah ga.iiñ

sham bhi thi dhuan dhuan husn bhi tha udas udas

dil ko kai kahaniyan yaad si aa ke rah gain

tumhāre shahr kā mausam baḌā suhānā lage

maiñ ek shaam churā luuñ agar burā na lage

tumhaare shahr ka mausam baDa suhana lage

main ek sham chura lun agar bura na lage

shaam tak sub.h kī nazroñ se utar jaate haiñ

itne samjhautoñ pe jiite haiñ ki mar jaate haiñ

sham tak subh ki nazron se utar jate hain

itne samjhauton pe jite hain ki mar jate hain

vo na aa.egā hameñ ma.alūm thā is shaam bhī

intizār us kā magar kuchh soch kar karte rahe

wo na aaega hamein malum tha is sham bhi

intizar us ka magar kuchh soch kar karte rahe

yuuñ to har shaam umīdoñ meñ guzar jaatī hai

aaj kuchh baat hai jo shaam pe ronā aayā

yun to har sham umidon mein guzar jati hai

aaj kuchh baat hai jo sham pe rona aaya

ab udaas phirte ho sardiyoñ kī shāmoñ meñ

is tarah to hotā hai is tarah ke kāmoñ meñ

ab udas phirte ho sardiyon ki shamon mein

is tarah to hota hai is tarah ke kaamon mein

vo kaun thā jo din ke ujāle meñ kho gayā

ye chāñd kis ko DhūñDne niklā hai shaam se

wo kaun tha jo din ke ujale mein kho gaya

ye chand kis ko DhunDne nikla hai sham se

tum parindoñ se ziyāda to nahīñ ho āzād

shaam hone ko hai ab ghar kī taraf lauT chalo

tum parindon se ziyaada to nahin ho aazad

sham hone ko hai ab ghar ki taraf lauT chalo

bas ek shaam kā har shaam intizār rahā

magar vo shaam kisī shaam bhī nahīñ aa.ī

bas ek sham ka har sham intizar raha

magar wo sham kisi sham bhi nahin aai

kabhī to āsmāñ se chāñd utre jaam ho jaa.e

tumhāre naam kī ik ḳhūb-sūrat shaam ho jaa.e

kabhi to aasman se chand utre jam ho jae

tumhaare nam ki ek KHub-surat sham ho jae

na udaas ho na malāl kar kisī baat kā na ḳhayāl kar

ka.ī saal ba.ad mile haiñ ham tere naam aaj kī shaam hai

na udas ho na malal kar kisi baat ka na KHayal kar

kai sal baad mile hain hum tere nam aaj ki sham hai

ab kaun muntazir hai hamāre liye vahāñ

shaam aa ga.ī hai lauT ke ghar jaa.eñ ham to kyā

ab kaun muntazir hai hamare liye wahan

sham aa gai hai lauT ke ghar jaen hum to kya

dostoñ se mulāqāt kī shaam hai

ye sazā kaaT kar apne ghar jā.ūñgā

doston se mulaqat ki sham hai

ye saza kaT kar apne ghar jaunga

yaad hai ab tak tujh se bichhaḌne kī vo añdherī shaam mujhe

tū ḳhāmosh khaḌā thā lekin bāteñ kartā thā kājal

yaad hai ab tak tujh se bichhaDne ki wo andheri sham mujhe

tu KHamosh khaDa tha lekin baaten karta tha kajal

shaam hote hī khulī saḌkoñ kī yaad aatī hai

sochtā roz huuñ maiñ ghar se nahīñ niklūñgā

sham hote hi khuli saDkon ki yaad aati hai

sochta roz hun main ghar se nahin niklunga

na.ī sub.h par nazar hai magar aah ye bhī Dar hai

ye sahar bhī rafta rafta kahīñ shaam tak na pahuñche

nai subh par nazar hai magar aah ye bhi Dar hai

ye sahar bhi rafta rafta kahin sham tak na pahunche

ab to chup-chāp shaam aatī hai

pahle chiḌiyoñ ke shor hote the

ab to chup-chap sham aati hai

pahle chiDiyon ke shor hote the

kabhī to shaam Dhale apne ghar ga.e hote

