تشریح

سم ہندوستانی موسیقی کی اصطلاح ہے۔ اس کا تعلق تال سے ہے۔ تال کہتے ہیں موسیقی کے وزن کو۔ جس طرح ہمارا عروضی نظام ارکان پر مبنی ہے اسی طرح ہندوستانی موسیقی میں تال کا نظام ماتراؤں پر مبنی ہے۔ جیسے دھا گے نا تی نا کے دھن نا(آٹھ ماترائیں: کہروا تال)۔ سم اس جگہ کو کہتے ہیں جہاں تال کا آغاز ہوتا ہے۔ تال کی پہلی ماترا سم کہلاتی ہے۔ ہر تال چکر میں ایک ہی بار سم آتا ہے۔ سنگیت میں خاص زور دے کر سم کو ظاہر کیا جاتا ہے۔ عام طور پر گانے کا اختتام سم پر ہی ہوتا ہے۔ تال کی زبان میں سم کی جگہوں پر ضرب کا نشان لگایا جاتا ہے۔

ذوقؔ کے شعر میں تجنیس تام نے بات بنائی ہے۔ شعر میں سم دو معنوں میں استعمال ہوا ہے۔ سم بمعنی تال کا سم اور سم بمعنی زہر۔ شعر کی ایک خوبی تضاد بھی ہے۔ یعنی شیریں کے مقابلے میں زہر جو کڑوا ہوتا ہے۔شعرمیں’’اثرِ نغمۂ شیریں‘‘ کی ترکیب جادو بیانی کی اعلیٰ مثال ہے۔ رعایتیں خوب ہیں۔ نغمہ کی رعایت سے راگ اور سم، شیریں کی رعایت سے سم(بمعنی زہر)مضمون میں تاثر پیدا کرتے ہیں۔ خیال نہایت ہی نازک ہے کہ شیریں نغمہ جب کسی پر اثر کرتا ہے تو اسے زہر بھی شیریں ہی لگتا ہے۔ یعنی جب (اس بات کا اگرچہ شعر کے کسی تلازمے میں اشارہ نہیں ملتا مگر ایسا فرض کرنے میں کوئی قباحت نہیں) میرے محبوب نے نغمہ چھیڑا تو اس کی شیرینی کا یہ عالم تھا کہ جہاںیعنی سننے والے ہے یہ بھول گیے کہ راگ کے سم کے سوا کوئی اور سم بھی ہے۔ اندازہ لگایا جاسکتا ہے کہ نغمہ سننے والے اس قدر شیرینی میں محو ہوگیے کہ جب انہیں زہر پلایا گیا تو انہیں تلخی محسوس نہیں ہوئی۔

یہ ہے کمال ہمارے اساتذہ کا۔

شفق سوپوری

تشریح

یہ شعر ذوقؔ کے قصیدہ اوّل کی تشبیب سے لیا گیا ہے۔ شعر میں کئی معنی اور تہ داری ہےجس کے لیے ذوقؔ نے استعاروں اور رعایتوں سے خوب کام لیا ہے۔ ان استعاروں اور رعایتوں نے اگر چہ شعر کے معنی کو کثیر الجہت بنایا ہے مگر یہ بات بھی ہے کہ ان کی وجہ سے ہی شعر میں پیچیدگی پیدا ہوگئی ہے۔ چنانچہ کوئی کتنا ہی سریع الفہم کیوں نہ ہو جب تک اس کے تلازمات سے واقف نہ ہو شعر کی تہ تک نہیں پہنچ سکتا۔ سو پہلے شعر کی لغات پر بات کرتے ہیں۔

1: سودا: (عربی) سیاہ۔ نام ایک خلط کا چار خلطوں میں سےیعنی1: خون۔2: صفرا۔3: سودا۔4: بلغم۔ (فارسی) بمعنی دیوانگی اور یہ مجاز ہے اس لیے کہ بسببِ کثرتِ خلط سودا کے جنون پیدا ہوتا ہے اور کبھی کبھی بمعنی عشق بھی آتا ہے۔(لغاتِ کشوری)اخلاطِ رابعہ میں سے ایک سیاہ خلط کا نام۔ بلغمِ سوختہ :؎

چار اخلاط ہیں اندوہ، غم و رنج و الم

خون بلغم ہے میرے تن میں نہ صفرا سودا

(امیرؔ)

خبط، جنون(چونکہ خلطِ سودا کے بڑھ جانے سے جنون پیدا ہوتا ہے اس وجہ سے فارسی والے اس معنی میں مستعمل کرنے لگے۔عشق۔فریفتگی(فرہنگِ آصفیہ) فیروز الغات کا کہنا بھی یہی ہے۔

