dard aisā hai ki jī chāhe hai zinda rahiye

zindagī aisī ki mar jaane ko jī chāhe hai

dard aisa hai ki ji chahe hai zinda rahiye

zindagi aisi ki mar jaane ko ji chahe hai

zālim thā vo aur zulm kī aadat bhī bahut thī

majbūr the ham us se mohabbat bhī bahut thī

zalim tha wo aur zulm ki aadat bhi bahut thi

majbur the hum us se mohabbat bhi bahut thi

na jaane ruuTh ke baiThā hai dil kā chain kahāñ

mile to us ko hamārā koī salām kahe

na jaane ruTh ke baiTha hai dil ka chain kahan

mile to us ko hamara koi salam kahe

dāman pe koī chhīñT na ḳhanjar pe koī daaġh

tum qatl karo ho ki karāmāt karo ho

daman pe koi chhinT na KHanjar pe koi dagh

tum qatl karo ho ki karamat karo ho

rakhnā hai kahīñ paañv to rakkho ho kahīñ paañv

chalnā zarā aayā hai to itrā.e chalo ho

rakhna hai kahin panw to rakkho ho kahin panw

chalna zara aaya hai to itrae chalo ho

bahāroñ kī nazar meñ phuul aur kāñTe barābar haiñ

mohabbat kyā kareñge dost dushman dekhne vaale

bahaaron ki nazar mein phul aur kanTe barabar hain

mohabbat kya karenge dost dushman dekhne wale

kare hai adāvat bhī vo is adā se

lage hai ki jaise mohabbat kare hai

kare hai adawat bhi wo is ada se

lage hai ki jaise mohabbat kare hai

tumheñ yaad hī na aa.uuñ ye hai aur baat varna

maiñ nahīñ huuñ duur itnā ki salām tak na pahuñche

tumhein yaad hi na aaun ye hai aur baat warna

main nahin hun dur itna ki salam tak na pahunche

ye aañsū be-sabab jaarī nahīñ hai

mujhe rone kī bīmārī nahīñ hai

ye aansu be-sabab jari nahin hai

mujhe rone ki bimari nahin hai

guzar jā.eñge jab din guzre aalam yaad ā.eñge

hameñ tum yaad aaoge tumheñ ham yaad ā.eñge

guzar jaenge jab din guzre aalam yaad aaenge

hamein tum yaad aaoge tumhein hum yaad aaenge

ġham hai to koī lutf nahīñ bistar-e-gul par

jī ḳhush hai to kāñToñ pe bhī ārām bahut hai

gham hai to koi lutf nahin bistar-e-gul par

ji KHush hai to kanTon pe bhi aaram bahut hai

kyā sitam hai ki vo zālim bhī hai mahbūb bhī hai

yaad karte na bane aur bhulā.e na bane

kya sitam hai ki wo zalim bhi hai mahbub bhi hai

yaad karte na bane aur bhulae na bane

baat chāhe be-salīqa ho 'kalīm'

baat kahne kā salīqa chāhiye

baat chahe be-saliqa ho 'kalim'

baat kahne ka saliqa chahiye

sunegā kaun merī chāk-dāmānī kā afsāna

yahāñ sab apne apne pairahan kī baat karte haiñ

sunega kaun meri chaak-damani ka afsana

yahan sab apne apne pairahan ki baat karte hain

talḳhiyāñ is meñ bahut kuchh haiñ mazā kuchh bhī nahīñ

zindagī dard-e-mohabbat ke sivā kuchh bhī nahīñ

talKHiyan is mein bahut kuchh hain maza kuchh bhi nahin

zindagi dard-e-mohabbat ke siwa kuchh bhi nahin

vo kahte haiñ har choT par muskurāo

vafā yaad rakkho sitam bhuul jaao

wo kahte hain har choT par muskurao

wafa yaad rakkho sitam bhul jao

ishq meñ maut kā naam hai zindagī

jis ko jiinā ho marnā gavārā kare

ishq mein maut ka nam hai zindagi

jis ko jina ho marna gawara kare

ye tarz-e-ḳhās hai koī kahāñ se lā.egā

jo ham kaheñge kisī se kahā na jā.egā

ye tarz-e-KHas hai koi kahan se laega

jo hum kahenge kisi se kaha na jaega

mausam-e-gul hameñ jab yaad aayā

jitnā ġham bhūle the sab yaad aayā

mausam-e-gul hamein jab yaad aaya

jitna gham bhule the sab yaad aaya

uThte huoñ ko sab ne sahārā diyā 'kalīm'