kisī kī aañkh meñ rah kar sañvar ga.e hote

kabhi to sham Dhale apne ghar gae hote

kisi ki aankh mein rah kar sanwar gae hote

maiñ tamām din kā thakā huā tū tamām shab kā jagā huā

zarā Thahar jā isī moḌ par tere saath shaam guzār luuñ

main tamam din ka thaka hua tu tamam shab ka jaga hua

zara Thahar ja isi moD par tere sath sham guzar lun

shaam se pahle tirī shaam na hone dūñgā

zindagī maiñ tujhe nākām na hone dūñgā

sham se pahle teri sham na hone dunga

zindagi main tujhe nakaam na hone dunga

ghar kī vahshat se laraztā huuñ magar jaane kyuuñ

shaam hotī hai to ghar jaane ko jī chāhtā hai

ghar ki wahshat se larazta hun magar jaane kyun

sham hoti hai to ghar jaane ko ji chahta hai

Dhalegī shaam jahāñ kuchh nazar na aa.egā

phir is ke ba.ad bahut yaad ghar kī aa.egī

Dhalegi sham jahan kuchh nazar na aaega

phir is ke baad bahut yaad ghar ki aaegi

kaun sī baat na.ī ai dil-e-nākām huī

shaam se sub.h huī sub.h se phir shaam huī

kaun si baat nai ai dil-e-nakaam hui

sham se subh hui subh se phir sham hui

shaam se un ke tasavvur kā nasha thā itnā

niiñd aa.ī hai to āñkhoñ ne burā maanā hai

sham se un ke tasawwur ka nasha tha itna

nind aai hai to aankhon ne bura mana hai

ham bahut duur nikal aa.e haiñ chalte chalte

ab Thahar jaa.eñ kahīñ shaam ke Dhalte Dhalte

hum bahut dur nikal aae hain chalte chalte

ab Thahar jaen kahin sham ke Dhalte Dhalte

shāmeñ kisī ko māñgtī haiñ aaj bhī 'firāq'

go zindagī meñ yuuñ mujhe koī kamī nahīñ

shamen kisi ko mangti hain aaj bhi 'firaq'

go zindagi mein yun mujhe koi kami nahin

shajar ne pūchhā ki tujh meñ ye kis kī ḳhushbū hai

havā-e-shām-e-alam ne kahā udāsī kī

shajar ne puchha ki tujh mein ye kis ki KHushbu hai

hawa-e-sham-e-alam ne kaha udasi ki

ham duniyā se jab tañg aayā karte haiñ

apne saath ik shaam manāyā karte haiñ

hum duniya se jab tang aaya karte hain

apne sath ek sham manaya karte hain

asr ke vaqt mere paas na baiTh

mujh pe ik sāñvlī kā saaya hai

asr ke waqt mere pas na baiTh

mujh pe ek sanwli ka saya hai

shaam ko aaoge tum achchhā abhī hotī hai shaam

gesuoñ ko khol do sūraj chhupāne ke liye

sham ko aaoge tum achchha abhi hoti hai sham

gesuon ko khol do suraj chhupane ke liye

us kī āñkhoñ meñ utar jaane ko jī chāhtā hai

shaam hotī hai to ghar jaane ko jī chāhtā hai

us ki aankhon mein utar jaane ko ji chahta hai

sham hoti hai to ghar jaane ko ji chahta hai

hotī hai shaam aañkh se aañsū ravāñ hue

ye vaqt qaidiyoñ kī rihā.ī kā vaqt hai

hoti hai sham aankh se aansu rawan hue

ye waqt qaidiyon ki rihai ka waqt hai

shaam Dhale ye soch ke baiThe ham apnī tasvīr ke paas

saarī ġhazleñ baiThī hoñgī apne apne miir ke paas

sham Dhale ye soch ke baiThe hum apni taswir ke pas

sari ghazlen baiThi hongi apne apne mir ke pas

hote hī shaam jalne lagā yaad kā alaao

aañsū sunāne dukh kī kahānī nikal paḌe

hote hi sham jalne laga yaad ka alao

aansu sunane dukh ki kahani nikal paDe

din kisī tarah se kaT jā.egā saḌkoñ pe 'shafaq'

