pūchhā jo un se chāñd nikaltā hai kis tarah

zulfoñ ko ruḳh pe Daal ke jhaTkā diyā ki yuuñ

puchha jo un se chand nikalta hai kis tarah

zulfon ko ruKH pe Dal ke jhaTka diya ki yun

kis ne bhīge hue bāloñ se ye jhaTkā paanī

jhuum ke aa.ī ghaTā TuuT ke barsā paanī

kis ne bhige hue baalon se ye jhaTka pani

jhum ke aai ghaTa TuT ke barsa pani

nigāheñ is qadar qātil ki uff uff

adā.eñ is qadar pyārī ki tauba

nigahen is qadar qatil ki uff uff

adaen is qadar pyari ki tauba

vafā tum se kareñge dukh saheñge naaz uThā.eñge

jise aatā hai dil denā use har kaam aatā hai

wafa tum se karenge dukh sahenge naz uThaenge

jise aata hai dil dena use har kaam aata hai

burī sarisht na badlī jagah badalne se

chaman meñ aa ke bhī kāñTā gulāb ho na sakā

buri sarisht na badli jagah badalne se

chaman mein aa ke bhi kanTa gulab ho na saka

jo dil rakhte haiñ siine meñ vo kāfir ho nahīñ sakte

mohabbat diin hotī hai vafā īmān hotī hai

jo dil rakhte hain sine mein wo kafir ho nahin sakte

mohabbat din hoti hai wafa iman hoti hai

bhole ban kar haal na pūchh bahte haiñ ashk to bahne do

jis se baḌhe bechainī dil kī aisī tasallī rahne do

bhole ban kar haal na puchh bahte hain ashk to bahne do

jis se baDhe bechaini dil ki aisi tasalli rahne do

mohabbat vahīñ tak hai sachchī mohabbat

jahāñ tak koī ahd-o-paimāñ nahīñ hai

mohabbat wahin tak hai sachchi mohabbat

jahan tak koi ahd-o-paiman nahin hai

had se Takrātī hai jo shai vo palaTtī hai zarūr

ḳhud bhī ro.eñge ġharīboñ ko rulāne vaale

had se Takraati hai jo shai wo palaTti hai zarur

KHud bhi roenge gharibon ko rulane wale

ḳhamoshī merī ma.anī-ḳhez thī ai aarzū kitnī

ki jis ne jaisā chāhā vaisā afsāna banā Daalā

KHamoshi meri mani-KHez thi ai aarzu kitni

ki jis ne jaisa chaha waisa afsana bana Dala

shauq chaḌhtī dhuup jaatā vaqt ghaTtī chhāñv hai

bā-vafā jo aaj haiñ kal be-vafā ho jā.eñge

shauq chaDhti dhup jata waqt ghaTti chhanw hai

ba-wafa jo aaj hain kal be-wafa ho jaenge

bholī bātoñ pe terī dil ko yaqīñ

pahle aatā thā ab nahīñ aatā

bholi baaton pe teri dil ko yaqin

pahle aata tha ab nahin aata

allāh allāh husn kī ye parda-dārī dekhiye

bhed jis ne kholnā chāhā vo dīvāna huā

allah allah husn ki ye parda-dari dekhiye

bhed jis ne kholna chaha wo diwana hua

khilnā kahīñ chhupā bhī hai chāhat ke phuul kā

lī ghar meñ saañs aur galī tak mahak ga.ī

khilna kahin chhupa bhi hai chahat ke phul ka

li ghar mein sans aur gali tak mahak gai

daf.atan tark-e-ta.alluq meñ bhī rusvā.ī hai

uljhe dāman ko chhuḌāte nahīñ jhaTkā de kar

dafatan tark-e-talluq mein bhi ruswai hai

uljhe daman ko chhuDate nahin jhaTka de kar

phir chāhe to na aanā o aan baan vaale

jhūTā hī va.ada kar le sachchī zabān vaale

phir chahe to na aana o aan ban wale

jhuTa hi wada kar le sachchi zaban wale

dil kī zid is liye rakh lī thī ki aa jaa.e qarār

kal ye kuchh aur kahegā mujhe ma.alūm na thā

dil ki zid is liye rakh li thi ki aa jae qarar

kal ye kuchh aur kahega mujhe malum na tha

tere to Dhañg haiñ yahī apnā banā ke chhoḌ de

