nāmoñ kā ik hujūm sahī mere ās-pās

dil sun ke ek naam dhaḌaktā zarūr hai

namon ka ek hujum sahi mere aas-pas

dil sun ke ek nam dhaDakta zarur hai

ham tañg-nā-e-hijr se bāhar nahīñ ga.e

tujh se bichhaḌ ke zinda rahe mar nahīñ ga.e

hum tang-na-e-hijr se bahar nahin gae

tujh se bichhaD ke zinda rahe mar nahin gae

mujhe ḳhabar thī mirā intizār ghar meñ rahā

ye hādsa thā ki maiñ umr bhar safar meñ rahā

mujhe KHabar thi mera intizar ghar mein raha

ye hadsa tha ki main umr bhar safar mein raha

ek ek kar ke log bichhaḌte chale ga.e

ye kyā huā ki vaqfa-e-mātam nahīñ milā

ek ek kar ke log bichhaDte chale gae

ye kya hua ki waqfa-e-matam nahin mila

maiñ khil nahīñ sakā ki mujhe nam nahīñ milā

saaqī mire mizāj kā mausam nahīñ milā

main khil nahin saka ki mujhe nam nahin mila

saqi mere mizaj ka mausam nahin mila

vahī āñkhoñ meñ aur āñkhoñ se poshīda bhī rahtā hai

mirī yādoñ meñ ik bhūlā huā chehrā bhī rahtā hai

wahi aankhon mein aur aankhon se poshida bhi rahta hai

meri yaadon mein ek bhula hua chehra bhi rahta hai

maiñ un se bhī milā kartā huuñ jin se dil nahīñ miltā

magar ḳhud se bichhaḌ jaane kā andesha bhī rahtā hai

main un se bhi mila karta hun jin se dil nahin milta

magar KHud se bichhaD jaane ka andesha bhi rahta hai

qatl karne kā irāda hai magar sochtā huuñ

tū agar aa.e to hāthoñ meñ jhijak paidā ho

qatl karne ka irada hai magar sochta hun

tu agar aae to hathon mein jhijak paida ho

aag ho dil meñ to āñkhoñ meñ dhanak paidā ho

ruuh meñ raushnī lahje meñ chamak paidā ho

aag ho dil mein to aankhon mein dhanak paida ho

ruh mein raushni lahje mein chamak paida ho

dil hī ayyār hai be-vaj.h dhaḌak uThtā hai

varna afsurda havāoñ meñ bulāvā kaisā

dil hi ayyar hai be-wajh dhaDak uThta hai

warna afsurda hawaon mein bulawa kaisa

sub.h tak raat kī zanjīr pighal jā.egī

log pāgal haiñ sitāroñ se ulajhnā kaisā

subh tak raat ki zanjir pighal jaegi

log pagal hain sitaron se ulajhna kaisa

jo tere dil meñ hai vo baat mere dhyān meñ hai

tirī shikast tirī luknat-e-zabān meñ hai

jo tere dil mein hai wo baat mere dhyan mein hai

teri shikast teri luknat-e-zaban mein hai

log lamhoñ meñ zinda rahte haiñ

vaqt akelā isī sabab se hai

log lamhon mein zinda rahte hain

waqt akela isi sabab se hai

hādsa ye hai ki ham jaañ na mo.attar kar paa.e

vo to ḳhush-bū thā use yuuñ bhī bikhar jaanā thā

hadsa ye hai ki hum jaan na moattar kar pae

wo to KHush-bu tha use yun bhi bikhar jaana tha

muddat huī ik shaḳhs ne dil toḌ diyā thā

is vāste apnoñ se mohabbat nahīñ karte

muddat hui ek shaKHs ne dil toD diya tha

is waste apnon se mohabbat nahin karte

tum aur kisī ke ho to ham aur kisī ke

aur donoñ hī qismat kī shikāyat nahīñ karte

tum aur kisi ke ho to hum aur kisi ke

aur donon hi qismat ki shikayat nahin karte

tū jān-e-mohabbat hai magar terī taraf bhī