لفظ خلط کے بارے میں لغاتِ فارسی یوں کہتے ہیں:’’ ہر یک از عنا صرِ چہار گانۂ بدن(سودا، صفرا بلغم، خون) (طبِ قدیم)(عمید)

2: احتراق: جل جانا۔ سوخت ہونا۔(کشوری) آصفیہ میں ندارد۔ گرمی کی شدت۔ جلن۔ جل جانے کی کیفیت،(نجوم) کسی سیّارے کا آفتاب کے ساتھ ایک برج میں ہونے کے سبب اس کی شعاعوں میں چھپ جانا۔(فیروز)جلانا۔ پھونکنا۔ (طب کی اصطلاح) احتراقِ اخلاط۔ اس کو کہتے ہیں کہ حرارت کے سبب کسی خلط کے اجزائے لطیف و رقیق فانی ہوجاتے ہیں اور مابقی اس طرح کثیف ہوجائیں کہ وہ اپنی خلط اور اپنی جنس سے خارج ہو نہ کہ جل کر خاکستر ہوجائے۔ اور جو خلطِ محترق ہوتا ہے وہ سودائے غیر طبیعی ہوجاتا ہے۔(منجموں کی اصطلاح میں) منجملہ زہرہ، مشتری، مریخ، زحل اور عطارو کے کسی سیّارے کا آفتاب کے ساتھ ایک برج میں ہونا اور اس کی شعاعوں میں چھپ جانا؎

کیا فروغ آتشِ فراق میں ہے

مشتری زہرہ احتراق میں ہے

(مومن: مثنوی)(نور لغات)

میرؔ کا یہ شعر بھی خاطر نشان رکھیں:؎

احراق اپنے قلب کا رونے سے کب گیا

پانی کی چار بوندیں ہیں کیا احتراق میں

احراق: جلانا، جلن، سوزش۔

3: لالہ: ایک قسم کا سرخ پھول جس کے اندر سیاہ داغ ہوتا ہے:؎

جگر کو داغ میں مانندِ لالہ کیا کرتا

لبالب اپنے لہو کا پیالہ کیا کرتا

(آتشؔ)

4 :داغ: جلنے کا نشان۔ جلا ہوا نشان۔(آصفیہ)

5 :بالکل: تمام۔ سر تا سر

6 :یہ: اس طرح۔ یوں۔ ایسے۔

اخلاط کے بارے میں جاننا ضروری ہے۔ ایک روایت کے مطابق یونان کے ایک حکیم اسقلیبوس نے یہ نظریہ قائم کیا تھا کہ انسانی جسم کا نظام چار اخلاط پر قائم ہے۔ ان چار خلطوں کے چار رنگ ہیں۔ صفرا زرد، خون سرخ، سودا کالا، بلغم سفید۔ جب ان میں کسی طرح کی بے اعتدالی پیدا ہوجاتی تو حکیم سا ل میں دو دفعہ بدن کی صفائی کرتے۔ صفائی کا عمل یہ تھا کہ دس دن دوائیاں اور بارہویں دن ٹھنڈائی دیتے۔

اگرچہ زیرِ بحث شعر کو ’’سودا‘‘ ’’احتراق‘‘ اور لالہ بے داغ سیہ‘‘ جیسے تلازمات نے پیچیدہ بنادیا ہے تاہم اس بات کی داد دینی چاہیے کہ ذوقؔ علمِ طب اور علم نجوم کی اصطلاحات سے بخوبی واقف تھے۔ علم طب و نجوم سے واقفیت کوئی کمال نہیں بلکہ کمال یہ ہے ذوقؔ نے ان کو تلازمہ بنا کر شعر میں کئی مضامین پیدا کیے ہیں۔ شعر کی مناسبتوں پر غور کرتے ہیں تو عقل حیران ہوکر رہ جاتی ہے۔ مثلاً سودا(سیاہ) کی مناسبت سےلالہ بے داغِ سیہ، سودا (بمعنی خلط ) کی مناسبت سے احتراق( خلط کانام)، سودا ( بمعنی جنون) کی مناسبت سے احتراق بمعنی دیوانگی، داغ (بمعنی جلنے کا نشان، جلا ہوا نشان) کی مناسبت سے داغِ سیہ،احتراق (بمعنی سوخت ہوجانا، جل جانا) کی مناسبت سے داغِ سیہ اور لالہ کی مناسبت سے نشو و نما۔ غرضیکہ حیران کن مناسبتوں نے اس شعر کے معنی میں غضب کی تہ داری پیدا کی ہے۔