girte hue ġharīb sambhāle kahāñ ga.e

uThte huon ko sab ne sahaara diya 'kalim'

girte hue gharib sambhaale kahan gae

zarā dekh aa.ina merī vafā kā

ki tū kaisā thā ab kaisā lage hai

zara dekh aaina meri wafa ka

ki tu kaisa tha ab kaisa lage hai

bhalā aadmī thā pa nādān niklā

sunā hai kisī se mohabbat kare hai

bhala aadmi tha pa nadan nikla

suna hai kisi se mohabbat kare hai

din ek sitam ek sitam raat karo ho

vo dost ho dushman ko bhī tum maat karo ho

din ek sitam ek sitam raat karo ho

wo dost ho dushman ko bhi tum mat karo ho

kal kahte rahe haiñ vahī kal kahte raheñge

har daur meñ ham un pe ġhazal kahte raheñge

kal kahte rahe hain wahi kal kahte rahenge

har daur mein hum un pe ghazal kahte rahenge

unhīñ ke giit zamāne meñ gaa.e jā.eñge

jo choT khā.eñge aur muskurā.e jā.eñge

unhin ke git zamane mein gae jaenge

jo choT khaenge aur muskurae jaenge

ik ghar bhī salāmat nahīñ ab shahr-e-vafā meñ

tū aag lagāne ko kidhar jaa.e hai pyāre

ek ghar bhi salamat nahin ab shahr-e-wafa mein

tu aag lagane ko kidhar jae hai pyare

apnā lahū bhar kar logoñ ko baañT ga.e paimāne log

duniyā bhar ko yaad raheñge ham jaise dīvāne log

apna lahu bhar kar logon ko banT gae paimane log

duniya bhar ko yaad rahenge hum jaise diwane log

ḳhamoshī meñ har baat ban jaa.e hai

jo bole hai dīvāna kahlā.e hai

KHamoshi mein har baat ban jae hai

jo bole hai diwana kahlae hai

vo baat zarā sī jise kahte haiñ ġham-e-dil

samjhāne meñ ik umr guzar jaa.e hai pyāre

wo baat zara si jise kahte hain gham-e-dil

samjhane mein ek umr guzar jae hai pyare

marnā to bahut sahal sī ik baat lage hai

jiinā hī mohabbat meñ karāmāt lage hai

marna to bahut sahal si ek baat lage hai

jina hi mohabbat mein karamat lage hai

sunā hai hameñ bevafā tum kaho ho

zarā ham se āñkheñ milā lo to jāneñ

suna hai hamein bewafa tum kaho ho

zara hum se aankhen mila lo to jaanen

mirī shā.erī meñ na raqs-e-jām na mai kī rañg-fishāniyāñ

vahī dukh-bharoñ kī hikāyateñ vahī dil-jaloñ kī kahāniyāñ

meri shaeri mein na raqs-e-jam na mai ki rang-fishaniyan

wahi dukh-bharon ki hikayaten wahi dil-jalon ki kahaniyan

hamāre qatl se qātil ko tajraba ye huā

lahū lahū bhī hai mehñdī bhī hai sharāb bhī hai

hamare qatl se qatil ko tajraba ye hua

lahu lahu bhi hai mehndi bhi hai sharab bhi hai

kuchh roz se ham shahr meñ rusvā na hue haiñ

aa phir koī ilzām lagāne ke liye aa

kuchh roz se hum shahr mein ruswa na hue hain

aa phir koi ilzam lagane ke liye aa

mai-kade kī taraf chalā zāhid

sub.h kā bhūlā shaam ghar aayā

mai-kade ki taraf chala zahid

subh ka bhula sham ghar aaya

dil dard kī bhaTTī meñ ka.ī baar jale hai

tab ek ġhazal husn ke sāñche meñ Dhale hai

dil dard ki bhaTTi mein kai bar jale hai