ik ḳhvāhish-e-tash.hīr-e-vafā le ga.ī ham ko

tu jaan-e-mohabbat hai magar teri taraf bhi

ek KHwahish-e-tashhir-e-wafa le gai hum ko

hairānī meñ huuñ āḳhir kis kī parchhā.īñ huuñ

vo bhī dhyān meñ aayā jis kā saaya koī na thā

hairani mein hun aaKHir kis ki parchhain hun

wo bhi dhyan mein aaya jis ka saya koi na tha

vahī jiine kī āzādī vahī marne kī jaldī hai

divālī dekh lī ham ne dasahre kar liye ham ne

wahi jine ki aazadi wahi marne ki jaldi hai

diwali dekh li hum ne dasahre kar liye hum ne

magar un sīpiyoñ meñ pāniyoñ kā shor kaisā thā

samundar sunte sunte kaan bahre kar liye ham ne

magar un sipiyon mein paniyon ka shor kaisa tha

samundar sunte sunte kan bahre kar liye hum ne

ab ghar bhī nahīñ ghar kī tamannā bhī nahīñ hai

muddat huī sochā thā ki ghar jā.eñge ik din

ab ghar bhi nahin ghar ki tamanna bhi nahin hai

muddat hui socha tha ki ghar jaenge ek din

tamām jism kī uryāniyāñ thiiñ āñkhoñ meñ

vo merī ruuh meñ utrā hijāb pahne hue

tamam jism ki uryaniyan thin aankhon mein

wo meri ruh mein utra hijab pahne hue

mere andar use khone kī tamannā kyuuñ hai

jis ke milne se mirī zaat ko iz.hār mile

mere andar use khone ki tamanna kyun hai

jis ke milne se meri zat ko izhaar mile

ruuh meñ reñgtī rahtī hai gunah kī ḳhvāhish

is amarbel ko ik din koī dīvār mile

ruh mein rengti rahti hai gunah ki KHwahish

is amarbel ko ek din koi diwar mile

tere chehre pe ujāle kī saḳhāvat aisī

aur mirī ruuh meñ nādār añdherā aisā

tere chehre pe ujale ki saKHawat aisi

aur meri ruh mein nadar andhera aisa

had-bandī-e-ḳhizāñ se hisār-e-bahār tak

jaañ raqs kar sake to koī fāsla nahīñ

had-bandi-e-KHizan se hisar-e-bahaar tak

jaan raqs kar sake to koi fasla nahin

maiñ to ḳhudā ke saath vafādār bhī rahā

ye zaat kā tilism magar TūTtā nahīñ

main to KHuda ke sath wafadar bhi raha

ye zat ka tilism magar TuTta nahin

maiñ apne shahr se māyūs ho ke lauT aayā

purāne sog base the na.e makānoñ meñ

main apne shahr se mayus ho ke lauT aaya

purane sog base the nae makanon mein

Duub jaane kā salīqa nahīñ aayā varna

dil meñ girdāb the lahroñ kī nazar meñ ham the

Dub jaane ka saliqa nahin aaya warna

dil mein girdab the lahron ki nazar mein hum the

mujh ko mirī shikast kī dohrī sazā milī

tujh se bichhaḌ ke zindagī duniyā se jā milī

mujh ko meri shikast ki dohri saza mili

tujh se bichhaD ke zindagi duniya se ja mili

jis kī havas ke vāste duniyā huī aziiz

vāpas hue to us kī mohabbat ḳhafā milī

jis ki hawas ke waste duniya hui aziz

wapas hue to us ki mohabbat KHafa mili

mujh meñ saat samundar shor machāte haiñ

ek ḳhayāl ne dahshat phailā rakkhī hai

mujh mein sat samundar shor machate hain

ek KHayal ne dahshat phaila rakkhi hai

pyaas baḌhtī jā rahī hai bahtā dariyā dekh kar

bhāgtī jaatī haiñ lahreñ ye tamāshā dekh kar

pyas baDhti ja rahi hai bahta dariya dekh kar