اب شعر کے ممکنہ مفہوم پر غور کرتے ہیں:

1 :چونکہ سودا (چار خلطوں میں سے ایک) کا احتراق (جل کر خاکستر ہونا) کچھ ایسے موقوف (ٹھہرایا جانا۔ برخاست کرنا) ہوگیا ہے کہ اس کے نتیجے میں (چمن میں) لالہ سیاہ داغ کے بغیر نشو ونما پانے لگے۔ گویا لالہ کے سینے میں سودا کی وجہ سے ہی سیاہ داغ پڑ چکا تھا۔ اب جبکہ سودا کا احتراق موقوف ہوگیا تو لالہ بے داغِ سیاہ نشوو نما پانے لگا۔

2 :چونکہ سودا(بمعنی فریفتگی، عشق) سے ہونے والی جلن اور سوزش ختم ہوگئی ہے تو اس کے نتیجے میں چمن کے اندر لالہ سیاہ داغ کے بغیر نشو و نما پانے لگا۔ یہ بات ملحوظِ خاطر رہے کہ سویدا(نقطۂ سیاہ جو دل پر ہوتا ہے اور یہ تصغیر سودا کی ہے جو اسود کا مونّث ہے(کشوری) کے بارے میں عام خیال ہے کہ یہ داغِ عشق ہے جو عاشقوں کے دل پر لگتا ہے:؎

آشفتگی نے نقشِ سویدا کیا درست

ظاہر ہوا کہ داغ کا سرمایہ دود تھا

(غالبؔ)

اس شعر کی تشریح غلام رسول مہر ان الفاظ میں کرتے ہیں:

’’ عشق کی پریشانی کے باعث دل سے آہ و فغاں کا دھواں اٹھتا رہتا تھا۔ اس دھویں سے دل کے سیاہ نقطے کی صورت قائم ہوئی۔ وغیرہ۔‘‘

3:(چونکہ)سودا(ایک خلط) کے احتراق( کسی سیّارے کا آفتاب کے ساتھ ایک برج میں ہونے کے سبب اس کی شعاعوں میں چھپ جانا) میں ہونے سے جو اندھیرا لالہ کے سینے میں داغ کی صورت میں نظر آتا تھا وہ احتراق کچھ اس طور ختم ہوگیا کہ لالہ کے سینے میں اب داغ نہیں رہا۔ یعنی اب لالہ بغیر سیاہ داغ کے نشو و نما پانے لگا۔

کیا عجب شعر ہے

شفق سوپوری

تشریح

یہ ذوق کا ایک خوبصورت شعر ہے اور اس میں ذوقؔ نے ایک اہم نکتے والی بات بتائی ہے۔ اگرچہ اس شعر کا اہم لفظ تکلف ہے مگر تکلیف کی رعایت سے آرام بہت تکلیف پیدا کرتے ہیں۔

ذوق اس شعر میں تکلف یعنی بناوٹ کی بدعت پر روشنی ڈالتے ہی۔ بناوٹ وہ چیز ہووتی ہے جس میں حقیقت نہ ہو یعنی جو بناوٹی ہو۔ بناوٹ زندگی کے تمام معاملات میں بھی ہوتی ہے اور رشتوں میں بھی۔ عام معاملات میں بناوٹ سے مراد یہ ہے کہ آدمی اپنی وہ حیثیت دکھانے کی کوشش کرے جو اصلی نہ ہو اور رشتوں میں بناوٹ سے مراد ایسے جذبات کا اظہار کرنا جو حقیقی نہ ہوں۔ بہرحال معاملہ جو بھی ہے اگر انسان عام معاملات میں بناوٹ سے کام لے تو خود کوو نقصان پہنچاتا ہے اور اگر رشتوں میں بناوٹ سے کام لے تو ایک نہ ایک دن تو بناوٹ کھل ہی جاتی ہے پھر رشتے ٹوٹ جاتے ہیں۔

ذوق کہتے کہ دراصل بناوٹ اور تضع ایک بھرپور تکلیف ہے اور جو آدمی بناوٹ سے کام نہیں لیتا اگرچہ وقتی طور پر اسے تکلیف محسوس ہوتی ہے مگر بالآخر آرام میں ہوتا ہے۔ لہٰذا انسان کو بناوٹ سے پرہیز کرنا چاہئے۔

شفق سوپوری