aaj rakkhe haiñ qadam us ne mirī chaukhaT par

aaj dahlīz mirī chhat ke barābar huī hai

aaj rakkhe hain qadam us ne meri chaukhaT par

aaj dahliz meri chhat ke barabar hui hai

kaun sā jurm ḳhudā jaane huā hai sābit

mashvare kartā hai munsif jo gunahgār ke saath

kaun sa jurm KHuda jaane hua hai sabit

mashware karta hai munsif jo gunahgar ke sath

ham aadmī kī tarah jī rahe haiñ sadiyoñ se

chalo 'salīm' ab insān ho ke dekhte haiñ

hum aadmi ki tarah ji rahe hain sadiyon se

chalo 'salim' ab insan ho ke dekhte hain

apne jiine ke ham asbāb dikhāte haiñ tumheñ

dosto aao ki kuchh ḳhvāb dikhāte haiñ tumheñ

apne jine ke hum asbab dikhate hain tumhein

dosto aao ki kuchh KHwab dikhate hain tumhein

umr bhar jis ke liye peT se bāñdhe patthar

ab vo gin gin ke khilātā hai nivāle mujh ko

umr bhar jis ke liye peT se bandhe patthar

ab wo gin gin ke khilata hai niwale mujh ko

beḌiyāñ Daal ke parchhā.īñ kī pairoñ meñ mire

qaid rakhte haiñ añdheroñ meñ ujāle mujh ko

beDiyan Dal ke parchhain ki pairon mein mere

qaid rakhte hain andheron mein ujale mujh ko

ab zamīnoñ ko bichhā.e ki falak ko oḌhe

muflisī to bharī barsāt meñ be-ghar huī hai

ab zaminon ko bichhae ki falak ko oDhe

muflisi to bhari barsat mein be-ghar hui hai

ḳharīdne ke liye us ko bik gayā ḳhud hī

maiñ vo huuñ jis ko munāfe meñ bhī ḳhasārā huā

KHaridne ke liye us ko bik gaya KHud hi

main wo hun jis ko munafe mein bhi KHasara hua

ik ek harf kī rakhnī hai aabrū mujh ko

savāl dil kā nahīñ hai mirī zabān kā hai

ek ek harf ki rakhni hai aabru mujh ko

sawal dil ka nahin hai meri zaban ka hai

kaj-kulāhī pe na maġhrūr huā kar itnā

sar utar aate haiñ shāhoñ ke bhī dastār ke saath

kaj-kulahi pe na maghrur hua kar itna

sar utar aate hain shahon ke bhi dastar ke sath

huuñ pārsā tire pahlū meñ shab guzār ke bhī

maiñ be-libās nahīñ pairahan utaar ke bhī

hun parsa tere pahlu mein shab guzar ke bhi

main be-libas nahin pairahan utar ke bhi

ḳhauf āñkhoñ meñ mirī dekh ke chiñgārī kā

kar diyā raat ne sūraj ke havāle mujh ko

KHauf aankhon mein meri dekh ke chingari ka

kar diya raat ne suraj ke hawale mujh ko

zaḳhm-dar-zaḳhm suḳhan aur bhī hotā hai vasī.a

ashk-dar-ashk ubhartī hai qalamkār kī guuñj

zaKHm-dar-zaKHm suKHan aur bhi hota hai wasia

ashk-dar-ashk ubharti hai qalamkar ki gunj

aaj phir apnī samā.at sauñp dī us ne hameñ

aaj phir lahja hamārā iḳhtiyār us ne kiyā

aaj phir apni samaat saunp di us ne hamein

aaj phir lahja hamara iKHtiyar us ne kiya

ik dhuñdlakā huuñ zarā der meñ chhaT jā.ūñgā

maiñ koī raat nahīñ huuñ jo sahar tak jā.ūñ

ek dhundlaka hun zara der mein chhaT jaunga

main koi raat nahin hun jo sahar tak jaun

saare kirdār kuchalne pe tule haiñ ham ko

aao chup-chāp kahānī se nikal chalte haiñ

sare kirdar kuchalne pe tule hain hum ko

aao chup-chap kahani se nikal chalte hain