bhagti jati hain lahren ye tamasha dekh kar

abhī nazar meñ Thahar dhyān se utar ke na jā

is ek aan meñ sab kuchh tabāh kar ke na jā

abhi nazar mein Thahar dhyan se utar ke na ja

is ek aan mein sab kuchh tabah kar ke na ja

ajab ki sabr kī mī.ād baḌhtī jaatī hai

ye kaun log haiñ fariyād kyuuñ nahīñ karte

ajab ki sabr ki miad baDhti jati hai

ye kaun log hain fariyaad kyun nahin karte

na.e charāġh jalā yaad ke ḳharābe meñ

vatan meñ raat sahī raushnī manāyā kar

nae charagh jala yaad ke KHarabe mein

watan mein raat sahi raushni manaya kar

ḳhudā ke vāste mauqā na de shikāyat kā

ki dostī kī tarah dushmanī nibhāyā kar

KHuda ke waste mauqa na de shikayat ka

ki dosti ki tarah dushmani nibhaya kar

bujhe laboñ pe hai bosoñ kī raakh bikhrī huī

maiñ is bahār meñ ye raakh bhī uḌā dūñgā

bujhe labon pe hai boson ki rakh bikhri hui

main is bahaar mein ye rakh bhi uDa dunga

ye kaisī baat huī hai ki dekh kar ḳhush hai

vo āñsuoñ ke samundar ke darmiyān mujhe

ye kaisi baat hui hai ki dekh kar KHush hai

wo aansuon ke samundar ke darmiyan mujhe

maiñ apnī āñkhoñ se apnā zavāl dekhtā huuñ

maiñ bevafā huuñ magar be-ḳhabar na jaan mujhe

main apni aankhon se apna zawal dekhta hun

main bewafa hun magar be-KHabar na jaan mujhe

ḳhāmushī chheḌ rahī hai koī nauha apnā

TūTtā jaatā hai āvāz se rishta apnā

KHamushi chheD rahi hai koi nauha apna

TuTta jata hai aawaz se rishta apna

merī ayyār nigāhoñ se vafā māñgtā hai

vo bhī mohtāj milā vo bhī savālī niklā

meri ayyar nigahon se wafa mangta hai

wo bhi mohtaj mila wo bhi sawali nikla

ḳhaak maiñ us kī judā.ī meñ pareshān phirūñ

jab ki ye milnā bichhaḌnā mirī marzī niklā

KHak main us ki judai mein pareshan phirun

jab ki ye milna bichhaDna meri marzi nikla

maiñ ne chāhā thā ki ashkoñ kā tamāshā dekhūñ

aur āñkhoñ kā ḳhazāna thā ki ḳhālī niklā

main ne chaha tha ki ashkon ka tamasha dekhun

aur aankhon ka KHazana tha ki KHali nikla

miT jā.egā sehr tumhārī āñkhoñ kā

apne paas bulā legī duniyā ik din

miT jaega sehr tumhaari aankhon ka

apne pas bula legi duniya ek din

tujh se milne kā rāsta bas ek

aur bichhaḌne ke rāste haiñ bahut

tujh se milne ka rasta bas ek

aur bichhaDne ke raste hain bahut

us ke vāris nazar nahīñ aa.e

shāyad us laash ke pate haiñ bahut

us ke waris nazar nahin aae

shayad us lash ke pate hain bahut

ik yaad kī maujūdgī sah bhī nahīñ sakte

ye baat kisī aur se kah bhī nahīñ sakte

ek yaad ki maujudgi sah bhi nahin sakte

ye baat kisi aur se kah bhi nahin sakte

mujhe samajhne kī koshish na kī mohabbat ne

ye aur baat zarā pechdār maiñ bhī thā

mujhe samajhne ki koshish na ki mohabbat ne

ye aur baat zara pechdar main bhi tha

mujhe gunāh meñ apnā surāġh miltā hai

vagarna pārsā-o-dīn-dār maiñ bhī thā

mujhe gunah mein apna suragh milta hai

wagarna parsa-o-din-dar main bhi tha