vo bhī burā hai bāvlā tujh ko jo pā ke chhoḌ de

tere to Dhang hain yahi apna bana ke chhoD de

wo bhi bura hai bawla tujh ko jo pa ke chhoD de

jis qadar nafrat baḌhā.ī utnī hī qurbat baḌhī

ab jo mahfil meñ nahīñ hai vo tumhāre dil meñ hai

jis qadar nafrat baDhai utni hi qurbat baDhi

ab jo mahfil mein nahin hai wo tumhaare dil mein hai

kah ke ye aur kuchh kahā na gayā

ki mujhe aap se shikāyat hai

kah ke ye aur kuchh kaha na gaya

ki mujhe aap se shikayat hai

mohabbat nek-o-bad ko sochne de ġhair-mumkin hai

baḌhī jab be-ḳhudī phir kaun Dartā hai gunāhoñ se

mohabbat nek-o-bad ko sochne de ghair-mumkin hai

baDhi jab be-KHudi phir kaun Darta hai gunahon se

vo palaT ke jald na ā.eñge ye ayaañ hai tarz-e-ḳhirām se

koī gardish aisī bhī ai falak jo bulā de sub.h ko shaam se

wo palaT ke jald na aaenge ye ayan hai tarz-e-KHiram se

koi gardish aisi bhi ai falak jo bula de subh ko sham se

kuchh to mil jaa.e lab-e-shīrīñ se

zahr khāne kī ijāzat hī sahī

kuchh to mil jae lab-e-shirin se

zahr khane ki ijazat hi sahi

dost ne dil ko toḌ ke naqsh-e-vafā miTā diyā

samjhe the ham jise ḳhalīl ka.aba usī ne Dhā diyā

dost ne dil ko toD ke naqsh-e-wafa miTa diya

samjhe the hum jise KHalil kaba usi ne Dha diya

apnī apnī gardish-e-raftār puurī kar to leñ

do sitāre phir kisī din ek jā ho jā.eñge

apni apni gardish-e-raftar puri kar to len

do sitare phir kisi din ek ja ho jaenge

haath se kis ne sāġhar paTkā mausam kī be-kaifī par

itnā barsā TuuT ke bādal Duub chalā mai-ḳhāna bhī

hath se kis ne saghar paTka mausam ki be-kaifi par

itna barsa TuT ke baadal Dub chala mai-KHana bhi

kuchh kahte kahte ishāroñ meñ sharmā ke kisī kā rah jaanā

vo merā samajh kar kuchh kā kuchh jo kahnā na thā sab kah jaanā

kuchh kahte kahte ishaaron mein sharma ke kisi ka rah jaana

wo mera samajh kar kuchh ka kuchh jo kahna na tha sab kah jaana

do tund havāoñ par buniyād hai tūfāñ kī

yā tum na hasīñ hote yā meñ na javāñ hotā

do tund hawaon par buniyaad hai tufan ki

ya tum na hasin hote ya mein na jawan hota

jo kuchh thā na kahne kā sab kah gayā dīvāna

samho to mukammal hai ab ishq kā afsāna

jo kuchh tha na kahne ka sab kah gaya diwana

samho to mukammal hai ab ishq ka afsana

ḳhizāñ kā bhes banā kar bahār ne maarā

mujhe do-rañgī-e-lail-o-nahār ne maarā

KHizan ka bhes bana kar bahaar ne mara

mujhe do-rangi-e-lail-o-nahaar ne mara

kis kaam kī aisī sachchā.ī jo toḌ de ummīdeñ dil kī

thoḌī sī tasallī ho to ga.ī maanā ki vo bol ke jhuuT gayā

kis kaam ki aisi sachchai jo toD de ummiden dil ki

thoDi si tasalli ho to gai mana ki wo bol ke jhuT gaya

ma.asūm nazar kā bholā-pan lalchā ke lubhānā kyā jaane

dil aap nishāna bantā hai vo tiir chalānā kyā jaane

masum nazar ka bhola-pan lalcha ke lubhana kya jaane

dil aap nishana banta hai wo tir chalana kya jaane

har ik shaam kahtī hai phir sub.h hogī

añdhere meñ sūraj nazar aa rahā hai

har ek sham kahti hai phir subh hogi

andhere mein suraj nazar aa raha hai

'ārzū' jaam lo jhijak kaisī

pī lo aur dahshat-e-gunāh ga.ī