ham ko uḌne ke tarīqe na sikhāo ham log

peḌ se aa.e haiñ piñjre se nahīñ aa.e haiñ

hum ko uDne ke tariqe na sikhao hum log

peD se aae hain pinjre se nahin aae hain

kaun sūkhe hue phūloñ kī taraf dekhtā hai

zaḳhm thoḌe se hare hoñ to numā.ish kareñ ham

kaun sukhe hue phulon ki taraf dekhta hai

zaKHm thoDe se hare hon to numaish karen hum

ham riyāzī ke haiñ māhir ki hamāre ghar meñ

ek tanḳhvāh pe das log guzar karte haiñ

hum riyazi ke hain mahir ki hamare ghar mein

ek tanKHwah pe das log guzar karte hain

jabīñ ko chuum ke bas itnī raushnī rakh de

havā charāġh bujhā.e to mujh ko Dar na lage

jabin ko chum ke bas itni raushni rakh de

hawa charagh bujhae to mujh ko Dar na lage

miTTī kī fazīlat pe bahut she'r kahe haiñ

sone se likhā jā.egā dīvān hamārā

miTTi ki fazilat pe bahut she'r kahe hain

sone se likha jaega diwan hamara

jugnū bhī ghar se nikleñ sitāre bhī aa.eñ saath

miTTī ke ik diye pe musībat kā vaqt hai

jugnu bhi ghar se niklen sitare bhi aaen sath

miTTi ke ek diye pe musibat ka waqt hai

sunā thā rūh-talab hai tire badan kī mahak

so tere shahr se guzre to saañs lī hī nahīñ

suna tha ruh-talab hai tere badan ki mahak

so tere shahr se guzre to sans li hi nahin

maiñ sadā de ke use rok na paayā afsos

kaash āvāz ko zanjīr kiyā jā saktā

main sada de ke use rok na paya afsos

kash aawaz ko zanjir kiya ja sakta

phir shaah ne bai'at hī talab kī nahīñ varna

jo ran meñ huā thā vahī darbār meñ hotā

phir shah ne bai'at hi talab ki nahin warna

jo ran mein hua tha wahi darbar mein hota

yuuñ tirī chaap se tahrīk-e-safar TūTtī hai

jaise palkoñ ke jhapakne se nazar TūTtī hai

yun teri chap se tahrik-e-safar TuTti hai

jaise palkon ke jhapakne se nazar TuTti hai

guloñ ke jism pe shabnam 'ajīb rasm hai ye

kisī kā dard kisī ke jigar meñ rakkhā jaa.e

gulon ke jism pe shabnam 'ajib rasm hai ye

kisi ka dard kisi ke jigar mein rakkha jae

junūn-e-qāfila-sāzī tirā qubūl magar

ye raah tang na ho jaa.e shahsavāroñ par

junun-e-qafila-sazi tera qubul magar

ye rah tang na ho jae shahsawaron par

maiñ ne roġhan kī tijārat to nahīñ kī lekin

shahr ke saare charāġhoñ ke nasab jāntā huuñ

main ne roghan ki tijarat to nahin ki lekin

shahr ke sare charaghon ke nasab jaanta hun

āñkheñ taḌap rahī haiñ mirī kuchh ḳhayāl kar

band-e-qabā ko khol badan ko bahāl kar

aankhen taDap rahi hain meri kuchh KHayal kar

band-e-qaba ko khol badan ko bahaal kar

ham ko baisākhiyāñ sañbhāle haiñ

paañv hote to laḌkhaḌāte ham

hum ko baisakhiyan sanbhaale hain

panw hote to laDkhaDate hum

'ajīb log haiñ lāshoñ meñ zindagī ke nishāñ

har ek jism meñ neza chubho ke dekhte haiñ

'ajib log hain lashon mein zindagi ke nishan

har ek jism mein neza chubho ke dekhte hain

tishna-kāmī agar payambar ho

kaun kalma paḌhegā paanī kā

tishna-kaami agar payambar ho

kaun kalma paDhega pani ka