tab ek ghazal husn ke sanche mein Dhale hai

ab insānoñ kī bastī kā ye aalam hai ki mat pūchho

lage hai aag ik ghar meñ to ham-sāya havā de hai

ab insanon ki basti ka ye aalam hai ki mat puchho

lage hai aag ek ghar mein to ham-saya hawa de hai

dil thaam ke karvaT pe liye jā.ūñ huuñ karvaT

vo aag lagī hai ki bujhā.e na bane hai

dil tham ke karwaT pe liye jaun hun karwaT

wo aag lagi hai ki bujhae na bane hai

mirā haal pūchh ke ham-nashīñ mire soz-e-dil ko havā na de

bas yahī duā maiñ karūñ huuñ ab ki ye ġham kisī ko ḳhudā na de

mera haal puchh ke ham-nashin mere soz-e-dil ko hawa na de

bas yahi dua main karun hun ab ki ye gham kisi ko KHuda na de

vo sitam na Dhaa.e to kyā kare use kyā ḳhabar ki vafā hai kyaa?

tū usī ko pyaar kare hai kyuuñ ye 'kalīm' tujh ko huā hai kyaa?

wo sitam na Dhae to kya kare use kya KHabar ki wafa hai kya?

tu usi ko pyar kare hai kyun ye 'kalim' tujh ko hua hai kya?

āzmānā hai to aa baazū o dil kī quvvat

tū bhī shamshīr uThā ham bhī ġhazal kahte haiñ

aazmana hai to aa bazu o dil ki quwwat

tu bhi shamshir uTha hum bhi ghazal kahte hain

maiñ mohabbat na chhupā.ūñ tū adāvat na chhupā

na yahī raaz meñ ab hai na vahī raaz meñ hai

main mohabbat na chhupaun tu adawat na chhupa

na yahi raaz mein ab hai na wahi raaz mein hai

fan meñ na mo.ajaza na karāmāt chāhiye

dil ko lage bas aisī koī baat chāhiye

fan mein na moajaza na karamat chahiye

dil ko lage bas aisi koi baat chahiye

duniyā meñ ġharīboñ ko do kaam hī aate haiñ

khāne ke liye jiinā jiine ke liye khānā

duniya mein gharibon ko do kaam hi aate hain

khane ke liye jina jine ke liye khana

mai meñ koī ḳhāmī hai na sāġhar meñ koī khoT

piinā nahīñ aa.e hai to chhalkā.e chalo ho

mai mein koi KHami hai na saghar mein koi khoT

pina nahin aae hai to chhalkae chalo ho

haañ kuchh bhī to derīna mohabbat kā bharam rakh

dil se na aa duniyā ko dikhāne ke liye aa

han kuchh bhi to derina mohabbat ka bharam rakh

dil se na aa duniya ko dikhane ke liye aa

merī ġhazal ko merī jaañ faqat ġhazal na samajh

ik aa.ina hai jo har dam tire muqābil hai

meri ghazal ko meri jaan faqat ghazal na samajh

ek aaina hai jo har dam tere muqabil hai

tujhe sañg-dil ye pata hai kyā ki dukhe diloñ kī sadā hai kyaa?

kabhī choT tū ne bhī khaa.ī hai kabhī terā dil bhī dukhā hai kyaa?

tujhe sang-dil ye pata hai kya ki dukhe dilon ki sada hai kya?

kabhi choT tu ne bhi khai hai kabhi tera dil bhi dukha hai kya?

bahut dushvār samjhānā hai ġham kā

samajh lene meñ dushvārī nahīñ hai

bahut dushwar samjhana hai gham ka

samajh lene mein dushwari nahin hai

kabhī aisā bhī hove hai rote rote

jigar thaam kar muskurānā paḌe hai

kabhi aisa bhi howe hai rote rote

jigar tham kar muskurana paDe hai