shaam phir aa.egī ham shaam se ghabrā.eñge

din kisi tarah se kaT jaega saDkon pe 'shafaq'

sham phir aaegi hum sham se ghabraenge

guzar ga.ī hai magar roz yaad aatī hai

vo ek shaam jise bhūlne kī hasrat hai

guzar gai hai magar roz yaad aati hai

wo ek sham jise bhulne ki hasrat hai

jab shaam utartī hai kyā dil pe guzartī hai

sāhil ne bahut pūchhā ḳhāmosh rahā paanī

jab sham utarti hai kya dil pe guzarti hai

sahil ne bahut puchha KHamosh raha pani

ham bhī ik shaam bahut uljhe hue the ḳhud meñ

ek shaam us ko bhī hālāt ne mohlat nahīñ dī

hum bhi ek sham bahut uljhe hue the KHud mein

ek sham us ko bhi haalat ne mohlat nahin di

sāqiyā ek nazar jaam se pahle pahle

ham ko jaanā hai kahīñ shaam se pahle pahle

saqiya ek nazar jam se pahle pahle

hum ko jaana hai kahin sham se pahle pahle

bhīgī huī ik shaam kī dahlīz pe baiThe

ham dil ke sulagne kā sabab soch rahe haiñ

bhigi hui ek sham ki dahliz pe baiThe

hum dil ke sulagne ka sabab soch rahe hain

kab dhuup chalī shaam Dhalī kis ko ḳhabar hai

ik umr se maiñ apne hī saa.e meñ khaḌā huuñ

kab dhup chali sham Dhali kis ko KHabar hai

ek umr se main apne hi sae mein khaDa hun

shaam hī se baras rahī hai raat

rañg apne sambhāl kar rakhnā

sham hi se baras rahi hai raat

rang apne sambhaal kar rakhna

shaam paḌte hī kisī shaḳhs kī yaad

kūcha-e-jāñ meñ sadā kartī hai

sham paDte hi kisi shaKHs ki yaad

kucha-e-jaan mein sada karti hai

baiThā huā huuñ lag ke darīche se mahv-e-yās

ye shaam aaj mere barābar udaas hai

baiTha hua hun lag ke dariche se mahw-e-yas

ye sham aaj mere barabar udas hai

ab yaad kabhī aa.e to ā.īne se pūchho

'mahbūb-ḳhizāñ' shaam ko ghar kyuuñ nahīñ jaate

ab yaad kabhi aae to aaine se puchho

'mahbub-KHizan' sham ko ghar kyun nahin jate

āḳhirī baar maiñ kab us se milā yaad nahīñ

bas yahī yaad hai ik shaam bahut bhārī thī

aaKHiri bar main kab us se mila yaad nahin

bas yahi yaad hai ek sham bahut bhaari thi

saa.e Dhalne charāg jalne lage

log apne gharoñ ko chalne lage

sae Dhalne charag jalne lage

log apne gharon ko chalne lage

shaam hotī hai to lagtā hai koī ruuTh gayā

aur shab us ko manāne meñ guzar jaatī hai

sham hoti hai to lagta hai koi ruTh gaya

aur shab us ko manane mein guzar jati hai

dalīl-e-tābish-e-īmāñ hai kufr kā ehsās

charāġh shaam se pahle jalā nahīñ karte

dalil-e-tabish-e-iman hai kufr ka ehsas

charagh sham se pahle jala nahin karte

shaam hone ko hai jalne ko hai sham-e-mahfil

saañs lene kī bhī fursat nahīñ parvāne ko

sham hone ko hai jalne ko hai sham-e-mahfil

sans lene ki bhi fursat nahin parwane ko