'arzu' jam lo jhijak kaisi

pi lo aur dahshat-e-gunah gai

rāhbar rahzan na ban jaa.e kahīñ is soch meñ

chup khaḌā huuñ bhuul kar raste meñ manzil kā patā

rahbar rahzan na ban jae kahin is soch mein

chup khaDa hun bhul kar raste mein manzil ka pata

har nafas ik sharāb kā ho ghūñT

zindagānī harām hai varna

har nafas ek sharab ka ho ghunT

zindagani haram hai warna

sukūn-e-dil nahīñ jis vaqt se us bazm meñ aa.e

zarā sī chiiz ghabrāhaT meñ kyā jaane kahāñ rakh dī

sukun-e-dil nahin jis waqt se us bazm mein aae

zara si chiz ghabrahaT mein kya jaane kahan rakh di

Daal rahā hai kaam meñ mushkil

mushkil meñ kaam aane vaalā

Dal raha hai kaam mein mushkil

mushkil mein kaam aane wala

har saañs hai ik naġhma har naġhma hai mastāna

kis darja dukhe dil kā rañgīn hai afsāna

har sans hai ek naghma har naghma hai mastana

kis darja dukhe dil ka rangin hai afsana

vaa.e ġhurbat ki hue jis ke liye ḳhāna-ḳharāb

sun ke āvāz bhī ghar se na vo bāhar niklā

wae ghurbat ki hue jis ke liye KHana-KHarab

sun ke aawaz bhi ghar se na wo bahar nikla

ham ko itnā bhī rihā.ī kī ḳhushī meñ nahīñ hosh

TuuTī zanjīr ki ḳhud paañv hamārā TuuTā

hum ko itna bhi rihai ki KHushi mein nahin hosh

TuTi zanjir ki KHud panw hamara TuTa

jo kaan lagā kar sunte haiñ kyā jāneñ rumūz mohabbat ke

ab hoñT nahīñ hilne paate aur pahroñ bāteñ hotī haiñ

jo kan laga kar sunte hain kya jaanen rumuz mohabbat ke

ab honT nahin hilne pate aur pahron baaten hoti hain

nazar bachā ke jo aañsū kiye the maiñ ne paak

ḳhabar na thī yahī dhabbe baneñge dāman ke

nazar bacha ke jo aansu kiye the main ne pak

KHabar na thi yahi dhabbe banenge daman ke

barsoñ bhaTkā kiyā aur phir bhī na un tak pahuñchā

ghar to ma.alūm thā rasta mujhe ma.alūm na thā

barson bhaTka kiya aur phir bhi na un tak pahuncha

ghar to malum tha rasta mujhe malum na tha

ye zorā-zorī ishq kī thī fitrat hī jis ne badal Daalī

jaltā huā dil ho kar paanī aañsū ban jaanā kyā jaane

ye zora-zori ishq ki thi fitrat hi jis ne badal Dali

jalta hua dil ho kar pani aansu ban jaana kya jaane

ye gul khil rahā hai vo murjhā rahā hai

asar do tarah ke havā ek hī hai

ye gul khil raha hai wo murjha raha hai

asar do tarah ke hawa ek hi hai

mazā barsāt kā chāho to in āñkhoñ meñ aa baiTho

syāhī hai safedī hai shafaq hai abr-e-bārāñ hai

maza barsat ka chaho to in aankhon mein aa baiTho

syahi hai safedi hai shafaq hai abr-e-baran hai

mujhe rahne ko vo milā hai ghar ki jo āfatoñ kī hai rahguzar

tumheñ ḳhāksāroñ kī kyā ḳhabar kabhī nīche utre ho baam se

mujhe rahne ko wo mila hai ghar ki jo aafaton ki hai rahguzar

tumhein KHaksaron ki kya KHabar kabhi niche utre ho baam se

javāb dene ke badle vo shakl dekhte haiñ

ye kyā huā mere chehre ko arz-e-hāl ke ba.ad

jawab dene ke badle wo shakl dekhte hain

ye kya hua mere chehre ko arz-e-haal ke baad

ek dil patthar bane aur ek dil ban jaa.e mom

āḳhir itnā farq kyuuñ taqsīm-e-āb-o-gil meñ hai

ek dil patthar bane aur ek dil ban jae mom

aaKHir itna farq kyun taqsim-e-ab-o-gil mein hai